Ti ɓɛ́ Jɛ̀hóvà dè ma xwéɖé-dù jè gbɔɔ, ɔ po ma wóɖóìn-nyɔ̀ ɓě ɖé waà dyú ɓěɔ̀ kɔ̃in. (Kɔ̀ɖɔ́sĩ̀à 3:20) Kà m̀ mɔ̀à wóɖóìn-nyɔ̀ kɛɛ, ɔ mɔ̀ nì kũ̀à ɓɛ́ m̀ ké nì dyúɔ̀ ɖɛ tɛ̀mɛ̀ìn ɓɛ́ ɔ ké Jɛ̀hóvà mú ɖɛ̀ɓɛ̀, kè ɓɛ́ ɔ ké nyɔ vɛ̀nɛ̀ ɓɛ́ìn kpéɛ jǔ. (2 Tímétè 1:5; 3:15) M̀ ɓéɖé ɓɛ́ m̀ ké ɖɛ nì nì dyú-gàà mɔɔ dyú-màà hwòɖǒ bũ̌ɛɛ cɛ̃́ ɖekè. Jɛ́ɛ́ kɛɛ, ɖɛ m̀ mìɔùn mu nyuùn wɛ̃ɛ kpa ɖɛ mìɔ. M̀ ɓɛ́ìn nì dyúɔ̀ Jɛ̀hóvà wuɖuɔ̀ tɛ̀mɛ̀ìn nɔ̀mɔ̀ dyíin ɔ jǔ ké ɔ wuɖuɔ̀ dyi m̀ mìɔùn nììn hwòɖǒɔ̀ bũ̌ nì kĩ́ín ní.—Wɛ́ɖɛ́ 40:8.

ÐƐ BÁƁÒƆ̀ CƐ̃ KƐ MƆ̀: “Nyɔǔn séín mɛ fṹà ɓó ɖùǔ tò jè, kɛɛ wa mɛ mɛɛ̀ ɓó wùɖù jè.” (Jĩ́ìn 1:19) M̀ mɔ́ ɓɛ́ nì dyú ɓěɔ̀ kéɛ dyí dyuò kà wa ɓɛ́ìn m̀ gbo wùɖùɛ̀ wáɖáá kɛ. Wa dyi m̀ gbo wùɖùɛ̀ mɔ́ín, wa mɛ dyuòɛ̀ dyí kà ɓɛ́ m̀ ɖà ti dyé ɓɛ́ m̀ ké wa ɖùǔ gbo tò kɛ. Gìɖìǐ mɛ nì m̀ kè nì dyú ɓěɔ̀ pṹa ɓɛ́ wa hwòɖǒ-kpɔ̃-ɖɛ̀ ɓě m̀ gbo cɛ̃-cɛ̃ ké se mú kàmà. (Jĩ́ìn 3:18) Wa dyi ɔ hwìɖǐi poìn kà ɓɛ́ m̀ mu wa kànàǎ-kà kpɔ̃ùn, ké m̀ mu wa bɛ̃̌ dyi mɔ́ìn ní, nìí, ɔ mu mú kàmàùn ɓɛ́ wa ké waà hwòɖǒ-kpɔ̃-ɖɛ̀ ɓě m̀ gbo cɛ̃. M̀ mɛ kùìn nì dyú ɓěɔ̀ kpeɖe hwòɖǒ, ké m̀ mɛ cɛ̃ɛ wa gbo kpɛ́-kpɛ́ kà ɓɛ́ m̀ ɖɛ̀ɓɛ̀ wa múɛ.—Máfíò 3:17; 1 Kɔ̀ɖéíntĩ̀ɔ̀ 8:1.

ÐƐ M̀ ƁƐ́ÌN NYUƐ KƐ MƆ̀:

• Nì dyú ɓěɔ̀ dyi m̀ gbo wùɖùɛ̀ mɔ́ín, nìí, m̀ mɛ zà m̀ mìɔùn xwáɖáún

• M̀ kè nì dyú ɓěɔ̀ mɛ dè dɔ́ɔ́ ti séín, ké ɔ mɛ ɓɔ́ fũ̀à-fṹá-tì jǔɛ hwɛ̀

ÐƐ BÁƁÒƆ̀ CƐ̃ KƐ MƆ̀: “Nyɔ ɓɛ́ ɔ kpɔ̃ ɓó ɖɛ-múin-wɔ̃́-wɔ̃́ gbo dyi kóɖó-kóɖóɛɛ, ɔ nyuu-ɖɛ̀ wóɖó mú.” (Nɔ́ɔ́ 19:8) Ti ɖíɛ́ ɓě ɓaɖaín m̀ ɓéɖé ɓɛ́ m̀ ké nì dyú ɓěɛ̀ wuɖu ɓěɔ̀ ɖeín gmɔ̀ ɓɛ́ m̀ ké wa hwòɖǒ-kpɔ̃-ɖɛ̀ jɛ́ɛ́ ɓě múin wɔ̃́. Ɔ mɔ̀ nyuu-ɖɛ̀ ɓɛ́ nyɔ gmɔ̀ ɓě ké ɖɛ dyí ɓúáìn, mɔɔ ɓɛ́ wuɖu ɓě ké wa wĩín wã. “Nyɔ ɓɛ́ ɔ seà ɖùǔ tò, ɓɛ́ ɔ kéà ɖɛ ɖò múin wɔ̃́, hwɛ̀ ɓɛ́ ɔ kéà gɔ̃̌ jǔɛɛ, nyɔɔ̀ nyu zuɖuu-ɖɛ̀.” (Nɔ́ɔ́ 18:13) Nì dyoɖo-hwòɖǒ mɛ ɓɔ́ fṹàà.—Nɔ́ɔ́ 19:11.

ÐƐ M̀ ƁƐ́ÌN NYUƐ KƐ MƆ̀:

• Poɛ gbɔ ɓɛ́ mɔ̀ ní kɔ̃̀ ɖà nì dyú ɓěɔ̀ wuɖu wĩín kpɔ̃, mɔɔ ɓɛ́ m̀ ké ɖɛ ɖò nyuɛń zi kɛbì wa mɛ cɛ̃ ɖɛ séín ɖòɛ̀

• Vɔ̃ ɓɛ́ m̀ ké kà ɖɛ kpɔ̃ ma m̀ hwòɖǒ, ɔ kè ɖɛ kpa ma ɖɛ ɖé m̀ gbo ti ɓɛ́ m̀ mɔ̀ mà dyú-gbɔ́ɔ́ kɛɛ jè hwìɖǐi dyà

ÐƐ BÁƁÒƆ̀ CƐ̃ KƐ MƆ̀: Ní dyú, kpɔ̃ m̀ ɓǎà ná-wùɖùɔ̀ dyi, ké mɔ̀ǔn ɖá ɓɛ́ m̀ ké ɖɛ ɓě ɓɛ́ m̀ ɖe ɖǎ m̀ tɛ̀mɛ̀ìn nyɛɛ dyi pɛ̃́ìn” (Nɔ́ɔ́ 1:8) Jɛ̀hóvà ɖǎ ɓǎ kè ɖe kpé nyí ɖé dyú ɓě kɔ̃in. Ɓě mɛ tɛ̀mɛ̀ìn ɓěɛ̀ dyú ɓě ɖɛ ɓɛ́ wa ké ɓě kpéín dyé, ɔ kè ɓɛ́ wa ké ɓě wuɖu nyu. (Ìfísĩ̀ɔ̀ 6:1-3) Dyú ɓě ɓɛ́ìn dyí dyuòɛ̀ ɔ jǔ ké waà wóɖóìn-nyɔ̀ ɓěɛ̀ ‘fɔ̀nɔ̀-hwòɖǒ se dyúáɖò nììn.’ (1 Kɔ̀ɖéíntĩ̀ɔ̀ 1:10) Ɔ jǔ ké ɓě se ɖɛ gbo wɔ̃́ìn ní, nìí, ɓě mɛ ɓɔ́ɔ ɓěɛ̀ dyú ɓěɔ̀ dyúa nyuɛ, sepóɛɖé ɔ ɓɛ́ìn nyuɛ ɓɛ́ wa ké se ɓě mɔ̀à waà wóɖóìn-nyɔ̀ ɓěɛɛ kpéín dyé.

ÐƐ M̀ ƁƐ́ÌN NYUƐ KƐ MƆ̀:

• Kà ɓě mu ɓěɛ̀ dyú ɓěɔ̀ kpeɖe zàùn wɛ̃ɛ, ɓě mɛ cɛ̃ɛ jè ké ɓě mɛ wɔ̃́ìn gbo

• Ɔ jǔ ké m̀ kè nì mǔèɔ̀ hwìɖǐi-poìn-kà dyi kò ɓó kà ɓě ké ɓěɛ̀ dyú ɓěɔ̀ ɖɛ tɛ̀mɛ̀ìn nyɛ jè ní, nìí, ɓě vɔ̃ ɓɛ́ ɓě ké kà ɓě mǔèɔ̀ nyu ɖɛ dyéɛ kɛɛ dyí dyuò

ÐƐ BÁƁÒƆ̀ CƐ̃ KƐ MƆ̀: “Zàìn dyú-gbɔ́ɔ́ hwìè sɛ́ɖɛ́ìn dyí ɔ ɓéɖé ɔ ké kpa kɛɛ da.” (Nɔ́ɔ́ 22:6) Nì dyú ɓěɔ̀ ɖɛ-cɛ̃́-cɛ̃́ súɖúú dyí kpá-kpá se dyi-cɛ̃́-ɖɛ̀. M̀ kɔ̃̀ ɓɛ́ m̀ ké wa ɖɛ-tɛ̀mɛ̀ìn-tɛ̀mɛ̀ìn ɓɛ́ ɔ mɔ̀à wa kpeɖe-zà-zà kɛɛ dyí sɔ́. (Wɛ́ɖɛ́ 127:4; Nɔ́ɔ́ 29:17) Dyú ɓě kpeɖe-zà-zà se ɓɛ́ m̀ ké wa sɔ̃̀ kɔ̃ pɛ̃́ìn pū, kɛɛ ɔ mɔ̀ ɓɛ́ m̀ ké wa gbo kpá ɓɛ́ wa ké fɔ̀nɔ̀-hwòɖǒ nìà gma ɓěɔ̀ ɖeín nyɛɛ múin wɔ̃́. (Nɔ́ɔ́ 28:7) Ké ɖeɛɛ, m̀ mɛ tɛ̀mɛ̀ìn wa ɓɛ́ wa ké Jɛ̀hóvà wuɖuɔ̀ mú ɖɛ̀ɓɛ̀, ɔ kè ɓɛ́ wa ké ɔ gma ɓěɔ̀ múin wɔ̃́. (Wɛ́ɖɛ́ 1:2) Ðɛ nìà kɛ mu wa gbo kpáùn ɓɛ́ wa ké hwòɖǒ-xwíníín-hwòɖò-dyùà sɛ́ɖɛ́ìn dyí ɓéɖé.—Híìbúɖúù 5:14.

ÐƐ M̀ ƁƐ́ÌN NYUƐ KƐ MƆ̀:

• M̀ mɛ nɛ́ɛ̀ kíɖíí ɓɛ́ nì dyú ɓěɔ̀ ké Gèɖèpɔ́ɔ̀ dyé kà nyɔ jɛ́ɛ́ ɓɛ́ wa ɓɛ́ìn hwòɖǒ kɔ̃ dèɛ̀ kɛɛ nìà kɛ

• Kpá nì dyú ɓěɔ̀ gbo ɓɛ́ wa ké kpeɖe gbà ɓě dyí dyuò, ɔ kè ɓɛ́ wa ké wa dyí vìě. Ɔ hwɔìn kà kpeɖe gbà ɓě nìà nɛɛ̀-kpà ɖúú kɔ̃ɔ. Tɛ̀mɛ̀ìn wa kà wa ké nyɔ ɓě nyuà dyú mɛ́nɛ́ɛ́ ɓě nyɔ́nɔ́ún wɛ̃ɛ dyí vìě kɛ