Ɓaà ɓɛ́ m̀ ké ti dyé nɔ̀mɔ̀ dyíin. Ɓaà ɓɛ́ m̀ ké ɖɛ nì muà cɛ̃ìn nyɛɛ jè hwìɖìi poìn, ké ɔ se m̀ mìɔùn. Pɛ̃́ìn fɔ̀nɔ̀-hwòɖò jɛ́ɛ́ ɓè m̀ kɔ̃̀ m̀ kéà tɛ̀mɛ̀ìn nyɛɛ jè hwìɖìi. Cɛ̃ ɖɛ ɓè ɖé m̀ mìɔùn nììn wuɖu mú; ɓɔ́ wuɖu ɓè kɔ̃in kpaa pu kà wa nyuà wa céèɛ̀ kɛ.

Wùɖù sɔ̀ìn ɖé nì hwòɖòɔ̀ bũ̀. Poìn xwíníín kɔ̃̀ jè nyɔ ɓè m̀ wùɖùà gboɛɛ kɔ̃̀ wa kéà ɖɛ m̀ nìà jè cɛ̃iń nyɛ wɔ̃́ kɛɛ jè hwìɖìi. Poìn nyɔ ɓèɔ̀ jè hwìɖìi. Nìí, nì kpóɖó-dyùàɔ̀ nì-kà kè nì sɔ̃ɔ̀-dyi-toìn-kà ɔ kè nì dyúa-kpàɔ̀ mu hwòɖò wáɖáá kè ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn.

Gmɔ̀ nyɔ ɓè m̀ wùɖùà gboɛɛ dya. Gmɔ̀ nyɔ ɓè dyéɖéín ɔ jù ké ɔ náa nyu-nyu dyi dyí sɛ́ɖɛ́ìn ɖé gbɛ̀ɔ̀ mú ní. Ɔ jù ké m̀ dyi wuɖu wáɖáuń nììn, gmɔ̀ nyɔ ɓè dya ɖò-ɖò ɖé nyɔ ɓèɔ̀ hwìɛ̀, ké ɓɔ́ nyɔ kúɖúú ɓè dya gmɔ̀ɔ̀ mɔɔ wa dyéɖé dyai ɓaɖaa.