À dyi à ɖíí jàà-po-nyɔ̀ ɓè hwìɛ̀ nììn, à hwòɖòɔ̀ nì kà Kã́á Dèɓé hwòɖò nyu ma nìɛ̀ kɛ. Ɔ ɖá: “Wóɖó-wóɖó ɓè dyi dà dyúáɖò cĩ́ ɖé gbo-kpɔ̃ìn-kpɔ̃ìn mú nì, ɔ mɔ̀ ɖɛ kpa ɖɛ mìɔ cá!” (Wɛ́ɖɛ́ 133:1) À gbo-kpɔ̃ìn-kpɔ̃ìnɔ̀ se kpá pu ɓó ɔ mìɔ sɔ̃ kɔ̃. À ɖò-ɖò séín nyu kũ̀à ɓɛ́ ɔ ké nì tee.

1. Ðɛ́ mɔ̀ dĩ́ín-dĩ̀ìn-ɖɛ̀ ɓɛ́ ɔ nì Geɖepɔɔ nyɔ ɓèɔ̀ hwìɛ̀ kɛ́?

Ɔ jù ké m̀ dyi dyí-poìn-poìn ɖò mú mu ɖé ɓóɖó-dù kà kò ɖò kɔ̃ ní, m̀ se wuɖu wa po ɖéɛɛ múin wɔ̃́ɔ mu dyɛ̀. Kɛɛ, ɖé hwìè pàɖà ɓé múɛɛ, nì hwòɖò mu dyi dèìn. Xwíníínɔ̀ nyɛ́ kɔ̃̀ jèɛ́? Sepoɛɖe à nyùìn céè-ɖɛ̀ dyúáɖòɔ̀ kũ̀à mú ɓɛ́ à ké Baɓoɔ cɛ̃́ ɖé ɓóɖó-kpàà dà séín. Ké à vɔ̃ ɓɛ́ à ké à mùè ɖò ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn. Kɛbì à mɛ cĩ́ dà séín ɖòɛɛ, à séín ‘ɓiè Jɛhova ɖé hwòɖò dyúáɖò mú, ɓɛ́ à ké ɔ kũ̀à nyu.’—Zɛ́fènádyà 3:9.

2. Ðɛ́ m̀ ɓɛ́ìn nyuɛ ɓɛ́ gbo-kpɔ̃ìn-kpɔ̃ìn ké nì kɛ́?

“Ɓè mɛ ɖɛɓɛìn ɖɛ̀ɓɛ̀ìn mú hwòɖòɛ̀-ɖé-hwɛ̀-kà.” (1 Píɖɛ̀ 1:22) Xwɛ̀ m̀ ɓɛ́ìn náún-po-wùɖù nìà kɛ kíɖíí síɛ kɛ́? Ɓɔ́ nyɔ tɔ̀ɔ̀ ɓè nììn kpéí-hwɛ̀-hwɛ̀ ɓè dya gmɔ̀ɔ̀, kɛɛ m̀ mɛ mɔ́ kpeɖe nɔ̀mɔ̀ dyíin ɓè nì wa múɛɛ dyi. M̀ kè nyɔ ɓè ɓɛ́ ɓè ɖɛ̀ɓɛ̀ ɖɛ dyúáɖòɔ̀ múɛɛ ɖòùn mɛ ɓɔ́ mú nàìn. Vɔ̃ ɓɛ́ m̀ ké ɖíí-gàà kè ɖíí-màà tɔ̀ɔ̀ ɓè ɓɛ́ wa sɔ̀ nyɔ-dù kà kò ɖò ɓè hwìɛ̀ kɛɛ dyí dyuò. Ké ɖeɛɛ, à ɓɛ́ìn vɔ̃ɔ kóɖó-kóɖó ɓɛ́ à ké nyɛ́ín-nyɛ́ín séín ɖò à ɓéɖé ɖé à hwòɖòɔ̀ xwíníín nyɛɛ dyi táà.—Zà 1 Píɖɛ̀ 2:17 wuɖuún. a

3. Ðɛ́ nì mu nyuùn ɔ jù ké ɖɛ ɖò dyi m̀ kè nì ɖíí Kɛ́ɖɛ́ì ɖeín-sí-nyɔ̀ ɖò pṹa kpá níɛ́?

À kpɔ̃ìn gbo, kɛɛ à se mú hwɛ̀ ɖekè. Tiɔ̀ ɖíɛ́ ɓè ɓaɖaín, à po à mùè ɓè hwòɖò ɖé ɖei, mɔɔ à nyu wa puà-ɖɛ̀ ɓè bũ̀. Ɔ jèɛɛ, Geɖepɔɔ Wuɖuɔ̀ cɛ̃ɛ à gbo, ké ɔ ɖá: “Ɓè dyi ɖɛ ɖò ɓá nyɔ ɖò dyíɛɛ ɓéɖéín, ɔ jè mɛ hwɛ̀ ɓè hwìɖìi.” Ɔ cɛ̃ɛ ɖe, ké ɔ ɖá: “Kà [Jɛhova] ɖàà ɓè nììn ɖɛ gbà kɔ̃in zĩ̀ìn nyɛɛ, kàà ɓè mɛ zĩ̀ìn nyɔ ɖò nììn ɖɛ gbà kɔ̃in ɖekè.” (Zà Kɔ̀ɖɔ́sĩ̀à 3:13 wuɖuún.) À ɖà Jɛhova ɖɛ gbà bũ̀ nyu kpa vò-vò dyɛo, kɛɛ ɔ ɖà à kɔ̃in zĩ̀ìn. Ɔ jèɛɛ, ɔ mɔ́ ɓɛ́ à ké à ɖíí ɓèɔ̀ kɔ̃in zĩ̀ìn. Ɔ jù ké m̀ dyiɛ dyí dyuò kà m̀ ɖà nyɔ ɖò ɖɛ gbà bũ̀ nyuɛ ní, mu ɖé nyɔɔ̀ gbo ɓɛ́ ɓè kéɛ jè dyi zĩ̀ìn.—Zà Máfíò 5:23, 24 wuɖuún. b

 ÐE ÐƐ MÚIN CÁ

4. Zi nyɔ-mú-nyɛ́-kpèɖè wɔ̃

À mɔ́ ɓɛ́ à ké à ɖíí séín ɓèɔ̀ mú ɖɛ̀ɓɛ̀. Kɛɛ, ɔ ɓɛ́ìn mú kàmàà ɓɛ́ à ké nyɔ ɖò ɓɛ́ ɔ kò ɓó à gbo kɛɛ jè dyi kpɔ̃. Ðɛ́ ɓɛ́ìn à gbo kpáa kɛ́? Zà Àpɔ́sò 10:34, 35 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Jɛhova kpɔ̃ nyɔ kã̀ìn séín dyi, ɓɛ́ wa ké ɔ Zàse ɓè jù. Xwɛ̀ m̀ ɓɛ́ìn ɔ ɓo-bɛ̃̀ìn síɛ ɓó kà m̀ nyu nyɔ tɔ̀ɔ̀ ɓè ɓɛ́ wa kò ɓó m̀ gboɛɛ dya gmɔ̀ɔ̀ kɛ́?

• Nyɔ-mú-nyɛ́-kpèɖè ɓèɔ̀ nyɛ́ nyɔ pàɖà ɓéɖé ɖé dɛ̀ m̀ cĩ́à ɓɛ́ m̀ mɔ́ ɓɛ́ m̀ ké dyí ɓàɖàìn nyɛ́?

Zà 2 Kɔ̀ɖéíntĩ̀ɔ̀ 6:11-13 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Nì hwòɖò ɖá xwɛ̀ m̀ ɓɛ́ìn ɖíí-gàà kè ɖíí-màà ɓè ɓɛ́ wa sɔ̀ nyɔ-dù kà kò ɖò ɓè hwìɛ̀ kɛɛ bũ̀in xwɛ̃́ìn mìɔ kɛ́?

5. Nyɔ ɖò nììn ɖɛ gbà jè mɛ hwɛ̀ m̀ hwìɖìi, ké nyuɛ ɓɛ́ gìɖìì ké nì

Jɛhova se à kɔ̃in-zĩ̀ìn-zĩ̀ìn xwaún mɔ́, kɛɛ ɔ zĩ̀ìn à kɔ̃in. Zà Wɛ́ɖɛ́ 86:5 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ðɛ́ mɔ̀ dĩ́ín-dĩ̀ìn-ɖɛ̀ ɓá Jɛhovaa nyɔ-kɔ̃in-zĩ̀ìn-zĩ̀ìnɔ̀ jè dyíɛ́?

• Xwíníínɔ̀ nyɛ́ kɔ̃̀ jè m̀ poà ɔ zùo ɓó ɔ nyɔ-kɔ̃in-zĩ̀ìn-zĩ̀ìnɔ̀ jè kɛ́?

• Ðɛ́ mɔ̀ ɖɛ ɓè ɓɛ́ wa ɓɛ́ìn nyuɛ ɓɛ́ ɔ ké mú kàmà ɓɛ́ gìɖìì ké à kè nyɔ tɔ̀ɔ̀ ɓè pṹa nì kɛ́?

Xwɛ̀ à ɓɛ́ìn Jɛhova ɓo-bɛ̃̀ìn síɛ ɓɛ́ à kè à ɖíí-gàà kè ɖíí-màà ɓèɔ̀ ké gbo kpɔ̃ìn teeɛ́? Zà Nɔ́ɔ́ 19:11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ɔ jù ké nyɔ ɖò dyi m̀ dyoɖoún po ní, ɖɛ́ m̀ ɓɛ́ìn nyuɛ ɓɛ́ gìɖìì ké nì kɛ́?

 Tiɔ̀ ɖíɛ́ ɓè ɓaɖaín, à po nyɔ tɔ̀ɔ̀ ɓè dyoɖoún. Ɔ dyi ná kpáín, ɖɛ́ à mɛ nyu kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

• Ðé víɖòɔ̀ múɛɛ, ɖɛ́ ɖíí-mààɔ̀ nyu ma ɓɛ́ gìɖìì ké ma nì kɛ́?

 SṸÌN-XWÍNÍÍN

M̀ ɓɛ́ìn nyuɛ ɓɛ́ dyí-poìn-kpòòɔ̀ ké gbo kpɔ̃ìn dyììn ɖé nì ɖíí-gàà kè nì ɖíí-màà ɓèɔ̀ kɔ̃in-zĩ̀ìn-zĩ̀ìn kè wa mú-ɖɛ̀ɓɛ̀-ɖɛ̀ɓɛ̀ mú.

Ðɛ-kɔ̃in-kpa-kpa

• Xwɛ̀ m̀ ɓɛ́ìn nyɔ-mú-nyɛ́-kpèɖè wɔ̃ ziɛ kɛ́?

• Ðɛ́ nì mu nyuùn ɔ jù ké ɖɛ ɖò dyi m̀ kè nì ɖíí Kɛ́ɖɛ́ì ɖeín-sí-nyɔ̀ ɖò pṹa kpáín nyɛ́?

• Xwíníínɔ̀ nyɛ́ kɔ̃̀ jè m̀ mɔ́ ɓɛ́ m̀ kéà Jɛhovaa nyɔ-kɔ̃in-zĩ̀ìn-kpèɖèɔ̀ kíɖíí síɛ́?