Kpá nyɔ ɓè m̀ wùɖùà gboɛɛ gbo, ɓɛ́ wa ké wa mìɔùn múin gmɔìn. Diè dyi-diè-ɖɛ̀ ɓè nyu ké nyɔ poìn hwìɖìiɛɛ dyi, ɓɛ́ m̀ ké nyɔ ɓè gbo kpá, ɓɛ́ wa ké kà wa mìɔùn nììn hwòɖò nyu nìɛ̀ kɛɛ múin gmɔìn.

Po nyɔ ɓè kpéí ɓɛ́ wa ké hwòɖò-kpàìn-ɖɛ̀ nɔ̀mɔ̀ dyíin ɓéɖé. Po nyɔ ɓè m̀ wùɖùà gboɛɛ kpéí, ɓɛ́ wa ké xwíníín kɔ̃̀ jè wa nyuà kũ̀à nɔ̀mɔ̀ dyíin ɓèɛɛ jè múin gmɔìn. Kpá wa gbo ɓɛ́ wa ké hwòɖò-kpàìn-ɖɛ̀ zi dyíin nɔ̀mɔ̀ùn—ɓɛ́ ɔ mɔ̀à ɖɛ̀ɓɛ̀ìn-ɖɛ̀ɓɛ̀ìn ɓó Jɛhova kè nyɔùn ɔ kè Baɓo tɛ̀mɛ̀ìn-ɖɛ̀ ɓè bììɛɛ ɓéɖé. Zàìn nyɔ ɓèɔ̀ fɔ̀nɔ̀-hwòɖò da; ɓɔ́ wa gbo wùɖùɛ̀. Mɔ̀ùn ɖá ɓɛ́ m̀ ké wa dɛ̃ nyùìn, kɛɛ po wa kpéí ɖé nì wuɖu wáɖá-wáɖáɔ̀ mú ɓɛ́ wa ké ɖɛín-ɖɛ̀ nyuɛ mɔ́.

Nyuɛ ɓɛ́ nyɔ ɓè ké Jɛhova gbo gmɔ̀ìn. Taɓa kà Baɓo tɛ̀mɛ̀ìn-ɖɛ̀ ɓè kè Baɓo hwìè-da-zàìn-wùɖù ɓè ɔ kè Baɓo gma ɓè nyu Geɖepɔɔ kpeɖe ɓèɔ̀ kè ɔ ɖɛ̀ɓɛ̀ìn-ɖɛ̀ɓɛ̀ìn ɓó à bììɛ tɛ̀mɛ̀ìn nyɛɛ jìì. Nyuɛ ɓɛ́ nyɔ ɓè m̀ wùɖùà gboɛɛ ké kà Jɛhova hwòɖò nyu nìɛ̀ kɛɛ jè hwìɖìi poìn, kè ɓɛ́ wa ké ɔ hwòɖò dyi dèɛ̀ mɔ́.