À ɖúú-kɔ̃-pàɔ̀ wáká jɛ́ɛ́ɔ̀ ɓéɖé céè-ɖɛ̀ ɓè kè víɖò ɓè ɓɛ́ wa po páún ɓɛ́ wa ké nyɔ ɓè ɓéɖé hwòɖò wáɖáá ɖé píéɛɛ hwòɖò dyi tóɛ ɓɛ́ìn nyɛ. (Àpɔ́ 13:48) Ðɛ ɔ cɛ̃ jè kpɛ́-kpɛ́ kɛɛ mɔ̀ ɖɛ ɓè ɓɛ́ wa nì bɔ̃̀ɔ̀ kɔ̃, mɔɔ ɖɛ ɓè ɓɛ́ nyɔ ɓè nì jè hwìɖìi poɛ̀n ké wa nì jè cɛ̃ɛń nyɛ.

Xwɛ̀ m̀ ɓɛ́ìn jw.org wáká jɛ́ɛ́ɔ̀ kũ̀à mú nyùɛ̀n ɖé nì wuɖu-wáɖá-kũ̀àɔ̀ múɛ́?

• Gmɔ̀ ɖé páɔ̀ kɔ̃ ti séín. Dè ɖɛ wa nì tɛ̀mɛ̀ìn kàùn wɛ̃ dyéɖé gbo, ɓɛ́ m̀ ké kà m̀ ɓɛ́ìn kũ̀à mú nyùɛ̀n ɓɛ́ m̀ ké hwòɖòɛ̀-wɔ̃́-nyɔ̀ ɖò gbo kpá kɛɛ jè hwìɖìi poìn. (Ɓɛ́ m̀ ké ɖɛ ɖò ɓɛ́ wa tɛ̀mɛ̀ìn wáká jɛ́ɛ́ɔ̀ kɔ̃ wíɔ̀ùn wɛ̃ɛ dyé ní, nɛ́ “Dyé Ðɛ Pàɖà” kɔ̃.) À páɔ̀ kɔ̃ gmɔ̀-gmɔ̀ kpɛ́-kpɛ́ mu m̀ gbo kpáùn, ɓɛ́ m̀ ké fɔ̀nɔ̀-hwòɖò ɖìè ɓè kũ̀à mú nyùìn ɖé wuɖu-wádá-kũ̀àɔ̀ mú.

• Nyùìn céè-ɖɛ̀ ɓè kè víɖò ɓè wa tɛ̀mɛ̀ìn wáká jɛ́ɛ́ɔ̀ kɔ̃ɛ kũ̀à mú, ɓɛ́ m̀ ké dɔ́ɔ́ ɖò gbɔ dè. Ðɛ nìà kɛ ɓɛ́ìn à fɔ̀nɔ̀-hwòɖò nyíɛ ɓá ɖɛ nyɔ ɓè nì ɖé à gbɛ̀ɔ̀ múɛɛ nì dyɛ̀ hwìɖìi poɛ̀n nyɛ jè dyí.

• Tɛ̀mɛ̀ìn nyɔ ɓè wáká jɛ́ɛ́ɔ̀ dyí. Cɛ̃ cɛ̃́ɛ́-ɖɛ̀ jɛ́ɛ́ ɓè jè, ɓɛ́ m̀ ké kà nyɔ ké ɖɛ ɓè dyéɛ nyu ɖé páɔ̀ kɔ̃ɛ nyɔɔ̀ dyí tɛ̀mɛ̀ìn.

• Ðoɓo dyi-síìn-naín ɖò. Ɔ hwɔ nyɔ ɖíɛ́ ɓè kpéí ɓɛ́ wa ké à gbo wùɖù ɖé kpóɖóún, kɛɛ wa hwòɖò wɔ̃́ ɓɛ́ wa ké ɖé à ɖúú-kɔ̃-pàɔ̀ kɔ̃ mu. Ɔ jèɛɛ, ɔ mɛ ɓɔ́ m̀ kpéí hwɔɔ ɓɛ́ m̀ ké dyi-síìn-naín ɖò ɓɛ́ ɔ sí wáká jɛ́ɛ́ɔ̀ mɔɔ céè-ɖɛ̀ jɛ́ɛ́ ɖò mɔɔ víɖò ɖò ɓɛ́ wa tɛ̀mɛ̀ìn ɖéɛ gbo dyiɛɛ hwòɖòɛ̀-wɔ̃́-nyɔ̀ ɓè gbo ɖoɓo.