CƐ̃́Ɛ́-ÐƐ̀ 14
Nyuɛ Ɓɛ́ Fɔ̀nɔ̀-Hwòɖò Jɛ́ɛ́ Ɓèɔ̀ Ké Wáɖáá Nì
Híìbúɖúù 8:1
SṸÌN-XWÍNÍÍN: Kpá nyɔ ɓè m̀ wùɖùà gboɛɛ gbo, ɓɛ́ wa ké wuɖu wáɖá-wáɖáɔ̀ kíɖíí sí, ké tɛ̀mɛ̀ìn wáɖáá kà fɔ̀nɔ̀-hwòɖò jɛ́ɛ́ ɖò-ɖò ɓèɔ̀ nyu nì hwòɖò-kpàìn-ɖɛ̀ɔ̀ kè hìɖì-kpàɔ̀ dyí ɓáa kɛ.
Ɔ NYU-KÀ:
-
Ɓéɖé hwòɖò-kpàìn-ɖɛ̀. Poɛ̀n hwìɖìi kɛbì wa poìn wáɖáá-wùɖùɔ̀ xwaún ɓɛ́ ɔ ké nyɔ ɓèɔ̀ bɔ̃̀ùn po, mɔɔ ɔ ké wa hwòɖò-dyùà gbo zĩàìn, mɔɔ ɔ ké wa kpéí po ní, nìí, ɓɛ́ m̀ kéɛ náa wáɖá. Nyuɛ ɓɛ́ fɔ̀nɔ̀-hwòɖò jɛ́ɛ́ ɓèɔ̀ séín ké m̀ gbo kpá, ɓɛ́ m̀ ké nì hwòɖò-kpàìn-ɖɛ̀ɔ̀ nyu.
-
Nɛ́ìn wáɖáá-wùɖùɔ̀ hìɖì-kpàɔ̀ jìì kɔ̃. Cɛ̃ hìɖì-kpàɔ̀ jè ɖé nì wuɖu wáɖá-wáɖá gànáɔ̀ mú dyììn ɖé wuɖu ɓè nì hìɖì-kpàɔ̀ múɛ, mɔɔ wuɖu ɓè xwɛ̃́ìn wuɖu ɓèa bũ̀in nyɛɛ kɔ̃in-kpa-kpa mú.
-
Nyuɛ ɓɛ́ fɔ̀nɔ̀-hwòɖò jɛ́ɛ́ ɓèɔ̀ ké wáɖáá nì, kè ɓɛ́ wa ké se múin wɔ̃́uń kàmà. Gã fɔ̀nɔ̀-hwòɖò jɛ́ɛ́ ɓè ɓɛ́ wa ɓá hìɖì-kpàɔ̀ dyí, ɓɛ́ m̀ ɓɛ́ìn tɛ̀mɛ̀ìn nɔ̀mɔ̀ dyíin ɖé ti jĩ̀-kà m̀ ɓéɖéà kɛɛ xwíníín nyɛ. Cɛ̃ kà fɔ̀nɔ̀-hwòɖò jɛ́ɛ́ ɓèɔ̀ nyu jĩ̀ɛ kɛɛ kɔ̃, ké ɖá fɔ̀nɔ̀-hwòɖò jɛ́ɛ́ ɖò-ɖò wáɖáá, ké gbà mú ɓó wa pṹa, ké ɖò gbo-sɔ̀-sɔ̀ kè ɖò gbo-mu-mu mɛ kpáìn xwaún.
