Ɔ ɓɛ́ìn dyɛ̀ mú kàmàà ɓɛ́ m̀ ké ɖɛ m̀ cɛ̃́ɛ hwìɖìi pɛ́ìn kà ɔ nyuà nyɔ pàɖà gbo kpáa kɛ. Kɛɛ, m̀ ɖàa dyéɖé gbo dè kà ɓɛ́ Jizɛɛ nɔ́ɔ́ ɓèɔ̀ jè dyi nyɔ hwìɖìi wàɖà kɛɛ̀? Wa ɓɛ́ìn m̀ dyéɖé kɔ̃ nìɛ̀ ɖé nì hwòɖòɔ̀ bũ̀, ké ɔ kpá à gbo ɓɛ́ à ké wa hwìɖìi pɛ́ìn. Kà dyúáɖòɔ̀ kàà, m̀ ɓɛ́ìn ɖɛ ɓè m̀ cɛ̃́ kɛɛ pàɖà hwìɖìi pɛ́ìn dyììn ɖé wa hwìɖìi-nàìn-nàìn mú. Xwɛ̀ m̀ ɓɛ́ìn ɔ náa nyuɛ kɛ́? Ɔ mɔ̀ dyììn ɖé ɖɛ ɓè mɛ-mɛ mú kà nì muà ɖɛ cɛ̃́ìn nyɛ.

Nyɔ ɓè ɓɛ́ wa mɛ ɖɛ ɖìè ɓè wa cɛ̃́ kɛɛ pɛ́ìn ɖɛ ɓèa hwìɖìi kpɛ́-kpɛ́. Wa dyéɛ kà ɓɛ́ sɛ́ɖɛ́ nìà kɛ ní kpá wa gbo ɓɛ́ wa ké wuɖu ɖò-ɖò ɓè múin wɔ̃́ ɖòùn wɛ̃, kɛɛ ɔ kpá wa gbo ɓɛ́ wa ké fɔ̀nɔ̀-hwòɖò ɓè múin wɔ̃́ ɖekè. Waà mɛɛ-ɖɛ̀ ɓèɔ̀ se nì kà ɖɛ-mɛ-nyɔ̀ ɖòɛ̀ kũ̀à nyuà nìɛ̀ kɛ—kɛɛ ɔ mɔ̀ ɖɛ ɖòɛ̀ mɛ-dè-dè pu. Ké ɖɛ ɓè ɖàa tɛ̀mɛ̀ìn kà ɓɛ́ nyɔ sùà ɓè dyé sɛ́ɖɛ́ nìà kɛ kpáná kɔ̃ún jɛ́ɛ́ kɛ.

Ti nì mu ɖɛ cɛ̃́ìn ɖeɛɛ, m̀ ɓɛ́ìn mú dɔ̃̀ɔ, ɓɛ́ m̀ ké mɛɛ-ɖɛ̀ ɖíɛ́ ɓè mɛ ɓá ɖɛ m̀ ɖàà cɛ̃́ kɛɛ jè dyí. Ðɛ jĩ̀-kà nì mu hwìɖìi pɛ́ìn nyɛɛ jè mu m̀ wɔ̃ fɔ̀nɔ̀ìn cá!