Kà M̀ Ké Baɓo Cɛ̃́ɛ́-Ðɛ̀ Ɓèɛ̀ Kpáná Kɔ̃ún Dyéɛ Nyuɛ
Kĩ́ín nyɛɛ, dyé ɖɛ-da-zà-zà nìà kɛ, nìí, po VÍÐÒƆ̀ kũ̀à gbo.
WÁKÁ KĨ́ÍN-KĨ́ÍN
Ɓɛ́ m̀ ké cɛ̃́ɛ́-ɖɛ̀ ɓèɔ̀ ɖò-ɖò ti dyéìn ní, zà wáká kĩ́ín-kĩ́ínɔ̀ wuɖuún. Dyi-diè-ɖɛ̀ ɓè nìà wuɖu-kpà ɓèɔ̀ kɔ̃in nyɛ (A) kè vɔ̀sì ɓè (B) nɛ́ìn fɔ̀nɔ̀-hwòɖò jɛ́ɛ́ ɓèɔ̀ jìì kɔ̃ɛ. Dèɛ̀ dyéɖé gbo kà wa céè “zà . . . wuɖuún” ɓó vɔ̀sì ɖíɛ́ ɓè gboɛ.
WÁKÁ SƆ̃́ NÌÌN
Wuɖu kĩ́ín ɓè (C) nìà Ðe Ðɛ Múin Cá xwíɖíiɛɛ zaìn ɖɛ ɓè kɔ ɓó dyíɛɛ jè kɔ̃in. Zà-wuɖu-da ɓèɔ̀ (D) zà fɔ̀nɔ̀-hwòɖò jɛ́ɛ́ ɓèɔ̀ da. M̀ kè nì ɖɛ-tɛ̀mɛ̀ìn-nyɔ̀ɔ̀ mɛ zà vɔ̀sì ɓèɔ̀ wuɖuún, ɓɛ́ ɓè ké dyi-diè-ɖɛ̀ ɓèɔ̀ gɔ̃̀ jù, kè ɓɛ́ ɓè ké víɖò ɓèɔ̀ dyi dyé.
VÍÐÒ gbɔ̀ɖɔ̀ɔ̀ ɓèɔ̀ zà dyi-dyé-ɖɛ̀ ɓè ɓɛ́ wa mɔ̀ céè-ɖɛ̀ɔ̀ wáká tɔ̀ɔ̀ ɓèɛɛ da. Víɖò ɖíɛ́ ɓè cɛ̃ ɖɛ jɛ́ɛ́ ɓè kpá kɛɛ jè. Wa tɔ̀ɔ̀ ɓè mɔ̀ dyí-tɛ̀mɛ̀ìn-ɖɛ̀ ɓè ɓɛ́ wa se ɖɛ jɛ́ɛ́ ɓè kpá kɛ mɔɔ nyɔ jɛ́ɛ́ ɓè jè cɛ̃ kɛ, kɛɛ wa tɛ̀mɛ̀ìn ɖɛ ɓè mɔ̀ kpáá-ɖɛ̀ ɓèɛ.
Gmɔ̀ dyi-dyé-ɖɛ̀ ɓèɔ̀ kè wa mɛ-dèìn-wùɖù ɓèɔ̀ dya kóɖó-kóɖó (E), ké poìn kà m̀ ké Nyɔ Ðíɛ́ Ɓè Ðá gɔ̃̀ jùɛ nyuɛɛ jè hwìɖìi (F)
WÁKÁ HWƐ̀ÌN-GBƆƆ̀
Sṹìn-xwíníín kè Ðɛ-kɔ̃in-kpa-kpa (G) kpɔ̃ cɛ̃́ɛ́-ɖɛ̀ɔ̀ kɔ̃in. Céè wé kɔ̃̀ ɓaɖa ɓɛ́ cɛ̃́ɛ́-ɖɛ̀ɔ̀ hwɛ̀ gbɔɛ. Dyí-sɔ́-ɖɛ̀ (H) ɓéɖé ɖɛ ɓè ɓɛ́ m̀ ké kũ̀à kɔ̃ nyuɛ. Cɛ̃́ Ðɛ Pàɖà (I) ɓéɖé ɖɛ tɔ̀ɔ̀ ɓè ɓɛ́ m̀ ɓɛ́ìn wuɖuún zàà mɔɔ dyi dyéɛ kɛ.
Dɛ̀ Cɛ̃́ɛ́-Ðɛ̀ Ɓèɔ̀ Ɓɛ̀ɖɛ̀ìn Dyíɛ
|
Ge-mú 2 
|
Ge-mú 3 
|
Ge-mú 4 
|
Mánáín-hwɛ̀ìn-wùɖù ɓè |
Kà m̀ ké Baɓo vɔ̀sì ɓè dyéɛ nyuɛ
Baɓoɔ mɔ̀ céè-ɖɛ̀ kpò mɛ́nɛ́ɛ́ poìn dyí 66 ɓè. Ɔ ge mú dú sɔ̃́: Híìbúɖúù kè Áwàɖàùn-cèè-ɖɛ̀ ɓè (mɔ̀à “Dèè-Wùɖù Sùà” kɛ) ɔ kè Gíɖíì-cèè-ɖɛ̀ ɓè (mɔ̀à “Dèè-Wùɖù Ðìè” kɛ).
Wa dyi vɔ̀sì ɖò céè nɔ céè-ɖɛ̀ nìà kɛ mú ní, ɔ ɓéɖé Baɓo-cèè-ɖɛ̀ɔ̀ nyɛ́nɛ́ (A), kè wuɖu-kpàɔ̀ (B), ɔ kè vɔ̀sìɔ̀ mɔɔ vɔ̀sì ɓèɔ̀ (C).
Ɔ hwɔìn kà, Jɔ̃́ɔ́ 17:3 mɔ̀ Jɔ̃́ɔ́-cèè-ɖɛ̀ɔ̀ kè ɔ wuɖu-kpà 17 kè vɔ̀sì 3.
