• Wɛ́ 23:3—Ðɛ́ mɔ̀à ‘hwìè sɛ́ɖɛ́ìn dyíɔ̀’ kɛ́, ké ɖɛ́ mu à gbo kpáùn ɓɛ́ à ké se ɔ xwíníín sɔ̀ kɛ́? (w11-E 2/15 24 ¶1-3)

  Nì gɔ̃̀-jù-wùɖùɔ̀

• Ðɛ́ mɔ̀ zùùn kɔ́mɔ́-ɖɛ̀ ɓè sɔ̀ìn ɖé wíkì nìà kɛ Baɓo wuɖuún-zà-zàɔ̀ mú, ɓɛ́ nì mu mɔ́ùn ɓɛ́ m̀ ké jè cɛ̃ kɛ́?

  Nì gɔ̃̀-jù-wùɖùɔ̀

Ɓáɖáá ɓè dyuò waà dyí-gmɔ̀-nyɔ̀ɔ̀ wuɖu dyí, ké wa sí ɔ kíɖí. Kɛɛ, wa gbù ɖéè kɔ̃̀ wuɖu wa se dyí dyuòɛɛ dyúa. (Jɔ̃́ɔ́ 10:5) Kà dyúáɖòɔ̀ kàà, à tò à zùùn Ɓáɖáá-dyí-gmɔ̀-nyɔ̀ ɓè mɔ̀ hwòɖò-kɔ̃-dè-nyɔ̀ ɓè ɓéɖé ɖɛ̀ɓɛ̀ìn-ɖɛ̀ɓɛ̀ìn mɔ̀à, Jɛhova kè Jízɛ̀ kɛɛ wuɖuɔ̀ ɖùù gbo. (Wɛ́ 23:1; Jɔ̃́ɔ́ 10:11) Kɛɛ, à nɔ́ɔ̀ ɖéè ɓè ɓɛ́ wa mɔ́ à hwìɖìi-taɓa-taɓaɔ̀ wɔ̃ hwɔɔ dyi dyììn ɖé “wuɖu ɓè se jàà” kɛ múɛɛ wuɖu gbo.—2Pí 2:1, 3.

Jɛ́nɛ́sì wuɖu-kpà tã zaìn ti kĩ́ín ɓɛ́ ɖéè ɖòɛ̀ wuɖu dyi ma dà ɓóɖó-kpàà kɔ̃ɛɛ jè kɔ̃in. Sétɔ̃̀ wùɖù ma Íì gbo nyɔ-cá-kà ké ɔ nyu ké nyɔ ɔ jù ma jɛ́ɛ́ kɛɛ jù ma vìe-ɖɛ̀. Ɔ nyu ma ɔ mìɔùn kà ɔ mɔ̀ ma Íì ɓàtoɛ, ké ɔ vìàìn ma Jɛhovaa wuɖu kè ɔ hwòɖò-kpàìn-ɖɛ̀ ɓèɔ̀ dyí. Wìì-ɖɛ̀ɔ̀ mɔ̀, Íì tò ma ɖùù, ké ɔ nyuɛ ké gà zi wɔ̃ kɔ̃ dyi ma ɔ kè ɔ xwéɖé-dùɔ̀ kɔ̃.

Zɛ̃̀ɛ̀ kɛɛ, Sétɔ̃̀ nyuɛ ɓɛ́ nyɔ ɓè hwòɖò ké gbà ɓá Jɛhova kè ɔ kpooɔ̀ jè dyí dyììn ɖé se-bɔ̃̀ ɓè kè jàà se gbɔ hwɛ̀ ɓè ɔ kè se saá-saá ɓè dyi-ɓèìn-ɓèìn mú. À dyi ɖéè ɖòɛ̀ wuɖu wɔ̃́ ní, à mɛ gbù! Ðùù-tò-tò ɓó ti xwã́-xwã́ wè bìì, sepóɛɖé m̀ mɔ́ ɖɛ ɖò dyí dyuòɛ̀ dyi jèɛɛ mɔ̀ nàdì. Wuɖu jĩ̀ xwɛ̀ Sétɔ̃̀ mɔ́ ma, ɓɛ́ ɔ ké ma Íì cá ɖé wa dɔ́ɔ́-dè-wùɖù xwã́-xwã́ɔ̀ múɛ́? (Jɛ́ 3:1, 4, 5) Kɛɛ, ɔ jù ké nyɔ ɖò à dyuò dyíɛ—nyɔ ɓɛ́ ɔ ɖɛ̀ɓɛ̀ à mú ké ɔ ɓéɖé hwòɖòùn-hwòɖò ɓó à bììɛɛ—dyí mɔ́ ɓɛ́ ɔ ké se-bɔ̃̀ ɖò ɓá Jɛhova kè ɔ kpooɔ̀ jè dyíɛɛ à gbo cɛ̃ ní ɖé?

Po VÍÐÒ nìà kɛ kũ̀à gbo, Nɔ́ɔ̀ Ðéè Ɓè “Wuɖu” Gbo. Nìí, diè nyɔ ɓèɔ̀ dyi:

Ðɛ́ m̀ cɛ̃́ sɔ̀ìn ɖé kà Jéè nyu ma ɖɛ ɓá ma ɔ ɖe seà Zàse kɛ dyíɛ kpɔ̃-sɔ̃̀ nyuɛ kɛɛ mú kɛ́?