CƐ̃́Ɛ́-ÐƐ̀ 17
Wuɖu Nyɔ Tɔ̀ɔ̀ Ɓè Mu Múin Wɔ̃́ùn Wɛ̃
1 Kɔ̀ɖéíntĩ̀ɔ̀ 14:9
SṸÌN-XWÍNÍÍN: Kpá nyɔ ɓè m̀ wùɖùà gboɛɛ gbo, ɓɛ́ wa ké ɖɛ m̀ nìà cɛ̃iń nyɛɛ fɔ̀nɔ̀-hwòɖò kpɔ̃.
Ɔ NYU-KÀ:
-
Cɛ̃́ nì wáɖáá-wùɖùɔ̀ nɔ̀mɔ̀ dyíin cá. Wɔ̃́ ɖɛ nì muà jè cɛ̃ìn nyɛɛ múin nɔ̀mɔ̀ dyíin cá, ɓɛ́ m̀ kéɛ kɔ̃in zaìn ɓɛ́ìn wáɖáá ɖé m̀ mìɔùn nììn wuɖu mú.
-
Nyùìn wuɖu xwã́-xwã́ kè wuɖu se múin wɔ̃́uń kàmà ɓè kũ̀à mú. Wuɖu tɔ̀mɔ̀ ɓoún ɓè nɔ̀mɔ̀ dyíin dyɛo, kɛɛ m̀ mɛ tɛ̀mɛ̀ìn fɔ̀nɔ̀-hwòɖò jɛ́ɛ́ ɓè dyììn ɖé wuɖu xwã́-xwã́ ɓè kũ̀à-mú-nyùìn-nyùìn mú.
-
Zaìn wuɖu ɓè ɓɛ́ nyɔ ɓè se dyí dyuòɛɛ jè kɔ̃in. Ɓɔ́ wuɖu ɓè ɓɛ́ nyɔ ɓè m̀ wùɖùà gboɛɛ se dyí dyuòɛɛ kũ̀à mú nyùɛ̀n mìɔ. Ɔ jù ké m̀ dyi ɓéɖé ɓɛ́ m̀ ké wuɖu ɖò, mɔɔ nyɔ ɖò nì Baɓoɔ múɛ, mɔɔ ɖɛ-ɖàɓàìn-ɖɛ̀ sùà ɖò mɔɔ nyaá-nyaá-ɖɛ̀ ɖò ɓɛ́ nyɔ ɓè se dyí dyuò kɛ jè cɛ̃ ní, m̀ mɛ zaìn jè kɔ̃in.
