M̀ ɖɛ̀ɓɛ̀ Jɛhova mú mìɔ, ké m̀ vɔ̃ kóɖó-kóɖó ɓɛ́ m̀ ké ɖɛ séín ɖò ɓɛ́ ɔ mu ɔ hwòɖò ɖé ɖei poùn wɛ̃ɛ nyu-nyu dyí ɓàɖàìn dyɛo, kɛɛ nì mu ɖɛ ɓè xwa bĩìn ti ɖíɛ́ ɓè ɓaɖa. Kɛɛ, nàmàùn ɖíɛ́ ɓè ku wɔ̃ cá, ké ɔ zi ɔ tɔ̀ɔ̀ ɓè dyí. (1 Kɔ̀ɖéíntĩ̀ɔ̀ 6:9, 10) Ɔ jù ké m̀ dyi nàmàùn ku wɔ̃ ɖò nyu ní, ɔ mɛ nì m̀ hwìɖìi kà Jɛhova ɖɛ̀ɓɛ̀ m̀ mú keɛ. Ɔ mɔ́ ɓɛ́ ɔ ké m̀ kɔ̃in zĩ̀ìn, kè ɓɛ́ ɔ ké m̀ gbo kpá.

1. Ðɛ́ à ɓéɖé ɓɛ́ à ké nyu ɓɛ́ Jɛhova ké à kɔ̃in zĩ̀ìn nyɛ́?

Nyɔ ɓè ɓɛ́ wa ɖɛ̀ɓɛ̀ Jɛhova múɛɛ kpá wììn mìɔ ɔ jù ké wa dyiɛ dyí dyuò kà wa ɖà nàmàùn ku wɔ̃ ɖò nyuɛ ní. Kɛɛ, wa ɓéɖé hwòɖò-dyi-dè-dè dyììn ɖé ɖɛ Jɛhova cɛ̃à ɔ nyɔ ɓèɔ̀ gboɛɛ mú. Ɔ ɖá: “Kɛbi ɓèɛ̀ nàmàùn ɓèɔ̀ mɛ bo mìɔ kà táɓòtíì nìà kɛɛ, ní mu wa nyuùn ɓɛ́ wa ké séɖéé tá-tá nì.” (Àzédyà 1:18) Ɔ jù ké à dyi à nàmàùnɔ̀ dyi táà jàà cá ní, Jɛhova mu à kɔ̃in zĩ̀ìn gàná cá. Xwɛ̀ à nyu nàmàùn dyi táà kɛ́? Dyììn ɖé wììn-kpá-kpá múɛɛ, à poìn ɖɛ gbà nyu-nyu kɔ̃in, ké à ɓaà Jɛhova ɓɛ́ ɔ ké à kɔ̃in zĩ̀ìn. Nìí, à vɔ̃ kóɖó-kóɖó ɓɛ́ à ké hwìɖìi-poìn-poìn se dyí sɛ́ɖɛ́ìn mɔɔ kpeɖe ɓè ɓɛ́ wa nyu ké à nyuà nàmàùnɔ̀ kɛɛ gbo zĩàìn, ké à vɔ̃ ɓɛ́ à nyuu-ɖɛ̀ kè Jɛhova gma hwɛ̀ìn-hwɛ̀ìnɔ̀ ké gbo muìn.—Zà Àzédyà 55:6, 7 wuɖuún.

2. À dyi nàmàùn nyuín, xwɛ̀ Jɛhova nyu ɛ́ɖɔ̀ ɓèɔ̀ kũ̀à mú nyùɛ̀n ɓɛ́ wa ké à gbo kpá kɛ́?

Ɔ jù ké à dyi nàmàùn ku wɔ̃ ɖò nyu ní, Jɛhova ɖá à mɛ “ɖá [ɛ́ɖɔ̀ ɓèɔ̀].” (Zà Jĩ́ìn 5:14, 15 wuɖuún.) Ɛ́ɖɔ̀ ɓè nìà kɛ ɖɛ̀ɓɛ̀ Jɛhova kè ɔ ɓáɖáá ɓèɔ̀ mú. Wa ɓɛ́ìn kpé ɓɛ́ wa ké à gbo kpá ɓɛ́ à ké gbo-kpɔ̃ìn-kpɔ̃ìn nìà à kè Jɛhova pṹa kɛɛ dyíin nɔ̀mɔ̀ìn.—Gàɖézìà 6:1.

Xwɛ̀ ɛ́ɖɔ̀ ɓèɔ̀ nyu à gbo kpáa ɔ jù ké à dyi nàmàùn ku wɔ̃ ɖò nyuín nyɛ́? Ɛ́ɖɔ̀ sɔ̃́ mɔɔ ɛ́ɖɔ̀ tã ɓè mu Baɓoɔ kũ̀à mú nyùìn ɓɛ́ wa kéɛ à dyí tɛ̀mɛ̀ìn kà ɖɛ à nyuà kɛɛ mɔ̀ ɖɛ gbà kɛ. Ké ɖeɛɛ, wa mu à náún poùn ɓá ɖɛ à ké nyuɛ jè dyí, ké wa mu à kpéí poùn ɓɛ́ à ké se nàmàùnɔ̀ nyu ɖe. Wa ɓɛ́ìn à ɓɔ́í poɛ ɓɛ́ à ké se ɖɛ ɖíɛ́ ɓè nyu ɖé dyí-poìn-kpòòɔ̀ mú ɓó ti wè xwíníín, ɓɛ́ gbo-kpɔ̃ìn-kpɔ̃ìn nìà à kè Jɛhova pṹa kɛɛ ké dyi ku ɖe hwɛ̀. Ɔ jù ké nyɔ ɖò dyi nàmàùn ku wɔ̃ ɖò nyu, ké ɔ seɛ dyi táà mɔ́ ní, ɛ́ɖɔ̀ ɓèɔ̀ mu ɔ píé poùn ɓɛ́ wa ké dyí-poìn-kpòòɔ̀ dyí gmɔ̀.

 ÐE ÐƐ MÚIN CÁ

3. Nàmàùn mú-wɔ̃́ìn-wɔ̃́ìn kpá à gbo ɓɛ́ à ké dyi káná ɖé zùùn

Nàmàùn séín ɖò à nyuɛɛ ɓá Jɛhova dyí. Ɔ jèɛɛ, ɔ kpa ɖɛ ɓɛ́ à kéɛ jè mú wɔ̃́ìn ɖé ɔ gbo. Zà Wɛ́ɖɛ́ 32:1-5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè ɔ nɔ̀mɔ̀à dyíin ɓɛ́ à kéà à nàmàùn ɓèɔ̀ mú wɔ̃́ìn ɖé Jɛhova gbo ké ɔ zi ɓɛ́ à ké wa vìè kɛɛ dyíɛ́?

 4. Kà nyɔ-píé-po-po nyu gbo-kpá-kpá tòɛ̀ kɛ

Ɔ jù ké nyɔ ɖàà nàmàùn nyuɛɛ se mɔ́ ɓɛ́ ɔ ké Jɛhovaa gma ɓèɔ̀ dyi kpɔ̃ ní, ɔ se ɖé dyí-poìn-kpòòɔ̀ mú sèɛ̀ ɓɛ́ìn fɔɔ. Ɔ ɖà píé kpá, ké à kè ɔ kè se mú naìn mu, mɔɔ à se ɔ gbo wùɖùɛ̀ mu dyɛ mɔ̀ùn. Zà 1 Kɔ̀ɖéíntĩ̀ɔ̀ 5:6, 11 kè 2 Jɔ̃́ɔ́ 9-11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Kà bɛ̀ɖɛ̀ɛ̀-dyáìn-ɖɛ̀ nyuà bɛ̀ɖɛ̀ɛ̀-kpò gàná ɖò dyáìn nyɛɛ, xwɛ̀ nàmàùn-nyu-nyɔ̀ ɖò ɓɛ́ ɔ se ɔ nàmàùnɔ̀ dyi táà mɔ́ kɛɛ dyí-nɛ́-nɛ́ ɓɛ́ìn dyí-poìn-kpòòɔ̀ dyíin nyìnìɛ̀n nyɛ́?

 SṸÌN-XWÍNÍÍN

Ɔ jù ké à dyi nàmàùn ku wɔ̃ ɖò nyu, ké à dyi wììn kpá jàà, ké à dyiɛ kɔ̃ jìnììn ɓɛ́ à ké ɖɛ mɔ̀ ɖɛ gbà kɛɛ nyu-nyu dyi táà ní, nìí Jɛhova mu à kɔ̃in zĩ̀ìn.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè ɔ nɔ̀mɔ̀à dyíin ɓɛ́ à kéà à nàmàùn ɓèɔ̀ mú wɔ̃́ìn ɖé Jɛhova gbo kɛ́?

• Ðɛ́ à kɔ̃̀ à ké nyu ɓɛ́ Jɛhova ké à nàmàùn ɓèɔ̀ kɔ̃in zĩ̀ìn nyɛ́?

• Ɔ jù ké à dyi nàmàùn ku wɔ̃ ɖò nyuín, xwíníínɔ̀ nyɛ́ kɔ̃̀ jè à mɛ zɔ̀àìn ɛ́ɖɔ̀ ɓèɔ̀ gbo-kpá-kpá kɛ́?