“Ɓè ɓéɖé ɓɛ́ ɓè kéɔ́ nyɔ-ɖɛ-tɛ̀mɛ̀ìn-nyɔ̀ ɓè jù.” (Híì 5:12) Nàìn hwìɖìi! Jɛhova—ɓɛ́ ɔ mɔ̀à Nyɔ-ɖɛ-tɛ̀mɛ̀ìn-nyɔ̀ vɛ̀nɛ̀ ɖé dyɔún kè ɓóɖó-kpàà kɔ̃ɛɛ—ɖá à, ɓɛ́ à ké nyɔ tɔ̀ɔ̀ ɓè ɖɛ tɛ̀mɛ̀ìn ɓá ɔ jè dyí! Kũ̀à séín ɖò ɓɛ́ ɔ ɓá jàà ɓáà Jɛhova jè dyíɛ tɛ̀mɛ̀ìn jè dyí—kɛbì ɔ mɛ mɔ̀ ɖé xwéɖé-dùɔ̀ mú, mɔɔ ɖé dyí-poìn-kpòòɔ̀ mú, mɔɔ ɖé wuɖu-wáɖá-kũ̀àɔ̀ múɛɛ—ɔ mɔ̀ mana kpa ɖɛ kè kũ̀à ku wɔ̃ ɖò cá. Xwɛ̀ à nyuu-ɖɛ̀ ɓɛ́ìn mú wóɖóɛ kɛ́?

Ɔ gɔ̃̀-jù-wùɖùɔ̀ nì ɖé wuɖu ɓè ɓɛ́ àpɔ́sò Pɔ́ɔ̀ céè ma ɖé Tímétè gboɛɛ mú. Ɔ ɖá: “M̀ mɛ dyé Geɖepɔɔ-cèè-ɖɛ̀ɔ̀ ɖé nyɔùn dyúa wuɖuún-zà-zà kè Geɖepɔɔ-wùɖùɔ̀ cɛ̃-cɛ̃ ɔ kè nyɔùn-ɖɛ-tɛ̀mɛ̀ìn-tɛ̀mɛ̀ìn jè gbo.” Ké Pɔ́ɔ̀ mu ma dyúa, ké ɔ ɖá: “Sepoɛɖe m̀ dyi ɖɛ ɓè nìà kɛ nyuín, nì mu m̀ mìɔùn póìn, ké nì mu nyɔ ɓè ɓɛ́ wa wɔ̃́ nì wuɖuɔ̀ kɛɛ póìn ɖekè.” (1 Tím 4:13, 16) M̀ ɓéɖé bɔ̃̀ ɓɛ́ ɔ ɓɛ́ìn nyɔùn fɛ̀ɛ̀ póɛ̀n nyɛ, ɓɛ́ m̀ kéɛ cɛ̃. Ɔ jèɛɛ, ɔ kpa ɖɛ mìɔ ɓɛ́ m̀ ké nì céè-ɖɛ̀ wuɖuún-zà-zà kè nì ɖɛ-tɛ̀mɛ̀ìn-tɛ̀mɛ̀ìnɔ̀ dyíin nɔ̀mɔ̀ìn. Wa poìn bòɖòsóò nìà kɛ xwaún, ɓɛ́ ɔ ké m̀ gbo kpá ɓɛ́ m̀ kéɛ náa nyu. Dyé ɖɛ ɓè nì ɖé ɔ múɛɛ ɖíɛ́ ɓè.

Jɛhova mɔ̀ nyɔ mɔ̀ “Ðɛ-tɛ̀mɛ̀ìn-nyɔ̀ɔ̀.” (Àzé 30:20) Bòɖòsóò nìà kɛ mu m̀ gbo kpáùn ɓɛ́ m̀ ké nì sɛ́ɖɛ́ ɓèɔ̀ kɔ̃ po kà m̀ mɔ̀à céè-ɖɛ̀ wuɖuún-zà-nyɔ̀ kè ɖɛ-tɛ̀mɛ̀ìn-nyɔ̀ kɛ dyɛo, kɛɛ ɔ mɛ ɓɔ́ m̀ hwìɖìi sɔ̀ɔ̀ kà ɓɛ́ bɔ̃̀ à kpaà kɛɛ sɔ̀ìn ɖé Jɛhova gbo, ké ɔ mɔ̀ nyɔ mɔ̀ nyɔ ɓè dyà-nyɔ̀ kɛ. (Jɔ̃́ɔ́ 6:44) Ɔ jèɛɛ, ɓaà kpɛ́-kpɛ́ ɓó zùù hwɛ̀in-hwɛ̀inɔ̀ jè. Nyùìn Geɖepɔɔ Wuɖuɔ̀ kũ̀à mú ti séín. Nyuɛ ɓɛ́ nyɔ ɓè ké Jɛhova dya gmɔ̀, ké ɔ mɛ ɓɔ́ m̀ mìɔùn jùɛ fɔ̀ɔ̀. Vɔ̃ ɓɛ́ m̀ kéɛ nyu, ɓɛ́ nyɔ ɓè m̀ wùɖùà gboɛɛ ké Jɛhova mú ɖɛ̀ɓɛ̀ mìɔ.

Wa ɖà m̀ ɖá, ɓɛ́ m̀ ké bɔ̃̀ zi ɖɛ kpauń mìɔ ɓɛ́ wa ɖà nyɔùn nyíɛɛ cɛ̃. À dèɛ̀ hwòɖò kɔ̃ kà ɓɛ́ kà nì muà “kpé ɓɛ́ Geɖepɔɔ nyí [nyɔɛ]” hwòɖò kɔ̃ dèìn nyɛɛ, nì nyuu-ɖɛ̀ mu mú wóɖóùn wɛ̃.—1 Píɖ 4:11.

À mɔ̀ nì mùe ɖɛ-tɛ̀mɛ̀ìn-nyɔ̀ ɓè,

Nyɔ-Dyúa-Nì-Nyɔ̀ Ɓè Ɓó Jɛhova Zàse Ɓè Bìì