1. Ðɛ́ à ɓɛ́ìn nyuɛ ɓɛ́ Jɛhova ké múàùn kpá kɛ́?

 NÀÌN HWÌÐÌI kà m̀ nì nyɔ ɖò ɓɛ́ m̀ ɖɛ̀ɓɛ̀ múɛɛ nyíí-ɖɛ̀ kpa ɖɛ ɖò ɓɛ́ ɔ nɔ̀mɔ̀ dyíin ké nyɔɔ̀ ɓɛ́ìn kũ̀à mú nyùɛ̀n nyɛɛ ɔ nyíɛń nyɛ. Nì hwòɖò mú ɖé ɖei kpáùn mìɔ cá ɔ jù ké nyɔa dyi nyíí-ɖɛ̀ nìà wɛ da po, ké ɔ seɛ jè hwìɖìi poìn ɖe fɔɔ ní! Kɛɛ, nì hwòɖòɔ̀ mu dyi dèìn jɛ́ɛ́ cá ɔ jù ké nyɔɔ̀ dyi nì nyíí-ɖɛ̀ɔ̀ kũ̀à mú nyùìn nɔ̀mɔ̀ dyíin, ké ɔ dyi zùo-po-hwòɖò tɛ̀mɛ̀ìn ɓóɛ jè ní. Ðɛ́ mɔ̀ fɔ̀nɔ̀-hwòɖòɔ̀ kɛ́? Jɛhova ɖà ɔ Dyú-gààɔ̀ tò ɓó à bìì. Jɛhova mu múàùn kpáùn mìɔ ɔ jù ké à dyi zùo-po-hwòɖò tɛ̀mɛ̀ìn ɓó nyíí-ɖɛ̀ kpa ɖɛ nìà wɛ jè, ké à dyi ɔ zùo po ɓó ɔ ɖɛ̀ɓɛ̀ìn-ɖɛ̀ɓɛ̀ìn ɓɛ́ ɔ nyuà ké ɔ tòà mú-gbààìn-ɖɛ̀ɔ̀ kɛɛ jè ní!—Jɔ̃́ɔ́ 3:16; Wóɖ. 5:​7, 8.

 2. Ðɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

² Kà tiɔ̀ muà ziɛń nììn nyɛɛ, à zùo-po-hwòɖò ɓó mú-gbààìn-ɖɛ̀ɔ̀ jèɛɛ ɓɛ́ìn wɔ̃ wáɖáuń nìɛ̀ mɛ́nɛ́-mɛ́nɛ́. Ɔ mu nììn kà nyɔ nìɔ́ kà Geɖepɔɔ nyíí-ɖɛ̀ɔ̀ da poɛń nyɛ. À kpá múàùn ɓó ɔ ɓéɖé jè, kɛɛ à poɛ vìe-dà. Ɓɛ́ à ké ɔ náa nyu-nyu ɓɔ́í po ní, à ɓéɖé ɓɛ́ à ké ɖɛ ɓɛ́ Geɖepɔɔ kè Kɛ́ɖɛ́ì ɖàà à bìì nyuɛɛ jè hwìɖìi dyà tee. Cɛ̃́ɛ́-ɖɛ̀ nìà kɛ mu à gbo kpáùn ɓɛ́ à kéɛ náa nyu. À mu kà à nyu mú-gbààìn-ɖɛ̀ɔ̀ kpáná kɔ̃ún dyéɛ kàùn, kè kà à ɓɛ́ìn kpáná kɔ̃ún dyéɛ ɖé dyúa kɛɛ jè dɔ́ɔ́ kɔ̃in dèìn. Ké à mu kà à ɓɛ́ìn Jɛhova zùo poɛ ɓó ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jè, jɛ́ɛ́ ɓó Ðɛ-hwìɖìi-dyà-hwɔ̀ɔ̀ tiín nyɛɛ jè cɛ̃ìn ɖekè.

KÀ À NYU KPÁNÁ DYÉƐ KÀÙN WƐ̃

 3. Ðɛ́ mɔ̀ hwìè ɖò kɔ̃̀ mú à dyé mú-gbààìn-ɖɛ̀ɔ̀ kpáná kɔ̃ún kàùn wɛ̃́?

³ À nì Kɛ́ɖɛ́ì sáa-zà-zàɔ̀ kpáná kɔ̃ún dyéɛń kàùn. Ɔ hwɔìn-kà,  dyììn ɖé mú-gbààìn-ɖɛ̀ɔ̀ múɛɛ, Jɛhova zĩ̀ìn à nàmàùn ɓèɔ̀ kɔ̃in. Ɔ se ɓéɖé ɓɛ́ ɔ ké à kɔ̃in zĩ̀ìn. Kɛɛ, ɔ mɔ́ɔ nyuɛ dyi. Wɛ́ɖɛ́-céè-nyɔ̀ɔ̀ ɓeɖe ma zùo-po-kà, ké ɔ ɖá: “Nì kpeɖe zi dyíin nɔ̀mɔ̀ùn, ké nì zĩ̀ìn nyɔ kɔ̃in.”—Wɛ́ɖɛ́ 86:5; 103:​3, 10-13.

 4. Nyɛ́ ɓè kɔ̃̀ bìì Jɛhova tò ma mú-gbààìn-ɖɛ̀ɔ̀ kɛ́? (Ðúù 5:32; 1 Tímétè 1:15)

⁴ Nyɔ ɖíɛ́ ɓè poɛ̀n hwìɖìi kà wa se ɖɛ kpa ɓó Jɛhovaa kɔ̃in-zĩ̀ìn-zĩ̀ìnɔ̀ jèɛ. Jàà kɛɛ, à séín se ɖɛ kpa. Àpɔ́sò Pɔ́ɔ̀ wɔ̃́ɔ ma múin, ké ɔ ɖá, “ḿ se ɖɛ kpa, ɓɛ́ wa ké ḿ àpɔ́sò ɖáìn.” Kɛɛ, ɔ cɛ̃ɛ ma ɖe, ké ɔ ɖá: “Geɖepɔɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuɛ ké ḿ mɔ̀ nyɔ ḿ jùà kàùn wɛ̃.” (1 Kɔ̀. 15:​9, 10) À dyi à nàmàùn ɓèɔ̀ dyi táà ní, Jɛhova zĩ̀ìn à kɔ̃in. Xwíníínɔ̀ nyɛ́ kɔ̃̀ jèɛ́? Ɔ se ɖɛ ɓɛ́ à nyu kũ̀à ɓóɛ jèɛ, kɛɛ ɔ mɔ̀ sepoɛɖe ɔ ɖɛ̀ɓɛ̀ à mú jè. Ɔ jù ké nì hwòɖò dyi ɖé ɖei kpá sepoɛɖe nì hwòɖò ɖá m̀ se ɖɛ kpa jè ní, ɔ mɛ nì m̀ hwìɖìi kà ɓɛ́ Jɛhova se ma mú-gbààìn-ɖɛ̀ɔ̀ tò ɓó dyí-sɛ́ɖɛ́ìn-nyɔ̀ ɓè bììɛ, kɛɛ ɔ tòɛ̀ ma ɓó nyɔ ɓè táà wa nàmàùn-kpèɖè dyiɛɛ bìì.—Zà Ðúù 5:32; 1 Tímétè 1:15 wuɖuún.

 5. Ðé jàà múɛɛ, à séín ɖò ɓɛ́ìn hwìɖìi poìn kà Jɛhova ɓéɖé ɓɛ́ ɔ ké à wìì kɔ̃ ɓéɖéɛɛ̀? Zaìn kɔ̃in.

⁵ À ɖò mɛ ɓɔ́ɔ hwìɖìi poìn kà Jɛhova ɓéɖé ɓɛ́ ɔ ké à wìì kɔ̃ ɓéɖéɛ, kɛbì à mɛ ɖà ɔ bìì kũ̀à nyu ɓó zɔ̃ pàɖà xwíníín nyɛ. Ɔ mɔ̀ jàà kà ɓɛ́ Jɛhova kpáìn kũ̀à ɓè à ɖà nyuɛɛ múàùn dyiɛ. (Híì. 6:10) Ɔ tò ma ɔ Dyú-gààɔ̀ à dyí pidyi, ké ɔ se kũ̀à ɓè à nyuɛɛ pɛ́ɛ̀-ɖɛ̀. Ɔ jù ké à dyiɔ́ɔ cɛ̃ kà à ɖà kũ̀à nyu ɓó Geɖepɔɔ wììɔ̀ jè, mɔɔ kà ɔ ɓéɖé ɓɛ́ ɔ ké à kpɔ̃ ɖé hwìè jɛ́ɛ́ ɖò múɛ ní, nìí, à muɛ cɛ̃ɛń nì kà ɓɛ́ Kɛ́ɖɛ́ì mɛ́ ma pídyiɛ.—Poɛ̀n kè Gáɖézìà 2:21 dyí.

 6. Xwíníínɔ̀ nyɛ́ kɔ̃̀ jè Pɔ́ɔ̀ nyu ma Jɛhova bìì kũ̀à kóɖó-kóɖó kɛ́?

⁶ Pɔ́ɔ̀ dyuòɛ̀ ma dyí kà ɔ se ma kũ̀à nyuɛ ɓɛ́ìn ɓó Geɖepɔɔ wììɔ̀ jèɛ. Nìí, xwíníínɔ̀ nyɛ́ kɔ̃̀ jè ɔ nyu ma kũ̀à kóɖó-kóɖó ɓó Jɛhova bììɛ́? Ɔ se ɓɛ́ ɔ kéɛ ma tɛ̀mɛ̀ìn kà ɔ ɓéɖé ɓɛ́ ɔ ké ma ɖɛ ɖò dyéɛ, kɛɛ ɔ mɔ̀ ɓɛ́ ɔ kéɛ ma tɛ̀mɛ̀ìn kà ɔ po Jɛhova zùo ɓó ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ jèɛ. (Ìfí. 3:7) Kà Pɔ́ɔ̀ nì ma kà kɛɛ, kàà à mɔ̀ùn nyu kũ̀à kóɖó-kóɖó tee, ɓɛ́ à ké zùo-po-hwòɖò tɛ̀mɛ̀ìn ɓó Jɛhova wììɔ̀ jè, kɛɛ ɔ se ɓɛ́ à kéɛ tɛ̀mɛ̀ìn kà à ɓéɖé ɓɛ́ à ké ɔ wììɔ̀ dyéɛ.

 7. Ðɛ́ mɔ̀ hwìè ɖò kɔ̃̀ mú ɓɛ́ à dyé mú-gbààìn-ɖɛ̀ɔ̀ kpáná kɔ̃ún ɖe kàùn wɛ̃́? (Wóɖómà 5:1; Jĩ́ìn 2:23)

⁷ Hwìè ɖò kɔ̃̀ mú ɓɛ́ à dyé mú-gbààìn-ɖɛ̀ɔ̀ kpáná kɔ̃ún ɖe kàùn wɛ̃ɛ mɔ̀, à ɖò-ɖò séín ɓɛ́ìn Jɛhova bũ̀ìn xwɛ̃́ìn. a Cɛ̃́ɛ́-ɖɛ̀ɔ̀ nyɔ zià kɛɛ cɛ̃ɛ kà ɓɛ́ ti à wóɖó ma kɛɛ, à kè Geɖepɔɔ se ma gbo-kpɔ̃ìn-kpɔ̃ìn ɖò ɓéɖéɛ. Kɛɛ mú-gbààìn-ɖɛ̀ɔ̀ nyuɛ ké ‘gìɖìi nì à kè Geɖepɔɔ pṹa,’ ké ɔ nyuɛ ké à ɓɛ́ìn Geɖepɔɔ bũ̀in xwɛ̃́ìn.—Zà Wóɖómà 5:1; Jĩ́ìn 2:23 wuɖuún.

 8. Xwíníínɔ̀ nyɛ́ kɔ̃̀ jè à mɛ poà Jɛhova zuò ɓó nyíí-ɖɛ̀ mɔ̀à ɓaà-ɓaà kɛɛ jè kɛ́?

⁸ Poìn gbo-kpɔ̃ìn-kpɔ̃ìn nìà à kè Jɛhova pṹa kɛɛ wáká ɖò—mɔ̀à ɔ gbo ɓaà-ɓaà kɛɛ jè hwìɖìi. Jɛhova wɔ̃́ ɓaà-wùɖù ɓè ɓɛ́ ɔ nyɔ ɓèɔ̀ nyu ɔ jù ké dyi dyí poìn níɛ, kɛɛ ɔ wɔ̃́ à ɖò-ɖò séínɛ̀ ɓaà-wùɖù à nyu ɖé gã gboɛ. Ɓaà-ɓaà dè à hwòɖò dyi, ké ɔ nyí à gìɖìi, kɛɛ ɔ nyu ɖɛ kpa ɖɛ ɖò ɖe. Ɔ kùìn gbo-kpɔ̃ìn-kpɔ̃ìn nìà à kè Geɖepɔɔ pṹa kɛɛ dyi. (Wɛ́ɖɛ́ 65:2; Jĩ́ìn 4:8; 1 Jɔ̃́ɔ́ 5:14) Ti Jizɛ nì ma dà ɓóɖó-kpàà kɔ̃ɛɛ, ɔ ɓaà ma kpɛ́-kpɛ́, sepoɛɖe ɔ dyuòɛ̀ ma dyí kà Jɛhova nì ma ɖùù tòɛ̀n, kè kà ɓaà-ɓaà mu ma gbo-kpɔ̃ìn-kpɔ̃ìn nì ma ɔ kè ɔ Ɓà pṹa kɛɛ dyi kùìn teeɛ. (Ðúù 5:16) À po Jɛhova zuò mìɔ cá kà ɓɛ́ dyììn ɖé Jizɛɛ sáa-zà-zàɔ̀ múɛɛ, à ɓɛ́ìn Jɛhova ɓàto jùɛ, ké à ɓɛ́ìn Ɔ gbo wùɖùɛ̀ ɖé ɓaà-ɓaà múɛ!

 KÀ À ƁƐ́ÌN KPÁNÁ DYÉƐ ÐÉ DYÚA KƐ

 9. Xwɛ̀ mú-gbààìn-ɖɛ̀ɔ̀ mu jàà ɓiè-nyɔ̀ ɓè kpáná dyí nyuùn ɖé dyúa kɛ́?

⁹ Xwɛ̀ Jɛhova jàà ɓiè-nyɔ̀ ɓè mu mú-gbààìn-ɖɛ̀ɔ̀ kpáná kɔ̃ún dyéìn ɖé dyúa kɛ́? Wa mu sè-ná-sèɛ̀ fɛ̀ɛ̀ ɓéɖéìn. Nyɔ pàɖà poɛ̀n hwìɖìi kà ɔ se kpáa ɓɛ́ìn nyɛ, sepoɛɖe nyɔùn-dyù ɖà mɛ́ɛń hwèɖèìn. Kɛɛ, Jɛhovaa hwòɖòɛ̀-gbɔ-po-ɖɛ̀ jɛ́ɛ́ɔ̀ mɔ̀ ɓɛ́ nyɔùn-dyù ké ma cĩ́ kánáá pu. Ɔ jù ké Áɖɔ̀ùn seɔ́ má nàmàùn nyuín, nyɔ ɖò seɔ́ máa hwìɖìi poɛ̀n mu kà ɓɛ́ sè-ná-sèɛ̀ fɛ̀ɛ̀ mɔ̀ ɖɛ nɔ̀mɔ̀ dyíin ɓɛ́ ɔ se kpáa ɓɛ́ìn nyɛ. Ɔ kàmà mú ɓɛ́ nyɔ ɓè kéɛ múin wɔ̃́ kà ɓɛ́ sè-ná-sèɛ̀ fɛ̀ɛ̀ ɓɛ́ìn nìɛ̀ kɛ dyɛo, kɛɛ à poɛ jàà kà ɓɛ́ ɔ mu nììn nyɛ, sepoɛɖe Jɛhova ɖà píɔ́—mɔ̀à ɔ mìɔùn nììn Dyú-gààɔ̀ tò-tò kɛɛ pɛ́ɛ̀, ɓɛ́ à ké mana nìà kɛ dyéɛ ɓɛ́ìn.—Wóɖ. 8:32.

10. Nyɔ ɓè ɓɛ́ zùùɔ̀ gãà kɛɛ kè ɓáɖáá tɔ̀ɔ̀ ɓèɔ̀ dè ɖɛ́ hwòɖò kɔ̃ kɛ́?

¹⁰ Sè-ná-sèɛ̀ fɛ̀ɛ̀ mɔ̀ kpáná ɓɛ́ ɔ mu nììn ɖé dyúa kɛ dyɛo, kɛɛ Jɛhova mɔ́ ɓɛ́ à kéɛ jè hwìi gmɔ̀ nɔ̀ɔ̀. Nyɔ ɓè ɓɛ́ zùùɔ̀ gãà kɛɛ dèɛ̀ hwòɖò kɔ̃ ɓɛ́ wa ké cĩ́ ɖé dyɔún, ɓɛ́ wa kè Kɛ́ɖɛ́ì ké ɓóɖó-kpàà nàìn. (Wɛ̀ɖ. 20:6) Ɓáɖáá tɔ̀ɔ̀ ɓèɔ̀ dèɛ̀ hwòɖò kɔ̃ ɓɛ́ wa ké páɖédà mú cĩ́ dà ɓóɖó-kpàà kɔ̃, dɛ̀ ɓɛ́ nyɔ-ɖɛ-puà-puà kè vĩ̀-vĩ̀ ɖò seà nìɛ̀ muɛ. (Wɛ̀ɖ. 21:​3, 4) M̀ mɔ̀ ɓáɖáá tɔ̀ɔ̀ ɓè dèà sè-nà-sèɛ̀ fɛ̀ɛ̀ hwòɖò kɔ̃ dà ɓóɖó-kpàà kɔ̃ɛ ɖòò? Pɛ́ɛ̀-ɖɛ̀ nìà kɛɛ se nyɔ-pɛ́í-pòìn-ɖɛ̀! Ɔ mɔ̀ xwíníín jɛ́ɛ́ kɔ̃̀ jè Jɛhova mɛ ma nyɔùn-dyù kɛ. Ɓóɖó-kpàà kɔ̃ cĩ́-cĩ́ mu à múàùn poùn mìɔ cá.

11-12. Ðɛ́ mɔ̀ mana ɖíɛ́ ɓè ɓɛ́ wa mu ɖé Páɖédà mú nììn ɓɛ́ à ɓɛ́ìn jè hwìi gmɔ̀ɔ̀ kɛ́? (Dyé dyi-dyé-ɖɛ̀ ɓèɔ̀ ɖekè.)

¹¹ Nàìn kà cĩ́-cĩ́ mu m̀ bìì nììn ɖé Páɖédà mú dà ɓóɖó-kpàà kɔ̃ɛɛ jè hwìɖìi. M̀ se wɛ́ mɔɔ gĩɔ jè hwòɖò dyií gbàìn mu. (Àzé. 25:8; 33:24) Jɛhova mu nì hwòɖòɛ̀-mɔ́ɔ́-ɖɛ̀ séín ɓɛ́ wa nɔ̀mɔ̀ dyíin nyɛɛ m̀ nyíìn. Ðɛ́ nì mu jè cɛ̃́ɛ mɔ́ùn wɛ̃́? Nimii ɓèè? Ɓáá-ɖɛ̀ ɓèè? Wɛ́ɖɛ́ɛ̀? Ðɛ ɓè mɛ-mɛɛ̀? Ɔ nì wáɖáá kà ɓɛ́ wa mu gbo-po-nyɔ̀ ɓè kè geɖe-nyu-nyɔ̀ ɓè mɔ́ùn wɛ̃. Jɛ́ɛ́ kɛɛ, wa mu ɖé nyɔ-gbo-kpá-kũ̀à ɓè kè  ɖɛ-xwa-nɔ̀mɔ̀ìn-kũ̀à ɓè mɔ́ùn ɖekè, ɔ hwɔìn-kà, ɖii-ɖɛ̀ nyu-nyu kè ɓé-nyu-nyu ɔ kè pá dyíin-nɔ̀mɔ̀ìn-nɔ̀mɔ̀ìn. (Àzé. 35:1; 65:21) M̀ dyi sè-ná-sèɛ̀ fɛ̀ɛ̀ ɓéɖéín, nì mu ti ɓéɖéìn ɓɛ́ m̀ ké sɛ́ɖɛ́ séín ɖò m̀ mɔ́ cɛ̃́ɛ dyiɛɛ cɛ̃́.

¹² Ɔ mu múà-ɖɛ̀ ɖò jùùn cá ɓɛ́ à ké nyɔ ɓè muà gĩɔ wóɖóùn wɛ̃ɛ hwìi kpɔ̃ɛ! (Àpɔ́. 24:15) Nàìn kà nì mu Jɛhova jè cɛ̃́-cɛ̃́ múàùn dyi kpáìn dyììn ɖé ɔ sɔ̃ɔ̀ mɛɛ-ɖɛ̀ ɓè múɛɛ jè hwìɖìi ɖekè. (Wɛ́ɖɛ́ 104:24; Àzé. 11:9) Ɓó wa séín kɔ̃in nyɛɛ, ɔ mu múà-ɖɛ̀ jùùn ɓɛ́ à ké Jɛhova ɓiè, ɓɛ́ à ké se à mìɔùn zaa kpɔ̃ìn ɖe fɔɔ kɛ! Nì mu mana ɓè nìà kɛ dyi táàùn ɓó “hwòɖò-dyi-dèìn-ɖɛ̀ ɓè nì nàmàùn-nyu-nyu mú ɓó ti wè xwíníín nyɛ” jèè? (Híì. 11:25) Ɔ se ná nì fɔɔ! Mana ɓè nìà kɛ kpa ɖɛ ké ɔ zi ɖɛ séín ɖò à mu kɔ̃ín pòìn kàùn wɛ̃ɛ dyí. Ɔ mɛ nì m̀ hwìɖìi kà ɓɛ́ Páɖédàɔ̀ dyi-dyi se ɖɛ mu kpáùn ɖé dyúa kɛ jùɛ mu kánáá pu kɛ. Ɔ mu jàà kpáùn kàùn. Ðɛ ɓèɛ̀ ɖò seɔ́ má kpáa mu ɔ jù ké Jɛhova seɔ́ má à mú ɖɛ̀ɓɛ̀ mìɔ dyììn ɖé ɔ Dyú-gààɔ̀ tò-tò mú ní!

PO JƐHOVA ZÙO ƁÓ Ɔ ÐƐ̀ƁƐ̀ÌN-ÐƐ̀ƁƐ̀ÌNƆ̀ JÈ

13. Xwɛ̀ à ɓɛ́ìn Jɛhova zùo poɛ ɓó ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jè kɛ́? (2 Kɔ̀ɖéíntĩ̀ɔ̀ 6:1)

¹³ Xwɛ̀ à ɓɛ́ìn Jɛhova zùo poɛ ɓó mú-gbààìn-ɖɛ̀ɔ̀ tò jè kɛ́? Ɔ mɔ̀ dyììn ɖé ɔ kũ̀àɔ̀ po-po kĩ́ín ɖé à cĩ́-cĩ́ɔ̀ mú. (Máf. 6:33) Ké jàà kɛɛ, Jizɛ mɛ́ ma “ɓɛ́ nyɔ ɓè nìà cĩ́ɛń nyɛɛ ké se wa mìɔùn bìì cĩ́ ɖe, kɛɛ ɓɛ́ wa kéá cĩ́ ɓó nyɔ ɓɛ́ ɔ mɛ́ ma, ké Geɖepɔɔ zà ma kà ɔ gĩɔ” kɛɛ bìì. (2 Kɔ̀. 5:15) À se mɔ́ ɓɛ́ à ké ɖɛ mɔ̀ Jɛhovaa kpeɖeɛ̀-dyíin-nɔ̀mɔ̀-nɔ̀mɔ̀ɔ̀ xwíníín nyɛɛ xwa bĩ.—Zà 2 Kɔ̀ɖéíntĩ̀ɔ̀ 6:1 wuɖuún.

14. Xwɛ̀ à ɓɛ́ìn Jɛhovaa hwìè-da-zàìn-wùɖùɔ̀ hwòɖò kɔ̃ dèɛ̀ kɛ́?

¹⁴ À ɓɛ́ìn Jɛhova zùo poɛ ɖekè dyììn ɖé ɔ hwìè-da-zàìn-wùɖùɔ̀ hwòɖò-kɔ̃-dè-dè mú. Xwɛ̀ kɛ́? À dyi ɓéɖé ɓɛ́ à ké ɖɛ ɓè gbɔ po ɓá céè-ɖɛ̀ jĩ̀-kà à ké cɛ̃́ kɛ mɔɔ kũ̀àɔ̀ nyɔ à ké dyi kpɔ̃ɛ jè dyí ní, à ɓéɖé ɓɛ́ à ké ɖɛ Jɛhova mɔ́ ɓɛ́ à ké nyuɛɛ jè hwìɖìi poìn. (1 Kɔ̀. 10:31; 2 Kɔ̀. 5:7) À dyi à hwìɖìi-taɓa-taɓaɔ̀ kũ̀à gbo po ní, ɔ nyuɛ ké dĩ́ín-dĩ̀ìn-ɖɛ̀ ɖò kpá—ɔ nyuɛ ké à hwìɖìi-taɓa-taɓa kè gbo-kpɔ̃ìn-kpɔ̃ìn nìà à kè Jɛhova pṹa kɛɛ ku dyi kóɖó-kóɖó. Ɔ nyuɛ ké à hwòɖò-kɔ̃-dè-ɖɛ̀ɔ̀ jù ɖɛ ɖìè ɖé à gbo.—Wóɖ. 5:​3-5; Jĩ́ìn 2:​21, 22.

15. Xwɛ̀ à ɓɛ́ìn à zùo-po-hwòɖòɔ̀ tɛ̀mɛ̀ìn ɓó Ðɛ-hwìɖìi-dyà-hwɔ̀ɔ̀ tiín nyɛ́?

¹⁵ Hwìè kà kò ɖò nì ɓó ɖe kɔ̃̀ mú ɓɛ́ à ɓɛ́ìn Jɛhova zùo poɛ ɓó ɔ ɖɛ̀ɓɛ̀ìn-ɖɛ̀ɓɛ̀ìnɔ̀ jèɛ. Ɔ mɔ̀ dyììn ɖé à tiɔ̀ kũ̀à-mú-nyùìn-nyùìn mú ɓó Ðɛ-hwìɖìi-dyà-hwɔ̀ɔ̀ tiín, ɓɛ́ à kéɛ Jɛhova dyí tɛ̀mɛ̀ìn kà à po ɔ zùo mìɔ ɓó mú-gbààìn-ɖɛ̀ɔ̀ jèɛ. Ɓó hwɔɔ̀ kɔ̃ nì jè ti-dyé-dyé kɔ̃in nyɛɛ, à ɓɛ́ìn nyɔ tɔ̀ɔ̀ ɓè ɖáa ɓɛ́ wa ké ɖé dyi ɖekè. (1 Tím. 2:4) Zaìn ɖɛ mu ɖé hwɔɔ̀ kɔ̃ kpáùn wɛ̃ɛ kɔ̃in ɖé nyɔ ɓè m̀ ɖá kɛɛ gbo. Ɔ mu dyíin nɔ̀mɔ̀ùn ɓɛ́ m̀ ké víɖò ɓè mɔ̀à, Xwíníínɔ̀ Nyɛ́ Kɔ̃̀ Jè Jízɛ̀ Mɛ́à Kɛ́? kè Dyà Jizɛɛ Mɛ́-Mɛ́ɔ̀ Jè Hwìɖìi  kɛɛ wa dyí tɛ̀mɛ̀ìn ɖé jw.org kɔ̃. Ɛ́ɖɔ̀ ɓè mɛ vɔ̃ kóɖó-kóɖó, ɓɛ́ wa ké nyɔ ɓè hwɛ̀ kpéí ɖé zùùn wɛ̃ɛ ɖá. Nàìn múà ɓɛ́ ɔ nì ɖé dyɔún kè nɔ ɓóɖó-kpàà kɔ̃ ɔ jù ké Jɛhovaa ɓáɖáá ɓè sèà xwáɖáún wɛ̃ɛ ɖíɛ́ ɓè hwòɖò-dyùà dyi hwuɖu sɔ̀, ké wa dyi ɖe dyi níɛɛ jè hwìɖìi! (Ðúù 15:​4-7) Ðé hwɔɔ̀ kɔ̃ɛɛ, ɓèà mɛ jìnìɛ̀n kɔ̃ ɓɛ́ à ké se à mùe ɖò nyíɔún zà ɖòùn pu, kɛɛ jɛ́ɛ́ kɛɛ, à mɛ zà ɖéè ɓè mɔɔ nyɔ ɓè ɓɔ́à hwɔɔ̀ kɔ̃ dyiɛ ɓó ti pàɖà xwíníín nyɛɛ nyíɔún ɖekè. À mɔ́ ɓɛ́ à kéɛ nyu ɓɛ́ wa ké hwìɖìi zaìn!—Wóɖ. 12:13.

16. Xwíníínɔ̀ nyɛ́ kɔ̃̀ jè à mɛ poàìn à nyuu-ɖɛ̀ ɓèɔ̀ kɔ̃ po jè hwìɖìi ɓó Ðɛ-hwìɖìi-dyà-hwɔ̀ɔ̀ tiín nyɛ́?

¹⁶ M̀ ɓɛ́ìn nì zùùn-ɖɛ̀ ɓèɔ̀ kɔ̃ poɛ ɓó Ðɛ-hwìɖìi-dyà-hwɔ̀ɔ̀ tiínǹ? Ɔ náa nyu-nyu mɔ̀ hwìè ɖò kɔ̃̀ mú ɓɛ́ à ɓɛ́ìn tɛ̀mɛ̀ìn kà à po Geɖepɔɔ kè Kɛ́ɖɛ́ì zùo ɓó ɖɛ wa ɖà à bìì nyuɛɛ jèɛ. Kà à mu Jɛhovaa kũ̀àɔ̀ nyuùn mìɔ kɛɛ, kàà à mu ɔ gbo-kpá-sɔ̃̀ dyéìn mìɔ, ké ɔ muɛ nyuùn ɓɛ́ à ké ɔ hwòɖò kɔ̃ dè mìɔ cá. (1 Kɔ̀. 3:9) Ké ɖeɛɛ, m̀ mɛ vɔ̃ ɓɛ́ m̀ ké Ðɛ-hwìɖìi-dyà-hwɔ̀ɔ̀ Baɓo wuɖuún-zà-zà nìà céè-ɖɛ̀ mɔ̀à, Baɓoɔ Múin-Gmɔìn-Gmɔìn Wé Séín kɛ múɛ mɔɔ ɔ nyɔ nìà ɖé wíkìɔ̀ hwìɛ̀ìn dyí-poìn-poìn kũ̀à-cèè-ɖɛ̀ɔ̀ múɛɛ kíɖíí sí. M̀ ɓɛ́ìn gãa dyɛ mɔ̀ùn, ɓɛ́ m̀ ké Baɓo vɔ̀sì ɓèà kũ̀à mú nyùìn ɓó m̀ mìɔùn sɔ̃ kɔ̃ ɖɛ cɛ̃́ jè.

17. Ðɛ́ dè Jɛhova hwìɖìiɛ́? (Dyé gbɔ̀ɖɔ̀ɔ̀ nìà kɛ ɖekè, “ Kà À Ké Jɛhova Zùo Po Ɓó Ɔ Ðɛ̀ɓɛ̀ìn-Ðɛ̀ɓɛ̀ìnɔ̀ Jèɛ.”)

¹⁷ Ɔ mɔ̀ jàà kà ɓɛ́ ɖɛ tɔ̀ɔ̀ ɓè ɓɛ́ìn nyuɛ ɓɛ́ m̀ ké se fɔ̀nɔ̀-hwòɖò séín ɓè nì cɛ̃́ɛ́-ɖɛ̀ nìà kɛ múɛɛ kíɖíí síɛ. Kɛɛ, ɔ mɛ nì m̀ hwìɖìi kà ɓɛ́ Jɛhova ní poìn ɖɛ m̀ ɓɛ́ìn nyuɛ kɛɛ kè nyɔ tɔ̀ɔ̀ ɓè nììn nyuu-ɖɛ̀ dyíɛ; ɔ dyé ɖé nì hwòɖòɔ̀ xwíníín dyi. Ɔ dè ɔ hwìɖìi ɔ jù ké ɔ dyiɛ dyé kà à po ɔ zùo ɖé hwòɖò wáɖáá mú ɓó ɔ nyíí-ɖɛ̀ kpa ɖɛ, mɔ̀à mú-gbààìn-ɖɛ̀ɔ̀ kɛɛ jè ní.—1 Sám. 16:7; Máà 12:​41-44.

18. Xwíníínɔ̀ nyɛ́ kɔ̃̀ jè à poà Jɛhova Geɖepɔɔ kè Jizɛ Kɛ́ɖɛ́ì zùo kɛ́?

¹⁸ Mú-gbààìn-ɖɛ̀ɔ̀ ɖòùn mɔ̀ nyɔ nyuɛ ké à nàmàùn ɓèɔ̀ ɓéɖé kɔ̃in-zĩ̀ìn-zĩ̀ìn, ké à kè Jɛhova ɓéɖé gbo-kpɔ̃ìn-kpɔ̃ìn, ké à dè sè-ná-sèɛ̀ fɛ̀ɛ̀ hwòɖò kɔ̃. Ɓèà mɛ tɛ̀mɛ̀ìn zùo-po-hwòɖò tee ɓó Jɛhovaa ɖɛ̀ɓɛ̀ìn-ɖɛ̀ɓɛ̀ìn ɓɛ́ ɔ nyuà ké mana ɓè nìà kɛ nìà ɓó à bììɛɛ jè. (1 Jɔ̃́ɔ́ 4:19) Ké ɖeɛɛ, ɓèà mɛ tɛ̀mɛ̀ìn kà à po Jizɛ zùo kɛ, sepoɛɖe ɔ ɖɛ̀ɓɛ̀ à mú mìɔ, ké ɔ tò ma ɔ nyɔùn-dyù fɛ̀ɛ̀ɔ̀ ɓó à bìì!—Jɔ̃́ɔ́ 15:13.