1. Ðɛ́ nyɔ ɓáún-ɓáún nì zɛ̃̀ɛ̀ kɛɛ vòìn gbo kɛ́?

 M̀ ÐÀA dyéɖé gbo dèè, kà ɓɛ́ nyɔ ɓáún-ɓáún nì zɛ̃̀ɛ̀ kɛɛ kàmà wa mìɔùn jè ké ɔ zi nyɔ tɔ̀ɔ̀ ɓè dyíɛɛ̀? Ɔ hwɔìn-kà, nyɔ ɖíɛ́ ɓè ɓɔ́ɖɔ́ ɓó wa mìɔùn kè ɖɛ ɓè wa nyuɛɛ jè ɖé ɖúú kɔ̃. Kɛɛ, nyɔ xwéɖé wè mɔ̀ nyɔ dè Jɛhova dya. Ðé cɛ̃́ɛ́-ɖɛ̀ nìà kɛ múɛɛ, à mu ɖɛ mɔ̀ Jɛhova dya-dè-dè xwíníín nyɛ kè ɖɛ mɛ po à kpéí ɓɛ́ à kéɛ náa nyuɛɛ dɔ́ɔ́ kɔ̃in dèìn. Ké ɖeɛɛ, à mu kà à ɓɛ́ìn dya-dè-dè ɓɛ́ Geɖepɔɔ kɔ̃̀ ɔ ké ɓéɖéɛɛ ɔ nyíɛ kè kà ɔ mìɔùn mu ɔ nyɛ́nɛ́ɔ̀ dya dèìn ɖé dyúa kɛɛ jè cɛ̃́ìn.

ÐƐ́ MƆ̀ JƐHOVA DYA-DÈ-DÈ XWÍNÍÍN NYƐ́?

 2. Xwɛ̀ Jɛhova nyu ma ɔ dĩ́ín-dĩ̀ìnɔ̀ tɛ̀mɛ̀ìn ɖé Sányà-Tòɖòɔ̀ dya kɛ́? (Dyé dyi-dyé-ɖɛ̀ nìà wɛ̃ ɖekè.)

² Ðɛ́ mɔ̀à dya-dè-dè kɛ́? Ðé Baɓoɔ múɛɛ, wuɖu mɔ̀à “dya-dè-dè” kɛɛ ɓɛ́ìn ɖɛ séín ɖò ɓɛ́ ɔ nyu ké nyɔ ɖò ɓúá dyíɛɛ jùɛ. Jɛhova tɛ̀mɛ̀ìn ma ɔ dĩ́ín-dĩ̀ìnɔ̀ ti ɓɛ́ Éézùɖùɛ̀-nyɔ̀ ɓèɔ̀ sɔ̀ ma gìi mú ɖé Íjè-ɓòɖòɔ̀ kɔ̃ nyɛ̀nɛ̀ɛ̀ kɛ. Nàìn hwìɖìi: Éézùɖùɛ̀-nyɔ̀ méɔ̀ùn ɓè poìn dyí ɓó Sányà-Tòɖòɔ̀ gbo, ɓɛ́ wa kè waà Geɖepɔɔ ké gmɔìn. Ní-kpò kpɛ̃̀ ɖò ɓáìn toɖoɔ̀ kɔ̃in. Wàɖà cá kɛɛ, toɖoɔ̀ kɔ̃in-tɛɖɛ-tɛɖɛ—kè ɔ nyànà-sò mú-sɔ̀-sɔ̀—túò ɓóɖó-kpàà dyi, ké zɛ páná-wùɖù kè dyɔɔ̀-kuɖu-wùɖù ɔ kè gã̀à-wùɖù vɛ̀nɛ̀ ɖò nì dyiɛń. (Ɛ́sé. 19:​16-18; 24:17; Wɛ́ɖɛ́ 68:8) Nàìn kà díɖí nyu ma Éézùɖùɛ̀-nyɔ̀ ɓèɔ̀ taɓaa ti ɓɛ́ Jɛhova tɛ̀mɛ̀ìn ma ɔ dĩ́ín-dĩ̀ìnɔ̀ kɛɛ jè hwìɖìi.

 3. Ðɛ́ mɔ̀ Jɛhova dya-dè-dè xwíníín nyɛ́?

 ³ Kɛɛ, à mɔ̀ùn ɖé? À ɓɛ́ìn Jɛhova dya dèɛ̀ jàà cáà? Ǹdye, à ɓɛ́ìn nyuɛ. Hwìè ɖò kɔ̃̀ mú ɓɛ́ à dè Jɛhova dya kɛɛ mɔ̀ dyììn ɖé ɔ dĩ́ín-dĩ̀ìn-kpèɔ̀ kè ɔ kpeɖe nɔ̀mɔ̀ dyíin ɓèɔ̀ jè nyɔ tɔ̀ɔ̀ ɓè gbo cɛ̃-cɛ̃ mú. À dè Geɖepɔɔ dya ɖekè ɔ jù ké à dyi ɔ ɓàìn ɓó ɖɛ ɓè à nyu ɖé ɔ kpé múɛɛ jè ní. (Àzé. 26:12) Kã́á Dèɓé mɔ̀ ma dyí-tɛ̀mɛ̀ìn-ɖɛ̀ nɔ̀mɔ̀ dyíin ɖò cá ɔ dyi Jɛhova dya dè jè gbo dyi ní. Ðé ɓaà-wùɖù ɖò ɓɛ́ Dèɓé nyu ma ɓó Éézùɖùɛ̀-nyɔ̀ ɓèɔ̀ dyéɖé waí kɛ múɛɛ, ɔ cɛ̃ɛ ma, ké ɔ ɖá: “[Jɛhova,] m̀ gã̀ ní, ké mɔ̀ kɔ̃̀ kpéɔ̀ kè ganaɔ̀ kè dĩ́ín-dĩ̀ìnɔ̀ ɔ kè dya-dè-dèɔ̀, sepoɛɖe mɔ̀ kɔ̃̀ ɖɛ séín nì ɖé dyɔún ɔ kè nɔ ɓóɖó-kpàà kɔ̃ɛ. Óó [Jɛhova,] mɔ̀ kɔ̃̀ kã́á-ɓòɖòɔ̀. Mɔ̀ mɔ̀ ɖɛ séínɛ̀ dú-hwìɛ̀-cùɔ̀.” Ti ɓɛ́ Dèɓé ɖà ma ɓaà hwɔɛɛ, “nyɔ séínɔ̀ ɓàìn ma [Jɛhova].”—1 Ká. 29:​11, 20.

 4. Xwɛ̀ Jizɛ nyu ma Jɛhova dya dèɛ̀ kɛ́?

⁴ Ti ɓɛ́ Jizɛ nì ma dà ɓóɖó-kpàà kɔ̃ɛɛ, ɔ dè ma ɔ Ɓà dya dyììn ɖéɛ nyɔ ɓè gbo cɛ̃-cɛ̃ mú, kà ɓɛ́ zɛ̃́ìn-ɖɛ̀ ɓè ɔ nyu ma kɛɛ sɔ̀ìn ɖé ɔ Ɓà gboɛ. (Máà 5:​18-20) Jizɛ dè ma Jɛhova dya ɖekè dyììn ɖé kà ɔ nyu ma ɔ Ɓà jè cɛ̃ɛ kè kà ɔ nyu ma nyɔ tɔ̀ɔ̀ ɓè kpɔ̃-sɔ̃̀ nyuɛ kɛɛ mú. Ɓó wé ɖòɛ̀ ɓaɖaa, Jizɛ nì ma ɖɛ tɛ̀mɛ̀ìn ɖé Júù-nyɔ̀ ɓèɔ̀ cɔ́cì-gbòɔ̀ mú. Ðé nyɔ ɓè nì ma kà ɖùù tòɛ̀n nyɛ hwìɛ̀ kɛɛ, mɔ̀ ma màa ɖò ɓɛ́ ɔ ɓéɖé ma zùù gbà ɓó zɔ̃ ɓaɖa-bùè sè mɛ̀nɛìn-tã xwíníín nyɛ. Zùù gbàɔ̀ nyuɛ ké màaɔ̀ kíɖíí ma kɔ̃ tee, ké ɔ se ma dyí pɛ́ɛ̀ ɓɛ́ìn fɔɔ. Ɔ mɔ̀ ma fũ̀à-fṹá-ɖɛ̀ ɖò cá! Wìì nyuɛ ké Jizɛ wùɖù ma màaɔ̀ gbo ɖé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ mú, ké ɔ ɖá: “Noò, m̀ ɖà nì wɛ́ɔ̀ xwaún buɛ̀.” Ké ɔ pɛ̃́ìn ma ɔ sɔ̃ kɔ̃, ké wàɖà cá kɛɛ, màaɔ̀ pɛ́ɛ̀ ma dyí, ké ɔ “nyí ma Geɖepɔɔ ɓàìn-ɓàìn,” sepoɛɖe ɔ dyɔɔ̀ ɖà ma mú wóɖó, ké ɔ ɓéɖéá ma kpéín-dyé-dyé ɖe! (Ðúù 13:​10-13) Màa nìà wɛɛ ɓéɖé ma xwíníín nɔ̀mɔ̀ dyíin, ɓɛ́ ɔ ké ma Jɛhova dya dè, ké kàà à mɔ̀ùn nì ɖekè.

ÐƐ́ PO À KPÉÍ ƁƐ́ À KÉ JƐHOVA DYA DÈ KƐ́?

 5. Ðɛ́ mɔ̀ xwíníín ɓè ɓɛ́ à ɓéɖé ɓó Jɛhova kpéín dyé jè kɛ́?

⁵ À dè Jɛhova dya, sepoɛɖe à dyé ɔ kpéín mìɔ jè. À ɓéɖé xwíníín pàɖà ɓó ɔ kpéín dyé jè. Jɛhova mɔ̀ Kpé-séín-ɓéɖé-nyɔ̀; Ɔ kpéɔ̀ se sèìn-naín kɔ̃̀. (Wɛ́ɖɛ́ 96:​4-7) Ɔ fɔ̀nɔ̀-hwòɖòɔ̀ nì wáɖáá ɖé ɖɛ ɓè ɔ ɖà mɛɛ mú. Fɛ̀ɛ̀ à ɓéɖéà kɛɛ Sɔ̀ìn ɖé ɔ gbo, ké ɔ mɔ̀ɔ̀ Dyí-gmɔ̀-nyɔ̀. (Wɛ̀ɖ. 4:11) Ɔ mɔ̀ jàà-nyɔ̀. (Wɛ̀ɖ. 15:4) Ɔ nyuu-ɖɛ̀ séín wóɖó mú, ké ɖɛ séín ɔ ɖá nyɛ́nɛ́ɛ kpá jàà. (Jas 23:14) Ðɛa kɔ̃̀ jè kpáá-ɖɛ̀-cɛ̃-nyɔ̀ Jɛ̀ɖèmádyà cɛ̃ɛ ma ɓá Jɛhova jè dyí, ké ɔ ɖá: “Nyɔ ɖò se nì kà m̀ nìà kɛ, ɖé hwòɖò-fɔ̀nɔ̀-nyɔ̀ séín ɓè nì toɖo-kpàà kɔ̃ɛɛ hwìɛ̀ kè ɖé kã́á-ɓòɖò séín kɔ̃”! (Jɛ̀ɖ. 10:​6, 7) Jɛ́ɛ́ kɛɛ, à ɓéɖé xwíníín nɔ̀mɔ̀ dyíin ɓè kɔ̃̀ jè à ké à dyɔún Ɓàɔ̀ kpéín dyéɛ. Jɛhova kpa ɖɛ ɓɛ́ à ké ɔ kpéín dyé—ké ɔ kpa ɖɛ ɓɛ́ à ké ɔ mú ɖɛ̀ɓɛ̀ ɖekè.

 6. Xwíníínɔ̀ nyɛ́ kɔ̃̀ jè à ɖɛ̀ɓɛ̀à Jɛhova múɛ́?

⁶ À dè Jɛhova dya, sepoɛɖe à ɖɛ̀ɓɛ̀ ɔ mú mìɔ jè. Poìn kpeɖe ɖíɛ́ ɓè ɓɛ́ Jɛhova ɓéɖé kɔ̃̀ jè à ɖɛ̀ɓɛ̀à ɔ múɛɛ jè hwìɖìi. Ɔ ɓéɖé wìì kè hwòɖò-ɓɛ̀ɖɛ̀ɛ̀-ɓɛ̀ɖɛ̀ɛ̀. (Wɛ́ɖɛ́ 103:13; Àzé. 49:15) Ðɛ ɖò dyi à puà ní, ɔ puà ɔ ɖekè. (Zɛ́k. 2:8) Ɔ nyuɛ ké ɔ fɛ̃́ìn xwa ɓɛ́ à ké ɔ bũ̀in xwɛ̃́ìn, kè ɓɛ́ à ké ɔ ɓàto jù. (Wɛ́ɖɛ́ 25:14; Àpɔ́. 17:27) Ké ɔ dyà ɔ mìɔùn ɓíɖíi ɖekè; “ɔ gmɔ̀ ɓíɖíi vɛ̃in, ɓɛ́ ɔ ké dyɔɔ̀ kè ɓóɖó-kpàà dyé. Ɔ zà gà-dyé-nyɔ̀ ɓè tĩ́ɔ mú.” (Wɛ́ɖɛ́ 113:​6, 7) Nìí, xwɛ̀ nyɔ ɖò ké se à dĩ́ín-dĩ̀ìn Geɖepɔɔ dya dèɛ̀ mɔ́ kɛ́?—Wɛ́ɖɛ́ 86:12.

 7. Ðɛ́ mɔ̀ ti nɔ̀mɔ̀ dyíin jɛ́ɛ́ ɖò ɓɛ́ à ɓéɖé kɛ́?

⁷ À dè Jɛhova dya, sepoɛɖe à mɔ́ ɓɛ́ nyɔ tɔ̀ɔ̀ ɓè ké ɔ dyí dyuò jè. Nyɔ ɓáún-ɓáún se jàà ɓá Jɛhova jè dyíɛɛ dyí dyuò. Xwíníínɔ̀  nyɛ́ kɔ̃̀ jèɛ́? Sepoɛɖe Sétɔ̃̀ ɖà wa hwòɖò kɔ̃in kpèìn dyììn ɖé Jɛhova se nyìnììn kɔ̃in ɓè wĩin tɔ́mɔ́ìn-tɔ́mɔ́ìn mú. (2 Kɔ̀. 4:4) Sétɔ̃̀ ɖàa nyu ɓɛ́ nyɔ ɓè kéɛ jàà po kà ɓɛ́ Jɛhova ní zĩ̀ìn nyɔ kɔ̃in ké ɔ mɔ̀ hwòɖò-kɔ̃in-nyìnììn-nyɔ̀ ɔ kè gà-dyé-dyé nìà ɓóɖó-kpàà kɔ̃ɛɛ pàɖà dyà-nyɔ̀ kɛ. Kɛɛ, à dyuò jàà ɓá à Geɖepɔɔ jè dyíɛɛ dyí! À ɓéɖé ti nɔ̀mɔ̀ dyíin, ɓɛ́ à ké ɖɛ dyí sɛ́ɖɛ́ìn, ɓɛ́ à ké ɔ dya dè. (Àzé. 43:10) Wɛ́ɖɛ́ 96 nɛ́ìn Jɛhova dya dè jè jìì kɔ̃. Kà à muà Geɖepɔɔ-wùɖù ɖíɛ́ ɓè céèà wɛ́ɖɛ́ nìà kɛ múɛɛ dɔ́ɔ́ kɔ̃in dèìn nyɛɛ, poìn hwìè ɓè kɔ̃̀ mú m̀ ɓɛ́ìn dya-dè-dè Jɛhova kɔ̃̀ ɔ ké ɓéɖéɛ ɔ nyíɛ kɛɛ jè hwìɖìi.

XWƐ̀ À ƁƐ́ÌN DYA-DÈ-DÈ JƐHOVA KƆ̃̀ Ɔ KÉ ƁÉÐÉƐƐ Ɔ NYÍƐ KƐ́?

 8. Ðɛ́ mɔ̀ hwìè ɖò kɔ̃̀ mú à ɓɛ́ìn Jɛhova dya dèɛ̀ kɛ́? (Wɛ́ɖɛ́ 96:​1-3)

⁸ Zà Wɛ́ɖɛ́ 96:​1-3 wuɖuún. À ɓɛ́ìn Jɛhova dya dèɛ̀ dyììn ɖé ɖɛ à cɛ̃ ɓá ɔ jè dyíɛɛ mú. Vɔ̀sì ɓè nìà kɛ cɛ̃ɛ Jɛhova nyɔ ɓèɔ̀ gbo kà wa mɛ “ɓèɖèìn Jɛhova gbo,” ké wa mɛ “ɓàìn ɔ nyɛ́nɛ́ɔ̀,” ké wa mɛ “po kà ɔ nyu nyɔ póɛ̀n nyɛɛ bɔ̃̀ dyi,” ké wa mɛ “po zio ɓá ɔ dĩ́ín-dĩ̀ìnɔ̀ jè dyí ɖé ɓóɖó-dù ɓèɔ̀ gbo” kɛ. Ðɛ séín ɓè nìà kɛɛ mɔ̀ hwìè ɓè kɔ̃̀ mú à ɓɛ́ìn à dyɔún Ɓàɔ̀ dya dèɛ̀ kɛ. Júù-nyɔ̀ ɓè kè Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ se ma fɛ̃̀ìn, ɓɛ́ wa ké ma ɖɛ nɔ̀mɔ̀ dyíin séín ɓɛ́ Jɛhova ɖà ma wa bìì nyuɛɛ nyɔ tɔ̀ɔ̀ ɓè gbo cɛ̃, kè ɓɛ́ wa ké ma ɔ nyɛ́nɛ́ín-nyɛ̀nɛ̀ ɖá. (Dàn. 3:​16-18; Àpɔ́. 4:29) Xwɛ̀ à ɓɛ́ìn ɖɛ dyúáɖòɔ̀ nyuɛ kɛ́?

9-10. Ðɛ́ à cɛ̃́ Ã̀jɛ̀ɖínà xwaún wɛ̃́? (Dyé dyi-dyé-ɖɛ̀ɔ̀ ɖekè.)

⁹ Poìn ɖɛ Ã̀jɛ̀ɖínà a dyé ma dyíɛɛ jè hwìɖìi. Ɔ mɔ̀ ɖíí-màà ɖò ɓɛ́ ɔ cĩ́ ɖé Mɛ́ɖékà-ɓòɖòɔ̀ kɔ̃ɛ. Ɔ cɛ̃ ma Jɛhova jè fã̀à-wɔ̃-zi-kà ɖé ɔ kũ̀à-nyùìn-naínɔ̀. Ã̀jɛ̀ɖínà mɔ̀ ma kũ̀à-nyɔ̀ ɖìè jèɛɛ, wa ɖá ma ɔ dyí-poìn-poìn ɖò kɔ̃̀ mú ɓɛ́ wa nyí nyɔ ɓè dyi kɔ̃́pɛ́nɛ̀ɔ̀ mú ɖieɛɛ ti, ɓɛ́ wa ké wa mìɔùn jè kɔ̃in zaìn ɖé wa mùe ɓè gboɛɛ mú. Ã̀jɛ̀ɖínà po ma dyi-dyé-ɖɛ̀ ɓè ɓɛ́ wa tɛ̀mɛ̀ìn ma múà ɔ ɓéɖé sepoɛɖe ɔ mɔ̀ Jɛhova Zàse ɓèɔ̀ ɖò jèɛɛ páún. Kɛɛ, hwɛ̀ ɓɛ́ ɔ wùɖù-tì ké ma ɓó nyini nyɛ̀nɛ̀ɛ̀ kɛɛ, ɔ mùe-kũ̀à-nyu-nyɔ̀ ɖò zà ma ɔ mìɔùn da kà wa gmɛ̀ìn ma ɔ, ɓɛ́ ɔ ké ma Jɛhova Zàse ɓèɔ̀ ɖò jùɛ. Ɔ ɖú ma ɖɛ ɓè à po jàà kɛɛ dyɔ́ ɓaɖa kpàì. Ã̀jɛ̀ɖínà ɖá: “Ní hwòɖò-dyùàɔ̀ nì ma ɓaɖauń. Kɛɛ, m̀ cɛ̃ɛ ma ḿ mìɔùn gbo, ké ḿ ɖá: ‘Ní mu wɔ̃́ùn ɓɛ́ nyɔ ɖò ké se tɔ́mɔ́ ɓá Jɛhova jè dyíì? Mɔɔ ḿ mu ɔ bìì wùɖùùnǹ?’”

 ¹⁰ Ti ɔ mùeɔ̀ jaɖa ma wuɖuɛɛ, Ã̀jɛ̀ɖínà ɓaà ma wàɖà ɖé ɔ hwòɖòɔ̀ bũ̀, ké ɔ wùɖù ma ɔ mùeɔ̀ gbo kpéín-dyé-kà, ké ɔ ɖá: “Ḿ kè mɔ̀ kè ɓíɖíi-wóɖó-wóɖó hwɔìn ní. Wa gmɛ̀ìn ma ḿ, ɓɛ́ ḿ ké ma Jɛhova Zàse ɓèɔ̀ ɖò jù ɖekè, ké ḿ mɔ̀ wa ɖò zɛ̃̀ɛ̀.” Dyoɖo nì ma dyiɛń mɛ́nɛ́-mɛ́nɛ́, kɛɛ Ã̀jɛ̀ɖínà se ma fɛ̃̀ìn, ké ɔ nì ma dyi-dyé-ɖɛ̀ ɓè sɔ̀ìn Jɛhova Zàse ɓèɛ̀ dyí-poìn-poìn ɓè ɔ mu ma gboɛ múɛɛ tɛ̀mɛ̀ìn, ké ɔ nì ma ɔ jàà-po-ɖɛ̀ ɓèɔ̀ jè kɔ̃in zaìn kpéín-dyé-kà. (1 Píɖɛ̀ 3:15) Ðɛ́ sɔ̀ìn ma ɖéɛ́? Ti ɓɛ́ Ã̀jɛ̀ɖínà hwɛ̀ ma kɛɛ, gàaɔ̀ dyoɖo-hwòɖò wáɖá ma. Ɔ cɛ̃ɛ ma ɖekè kà ɔ dyé ma ɖɛ nɔ̀mɔ̀ dyíin ɓè dyí ti ɔ nì ma ɓíɖíi wóɖóɛń ɖé Jɛhova Zàse ɓè hwìɛ̀ kɛ. Ã́jɛ̀ɖínà ɖá: “Jɛhova kpa ɖɛ ɓɛ́ à ké ɔ bìì wùɖù. Ɔ mɔ̀ dya-dè-dè ɓɛ́ ḿ ké jàà ɓá ɔ dyíɛɛ jè cɛ̃ kɛ.” Ɔ mɔ̀ dya-dè-dè ɓó à bìì ɖekè, ɓɛ́ à ké Jɛhova ɓàìn, kè ɓɛ́ à ké ɔ dya dè kɛbì nyɔ tɔ̀ɔ̀ ɓè mɛ se ɔ dya dèɛ.

11. Xwɛ̀ jàà ɓiè-nyɔ̀ ɓè ɖà hwìè-da-wùɖù nìà Wɛ́ɖɛ́ 96:8 múɛɛ kíɖíí sí teeɛ́?

¹¹ Zà Wɛ́ɖɛ́ 96:8 wuɖuún. À ɓɛ́ìn Jɛhova dya dèɛ̀ dyììn ɖé à kɔ́mɔ́-ɖɛ̀ ɓèɔ̀ mú. Jàà ɓiè-nyɔ̀ ɓè ɖà Jɛhova dya dè dyììn ɖé hwìè nìà kɛ mú tee. (Nɔ́ɔ́ 3:9) Ɔ hwɔìn-kà, Éézùɖùɛ̀-nyɔ̀ ɓèɔ̀ tò ma nyíí-ɖɛ̀ ɓó Geɖepɔɔ gbòɔ̀ po jè kè ɔ xwa nɔ̀mɔ̀ìn jè. (2 Kĩ́ín 12:​4, 5; 1 Ká. 29:​3-9) Kɛ́ɖɛ́ìɛ̀ ɖeín-nà-nyɔ̀ ɓèɔ̀ nyùìn ma “ɖɛ ɓè ɓɛ́ wa ɓéɖé ma” kɛɛ kũ̀à mú ɓɛ́ wa ké ma ɔ kè ɔ àpɔ́sò ɓèɔ̀ gbo kpá. (Ðúù 8:​1-3) Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ tò ma gbo-kpá-sɔ̃̀ ɓó wa ɖíí ɓèɔ̀ gbo kpá jè ɖekè. (Àpɔ́. 11:​27-29) Zɛ̃̀ɛ̀ kɛɛ, à mɔ̀ùn ɓɛ́ìn Jɛhova dya dèɛ̀ dyììn ɖé à hwòɖòɛ̀-wɔ̃́ín-nyíí-ɖɛ̀ ɓè mú.

12. Xwɛ̀ à nyíí-ɖɛ̀ ɓèɔ̀ nyu Jɛhova dya dèɛ̀ kɛ́? (Dyé dyi-dyé-ɖɛ̀ɔ̀ ɖekè.)

¹² Poìn ɖɛ dyúáɖò ɓɛ́ ɔ tɛ̀mɛ̀ìn kà à nyíí-ɖɛ̀ ɓèɔ̀ nyu Jɛhova dya dèɛ̀ kɛɛ jè hwìɖìi. Bɔ̃̀ ɖò ɓɛ́ ɔ dyi ma 2020 kɛɛ zaìn ɖɛ kpá ma ti ɓɛ́ ní se ma ɖaɓa ɓó ti tɔ̀mɔ̀ùn-tɔ̀mɔ̀ùn xwíníín ɖé Zĩ̀ìnbáɓúè-ɓòɖòɔ̀ kɔ̃ɛɛ jè kɔ̃in. Nyɔ méɔ̀ùn zi kɔ̃ ɓè táà ma mɔ́ xwaún mɛ́ɛ ɓɛ́ wa ɖò mɔ̀ ma à ɖíí-màà wa ɖáìn Pìɖìsíɖà kɛ. Mɔ́ kpá ma ní dyɛo, kɛɛ Pìɖìsíɖà wáɖá ma Geɖepɔɔ-wùɖùɔ̀ tee ɓó Wɛ́nɛ́dè kè Fáɖáádè séín, ɔ kè ɖɛ-ɓá-tì ɓè ɓaɖa ɖekè. Nyɔ ɓè nì ma ɖé ɔ gbɛ̀ɔ̀ múɛɛ ɓaɖa ma ɔ dyɔ́ ɓó wuɖu-wáɖá-kũ̀àɔ̀ nyu-nyu ɓó ɖɛ-ɓá-ɓá bɛ̃̀ìn nyɛɛ jè, ké wa ɖá, “Mɔ́ mu m̀ ɖáɓáo.” Pìɖìsíɖà jù ma wa gɔ̃̀ ɖɛ-hwòɖò-kɔ̃-dè-kà tee, ké ɔ ɖá, “Jɛhova séè ɔ nyɔ ɓèɔ̀ kɔ̃ín pòìn ɖò.” Sɔ̀ìn ɓó tia gboɛɛ, ɔ se  hwèɖèìn, ké ɔ dyé ma gbo-kpá-sɔ̃̀ ɓè sɔ̀ìn ɖé à kpooɔ̀ gbo. Gbo-kpá-sɔ̃̀ ɓèà nì ma, sepoɛɖe à tò nyíí-ɖɛ̀ jè. Nyɔ ɓè nì ma ɖé Pìɖìsíɖà gbɛ̀ɔ̀ múɛɛ giniìn ma dyi, ké wa cɛ̃ɛ ma ɔ gbo, ké wa ɖá, “Geɖepɔɔ se m̀ kɔ̃ín pòìn jàà, ɔ jèɛɛ, à mɔ́ ɓɛ́ à ké ɖɛ pàɖà cɛ̃́ ɓá ɔ jè dyí.” Nyɔ-kpò mɛ̀nɛìn-sɔ̃́ sɔ̀ìn ɖé Pìɖìsíɖà gbɛ̀ɔ̀ múɛɛ ɖú ma dyí-poìn-poìn ɓèɔ̀ mú mu kpàì.

13. Xwɛ̀ à kpeɖe ɓɛ́ìn Jɛhova dya dèɛ̀ kɛ́? (Wɛ́ɖɛ́ 96:9)

¹³ Zà Wɛ́ɖɛ́ 96:9 wuɖuún. À ɓɛ́ìn Jɛhova dya dèɛ̀ dyììn ɖé à kpeɖe mú. Sáa-zà-nyɔ̀ ɓè ɓɛ́ wa nyu ma kũ̀à ɖé Geɖepɔɔ gbòɔ̀ múɛɛ kɔ̃̀ wa ké ma mú hwɛ̀ ɖé kpóɖóún. (Ɛ́sé. 40:​30-32) Ɔ nì ná dyɛo, kɛɛ ɔ kpa ma ɖɛ mìɔ, ɓɛ́ wa ké ma mú hwɛ̀ ɖé waà kpeɖe ɓè mú. (Wɛ́ɖɛ́ 24:​3, 4; 1 Píɖɛ̀ 1:​15, 16) À kɔ̃̀ à ké vɔ̃ kóɖó-kóɖó, ɓɛ́ à ké “nyɔ [à] jù ma kĩ́ín nyɛ”—mɔ̀à kpeɖe gbà ɓèɛɛ dyi táà—ɓɛ́ à ké “nyɔ ɖìè”—mɔ̀à hwìɖìi-poìn-kà kè ɖɛ-nyu-kà ɓɛ́ ɔ tɛ̀mɛ̀ìn Jɛhovaa dĩ́ín-dĩ̀ìn-kpèɖè ɓèɔ̀ kɛɛ dyí ɖú. (Kɔ̀ɖ. 3:​9, 10) Dyììn ɖé Jɛhova kpé múɛɛ, nyɔ ɓɛ́ ɔ mɔ̀ gbàɖàùn-po-nyɔ̀ vɛ̀nɛ̀ kè hwɔ̀ɖɔ̀-gbàà-vɔ̃-nyɔ̀ kɛɛ ɓɛ́ìn gbo zĩàìn, ɓɛ́ ɔ ké nyɔ ɖìèɔ̀ dyí ɖú.

14. Ðɛ́ m̀ cɛ̃́ Jáà xwaún wɛ̃́? (Dyé dyi-dyé-ɖɛ̀ɔ̀ ɖekè.)

¹⁴ Poìn ɖɛ Jáà dyé ma dyíɛɛ jè hwìɖìi. Ɔ mɔ̀ ma gàa nyìnììn kpeɖeín ɖò cá kɔ̃̀ ɖe-nyɛ̀nɛ̀ mɔ̀ ma Zùù-Gbà kɛ. Ɓó Jáà ɖɛ gbà nyu jèɛɛ, zaa kpɔ̃ ma ɔ ɓɛ́ wa ké ma ɔ ɖáɓá. Kɛɛ, ti ɔ nì ma ɔ mɛ́-tìɔ̀ dya gmɔ̀ùn wɛ̃ɛ, ɔ wɔ̃́ìn ma gbo ɓɛ́ ɖíí-gàà ɖò ɓɛ́ ɔ mu ma dɛ̀ ɔ nì ma kà kpɔɖɔ ɖeín nyɛɛ ké ma ɔ Baɓoɔ tɛ̀mɛ̀ìn. Jáà nyìnììn ma kpeɖeín dyɛo, kɛɛ ɔ táà ma nyɔ ɔ jù ma kĩ́ín nyɛɛ dyi, ké ti wè ɖà ma ziɛɛ, ɔ kpá ma níɔ. Jáà zĩàìn ma gbo mìɔ, ké ɔ nyuɛ ké wé kɔ̃̀ ɓaɖa ɔ kɔ̃̀ ɔ ké ma mɛ́ɛ, kpɔɖɔ-dyí-gmɔ̀-nyɔ̀ ɖíɛ́ ɓè nì vĩ̀ɛ̀n ti wa nì ma ɔ cuòɛ̀n nyɛ. Sójà-nyɔ̀ vɛ̀nɛ̀ ɖò ɓɛ́ ɔ nyu ma kpɔɖɔɔ̀ gbo kũ̀à kɛɛ cɛ̃ɛ ma, ké ɔ ɖá: “Jáà mɔ̀ ma kpeɖeɛ̀-dyíin-nyìnììn-nyɔ̀ vɛ̀nɛ̀ ɖò cá ɖé ɔ mùe ɓèɔ̀ hwìɛ̀. Kàùn wɛ̃ɛ, ɔ mɔ̀á kpéɖéín-nɔ̀mɔ̀-nyɔ̀ ɓèɔ̀ ɖò.” Wíkìɔ̀ nyɔ kɔ ma ɓó dyí ti wa ɖà ma Jáà ɖáɓáa, ɖíí-gàà ɓè mu ma dyí-poìn-poìn ɓéɖéɛń ɖé kpɔɖɔɔ̀ ɖeín. Wa kè kpɔɖɔ-ɖeín-nì-nyɔ̀ ɖò ɓɛ́ ɔ mɔ̀ ma ɔ ti kĩ́ín ɓɛ́ ɔ ké ma dyí-poìn-poìnɔ̀ mú muɛɛ dyéìn ma. Ðɛ́ po ma ɔ kpéí, ɓɛ́ ɔ dyi ma kà ɖé múɛ́? Jáà kpeɖe gbo-zĩàìn-zĩàìnɔ̀ tó ma ɔ hwòɖòɔ̀ dyi, ké ɔ mɔ́ ɓɛ́ ɔ ké ma ɖɛ ɔ kɔ̃̀ ɔ ké ma nyu ɓɛ́ ɔ ké ma  Jɛhova ɓiè kɛɛ dyí dyuò. Wáɖáá kɛɛ, à kpeɖe ɓɛ́ìn à dyɔún Ɓàɔ̀ dya dèɛ̀!—1 Píɖɛ̀ 2:12.

XWƐ̀ JƐHOVA MU Ɔ NYƐ́NƐ́Ɔ̀ DYA DÈÌN ÐÉ DYÚA KƐ́?

15. Xwɛ̀ Jɛhova mu ɔ nyɛ́nɛ́ɔ̀ dya dèìn gàná cá ɖé dyúa kɛ́? (Wɛ́ɖɛ́ 96:​10-13)

¹⁵ Zà Wɛ́ɖɛ́ 96:​10-13 wuɖuún. Vɔ̀sì hwɛ̀ìn-gbɔ ɓè nìà ɖé Wɛ́ɖɛ́ 96 múɛɛ ɖáìn Jɛhova dyí-sɛ́ɖɛ́ìn-ɖɛ̀-wɔ̃-po-nyɔ̀ kè Kã́á. Xwɛ̀ Jɛhova mu ɔ nyɛ́nɛ́ɔ̀ dya dèìn ɖé dyúa kɛ́? Ɔ mɔ̀ dyììn ɖé ɔ zaa-wɔ̃-po-poɔ̀ mú. Ɔ mu Báɓéɖɔ́ùn-hwɔ̀ɖɔ̀ vɛ̀nɛ̀ɔ̀ mú gbɔɔùn kàùn, sepoɛɖe ɔ dyà ɔ nyɛ́nɛ́ hwɛ̀in-hwɛ̀inɔ̀ dɛ̃ kɔ̃ jè. (Wɛ̀ɖ. 17:​5, 16; 19:​1, 2) Nyɔ ɖíɛ́ ɓè ɓɛ́ wa mu Báɓéɖɔ́ùn-hwɔ̀ɖɔ̀ vɛ̀nɛ̀ɔ̀ mú-gbɔɔ̀-gbɔɔ̀ dyéìn nyɛɛ muɛ dyɛ̀ gbɔ poùn ɓɛ́ wa ké Jɛhova ɓiè. Nìí, ɓó Àmàgɛ́ɖɔ̀ùn-tòɔ̀ tiín ní, Jɛhova mu ɓóɖó-kpà gàná ɓɛ́ Sétɔ̃̀ kɔ̃̀à wuɖuíɛɛ mú gbɔɔ̀ùn, ké ɔ mu nyɔ séín ɓè ɓɛ́ wa vɔ̃ ɔ gbo, ké wa cɛ̃ ɔ nyɛ́nɛ́ɔ̀ ɖɛ gbà kɔ̃ún wɛ̃ɛ mú gbɔɔ̀ùn. Kɛɛ, ɔ mu nyɔ séín ɓè ɓɛ́ wa ɖɛ̀ɓɛ̀ ɔ mú, ké wa nyu ɔ wuɖu, ké wa nyí ɔ dya-dè-dè kɛɛ póìn. (Máà 8:38; 2 Tɛ̀s. 1:​6-10) Jɛhova mu ɔ nyɛ́nɛ́ɔ̀ mú hwɔùn gàná cá ɖé mú-dɔ̃̀-dɔ̃̀ hwɛ̀ìn-gbɔ ɓɛ́ ɔ kɔà ɓó Kɛ́ɖɛ́ì Zɔ̃ Táàzĩ̀ìnɔ̀ ɖeín dyíɛɛ mánáín. (Wɛ̀ɖ. 20:​7-10) Ɓó tia ɓaɖaa, “nyɔ ɓè mu [Jɛhovaa] dĩ́ín-dĩ̀ìnɔ̀ dyí dyuòùn ɖé ɓóɖó-kpàà dà séín kà ní jĩ̀à ɖé dyóóɔ̀ kɔ̃ɛ.”—Hàb. 2:14.

16. Ðɛ́ m̀ jìnììn kɔ̃ ɓɛ́ m̀ ké nyu kɛ́? (Dyé dyi-dyé-ɖɛ̀ɔ̀ ɖekè.)

¹⁶ Ɔ mu múà-ɖɛ̀ vɛ̀nɛ̀ ɖò jùùn ɓó ti ɓɛ́ nyɔ séín nì cĩ́ɛń nyɛɛ muà dya-dè-dè ɓɛ́ Jɛhova kɔ̃̀ ɔ ké ɓéɖéɛɛ ɔ nyíìn nyɛ! Kɛɛ, hwɛ̀ ɓɛ́ tia ké nyiniɛɛ, à ɓɛ́ìn ɖɛ à ɓɛ́ìn nyuɛ kɛɛ nyuɛ dyììn ɖé à Geɖepɔɔ dya-dè-dè mú ɓó ti nɔ̀mɔ̀ dyíin séín ɖò ɓaɖa. Ɓɛ́ Nyɔ-Dyúa-Nì-Nyɔ̀ Ɓèɔ̀ ké ɖɛ nìà kɛ jìì kɔ̃ nɛ́ìn nyɛɛ, wa ɖà Wɛ́ɖɛ́ 96:8 gã, ɓɛ́ ɔ ké zɔ̃ɔ̀ hìɖì-kpà jù ɓó 2025 bìì: “Ɓè dè [Jɛhovaa] nyɛ́nɛ́ dĩ́ín-dĩ̀ìnɔ̀ dya.”