1. Ðɛ́ mɔ̀ xwíníín ɖò kɔ̃̀ jè Jɛhova dyà ma dyi kpɔ̃ìn jè kɔ́mɔ́ kɛ́?

 JƐHOVA mɔ̀ “múà Geɖepɔɔ,” ké ɔ mɔ́ ɓɛ́ à ké múàùn kpá ɖekè. (1 Tím. 1:11 nwt) Ɔ ɖà à nyíí-ɖɛ̀ pàɖà nyí, ɓɛ́ ɔ kéɛ nyu ɓɛ́ à ké fɛ̀ɛ̀ múàùn dyi kpáìn. (Jĩ́ìn 1:17) Nyíí-ɖɛ̀ ɓèa ɖò mɔ̀ dyi-kpɔ̃ìn-kpɔ̃ìn. Gàa ɖò kè màa ɖò dyi dyi kpɔ̃ìn ní, wa ɖi wuɖu ɓɛ́ wa ké mú ɖɛɓɛìn, kè ɓɛ́ wa ké wa mùe ɖò kpéín dyé. Wa dyi mú ɖɛɓɛìn tee ní, wa mu múà jɛ́ɛ́ ɓéɖéìn.—Nɔ́ɔ́ 5:18.

 2. Xwɛ̀ dyi-kpɔ̃ìn-kpɔ̃ìn pàɖà ɓè jè nyu nìɛ̀ zɛ̃̀ɛ̀ kɛ́?

² Wìì-ɖɛ̀ɔ̀ mɔ̀, wuɖu-ɖi-ɖi ɓè ɓɛ́ dyi-kpɔ̃ìn-nyɔ̀ pàɖà ɓè nì zɛ̃̀ɛ̀ kɛɛ nyu ma ɓó waà dyi-kpɔ̃ìn-wèɔ̀ ɓaɖaa jè sɔ̀ wa hwìɖìi. Ðɛa jèɛɛ, wa se múàùn nì. Bɔ̃̀ ɖò ɓɛ́ Ɓóɖó-Kpàà Kpoo Dyéà Dyɔɔ̀ Mú Wóɖó Jè Gboɛ po dyi wéɔ̀ùn wɛ̃ɛ tɛ̀mɛ̀ìn kà ɓɛ́ nyɔ́nɔ́-ɓà ɓáún-ɓáún nyìnììn wa gmàà ɓè bũ̀in, mɔɔ wa ɖaɓaìn wa wuɖui, mɔɔ wa dè wa fũ̀à-fṹá dyíɛ. Nyɔ́nɔ́-ɓà ɓɛ́ ɔ nyu ɖɛ ɓè nìà kɛɛ ɓɛ́ìn ɔ gmàà kpɔ̃ɔ kpéín-dyé-kà ɖé nyɔ tɔ̀ɔ̀ ɓè dyúa, kɛɛ nìí, ɔ kpɔ̃ ɔ gbà-kà ɖé taún. Dyi-kpɔ̃ìn-kpɔ̃ìn pàɖà ɓè kpɔ̃ fũ̀à-fṹá ɖekè ɔ jù ké gàaɔ̀ dyi gbàɖà-po-po dyi-dyé-ɖɛ̀ ɓè dyi dyé ní.

 3. Ðɛ́ ɓɛ́ìn nyuɛ ɓɛ́ nyɔ́nɔ́-ɓà ɖò ké kpeɖeín nyìnììn nyɛ́?

³ Ðɛ́ ɓɛ́ìn nyuɛ ɓɛ́ nyɔ́nɔ́-ɓà ɖíɛ́ ɓè ké kpeɖeín nyìnììn nyɛ́? Ɓà ɓè ɓɛ́ wa nyìnììn ma kpeɖeín nyɛɛ ɓɛ́ìn ma wa gmɛ̀ìn dyɛ̀. Ɔ jèɛɛ, ɔ nyu ké wa poɛ̀n hwìɖìi kà kpeɖeín-nyìnììn-nyìnììn se ɖɛ gbà kɛ. Nyɔ tɔ̀ɔ̀ ɓè zàìn dyí ɓá kpeɖe ɓè nì ma wa ɖeiɛɛ dyí, ɓɛ́ ɔ nyu ké wa poɛ̀n hwìɖìi kà ɓɛ́ “gàaún-gàà” ɓéɖé ɓɛ́ ɔ ké gana kũ̀à mú nyùìn, ɓɛ́ ɔ kéɛ ɔ gmàà dyí tɛ̀mɛ̀ìn kà ɔ mɔ̀ gàa ɖé taà múɛ. Gàa tɔ̀ɔ̀ ɓè se kà wa ké waà dyoɖo-hwòɖò dyí kpɔ̃ɔ nyuɛɛ cɛ̃́. Gàa ɖíɛ́ ɓè gmɔ̀ màa ɓè kè gmaɖe po jè dya se-dyí-sɛ́ɖɛ́ìn-kà, sepoɛɖe wa dyé gbàɖàùn-po-po dyi-dyé-ɖɛ̀ ɓè dyi tee jè. Bɔ̃̀ ɓè tɛ̀mɛ̀ìn ɖekè, kà ɓɛ́ Kòwóɖónà-wɛ̀ɔ̀ po fũ̀à-fṹá ɓè nìà kɛ kɔ̃ mìɔ kɛ. Jàà kɛɛ, ɖɛ ɓè nìà kɛ mɛ ɓɔ́ɔ nyuɛ ɓɛ́ nyɔ́nɔ́-ɓà ɖò ké kpeɖeín nyìnììn.

 4. Ðɛ́ nyɔ́nɔ́-ɓà ɓè kɔ̃̀ wa ké dyí ɓàɖàìn nyɛ́, ké xwíníínɔ̀ nyɛ́ kɔ̃̀ jèɛ́?

 ⁴ Kɛ́ɖɛ́ì ɖeín-sí-gàà ɓè kɔ̃̀ wa ké màa dya-gmɔ̀-kà ɓɛ́ ɔ se dyí sɛ́ɖɛ́ìn nyɛɛ dyí ɓàɖàìn. a Xwíníínɔ̀ nyɛ́ kɔ̃̀ jèɛ́? Xwíníín dyúáɖò mɔ̀, nyɔ ɖòɛ̀ hwìɖìi-poìn-ɖɛ̀ ɓè wóɖó nyuu-ɖɛ̀ gbo kpɛ́-kpɛ́. Àpɔ́sò Pɔ́ɔ̀ po ma Kɛ́ɖɛ́ì ɖeín-sí-nyɔ̀ ɓè nì ma ɖé Wóɖóùn ɓɛ́ zùùɔ̀ gã ma kɛɛ náún, ké ɔ ɖá, “ɓèìn ɖá ɓɛ́ ɓèɛ̀ kpeɖe ké dyí zàìn, ɓɛ́ ɔ ké nì kà ɓóɖó-kpàà nyɔ ɓèɛ̀ kpeɖe nìà kɛ.” (Wóɖ. 12:​1, 2) Ti Pɔ́ɔ̀ céè ma Wóɖóùn-nyɔ̀ ɓèɔ̀ gboɛɛ, ɔ nì wáɖáá kà ɖíí ɓèɔ̀ se ma Kɛ́ɖɛ́ì ɖeín-sí-nyɔ̀ ɖìè ɓèɛ. Kɛɛ, Pɔ́ɔ̀ wuɖuɔ̀ tɛ̀mɛ̀ìn kà ɓɛ́ nyɔ ɖíɛ́ ɓè nì ma ɖé dyí-poìn-kpòòɔ̀ múɛɛ nì ma ɓóɖó-kpàà kpeɖe ɓè kè ɔ hwìɖìi-poìn-kà ɓè kpé xwíɖíi keɛ. Xwíníína kɔ̃̀ jèɛɛ, ɔ po ma wa náún, ɓɛ́ wa ké ma waà hwìɖìi-poìn-kà kè waà kpeɖe ɓèɔ̀ gbo zĩàìn. Náún-po-wùɖù nìà wɛɛ ɓá nyɔ́nɔ́-ɓà ɓè ɓɛ́ wa mɔ̀ Kɛ́ɖɛ́ì ɖeín-sí-nyɔ̀ ɓè zɛ̃̀ɛ̀ kɛɛ dyí ɖekè. Wìì-ɖɛ̀ɔ̀ mɔ̀, wa ɖíɛ́ ɓè ɖà ɓóɖó-kpàà hwìɖìi-poìn-kà dyi kpɔ̃, ké wa ɖà waà gmàà ɓè kpɔ̃ gbà-kà dyɛ mɔ̀ùn. b Xwɛ̀ Jɛhova mɔ́ ɓɛ́ nyɔ́nɔ́-ɓà ɖò ké ɔ gmàà kpɔ̃ kɛ́? À dyé gɔ̃̀-jù-wùɖùɔ̀ ɖé vɔ̀sì kɔ̃̀ mú ɓɛ́ cɛ̃́ɛ́-ɖɛ̀ nìà kɛ sɔ̀àìn nyɛɛ mú.

 5. Kà 1 Píɖɛ̀ 3:7 nyuà cɛ̃ɛ kɛɛ, xwɛ̀ nyɔ́nɔ́-ɓà ɖò mɛ kpɔ̃ ɔ gmàà kɛ́?

⁵ Zà 1 Píɖɛ̀ 3:7 wuɖuún. Jɛhova cɛ̃ɛ nyɔ́nɔ́-ɓà ɓè gbo ɓɛ́ wa ké waà gmàà ɓè kpéín dyé. Nyɔ́nɔ́-ɓà ɖò ɓɛ́ ɔ dyé ɔ gmàà kpéín nyɛɛ mu ɔ kpɔ̃ùn nɔ̀mɔ̀ dyíin ɖé ɖɛ̀ɓɛ̀ìn-ɖɛ̀ɓɛ̀ìn mú. Ðé cɛ̃́ɛ́-ɖɛ̀ nìà kɛ múɛɛ, à mu kà nyɔ́nɔ́-ɓà ɖò ɓɛ́ìn ɔ gmàà kpéín dyéɛ kɛɛ jè cɛ̃ìn. Kɛɛ, ɓèà cɛ̃ kpeɖe ɓè ɓɛ́ wa zàìn màa ɓè zùùn wɛ̃ɛ jè kĩ́ín.

TÁÀ KPEÐE ƁÈ ƁƐ́ WA ZÀÌN NÌ GMÀÀ ZÙÙN WƐ̃Ɛ DYI

 6. Xwɛ̀ Jɛhova hwòɖò nyu nìɛ̀ ɓá gàa ɓè ɓɛ́ wa nyìnìàìn wa gmàà ɓè bũ̀in nyɛɛ jè dyíɛ́? (Kɔ̀ɖɔ́sĩ̀à 3:19)

⁶ Nyɔ-bũ̀in-nyìnììn-nyìnììn. Jɛhova nyɛ́ nyɔ séín ɖò ɓɛ́ ɔ mɔ̀ hwɔ̀ɖɔ̀-gbà-vɔ̃-nyɔ̀ kɛɛ mú. (Wɛ́ɖɛ́ 11:5) Ɔ nyɛ́ nyɔ́nɔ́-ɓà ɓè ɓɛ́ wa kpɔ̃ wa gmàà ɓè gbà-kà kɛɛ mú jɛ́ɛ́. (Máɖ. 2:16; zà Kɔ̀ɖɔ́sĩ̀à 3:19 wuɖuún.) Vɔ̀sì ɓɛ́ à hìɖì-kpàɔ̀ sɔ̀àìn mú, mɔ̀à 1 Píɖɛ̀ 3:7 kɛɛ cɛ̃ɛ kà ɓɛ́ ɔ jù ké nyɔ́nɔ́-ɓà ɖò se ɔ gmàà kpɔ̃ nɔ̀mɔ̀ dyíin ní, ɔ kè Geɖepɔɔ mu gboi tɔmɔìn nyɛ. Jɛhova se dyɛ̀ ɔ ɓaà-wùɖùɔ̀ ɖùù gbo tòɛ̀ mu dyɛ mɔ̀ùn.

 7. Kà Ìfísĩ̀ɔ̀ 4:​31, 32 nyuà cɛ̃ɛ kɛɛ, wuɖuɔ̀ nyɛ́ nyɔ́nɔ́-ɓà ɖò ɓéɖé ɓɛ́ ɔ ké dyí ɓàɖàìn nyɛ́? (Dyé “Wuɖu Ɓè Jè Kɔ̃in-Zaìn-Zaìn” ɖekè.)

⁷ Nyɔ-wuɖui-ɖaɓaìn-ɖaɓaìn. Nyɔ́nɔ́-ɓà ɖíɛ́ ɓè kpɔ̃ wa gmàà ɓè gbà-kà dyììn ɖé wa dyoɖo-wùɖù ɓè kè wuɖu-gbà ɓè gbo-cɛ̃-cɛ̃ mú. Kɛɛ, Jɛhova nyɛ́ ‘dyoɖo kè cɛ̃́ kè mú-páná-páná ɔ kè wuɖu-gbà mú.’ c (Zà Ìfísĩ̀ɔ̀ 4:​31, 32 wuɖuún.) Ɔ wɔ̃́ ɖɛ séín. Kà nyɔ́nɔ́-ɓà ɖò nyu ɔ gmàà gbo wùɖùɛ̀, kɛbì ɔ mɛ mɔ̀ ɖé wa ɓíɖí-taún wɛ̃ɛ, ɔ jè kpa ɖɛ ɖé Jɛhova gbo. Nyɔ́nɔ́-ɓà ɖò ɓɛ́ ɔ wùɖù ɔ gmàà gbo gana-kà kɛɛ ɓɛ́ìn ɔ dyi-kpɔ̃ìn-kpɔ̃ìnɔ̀ kè gbo-kpɔ̃ìn-kpɔ̃ìn nìà ɔ kè Geɖepɔɔ pṹa kɛɛ mú gbɔɔ̀ɔ̀.—Jĩ́ìn 1:26.

 8. Xwɛ̀ Jɛhova hwòɖò nyu nìɛ̀ ɓá gbàɖàùn-po-po dyi-dyé-ɖɛ̀ jè dyíɛ́, ké xwíníínɔ̀ nyɛ́ kɔ̃̀ jèɛ́?

⁸ Gbàɖàùn-po-po dyi-dyé-ɖɛ̀ dyi-dyé-dyé. Xwɛ̀ Jɛhova hwòɖò nyu nìɛ̀ ɓá gbàɖàùn-po-po dyi-dyé-ɖɛ̀ jè dyíɛ́? Ɔ nyàìn ɔ dyi. Ɔ jèɛɛ, nyɔ́nɔ́-ɓà ɖò ɓɛ́ ɔ dyé dyi-dyé-ɖɛ̀ gbà ɓè dyiɛɛ gbɔɔ̀ gbo-kpɔ̃ìn-kpɔ̃ìn nìà ɔ kè Jɛhova pṹa kɛɛ mú, ké ɔ zàìn ɔ gmàà zùùn. d Jɛhova mɔ́ ɓɛ́ nyɔ́nɔ́-ɓà ɓè ké wa gmàà jàà gbo nyu ɖé  nyuu-ɖɛ̀ ɓè kè hwìɖìi-poìn-ɖɛ̀ ɓè mú. Jizɛ cɛ̃ɛ ma kà ɓɛ́ gàa ɓɛ́ ɔ gmɔ̀ màa ɖò dya ɓɛ́ ɔ mɔ́-tò nyu ɔ kɛɛ ɖà gbàɖàùn poɛ hwɔ “ɖé ɔ hwòɖò bũ̀.” e—Máf. 5:​28, 29.

 9. Xwíníínɔ̀ nyɛ́ kɔ̃̀ jè Jɛhova nyɛ́à nyɔ́nɔ́-ɓà ɓɛ́ ɔ nyuà ɔ gmàà dɛ̃-ɖɛ̀ bũ̀ kɛɛ mú kɛ́?

⁹ Nyɔ-dɛ̃-ɖɛ̀-bũ̀-nyu-nyu. Nyɔ́nɔ́-ɓà ɖíɛ́ ɓè dè wa gmàà ɓé dyí, ɓɛ́ wa ké wa gbo pɛ̃́ se-dyí-sɛ́ɖɛ́ìn-kà ɓɛ́ ɔ nyu ké màaɔ̀ hwòɖò kpá ɖé ɖeiɛ. Jɛhova nyɛ́ se-nyɔ-jè-gbo-kɔ̃̀-kpèɖè nì kà wɛ mú. Ɔ mɔ́ ɓɛ́ nyɔ́nɔ́-ɓà ɓè ké wa gmàà ɓè mú ɖɛ̀ɓɛ̀, kè ɓɛ́ wa ké kà wa hwòɖò nyu nìɛ̀ kɛɛ jè gbo kɔ̃̀. (Ìfí. 5:​28, 29) Ɔ jù ké nyɔ́nɔ́-ɓà ɖò ɓɛ́ ɔ mɔ̀ Kɛ́ɖɛ́ì ɖeín-sí-nyɔ̀ kɛɛ dyi ɔ gmàà dɛ̃-ɖɛ̀ bũ̀ nyuɛń nì mɔɔ ɔ dyi gbàɖàùn-po-po dyi-dyé-ɖɛ̀ dyi dyéɛń nì kàùn ní ɖé? Xwɛ̀ ɔ ɓɛ́ìn ɔ hwìɖìi-poìn-kà kè ɔ nyuu-ɖɛ̀ ɓè gbo zĩàìn nyɛ́?

KÀ NYƆ KÉ SE-NYƆ-KPÉÍN-DYÉ-KPÈÐÈ ƁÈ DYI TÁÀ NYUƐ

10. Xwɛ̀ nyɔ́nɔ́-ɓà ɓè ɓɛ́ìn Jizɛ ɓo bɛ̃̀ìn síɛ kɛ́?

¹⁰ Ðɛ́ ɓɛ́ìn nyɔ́nɔ́-ɓà ɖò gbo kpáa ɓɛ́ ɔ ké kpeɖe gbà ɓè dyi táà kɛ́? Ɔ ɓɛ́ìn vɔ̃ɔ ɓɛ́ ɔ ké Jizɛ ɓo bɛ̃̀ìn sí. Jizɛ se ma nyɔ́nɔ́ dyi kpɔ̃ dyɛo, kɛɛ kà ɔ nyu ma ɔ ɖeín-nà-nyɔ̀ ɓèɔ̀ kpɔ̃ɔ kɛɛ mɔ̀ dyí-tɛ̀mɛ̀ìn-ɖɛ̀ ɓó kà nyɔ́nɔ́-ɓà ɖò ké ɔ gmàà kpɔ̃ɔ nyuɛ jè. (Ìfí. 5:25) Poìn ɖɛ nyɔ́nɔ́-ɓà ɓè ɓɛ́ìn cɛ̃́ɛ sɔ̀ìn ɖé kà Jizɛ nyu ma ɔ àpɔ́sò ɓèɔ̀ kpɔ̃ɔ kè kà ɔ nyu ma wa gbo wùɖùɛ̀ kɛ múɛɛ jè hwìɖìi.

11. Xwɛ̀ Jizɛ nyu ma ɔ àpɔ́sò ɓèɔ̀ kpɔ̃ɔ kɛ́?

¹¹ Jizɛ kpɔ̃ ma ɔ àpɔ́sò ɓèɔ̀ kpeɖeín-nɔ̀mɔ̀-kà kè ɖé kpéín-dyé-dyé mú. Ɔ se ma wa gànà-sɔ̃̀ kpɔ̃̀ìn. Jizɛ mɔ̀ ma wa Wuɖuí-kɔ̃̀-nyɔ̀ kè wa gbo-nì-ɓà dyɛo, kɛɛ ɔ seɛ ma hwìɖìi poìn kà ɔ kɔ̃̀ ɔ ké ma ɔ kpéɔ̀ wa dyí tɛ̀mɛ̀ìn nyɛ. Kɛɛ, ɔ dyà ma ɔ mìɔùn ɓíɖíi, ké ɔ nyu ma wa bìì kũ̀à. (Jɔ̃́ɔ́ 13:​12-17) Ɔ cɛ̃ɛ ma ɔ ɖeín-nà-nyɔ̀ ɓèɔ̀ gbo, ké ɔ ɖá: “Ɓè ɖú ní gɛ̀ɛ̀ɔ̀ dyí, . . . ɓɛ́ ḿ ké ɓè ɖɛ tɛ̀mɛ̀ìn, sepoɛɖe ḿ ɓéɖé hwòɖò-ɓɛ̀ɖɛ̀ɛ̀-ɓɛ̀ɖɛ̀ɛ̀, ké ḿ dyà ḿ mìɔùn ɓíɖíi, ké ɓè mu fɔ̀-fɔ̀ ɓéɖéìn.” (Máf. 11:​28-30) Dèɛ̀ dyéɖé gbo kà Jizɛ ɓéɖé ma hwòɖò-ɓɛ̀ɖɛ̀ɛ̀-ɓɛ̀ɖɛ̀ɛ̀ kɛ. Nyɔ ɓɛ́ ɔ ɓéɖé hwòɖò-ɓɛ̀ɖɛ̀ɛ̀-ɓɛ̀ɖɛ̀ɛ̀ kɛɛ se kpéɛ̀-dyí-hwɛ̀-nyɔ̀. Kɛɛ, ɔ ɓɛ́ìn ɔ mìɔùn dyí kpɔ̃ɔ. Ɔ dyi dyoɖoún kpá ní, ɔ nì gìɖìi, ké ɔ kpɔ̃ ɔ dyoɖo-hwòɖòɔ̀ dyí.

12. Xwɛ̀ Jizɛ nyu ma nyɔ tɔ̀ɔ̀ ɓè gbo wùɖùɛ̀ kɛ́?

¹² Jizɛ nyùìn ma ɔ wuɖuɔ̀ kũ̀à mú, ɓɛ́ ɔ ké ma nyɔ tɔ̀ɔ̀ ɓè hwòɖò dyi dè, kè ɓɛ́ ɔ ké ma wa kpéí po. Ɔ se ma ɔ ɖeín-sí-nyɔ̀ ɓèɔ̀ gbo wùɖù gana-kà. (Ðúù 8:​47, 48) Ké ti ɓɛ́ ɔ gbo-vɔ̃-nyɔ̀ ɓè ɖaɓa ma ɔ wuɖu, ké wa mɔ́ ma ɔ dyoɖoún poɛ dyiɛɛ, “ɔ mɔ̀ùn se ma wa wuɖu ɖaɓa.” (1 Píɖɛ̀ 2:​21-23) Tiɔ̀ ɖíɛ́ ɓè ɓaɖaín, Jizɛ ɖɛ̀ɓɛ̀ ɔ ké ma gìɖìi nì ké ɔ zi ɓɛ́ ɔ ké ma ɖɛ ɖò cɛ̃ gana-kà kɛɛ dyí. (Máf. 27:​12-14) Ɔ mɔ̀ dyí-tɛ̀mɛ̀ìn-ɖɛ̀ nɔ̀mɔ̀ dyíin ɖò cá ɓó nyɔ́nɔ́-ɓà ɓè mɔ̀ Kɛ́ɖɛ́ì ɖeín-sí-nyɔ̀ ɓèɛɛ bìì!

13. Kà wa nyuà céèɛ̀ ɖé Máfíò 19:​4-6 múɛɛ, xwɛ̀ nyɔ́nɔ́-ɓà ɖò kè ɔ gmàà ɓɛ́ìn “xwaún kpáìn” nyɛ́? (Dyé dyi-dyé-ɖɛ̀ɔ̀ ɖekè.)

¹³ Jizɛ cɛ̃ɛ ma nyɔ́nɔ́-ɓà ɓè gbo ɓɛ́ wa ké wa gmàà ɓè jàà gbo nyu. Ɔ kpa ma ɔ Ɓà wuɖuɔ̀ kɔ̃in kà ɓɛ́ gàaɔ̀ ‘kè ɔ gmàà mɛ kpáìn xwaún’ wɛ̃. (Zà Máfíò 19:​4-6 wuɖuún.) Gíɖíì-wùɖù wa ɖáìn ‘kpáìn xwaún’ wɛ̃ɛ xwíníín mɔ̀ “nɛ́ìn dyí.” Ɔ jèɛɛ, gbo-kpɔ̃ìn-kpɔ̃ìn ɓɛ́ ɔ nì nyɔ́nɔ́-ɓà ɖò kè ɔ gmàà pṹa kɛɛ mɛ ku dyi mìɔ, ɓɛ́ ɔ ké nì kà wa gmaìn kà wa dyíɛ. Waà gbo-kpɔ̃ìn-kpɔ̃ìnɔ̀ se dyi gbaà ɓɛ́ìn ɔ sèìn wa gbɔɔ̀ wa ɖò mú hwɛ̀. Nyɔ́nɔ́-ɓà ɓɛ́ ɔ kè ɔ gmàà ɓéɖé gbo-kpɔ̃ìn-kpɔ̃ìn nì kà wɛɛ mu gbàɖàùn-po-po dyi-dyé-ɖɛ̀ séín dyí ɓàɖàìn. Ɔ mu ɔ dyéɖéɔ̀ “ɖɛ se kpáná ɖò mú nìɛɛ” dya zàùn wàɖà. (Wɛ́ɖɛ́ 119:37) Ɔ xwíníín mɔ̀, ɔ kè ɔ dyéɖéɔ̀ mu wuɖu dèìn, ɓɛ́ ɔ ké se màa séín ɖò ɓɛ́ ɔ se  ɔ gmàà kɛɛ dya gmɔ̀ ɓɛ́ ɔ mɔ́-tò ké ɔ nyu.—Jóɓò 31:1.

14. Ðɛ́ nyɔ́nɔ́-ɓà nyìnììn kpeɖeín ɖò mɛ nyu, ɓɛ́ ɔ ké gbo-kpɔ̃ìn-kpɔ̃ìn nìà ɔ kè Jɛhova kè ɔ gmàà pṹa kɛɛ dyí sɛ́ɖɛ́ìn nyɛ́?

¹⁴ Nyɔ́nɔ́-ɓà ɖò ɓɛ́ ɔ nyìnììn ɔ gmàà bũ̀in, ké ɔ ɖaɓaìn ɔ wuɖuiɛɛ kɔ̃̀ ɔ ké ɖɛ tɔ̀ɔ̀ ɓè nyu, ɓɛ́ ɔ ké gbo-kpɔ̃ìn-kpɔ̃ìn nìà ɔ kè Jɛhova kè ɔ gmàà pṹa kɛɛ dyí sɛ́ɖɛ́ìn. Ðɛ́ mɔ̀ nyuu-ɖɛ̀ ɓèɔ̀ kɛ́? Dòò, ɔ mɛ dyuòɛ̀ dyí kà ɔ ɓéɖé kpeɖe gbà kɛ. Ðɛ ɖò se Jɛhova dyí vìe. (Wɛ́ɖɛ́ 44:21; Ìkí. 12:14; Híì. 4:13) Sɔ̃́, ɔ mɛ ɓɔ́ ɔ gmàà kpɔ̃ɔ gbà-kà, ké ɔ mɛ zĩàìn ɔ kpeɖeɔ̀ gbo. (Nɔ́ɔ́ 28:13) Tã, ɔ mɛ nyí ɔ gmàà kè Jɛhova gɔ̃̀, ɓɛ́ ɔ ké wa kɔ̃in-zĩ̀ìn-zĩ̀ìn zɔ̀ìn. (Àpɔ́. 3:19) Ɔ mɛ zɔ̀ìn Jɛhova gbo-kpá-kpá ɖekè, ɓɛ́ ɔ ké gbo zĩàìn mɔ́, kè ɓɛ́ ɔ ké ɔ hwìɖìi-poìn-kà kè ɔ wĩín-wùɖù ɔ kè ɔ nyuu-ɖɛ̀ ɓè dyí kpɔ̃. (Wɛ́ɖɛ́ 51:​10-12; 2 Kɔ̀. 10:5; Fèɖ. 2:13) Hĩinyɛ, ɔ mɛ nyùìn ɓó ɖɛ ɖò ɓá ɔ ɓaà-wùɖùɔ̀ dyí dyììn ɖé vɔ̃-vɔ̃ séín ɖò kè wuɖu gbà ɓè mú nyɛ́-nyɛ́ mú. (Wɛ́ɖɛ́ 97:10) Hm̀m, ɔ mɛ zɔ̀ìn ɛ́ɖɔ̀ ɓèɔ̀ gbo-kpá-sɔ̃̀ wàɖà. (Jĩ́ìn 5:​14-16) Mɛ̀nɛìn-ɖò, ɔ mɛ po dyí-sɔ́-ɖɛ̀ ɖò ɓɛ́ ɔ mu ɔ gbo kpáùn ɓɛ́ ɔ ké kpeɖe nì kà ɓèà dyí ɖàɓàìn ɖé dyúa kɛɛ páún. Nyɔ́nɔ́-ɓà ɖò ɓɛ́ ɔ dyé gbàɖàùn-po-po dyi-dyé-ɖɛ̀ dyiɛɛ mɛ sí nyuu-ɖɛ̀ dyúáɖò ɓè nìà kɛ kíɖíí. Jɛhova mu ɔ dúún-ku-kuɔ̀ mana kɔ̃ poùn, ɓɛ́ ɔ ké ɔ kpeɖeɔ̀ gbo zĩàìn. (Wɛ́ɖɛ́ 37:5) Kɛɛ, ɔ se pṹá ɖu ɓɛ́ nyɔ́nɔ́-ɓà ɖò ké se-nyɔ-kpéín-dyé-kpèɖè dyí ɓàɖàìn ɖòùn pu. Kɛɛ, ɔ kɔ̃̀ ɔ ké ɔ gmàà kpéín dyé-dyé cɛ̃́. Xwɛ̀ ɔ ɓɛ́ìn náa nyuɛ kɛ́?

KÀ M̀ KÉ NÌ GMÀÀ KPÉÍN DYÉƐ NYUƐ

15. Xwɛ̀ nyɔ́nɔ́-ɓà ɖò ɓɛ́ìn ɔ gmàà dɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛ́?

¹⁵ Tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn. Ðɛ ɖíí-gàà ɖíɛ́ ɓè ɓɛ́ wa mɔ̀ dyi-kpɔ̃ìn-nyɔ̀ ɓè, ké wa kpá múàùn wɛ̃ nyu teeɛɛ mɔ̀, wa nyu ɖɛ ɖò wé séín ɓɛ́ wa kéɛ wa gmàà dyí tɛ̀mɛ̀ìn kà wa ɖɛ̀ɓɛ̀ ɔ mú mìɔ kɛ. (1 Jɔ̃́ɔ́ 3:18) Nyɔ́nɔ́-ɓà ɖò ɓɛ́ìn ɔ gmàà ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn ɖé ɖɛ mɛ́nɛ́ɛ́ ɓè mú, ɔ hwɔìn-kà, dyììn ɖé ɔ sɔ̃-dyi-kpɔ̃-kpɔ̃ mɔɔ ɔ gbèɖèìn-gbèɖèìn mú. Ɔ ɓɛ́ìn ɔ cuò-wùɖù gbo  ɖoɓoɛ ɓɛ́ ɔ ké níin, “Nì tó nì ḿ nyuɛńo,” mɔɔ ɔ ké níin, “À wɔ̃́ ɖé m̀ gboe?” Sɔ̀ìn ti gbo mu ti gboɛɛ, ɔ ɓɛ́ìn cɛ̃ɛ kà ɔ ɖɛ̀ɓɛ̀ ɔ gmàà múɛ dyììn ɖé ɔ wuɖu ɖéé-ɖéé ɓè gbo céè-céè mú. Nyɔ́nɔ́-ɓà ɖò dyi ɖɛ ɓè nìà kɛ nyu ní, ɔ dyé ɔ gmàà kpéín, ké ɔ kùìn wa dyi-kpɔ̃ìn-kpɔ̃ìnɔ̀ dyi.

16. Xwíníínɔ̀ nyɛ́ kɔ̃̀ jè nyɔ́nɔ́-ɓà ɓè mɛ ɓàìn wa gmàà kɛ́?

¹⁶ Po ɔ zùo. Gàa ɓɛ́ ɔ dyé ɔ gmàà kpéín nyɛɛ kùìn ɔ dyi, ké ɔ po ɔ kpéí. Hwìè ɖò kɔ̃̀ mú ɓɛ́ ɔ nyuɛ náa kɛɛ mɔ̀, dyììn ɖé ɔ zùo-po-po mú ɓó ɔ sɔ̃ xwíɖíi dè jè. (Kɔ̀ɖ. 3:15) Nyɔ́nɔ́-ɓà ɖò dyi ɔ gmàà ɓàìn ɖé hwòɖò wáɖáá mú ní, ɔ po màaɔ̀ múàùn. Ɔ mu hwìɖìi zaìn, ké ɔ muɛ dyéìn kà gàaɔ̀ ɖɛ̀ɓɛ̀ ɔ mú, ké ɔ dyé ɔ kpéín nyɛ.—Nɔ́ɔ́ 31:28.

17. Xwɛ̀ nyɔ́nɔ́-ɓà ɖò ɓɛ́ìn tɛ̀mɛ̀ìn kà ɔ dyé ɔ gmàà kpéín nyɛ́?

¹⁷ Kpɔ̃ ɔ kpeɖeín-nɔ̀mɔ̀-kà kè kpéín-dyé-kà. Nyɔ́nɔ́-ɓà ɓɛ́ ɔ ɖɛ̀ɓɛ̀ ɔ gmàà múɛɛ kàmà ɔ jè mìɔ cá. Ɔ gmɔ̀ ɔ dya kà nyíí-ɖɛ̀ kpa ɖɛ ɖò sɔ̀ìn ɖé Jɛhova gboɛɛ nìà kɛ. (Nɔ́ɔ́ 18:22; 31:10) Ɔ jèɛɛ, ɔ kpɔ̃ ɔ kpeɖeín-nɔ̀mɔ̀-kà kè kpéín-dyé-kà, kɛbì ɔ mɛ mɔ̀ ɖé gbòùn kè gã gboɛ. Ɔ se ɔ dyí dèɛ̀ mu ɓɛ́ wa ké màa kè gàa da-nì-kà ɓɛ́ ɔ muɛ nyuùn ɓɛ́ màaɔ̀ ké zùùn sɔ̀ìn mɔɔ ɔ hwòɖò ké ɖé ɖei kpá mɔɔ ɔ hwòɖò-xwíníín-hwòɖò-dyùàɔ̀ ké ɔ ɓaɖa kɛɛ xwai nyu. f Gàaɔ̀ mɔ̀ùn mu vɔ̃ùn ɖekè ɓɛ́ ɔ hwòɖò-dyùà ké wáɖáá nì ɖé Jɛhova gbo.—Àpɔ́. 24:16.

18. Ðɛ́ nyɔ́nɔ́-ɓà ɓè mɛ jìnììn kɔ̃̀ ɓɛ́ wa ké nyu kɛ́? (Dyé gbɔ̀ɖɔ̀ɔ̀ nìà kɛ ɖekè, “ Hwìè Hĩinyɛ Ɓè Kɔ̃̀ Mú Nyɔ́nɔ́-Ɓà Ðò Ɓɛ́ìn Kpéín-Dyé-Dyé Tɛ̀mɛ̀ìn Nyɛ.”)

¹⁸ Nyɔ́nɔ́-ɓà ɓè, kà ɓè nìà vɔ̃uń ɓɛ́ ɓè kéà ɓèɛ̀ gmàà ɓèɔ̀ kpéín dyé ɖé ɓèɛ̀ cĩ́-cĩ́ gànáɔ̀ múɛɛ, ɓè ɓɛ́ìn hwòɖò kɔ̃ dèɛ̀ kà ɓɛ́ Jɛhova nìɛ dyéɛń, ké ɔ dè ɔ hwìɖìiɛ. M̀ mɛ jìnìɛ̀n kɔ̃ ɓɛ́ m̀ ké ɔ kpéín dyé dyììn ɖé se-nyɔ-kpéín-dyé-kpèɖè ɓè dyí-ɓàɖàìn-ɓàɖàìn mú, kè ɓɛ́ m̀ ké kpeɖeín-nɔ̀mɔ̀-nɔ̀mɔ̀ kè kpéín-dyé-dyé ɔ kè ɖɛ̀ɓɛ̀ìn-ɖɛ̀ɓɛ̀ìn ɔ dyí tɛ̀mɛ̀ìn. M̀ dyiɛ náa nyuín, m̀ tɛ̀mɛ̀ìn kà m̀ ɖɛ̀ɓɛ̀ ɔ mú, ké ɔ jè kpa ɖɛ ɖé m̀ gboɛ. Dyé nì gmàà kpéín, nìí, nì mu nì gbo-kpɔ̃ìn-kpɔ̃ìn zi ɖɛ kpauńɔ̀ dyí gmɔ̀ùn—ɔ mɔ̀ gbo-kpɔ̃ìn-kpɔ̃ìn nìà m̀ kè Jɛhova pṹa kɛ.—Wɛ́ɖɛ́ 25:14.