1. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà Kɛ́ɖɛ́ì mɛ́-mɛ́ɔ̀ jè Hwìɖìi-dyà-hwɔ̀ɔ̀ kɔ̃ mu ɓó zɔ̃ séín nyɛ́?

 JƐ́Ɛ́ KƐƐ, nì muɛ gbo wɔ̃́ìn kà ɓɛ́ mú-gbààìn-ɖɛ̀ɔ̀ mɔ̀ nyíí-ɖɛ̀ ɓɛ́ ɔ se píɔ́ ɖò kɔ̃̀ɛ! (2 Kɔ̀. 9:15) Sepoɛɖe Jizɛ tò ma ɔ nyɔùn-dyù fɛ̀ɛ̀ɔ̀ jèɛɛ, m̀ kè Jɛhova Geɖepɔɔ ɓɛ́ìn gbo-kpɔ̃ìn-kpɔ̃ìn ɓéɖéɛ. M̀ ɓɛ́ìn sè-ná-sèɛ̀ fɛ̀ɛ̀ hwòɖò kɔ̃ dèɛ̀ ɖekè. Ɔ jèɛɛ, ɔ kpa ɖɛ mìɔ ɓɛ́ à ké zùo-po-hwòɖò tɛ̀mɛ̀ìn ɓó mú-gbààìn-ɖɛ̀ɔ̀ jè, kè ɓɛ́ à ké Jɛhova mɔ̀ nyɔ tòà mú-gbààìn-ɖɛ̀ɔ̀ dyììn ɖé ɖɛ̀ɓɛ̀ìn-ɖɛ̀ɓɛ̀ìn múɛɛ zùo po! (Wóɖ. 5:8) Ɓɛ́ à ké zùo-po-hwòɖò ɓéɖé tee, kè ɓɛ́ à ké se mú-gbààìn-ɖɛ̀ɔ̀ dyéɖé kɔ̃in wã̀ìn nyɛɛ, Jizɛ po ma ɔ mɛ́ jèɔ̀ hwìɖìi-dyà-dyà ɓó zɔ̃ séín nyɛɛ páún.—Ðúù 22:​19, 20.

 2. Ðɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

² Ɓó zɔ̃ nìà kɛ xwíníín nyɛɛ, à mu Ðɛ-hwìɖìi-dyà-hwɔ̀ɔ̀ ɓéɖéìn ɓó Sáɖádè ɓàɖà, Zágìɖìɔ̀ wé 12 kɔ̃, 2025. Ɔ nì wáɖáá kà à séín nì ɖɛ páùn poɛń ɓɛ́ à ké ɖé nìɛ. À mu kpáná dyéìn mìɔ ɔ jù ké à dyi ti dyí ɖú ɓó Ðɛ-hwìɖìi-dyà-hwɔ̀ɔ̀ tiín ɓɛ́ à ké ɖɛ ɓɛ́ Jɛhova kè ɔ Dyú-gààɔ̀ ɖà à bìì nyuɛɛ jè hwìɖìi nàìn a ní. Ðé cɛ̃́ɛ́-ɖɛ̀ nìà kɛ múɛɛ, à mu ɖɛ mú-gbààìn-ɖɛ̀ɔ̀ tɛ̀mɛ̀ìn à ɓá Jɛhova kè ɔ Dyú-gààɔ̀ jè dyíɛɛ dɔ́ɔ́ kɔ̃in dèìn. Ðé cɛ̃́ɛ́-ɖɛ̀ nyɔ kɔà ɓó dyíɛ múɛɛ, à mu kà à ɓɛ́ìn kpáná dyéɛ sɔ̀ìn ɖé mú-gbààìn-ɖɛ̀ɔ̀ mú, kè kà à ɓɛ́ìn zùo-po-hwòɖò tɛ̀mɛ̀ìn ɓóɛ jèɛɛ jè múin wɔ̃́ùn.

 ÐƐ MÚ-GBÀÀÌN-ÐƐ̀Ɔ̀ TƐ̀MƐ̀ÌN À ƁÁ JƐHOVA JÈ DYÍƐ

 3. Xwɛ̀ gàa dyúáɖòɛ̀ mɛ́-mɛ́ ɓɛ́ìn ma nyɔ méɔ̀ùn ɓè gbàà kɛ́? (Dyé dyi-dyé-ɖɛ̀ɔ̀ ɖekè.)

³ Mú-gbààìn-ɖɛ̀ɔ̀ tɛ̀mɛ̀ìn à ɖɛ ɓá Jɛhova dyí sɛ́ɖɛ́ìn jè dyí. (Dìtɔ̀. 32:4) Xwɛ̀ kɛ́? Poɛ̀n hwìɖìi: Sɔ̀ìn ɖé Áɖɔ̀ùn múɛɛ, à sè ma nàmàùn ɓɛ́ ɔ dyàà gĩɔ kɛɛ dúí. (Wóɖ. 5:12) Ɓɛ́ à ké nàmàùn kè gĩɔ xwaún buɛ̀ kɛɛ, Jɛhova poɛ ma páún ɓɛ́ Jizɛ ké ma mú-gbààìn-ɖɛ̀ɔ̀ jù. Kɛɛ, xwɛ̀ nyɔ kpò dyúáɖò se kɛɛ ɖò ɓéɖéɛɛ sáa-zà-zà ɓɛ́ìn ma nyɔ méɔ̀ùn ɓè gbàà kɛ́? Àpɔ́sò Pɔ́ɔ̀ zaìn ma kɔ̃in, ké ɔ ɖá: “Sepoɛɖe gàa dyúáɖòɛ̀ [Áɖɔ̀ùn] se wuɖu nyu jè nyuɛ ké nyɔ ɓáún-ɓáún jù ma nàmàùn-nyɔ̀, ké kàà gàa dyúáɖòɛ̀ [Jizɛ] wuɖu nyu jè muɛ nyuùn ɓɛ́ nyɔ ɓáún-ɓáún ké dyí-sɛ́ɖɛ́ìn-nyɔ̀ jù.” (Wóɖ. 5:19; 1 Tím. 2:6) Ɔ xwíníín mɔ̀, se-wuɖu-nyu-nyɔ̀ dyúáɖò se ma kɛɛ ɖò ɓéɖéɛɛ mɔ̀ nyɔ nyuɛ ma, ké à jù ma gìì ɖé nàmàùn kè gĩɔ xwaún. Ɔ jèɛɛ, ɔ ɖú ma wuɖu-nyu-nyɔ̀ dyúáɖò se kɛɛ ɖò ɓéɖéɛɛ dyí ɓɛ́ à ké ma buɛ̀.

 4. Xwíníínɔ̀ nyɛ́ kɔ̃̀ jè Jɛhova seɛ ma dyi táà ɓɛ́ Áɖɔ̀ùnɛ̀ xwíníín-dyù ɓè ɓɛ́ wa ɓéɖé hwòɖò wáɖáá kɛɛ ké ma cĩ́ kánáá pu kɛ́?

⁴ Jizɛ ɓéɖé ɓɛ́ ɔ ké ma mɛ́ wɛ̃́ɛ́ hwɛ̀ ɔ ké ma à póìnǹ? Jɛhova seɛ ma gbɔ poɛ ɓɛ́ìn ɓɛ́ ɔ kéɛ ma dyi táà ɓɛ́ Áɖɔ̀ùnɛ̀ xwíníín-dyù ɓè ɓɛ́ wa ɓéɖé hwòɖò wáɖáá kɛɛ ké ma cĩ́ kánáá puù? Ðé nyɔùn-dyù gboɛɛ, ɔ mu kpeɖeɛ̀-dyíin-nɔ̀mɔ̀-ɖɛ̀ kè hwòɖò-fɔ̀nɔ̀-ɖɛ̀ hwɔìn. Kɛɛ, ɔ se Jɛhovaa dyí-sɛ́ɖɛ́ìn-kpèɖè se kɛɛ ɖò ɓéɖéɛɛ dyí ɓá. Sepoɛɖe Jɛhova sɛ́ɖɛ́ìn dyí jèɛɛ, ɔ seɛ ma gãa ɓɛ́ìn ɓɛ́ ɔ ké ma Áɖɔ̀ùnɛ̀ wuɖu-ɖùù-dyi-zà-zà nì ma kà wáɖáá kɛɛ dyéɖé kɔ̃in wã̀ìn.

 5. Xwíníínɔ̀ nyɛ́ kɔ̃̀ jè à ɓɛ́àìn dyí dyuòɛ̀ jɛ́ɛ́ kà ɓɛ́ Jɛhova mu dyí-sɛ́ɖɛ́ìn-ɖɛ̀ nyuùn teeɛ́?

⁵ Ɔ jù ké Jɛhova se ma mú-gbààìn-ɖɛ̀ɔ̀ tò, ké ɔ dyi ma dyí-sɛ́ɖɛ́ìn-sɛ́ɖɛ́ìn wáká po dyììn ɖé Áɖɔ̀ùnɛ̀ xwíníín-dyù ɓéɖé kɛɛ ɓèɔ̀ dyi-táà-táà mú ɓɛ́ wa ké ma cĩ́ kánáá pu ní ɖé? Nyɔ ɓè muɛ máa hwìɖìi poìn kɛbì Geɖepɔɔ muɔ́ má dyí-sɛ́ɖɛ́ìn-sɛ́ɖɛ́ìn wáká poùn ɖé ɖɛ tɔ̀ɔ̀ ɓè mú ní. Ɔ hwɔìn-kà, wa muɔ́ máa hwìɖìi poìn dyɛ̀ kɛbì ɔ se ɔ nyɛ́nɛ́ín-ɖáìn-ɖɛ̀ ɓèɔ̀ ɖíɛ́ ɓè nyuɛ́ mu ní. À se kɔ̃̀ à ké hwòɖò dyií gbàìn ɓá ɖɛ ɓè nì kà wɛ kpá jè dyí. Kà ɓɛ́ Jɛhova nyu ma dyí-sɛ́ɖɛ́ìn-ɖɛ̀ ɖé puà-ɖɛ̀ dyí-dyé-dyé—mɔ̀à ɔ mìɔùn nììn ɖɛ̀ɓɛ̀-dyùɔ̀ sáa-zà-zà kɛ múɛɛ—ɔ tɛ̀mɛ̀ìn à dyí wáɖáá kà ɓɛ́ ɔ mu dyí-sɛ́ɖɛ́ìn-ɖɛ̀ nyuùn teeɛ.

 6. Ðɛ́ mɔ̀ hwìè ɖò kɔ̃̀ mú ɓɛ́ mú-gbààìn-ɖɛ̀ɔ̀ tɛ̀mɛ̀ìn Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ kɛ́? (1 Jɔ̃́ɔ́ 4:​9, 10)

⁶ Mú-gbààìn-ɖɛ̀ɔ̀ kpá à gbo ɓɛ́ à kéɛ múin wɔ̃́ kà ɓɛ́ Jɛhova sɛ́ɖɛ́ìn dyíɛ, kɛɛ jɛ́ɛ́ kɛɛ, ɔ kpá à gbo ɓɛ́ à ké kà ɔ ɖɛ̀ɓɛ̀ìn-ɖɛ̀ɓɛ̀ìnɔ̀ nyu ɓɛ́ɛ kɛɛ jè múin wɔ̃́. (Jɔ̃́ɔ́ 3:16; zà 1 Jɔ̃́ɔ́ 4:​9, 10 wuɖuún.) Tɛ̀mɛ̀ìn-ɖɛ̀ ɓáà mú-gbààìn-ɖɛ̀ɔ̀ jè dyíɛɛ tɛ̀mɛ̀ìn kà ɓɛ́ Jɛhova mɔ́ ɓɛ́ à ké sè-ná-sèɛ̀ fɛ̀ɛ̀ ɓéɖé, kè ɓɛ́ à ké ɔ xwéɖé-dùɔ̀ nyɔ ɓè jùɛ. Poɛ̀n hwìɖìi: Ti Áɖɔ̀ùn ɖà ma nàmàùn nyuɛɛ, Jɛhova kúmú ma  ɔ ɖé Ɔ xwéɖé-dù mɔ̀à ɔ ɓiè-nyɔ̀ ɓèɔ̀ kɛɛ hwìɛ̀. Dyììn ɖéɛ múɛɛ, à séín mɔ̀ píé-dyù ɓè ɖé Geɖepɔɔ xwéɖé-dùɔ̀ gbo. Kɛɛ, dyììn ɖé mú-gbààìn-ɖɛ̀ɔ̀ múɛɛ, Jɛhova zĩ̀ìn à nàmàùn ɓèɔ̀ kɔ̃in, ké ɔ mu nyɔùn séín ɓɛ́ wa taɓa ɔ hwìɖìi, ké wa nyu ɔ wuɖuɛɛ ɖé ɔ xwéɖé-dùɔ̀ mú dyàùn ɖé dyúa. Ɓó kàùn wɛ̃ɛ, à kè Jɛhova kè à mùe ɓiè-nyɔ̀ ɓè ɓɛ́ìn gbo-kpɔ̃ìn-kpɔ̃ìn ɓéɖéɛ. Jàà kɛɛ, à mɔ̀ Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ kpáná-kɔ̃ún-dyé-nyɔ̀ ɓè!—Wóɖ. 5:​10, 11.

 7. Xwɛ̀ Jizɛɛ gà-dyé-dyéɔ̀ nyu à gbo kpáa ɓɛ́ à kéɛ múin wɔ̃́ kà ɓɛ́ Jɛhova ɖɛ̀ɓɛ̀ à mú mìɔ kɛ́?

⁷ À ɓɛ́ìn kà Jɛhova nyu à mú ɖɛ̀ɓɛ̀ kɛɛ múin wɔ̃́ɔ nɔ̀mɔ̀ dyíin ɔ jù ké à dyi ɖɛ ɓɛ́ ɔ zĩ̀ìn ma mú ɓɛ́ ɔ ké ma mú-gbààìn-ɖɛ̀ɔ̀ tò kɛɛ jè hwìɖìi poìn ní. Sétɔ̃̀ ɖá Geɖepɔɔ ɓiè-nyɔ̀ ɖò se ɔ jè gboi kpɔ̃ɔ ɓɛ́ìn mu kánáá pu ɔ jù ké ɔ náa nyu-nyu dyi mú kàmà ɓó ɔ bìì ní. Ɓɛ́ Jɛhova kéɛ tɛ̀mɛ̀ìn kà ɓɛ́ ɖɛa mɔ̀ se kɛɛ, Ɔ táà ma dyi ké Jizɛ dyé ma gà hwɛ̀ ɔ mɛ́ ma. (Jóɓò 2:​1-5; 1 Píɖɛ̀ 2:21) Jɛhova dyéɛ ma, ké gbo-vɔ̃-nyɔ̀ ɓè mɔ̀ ma cɔ́cì-nyɔ̀ ɓèɛɛ ɓaɖa ma Jizɛ dyɔ́, ké sójà ɓè fɔ̀nɔ̀ìn ma ɔ múin, ké wa ɓaɖa ma ɔ, ké wa kɔ̀ìn ma ɔ cuɔ̀ dyai. Puɛɛ, Jɛhova dyéɛ ma, ké ɔ ɖɛ̀ɓɛ̀-dyùɔ̀ mɛ́ ma gà-kà. (Máf. 27:​28-31, 39) Jɛhova ɓéɖé ma kpé ɓɛ́ ɔ ké ma ɖɛa ɓɔ́í po ɓó ti séín ɖò ɓaɖa. Ɔ hwɔìn-kà, ti gbo-vɔ̃-nyɔ̀ ɓè cɛ̃ɛ ma, ké wa dyià níin: “Ɓèà mɛ dyéɛ kɛbì Geɖepɔɔ mu ɔ póìn ɓó kàùn ní” kɛɛ, Jɛhova ɓɛ́ìn ma náa nyuɛ. (Máf. 27:​42, 43) Kɛɛ, ɔ jù ké Geɖepɔɔ dyi ma ɓó ɖɛ ɖò nyùìn ní, nìí, mú-gbààìn-ɖɛ̀ ɖò se ma nìɛ̀ mu, ké à se ma hwòɖò-kɔ̃-dè-ɖɛ̀ ɖò ɓéɖéɛ mu fɔɔ. Ɔ jèɛɛ, Jɛhova wɔ̃́ìn ma gbo ké ɔ dyú-gààɔ̀ dyé ma gà tee ké ɔ dyɛ̀ìn ma ɔ gĩɔ.

 8. Ti Jɛhova dyé ma ɔ Dyú-gààɔ̀ gà dyéɛ kɛɛ, ɔ puà ma ɔ níì? Zaìn kɔ̃in. (Dyé dyi-dyé-ɖɛ̀ɔ̀ ɖekè.)

⁸ À mɛ ɓɔ́ɔ hwìɖìi poɛ̀n kà ɓɛ́ Geɖepɔɔ ɓéɖé kpé séín jèɛɛ, ɖɛ ɖò ní puà ɔ kɛ! Ɔ mɛ à kà ɔ mìɔùn nìà kɛ, ké ɔ mɛ à ɓɛ́ à ké nyɔ-ɖɛ-puà-puà dyí dyuòɛ̀ ɓɛ́ìn. Nìí, ɔ nyu fɔ̀nɔ̀ hwòɖò kà ɓɛ́ ɖɛ ɓè puà Jɛhova ɖekèɛ. Baɓoɔ cɛ̃ɛ ɓá ɔ jè dyí kà ɔ “hwòɖò kpá ma ɖé ɖei mìɔ” kɛ. (Wɛ́ɖɛ́ 78:​40, 41) Poɛ̀n hwìɖìi ɖekè ɓá Ééɓòɖòhɛ̃́ɛ̀ kè Áázè jè dyí. Ɔ ɓɛ́ìn m̀ hwìɖìi nìɛ̀ kà Jɛhova cɛ̃ɛ ma Ééɓòɖòhɛ̃́ɛ̀ gbo, ɓɛ́ ɔ ké ma ɔ dyú-gàà dyúáɖò kpeé-kpeéɔ̀ sáa zàìn nyɛ. (Jɛ́n. 22:​9-12; Híì. 11:​17-19) À ɓɛ́ìn kà Ééɓòɖòhɛ̃́ɛ̀ hwòɖò nyu ma nìɛ̀ kɛɛ jè hwìɖìi nàìn cá ti ɔ dyé ma ti, ɓɛ́ ɔ ké ma Áázèɛ̀ fɛ̀ɛ̀ ɖé zà dyììn ɖé ɔ dúí cɛ̃-cɛ̃ mú wàɖà kɛ. Jɛhova nììn hwòɖò ɓɛ́ìn ma ɖé ɖei kpáa mìɔ cá ti ɓɛ́ gàa ɓè se Geɖepɔɔ dyí dyuòɛɛ ɖáɓá ma ɔ Dyú-gààɔ̀ gà-kà ɓó ɔ dyéɖé waiɛ!—Dyé víɖò nìà kɛ dyi ɖé jw.org kɔ̃, Dyéìn Wa Hwìɖìi-Taɓa-Taɓaɔ̀—Ééɓòɖòhɛ̃́ɛ̀, Wáká 2.

 9. Xwɛ̀ Wóɖómà 8:​32, 38, 39 nyu à gbo kpáa ɓɛ́ à ké kà Jɛhova nyu à mú ɖɛ̀ɓɛ̀ɛ̀ kɛɛ jè mú wɔ̃́ kɛ́?

⁹ Mú-gbààìn-ɖɛ̀ɔ̀ jè tɛ̀mɛ̀ìn à kà ɓɛ́ nyɔ ɖò se à mú ɖɛ̀ɓɛ̀ kà Jɛhova ɖɛ̀ɓɛ̀à à múɛ—hwɛ̀ ḿ po níin à gbò-xwíníín-nyɔ̀ ɖò mɔɔ à ɓàto xwɛ̃́ìn bũ̀in ɖò. (Zà Wóɖómà 8:​32, 38, 39 wuɖuún.)  Ɔ nì wáɖáá kà ɓɛ́ Jɛhova ɖɛ̀ɓɛ̀ à mú ké ɔ zi kà à nyu à mìɔùn mú ɖɛ̀ɓɛ̀ɛ̀ kɛɛ dyíɛ. M̀ mɔ́ cĩ́ɛ dyi ɓó sè-ná-sèɛ̀ tiínǹ? M̀ seɛ mɔ́ mìɔ ɓɛ́ ɔ ké kà Jɛhova nyuɛ m̀ bìì mɔ́ɔ kɛɛ dyí zi. M̀ mɔ́ nì nàmàùn ɓè ké kɔ̃in zĩ̀ìnǹ? M̀ seɛ mɔ́ mìɔ ɓɛ́ ɔ ké kà Jɛhova mɔ́ wa kɔ̃in zĩ̀ɛ̀n dyiɛɛ dyí zi. Ðɛ ɖòùn ɔ mɔ́ à xwaún wɛ̃ɛ mɔ̀, ɓɛ́ à ké ɔ nyíí-ɖɛ̀ zi ɖɛ kpauńɔ̀ dyi kpɔ̃ dyììn ɖé ɔ hwìɖìi-taɓa-taɓa kè ɔ wuɖu-nyu-nyu mú. Mú-gbààìn-ɖɛ̀ɔ̀ mɔ̀ Geɖepɔɔ jàà ɖɛ̀ɓɛ̀ìn-ɖɛ̀ɓɛ̀ìnɔ̀ hwɔìn-ɖɛ̀ ɖò jɛ́ɛ́ cá. Ðé ɓóɖó ɖìèɔ̀ múɛɛ, à mu Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè cɛ̃́ìn mìɔ.—Ìkí. 3:11.

ÐƐ MÚ-GBÀÀÌN-ÐƐ̀Ɔ̀ TƐ̀MƐ̀ÌN À ƁÁ JIZƐ JÈ DYÍƐ

10. (a) Ðɛ́ po ma Jizɛ hwòɖò ɖé ɖei mìɔ cá kɛ́? (b) Hwìè nyɛ́ ɓè kɔ̃̀ mú Jizɛ hwɔ ma Jɛhova nyɛ́nɛ́ɔ̀ múɛ́? (Dyé gbɔ̀ɖɔ̀ɔ̀ nìà kɛ ɖekè, “ Jizɛɛ Wuɖu-Nyu-Nyuɔ̀ Hwɔ Ma Jɛhova Nyɛ́nɛ́ɔ̀ Mú.”)

¹⁰ Jizɛ kɔ̃̀ ɔ Ɓà nyɛ́nɛ́ɔ̀ jè gbo mìɔ. (Jɔ̃́ɔ̀ 14:31) Ti wa kpɔ̃ ma Jizɛ Geɖepɔ ɖɛ gbà kɔ̃ún cɛ̃ jè kè gɔ̃̀mànà gbo vɔ̃ jèɛɛ, ɔ hwòɖò kpá ma ɖé ɖei mìɔ, sepoɛɖe ɖɛa ɓɛ́ìn ma ɔ Ɓà nyɛ́nɛ́ɔ̀ dyíin nyìnìɛ̀n. Ðɛa kɔ̃̀ jè ɔ ɓaà ma, ké ɔ ɖá: “Ḿ Ɓà, gà-kòpò nìà kɛ mɛ sɔ̀ dà ḿ bũ̀, ɔ dyi ná nìɛ̀ ɓɛ́ìn ní.” (Máf. 26:39) Sepoɛɖe Jizɛ gã̀ ma Jɛhova wuɖu nyuɛń dyi tee ké ɔ mɛ́ ma jèɛɛ, ɔ hwɔ ma ɔ Ɓà nyɛ́nɛ́ɔ̀ mú gàná cá.

11. Xwɛ̀ Jizɛ nyu ma nyɔ ɓè jàà ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛ́? (Jɔ̃́ɔ́ 13:1)

¹¹ Mú-gbààìn-ɖɛ̀ɔ̀ tɛ̀mɛ̀ìn à ɖekè, kà ɓɛ́ Jizɛ kɔ̃̀ nyɔ ɓè jè gbo mìɔ kɛ. Kɛɛ jɛ́ɛ́ kɛɛ, ɔ kɔ̃̀ ɔ ɖeín-nà-nyɔ̀ ɓèɔ̀ jè gbo. (Nɔ́ɔ́ 8:31; zà Jɔ̃́ɔ́ 13:1 wuɖuún.) Ɔ hwɔìn-kà, Jizɛ dyuòɛ̀ ma dyí kà ɓɛ́ kũ̀à ɔ nyu ma dà ɓóɖó-kpàà kɔ̃ɛɛ wáká ɖíɛ́ ɓè mu ma mú kàmàùn mìɔ kɛ, jɛ́ɛ́ kɛɛ gà-gĩ̀ɔ̀ ɔ mɛ́ ma kɛ. Kɛɛ, ɖé ɔ kũ̀àɔ̀ nyu-nyu múɛɛ, ɔ seɛ ma nyu hwòɖò-se-wɔ̃́-kà. Kɛɛ, ɔ po ma ɔ hwòɖò-dyùà gànáɔ̀ ɖé wuɖu-wáɖá-wáɖá kè ɖɛ-tɛ̀mɛ̀ìn-tɛ̀mɛ̀ìn ɔ kè nyɔ tɔ̀ɔ̀ ɓè gbo-kpá-kpá mú. Ɓó wé kɔ̃̀ ɓaɖa ɓɛ́ ɔ mɛ́ ma kɛɛ, ɔ ɖú ma ti dyí ɓɛ́ ɔ ké ma ɔ àpɔ́sò ɓèɔ̀ ɓo dyi dèɖè, ké ɔ cɛ̃  ma kpéí-po-wùɖù ɓè kè náún-po-wùɖù ɓè wa gbo. (Jɔ̃́ɔ́ 13:​12-15) Ké ti ɔ nì ma ɓó cuɔ̀ dyaa, ɔ ɖú ma ti wè dyí, ké ɔ nyí ma ɖɛ-gbà-nyu-nyɔ̀ ɖò hwòɖò-kɔ̃-dè-ɖɛ̀, ké ɔ po ma ɖɛ páún ɓó ɔ ɖe gbo gmɔ̀ jè. (Ðúù 23:​42, 43; Jɔ̃́ɔ́ 19:​26, 27) Jɛ́ɛ́ kɛɛ, Jizɛ se ma ɔ jàà ɖɛ̀ɓɛ̀ìn-ɖɛ̀ɓɛ̀ìnɔ̀ tɛ̀mɛ̀ìn dyììn ɖé ɔ mɛ́-mɛ́ɔ̀ mú ɖòùn, kɛɛ ɔ tɛ̀mɛ̀ìn ma dyììn ɖé ɔ cĩ́-cĩ́ gànáɔ̀ mú dà ɓóɖó-kpàà kɔ̃.

12. Hwìèɔ̀ nyɛ́ kɔ̃̀ mú Jizɛ nì ɔ mìɔùn sáa zàìn ke kánáá pu ɓó à bììɛ́?

¹² Kɛ́ɖɛ́i mɛ́ìn ma “kpa dyúáɖò ɓó ti séín bìì,” kɛɛ ɔ nì ɔ mìɔùn sáa zàìn ke ɓó à bìì. (Wóɖ. 6:10 nwt) Xwɛ̀ kɛ́? Ɔ nì kũ̀à nyuɛń ke kánáá pu ɓɛ́ ɔ kéɛ nyu ɓɛ́ kpáná ɓè ɓɛ́ mú-gbààìn-ɖɛ̀ɔ̀ dyà kɛɛ ké nì ɓó à bìì. Poìn ɖɛ ɔ nì nyuɛń kàùn wɛ̃ɛ jè hwìɖìi. Ɔ mɔ̀ à Kã́á kè Sáa-Zà-Nyɔ̀ Vɛ̀nɛ̀ ɔ kè dyí-poìn-kpòòɔ̀ kɔ̃in-nì-nyɔ̀. (1 Kɔ̀. 15:25; Ìfí. 5:23; Híì. 2:17) Ɔ mɔ̀ nyɔ kɔ̃̀ nyɔ ɓè kéà dyɔún muɛ kè nyɔ kúɖúú ɓèɔ̀ dyí-poìn-poìn ɓɛ́ ɔ muà gbɔ hwɛ̀ìn hwɛ̀ ɓɛ́ gà-dyé-dyé vɛ̀nɛ̀ɔ̀ kéà mánáìn hwɛ̀ kɛɛ kpé gbo. b (Máf. 25:32; Máà 13:27) Ɔ dyéɛ jè gbo ɖekè ɓɛ́ ɔ jàà kũ̀à-nyu-nyɔ̀ ɓèɔ̀ ké ɖɛ ɖi nɔ̀mɔ̀ dyíin ɖé zùùn ɓó wé hwɛ̀ìn gbɔ ɓèɛ̀ mú. (Máf. 24:45) Ké ɓó ɔ zɔ̃ táázĩ̀ìnɔ̀ tíin nyɛɛ, ɔ mu à jè gbo kɔ̃̀ùn kánáá pu. Jɛhova tò ma ɔ Dyú-gààɔ̀ ɓó à bìì jàà!

MƆ̀ÙN ÐÁ ƁƐ́ M̀ KÉ ÐƐ CƐ̃́Ɛ ƁƆ́

13. Xwɛ̀ ɖɛ-hwìɖìi-nàìn-nàìn ɓɛ́ìn m̀ gbo kpáa, ɓɛ́ m̀ ké ɖɛ̀ɓɛ̀ìn-ɖɛ̀ɓɛ̀ìn ɓɛ́ Geɖepɔɔ kè Kɛ́ɖɛ́i ɓéɖéà ɓó à bììɛɛ jè cɛ̃́ kánáá pu kɛ́?

¹³ M̀ ɓɛ́ìn ɖɛ̀ɓɛ̀ìn-ɖɛ̀ɓɛ̀ìn ɓɛ́ Jɛhova Geɖepɔɔ kè Kɛ́ɖɛ́i Jizɛ ɓéɖéà ɓó à bììɛɛ jè cɛ̃́ɛ kánáá pu ɔ jù ké m̀ dyiɛ jè hwìɖìi nàìn tee ní. Ɓó zɔ̃ nìà kɛ Ðɛ-hwìɖìi-dyà-hwɔ̀ɔ̀ tiín ní, m̀ ɓɛ́ìn Bɔ̃̀ ɓáà Jizɛ jè dyíɛɛ dyúáɖò mɔɔ zi kɔ̃ wuɖuún zàà kóɖó-kóɖó. Ɓɔ́ vɔ̃ɔ ɓɛ́ m̀ ké ɖɛ pàɖà wuɖuún zà ɓó ti dyúáɖòɔ̀ xwíníín. Kɛɛ, ma mú ɓɛ́ m̀ ké xwíníín tɔ̀ɔ̀ ɓè kɔ̃̀ jè à mɛ ɖɛ̀ɓɛ̀à Jɛhova kè Jizɛ múɛɛ dyi mɔ́. Ké vɔ̃ kóɖó-kóɖó, ɓɛ́ m̀ ké ɖɛ m̀ cɛ̃́ kɛɛ nyɔ tɔ̀ɔ̀ ɓè gbo cɛ̃.

14. Kà Wɛ́ɖɛ́ 119:97 nyuà cɛ̃ɛ kɛɛ, xwɛ̀ ɖɛ-múin-ɖe-ɖe ɓɛ́ìn à gbo kpáa ɓɛ́ à ké mú-gbààìn-ɖɛ̀ɔ̀ kè tɛ̀mɛ̀ìn-ɖɛ̀ tɔ̀ɔ̀ ɓè jè cɛ̃́ teeɛ́? (Dyé dyi-dyé-ɖɛ̀ɔ̀ ɖekè.)

¹⁴ Geɖepɔɔ dyí-sɛ́ɖɛ́ìn-sɛ́ɖɛ́ìnɔ̀ kè ɔ ɖɛ̀ɓɛ̀ìn-ɖɛ̀ɓɛ̀ìnɔ̀ ɔ kè mú-gbààìn-ɖɛ̀ɔ̀ mɔ̀ ɖɛ ɓè ɓɛ́ nyɔ pàɖà dyuò jèɛ. Kɛɛ, ɔ jù ké m̀ ɖà jààɔ̀ mú hwèɖèìn ní, m̀ ɓɛ́ìn dyɛ̀ hwìɖìi poɛ̀n kɛbì m̀ ɓɛ́ìn ɖɛ-múin-wɔ̃́-wɔ̃́ ɖìè ɖò dyéɛ ɓá ɖɛ ɓè nìà kɛ jè dyí ní. Jàà-ɖɛ̀ɔ̀ mɔ̀, ɖɛ ɓè à ɓɛ́ìn cɛ̃́ɛ ɓá tɛ̀mɛ̀ìn-ɖɛ̀ ɓè nìà kɛ kè ɔ tɔ̀ɔ̀ ɓè jè dyíɛɛ se sèìn-naín kɔ̃̀. Nìí, ɖɛ́ m̀ ɓɛ́ìn nyuɛ kɛ́? Ku dúún ɓɛ́ m̀ ké cɛ̃́ɛ́-ɖɛ̀ ɓáún-ɓáún ɓè nìà ɖé à céè-ɖɛ̀ ɓèɔ̀ múɛɛ cɛ̃́. M̀ dyi vɔ̀sì ɖò ɓɛ́ m̀ se múin wɔ̃́ nɔ̀mɔ̀  dyíin nyɛɛ dyé ní, ɖe ɖɛ múin. Nìí, ɓó wé gàná wɛ ɓaɖa ní, nàìn ɖɛ m̀ ɖàà da dyé kè ɖɛ ɔ cɛ̃ m̀ gbo ɓá Jɛhova kè ɔ Dyú-gààɔ̀ ɔ kè waà ɖɛ̀ɓɛ̀ìn-ɖɛ̀ɓɛ̀ìn ɓó m̀ bììɛ jè dyíɛɛ hwìɖìi.—Zà Wɛ́ɖɛ́ 119:97 wuɖuún.

15. Xwíníínɔ̀ nyɛ́ kɔ̃̀ jè à mɛ mɔ́à kɔ́mɔ́-ɖɛ̀ ɓè dyi ɖé Baɓoɔ mú teeɛ́?

¹⁵ Nì hwòɖò mɛ ɓɔ́ ɖé ɖei kpáa ɔ jù ké m̀ se ɖɛ ɖìè ɖò mɔɔ nyɔ-hwòɖò-dyi-tó-ɖɛ̀ ɖò dyé ɓó ti séín ɖò ɓɛ́ m̀ dèɖè dya ɓɛ́ m̀ ké céè-ɖɛ̀ wuɖuún zà mɔɔ ɖɛ múin ɖeɛ. Ɔ xwíníín mɔ̀, m̀ nì kà góò-ɓúɖú-nyɔ̀ ɖò nìà kɛ. Nyɔ ɓè nì náa ku hwòɖò, ké wa nyu kũ̀à ɓó áɓà mɔɔ wé pàɖà bìì hwɛ̀ wa dyé góò tííwè ɖò. Kɛɛ, wa ku dúún, sepoɛɖe góò-kɛ̀nɛ̀ mɛ́nɛ́ɛ́ séín kpa ɖɛ ɖé wa gbo. Baɓoɔ jàà-wùɖù ɓèɔ̀ mɔ̀ kɔ́mɔ́-ɖɛ̀ ɓɛ́ ɔ kpa ɖɛ mìɔ ké ɔ zi góò dyíɛ! (Wɛ́ɖɛ́ 119:127; Nɔ́ɔ́ 8:10) Ɔ jèɛɛ, ku hwòɖò ɓɛ́ m̀ ké nì Baɓo wuɖuún-zà-tìɔ̀ kíɖíí nɛ́.—Wɛ́ɖɛ́ 1:2.

16. Xwɛ̀ à ɓɛ́ìn Jɛhova kè Jizɛ ɓo bɛ̃̀ìn síɛ kɛ́?

¹⁶ Kà nì muà ɖɛ cɛ̃́ìn nyɛɛ, mɔ́ hwìè ɓè dyi ɓɛ́ m̀ ké ɖɛ m̀ cɛ̃́à kɛɛ kũ̀à mú nyùìn. Ɔ hwɔìn-kà, dyéìn Jɛhovaa dyí-sɛ́ɖɛ́ìn-sɛ́ɖɛ́ìnɔ̀ dyììn ɖé nyɔ tɔ̀ɔ̀ ɓè jàà-kà kpɔ̃-kpɔ̃ mú. Dyéìn Jizɛɛ ɖɛ̀ɓɛ̀ìn-ɖɛ̀ɓɛ̀ìn ɓó ɔ Ɓà kè nyɔ tɔ̀ɔ̀ ɓè bììɛ dyììn ɖé Jɛhova nyɛ́nɛ́ɔ̀ jè gà-dyé-dyé ɖé hwòɖò-wɔ̃́-wɔ̃́ múɛɛ mú, ɔ kè dyììn ɖé m̀ mìɔùn tò-tò ɓó m̀ mùe Kɛ́ɖɛ́ì ɖeín-sí-nyɔ̀ ɓè bììɛɛ mú. Ké ɖeɛɛ, sí Jizɛ ɓo bɛ̃̀ìn dyììn ɖé nyɔ tɔ̀ɔ̀ ɓè gbo wuɖu-wáɖá-wáɖá mú, ɓɛ́ wa mɔ̀ùn ké ti nɔ̀mɔ̀ dyíin ɓéɖé ɓɛ́ wa ké Jɛhovaa nyíí-ɖɛ̀ zi ɖɛ kpauńɔ̀ dyi kpɔ̃.

17. Ðɛ́ à mu cɛ̃́ìn ɖé cɛ̃́ɛ́-ɖɛ̀ nyɔ kɔà ɓó dyíɛɛ mú kɛ́?

¹⁷ À dyi mú-gbààìn-ɖɛ̀ɔ̀ jè múin wɔ̃́, ké à dyi zùo-po-hwòɖò ɓéɖé ɓó ɔ jè mìɔ ní, nìí, à mu Jɛhova kè ɔ Dyú-gààɔ̀ mú ɖɛ̀ɓɛ̀ìn mìɔ. Nìí, wa mu à mɔ̀ùn mú ɖɛ̀ɓɛ̀ìn mìɔ ɖekè. (Jɔ̃́ɔ́ 14:21; Jĩ́ìn 4:8) Ɔ jèɛɛ, à mɛ nyùìn Jɛhovaa nyíí-ɖɛ̀ ɓèɔ̀ kũ̀à mú, ɓɛ́ à ké mú-gbààìn-ɖɛ̀ɔ̀ jè cɛ̃́ tee. Cɛ̃́ɛ́-ɖɛ̀ nyɔ kɔà ɓó dyíɛɛ mu hwìè ɖíɛ́ ɓè kɔ̃̀ mú à ɓɛ́ìn mú-gbààìn-ɖɛ̀ɔ̀ kpáná kɔ̃ún dyéɛ, kè kà à ɓɛ́ìn zùo-po-hwòɖò tɛ̀mɛ̀ìn ɓó Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè kɛɛ dɔ́ɔ́ kɔ̃in dèìn.