1. Ðɛ́ mɔ̀ ɖɛ kàmàùn-kàmàùn ɖò ɓɛ́ à séín dyé dyíɛ́?

 WÉ SÉÍN NÍ, à kɔ̃̀ à ké ɖɛ ɓè gbɔ po. Ðɛ ɖíɛ́ ɓè gbɔ po jè fɛ̃̀ìn xwa, ɔ hwɔìn-kà, ɖɛ à ké ɖi ɓó gànà-kṹún wɛ̃, mɔɔ ti à ké gbòùn mùìn nyɛ. Ðɛ tɔ̀ɔ̀ ɓè jè gbɔ-po-po kàmà mú. Wa ɓɛ́ìn ɖɛ gbo zĩàìn ɓá à dyɔɔ̀ mú wóɖó jè mɔɔ à múàùn kpá jè mɔɔ à ɖɛ̀ɓɛ̀-nyɔ̀ ɓè mɔɔ à ɓiè-ɓièɔ̀ jè dyí. À mɔ́ ɓɛ́ à gbɔ-po-ɖɛ̀ ɓè ké à kè à xwéɖé-dùɔ̀ kpáná dyí nyu. Ðɛ kpa ɖɛ jɛ́ɛ́ kɛɛ mɔ̀, ɓɛ́ à gbɔ-po-ɖɛ̀ ɓèɔ̀ ké Jɛhova hwìɖìi dè.—Wóɖ. 12:​1, 2.

 2. Ðɛ́ mɔ̀ nyuu-ɖɛ̀ ɓè ɓɛ́ wa mu m̀ gbo kpáùn, ɓɛ́ m̀ ké ɖɛ nɔ̀mɔ̀ dyíin ɓè gbɔ po kɛ́?

² Nì mu dyɛ̀ ɖɛ nɔ̀mɔ̀ dyíin gbɔ poɛ ɓɛ́ìn ɔ jù ké (1) m̀ dyiɛ jè múin wɔ̃́ ní, (2) m̀ dyi kà Jɛhova nyu ɖɛɔ̀ dya gmɔ̀ kɛɛ jè hwìɖìi poìn ní, kè (3) m̀ dyi ɔ kpɔ̃-kà ɓè jè hwìɖìi poìn ní. Cɛ̃́ɛ́-ɖɛ̀ nìà kɛɛ mu nyuu-ɖɛ̀ ɓèà dɔ́ɔ́ kɔ̃in dèìn, ké ɔ mu à gbo kpáùn ɖekè, ɓɛ́ à ké kà à ké à ɖɛ-dyí-dyuò-dyuòɔ̀ kũ̀à mú nyùìn nyɛɛ dyé.—Nɔ́ɔ́ 2:11.

WƆ̃́ ÐƐƆ̀ JÈ MÚIN

 3. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ m̀ kéà ɖɛ ɖò jè múin wɔ̃́ kĩ́ín hwɛ̀ m̀ kéà ɖɛ ɖò gbɔ po kɛ́? Poɛ̀n ɖɛi.

³ Ðɛ kĩ́ín m̀ kɔ̃̀ m̀ ké nyu ɓɛ́ m̀ ké ɖɛ nɔ̀mɔ̀ dyíin ɖò gbɔ poɛɛ mɔ̀ ɓɛ́ m̀ kéɛ jè múin wɔ̃́. Ðɛ́ kɔ̃̀ jè ɖɛ nìà kɛ kpaà ɖɛ kɛ́? Nàìn hwìɖìi kà wɛ́-nyɔ̀ ɖò muɔ́ má hwòo-nyɔ̀ ɖò gbo ɓá wɛ́ ku wɔ̃ ɖò jè dyíɛ. Hwòo-nyɔ̀ɔ̀ mu kũùn ɔ ké tòɛ̀ jè gbɔ poùn, ɓɛ́ ɔ ké se wɛ́-nyɔ̀ɔ̀ múin gmɔìn, mɔɔ ɔ ké se nyɔɔ̀ dyi-diè-ɖɛ̀ ɓè dyi dièè?  Ɔ se ná nì fɔɔ. Mɔ̀ùn mu ɖɛ nɔ̀mɔ̀ dyíin ɓè gbɔ poùn ɖekè ɔ jù ké m̀ dyi jàà-ɖɛ̀ ɓè ɓá ɖɛ kpáà kɛ jè dyíɛɛ múin wɔ̃́ùn kĩ́ín ní. Xwɛ̀ m̀ ɓɛ́ìn náa nyuɛ kɛ́?

 4. Kà Nɔ́ɔ́ 18:13 nyuà cɛ̃ɛ kɛɛ, ɖɛ́ m̀ ɓɛ́ìn nyuɛ ɓɛ́ m̀ ké ɖɛ ɖò múin wɔ̃́ kɛ́? (Dyé dyi-dyé-ɖɛ̀ɔ̀ ɖekè.)

⁴ M̀ ɓɛ́ìn ɖɛ ɖò múin wɔ̃́ɔ dyììn ɖé ɖɛ-dyi-diè-diè mú. Nàìn hwìɖìi kà nyɔ ɖò ɖá m̀ hwɔ ɖò kɔ̃ɛ. M̀ mɛ mu ɖéè? Ɔ jù ké m̀ se hwɔ-ɓàɔ̀ mɔɔ ɖɛ wa po ɖé páún wɛ̃ɛ dyí dyuò ní, nì mu nyɔɔ̀ dyi-diè-ɖɛ̀ ɓè nìà kɛ dyi dièìn: “Dɛ̀ kè tiɔ̀ nyɛ́ wa mu hwɔɔ̀ ɓéɖéìn nyɛ́? Xwɛ̀ hwɔɔ̀ mu ɓɛ́ìn nyɛ́? Nyɛ́ mu hwɔɔ̀ kɔ̃in nììn nyɛ́? Nyɛ́ kè nyɛ́ mu ɖé nììn nyɛ́? Nyuu-ɖɛ̀ ɓèɔ̀ nyɛ́ mu ɖé nììn nyɛ́? Náá-ɖɛ̀ kàmà-kàmà ɓè mu ɖé nììnǹ?” Dyi-diè-ɖɛ̀ ɓèɛ̀ gɔ̃̀-jù-wùɖù mu m̀ gbo kpáùn, ɓɛ́ m̀ ké ɖɛ nɔ̀mɔ̀ dyíin gbɔ po.—Zà Nɔ́ɔ́ 18:13 wuɖuún.

 5. Ðɛ́ m̀ mɛ nyu ɔ jù ké m̀ ɖà ɖɛɔ̀ múin wɔ̃́ níɛ́?

⁵ M̀ ɖà ɖɛɔ̀ múin wɔ̃́ ní, nìí, poìn ɖɛ gànáɔ̀ jè hwìɖìi. Ɔ hwɔìn-kà, ɔ jù ké m̀ dyiɛ dyí dyuò kà nyɔ ɓè ɓɛ́ wa se Baɓoɔ hwìè-da-zàìn-wùɖù ɓè kpéín dyéɛ mu ɖé nììn, mɔɔ náá-ɖɛ̀ kàmà-kàmà ɓè mu ɖé nììn, ké nyɔ ɖò seɛ kɔ̃in nìɛ̀ mu ní ɖé? M̀ dyéɛ nàdì ɖò múù kà hwɔ nìà kɛ se dyí-kpɔ̃-kà nìɛ̀ muɛɛ̀? (1 Píɖɛ̀ 4:3) Ké ɖeɛɛ, ɔ jù ké ti wa nìà hwɔɔ̀ ɓéɖéɛń nyɛɛ kè nì dyí-poìn-kpòòɔ̀ dyí-poìn-tì, mɔɔ ɔ kè nì wuɖu-wáɖá-tìɔ̀ dyi dyí ɓɛɖɛìn ní ɖé? M̀ ɖà ɖɛ gànáɔ̀ múin wɔ̃́ ní, nì muá hwìè kɔ̃ nììn ɓó ɖɛ  nɔ̀mɔ̀ dyíin gbɔ po jè. Kɛɛ, ɖɛ kà kò ɖò nì ɓó ɓɛ́ m̀ kɔ̃̀ m̀ ké nyuɛ. M̀ dyuò kà m̀ nyu ɖɛɔ̀ dya gmɔ̀ɔ̀ kɛɛ dyí; kɛɛ xwɛ̀ Jɛhova hwòɖò nyu nìɛ̀ ɓá ɖɛɔ̀ jè dyíɛ́?—Nɔ́ɔ́ 2:6.

POÌN KÀ JƐHOVA NYUƐ DYA GMƆ̀Ɔ̀ KƐƐ JÈ HWÌÐÌI

 6. Kà Jĩ́ìn 1:5 nyuà cɛ̃ɛ kɛɛ, xwíníínɔ̀ nyɛ́ kɔ̃̀ jè à mɛ zɔ̀àìn Jɛhova gbo-kpá-sɔ̃̀ kɛ́?

⁶ Ɓaà Jɛhova ɓɛ́ ɔ ké m̀ gbo kpá, ɓɛ́ m̀ ké ɔ hwìɖìi-poìn-ɖɛ̀ múin wɔ̃́. Jɛhova cɛ̃ɛ kà ɓɛ́ ɔ mu à fɔ̀nɔ̀-hwòɖò nyíìn, ɓɛ́ à kéɛ dyí dyuòɛ̀ ɓɛ́ìn kɛbì gbɔ-po-ɖɛ̀ ɖò mu ɔ hwìɖìi dèìn ní. Ɔ nyí nyɔ fɔ̀nɔ̀-hwòɖò nì náa “ké ɔ ní dèɛ̀ wuɖu kɔ̃.”—Zà Jĩ́ìn 1:5 wuɖuún.

 7. Xwɛ̀ m̀ ɓɛ́ìn Jɛhovaa hwìɖìi-poìn-ɖɛ̀ dyí dyuòɛ̀ kɛ́? Poɛ̀n ɖɛí.

⁷ M̀ ɖà Jɛhova hwìè-dà-zàìn-zàìn zɔ̀ìn ní, dè ɔ gɔ̃̀-jù-wùɖùɔ̀ dyéɖé gbo kóɖó-kóɖó. Ɓèà poɛ̀n ɖɛí: Ɔ jù ké m̀ dyiɔ́ dà ɖò muɛń nì, ké m̀ dyiɔ́ xwáɖáún sè ní, nì mu dyɛ̀ hwɔ̀ɖɔ̀-nyɔ̀ ɖò dyi dièìn. Kɛɛ, nì mu kɔ̃ pòìn hwɛ̀ ɓɛ́ nyɔɔ̀ ké ɖé wuɖu zàà? Ɔ se ná nìɛ̀ mu fɔɔ. Nì mu ɔ wuɖuɔ̀ ɖùù gbo tòùn kóɖó-kóɖó. Kà dyúáɖòɔ̀ kàà, m̀ dyi Jɛhova fɔ̀nɔ̀-hwòɖò zɔ̀ìn ní, m̀ mɛ vɔ̃ ɓɛ́ m̀ ké ɔ gɔ̃̀-jù-wùɖùɔ̀ dyéɖé gbo dè dyììn ɖé Baɓo gma ɓè kè Baɓo hwìè-da-zàìn-wùɖù ɓè ɓɛ́ wa ɓá ɖɛ m̀ nìà dyí dyéɛń nyɛ dyíɛɛ jè múin-ɖe-ɖe mú. Ɔ hwɔìn-kà, m̀ dyiɛ gbɔ poɛń nì ɓɛ́ m̀ ké hwɔ à cɛ̃ɔ́ kà jèɛɛ kɔ̃ mu, mɔɔ m̀ ké  se ɖé mu ní, m̀ ɓɛ́ìn ɖɛ Baɓoɔ cɛ̃ ɓá hwɔ se dyí-kpɔ̃-kpɔ̃ ɖò kɔ̃̀ɛ kè ɓàto gbà ɔ kè Kã́á-ɓòɖòɔ̀ po jè kĩ́ín nyɛ dyíɛɛ jè hwìɖìi poɛ̀n.—Máf. 6:33; Wóɖ. 13:13; 1 Kɔ̀. 15:33.

 8. Ðɛ́ m̀ ɓɛ́ìn nyuɛ ɔ jù ké m̀ dyi gbo-kpá-sɔ̃̀ mɔ́ ɓó ɖɛ m̀ nìà dyi mɔ́uń wɛ̃ɛ jè níɛ́? (Dyé dyi-dyé-ɖɛ̀ɔ̀ ɖekè.)

⁸ Kɛɛ, tiɔ̀ ɖíɛ́ ɓè ɓaɖaín, nì mu dyɛ̀ gbo-kpá-sɔ̃̀ mɔ́ùn ɓó ɖɛ ɓè m̀ nìà dyi mɔ́uń wɛ̃ɛ dyé jè. Ðíí-gàà mɔɔ ɖíí-màà hwɛ̀ ɖɛ ɖò ɓɛ́ìn m̀ náún poɛ. Kɛɛ, nì mu ɖɛ-múin-ɖe-ɖe ɓó m̀ mìɔùn sɔ̃ kɔ̃ɛɛ kpáná kɔ̃ún dyéìn ɖekè. Ðɛ kpa ɖɛ pàɖà ɓè nì ɖé à ɖɛ-múin-ɖe-cèè-ɖɛ̀ ɓèɔ̀ mú. Céè-ɖɛ̀ ɓèa ɖíɛ́ ɓè mɔ̀, Ðɛ-Múin-Ðe-Cèè-Ðɛ̀ Ɓó Jɛhova Zàse Ɓè Bìì kè Baɓo Vɔ̀sì Ɓè Ɓó Kɛ́ɖɛ́ì Ðeín-Sí-Kà Cĩ́ Jè. Ðɛ mɛ nì m̀ hwìɖìiɛ mɔ̀: ɓɛ́ m̀ ké ɖɛ mu Jɛhova hwìɖìi dèìn nyɛɛ gbɔ po.

 9. Xwɛ̀ à ɓɛ́ìn dyí dyuòɛ̀ wáɖáá kà à gbɔ-po-ɖɛ̀ɔ̀ mu Jɛhova hwìdìi dèìn nyɛ́? (Ìfísĩ̀ɔ̀ 5:17)

⁹ Xwɛ̀ à ɓɛ́ìn dyí dyuòɛ̀ wáɖáá kà à gbɔ-po-ɖɛ̀ɔ̀ mu Jɛhova hwìɖìi dèìn nyɛ́? Kĩ́ín nyɛɛ, à kɔ̃̀ à ké Jɛhova dyí dyuò nɔ̀mɔ̀ dyíin. Baɓoɔ ɖá, “Mú-hwɛ̀-nyɔ̀ɔ̀ dyí-dyuò-dyuò dyà ɖɛ-múin-wɔ̃́-wɔ̃́.” (Nɔ́ɔ́ 9:10) Ǹdye, jàà ɖɛ-múin-wɔ̃́-wɔ̃́ sɔ̀ìn ɖé Jɛhovaa kpeɖe ɓè kè ɔ hwòɖòɛ̀-gbɔ-po-ɖɛ̀ ɔ kè ɖɛ ɔ ɖɛ̀ɓɛ̀ múɛ mɔɔ ɖɛ ɔ nyɛ́ múɛɛ dyí-dyuò-dyuò mú. Diè m̀ mìɔùn dyi, ‘Dyììn ɖé ɖɛ ḿ dyuò dyí ɓá Jɛhova jè dyíɛ múɛɛ, ɖɛ́ ḿ ɓɛ́ìn gbɔ poɛ ɓɛ́ ɔ mu ɔ hwìɖìi dèìn nyɛ́?’—Zà Ìfísĩ̀ɔ̀ 5:17 wuɖuún.

10. Ðɛ́ kɔ̃̀ jè Baɓo hwìè-da-zàìn-wùɖù kpaà ɖɛ ké ɔ zià nyaá-nya-ɖɛ̀ ɓè dyíɛ́?

¹⁰ Ɓɛ́ à ké Jɛhova hwòɖò dyi dè ní, à ɓéɖé ɓɛ́ à ké nyɔ ɓè xwɛ̃́ìn à bũ̀in nyɛɛ hwòɖò ɖé ɖei po tiɔ̀ ɖíɛ́ ɓè ɓaɖa. Ɔ hwɔìn-kà, wóɖóìn-nyɔ̀ ɖíɛ́ ɓè ɓɛ́ wa ɓéɖé hwòɖò nɔ̀mɔ̀ dyíin nyɛɛ ɓɛ́ìn wa dyú-màà ɖò ɓɛ́ ɔ ɖà nyɔ́nɔ́ìn kpɔ̃ kɛɛ dyí dèɛ̀, ɓɛ́ ɔ ké gàa ɖò ɓɛ́ ɔ ɓéɖé wíɖí—mɔɔ ɔ ɓɛ́ìn nyɔ́nɔ́-wìɖì goun pɛ́ɛ̀ dyi kpɔ̃—kɛbì ɔ mɛ se dyi ku ɖé zùùn wɛ̃. Jàà kɛɛ, wa mɔ́ ɓɛ́ wa dyú-mààɔ̀ ké cĩ́-cĩ́ nɔ̀mɔ̀ dyíin ɓéɖé, kɛɛ nyɛ́ mu ɔ gbo kpáùn ɓɛ́ ɔ ké dyúa mu ɖé zùùn wɛ̃́? Xwɛ̀ Jɛhova nyuɛ dya gmɔ̀ɔ̀ kɛ́? Ɔ gɔ̃̀-jù-wùɖùɔ̀ nì ɖé Máfíò 6:33 mú. Ðéɛ̀ wa cɛ̃ɛ Kɛ́ɖɛ́ì ɖeín-sí-nyɔ̀ ɓè gbo kà “ɖɛ mɛ kpɔ̃ [wa] hwòɖòɛɛ mɛ mɔ̀ Geɖepɔɔ kã́á-ɓòɖòɔ̀” kɛ. À dyé à wóɖóìn-nyɔ̀ ɓè kè nyɔ ɓè nì à gbɛ̀ɔ̀ múɛ kpéín dyɛo, kɛɛ ɖɛ kpɔ̃ à hwòɖò jɛ́ɛ́ kɛɛ mɔ̀ ɓɛ́ à ké Jɛhova múàùn po.

POÌN Ɔ KPƆ̃-KÀ ƁÈ JÈ HWÌÐÌI

11. Kpeɖeɔ̀ nyɛ́ Fèɖópĩ̀ɔ̀ 1:​9, 10 cɛ̃ jè, ɓɛ́ ɔ mu m̀ gbo kpáùn ɓɛ́ m̀ ké ɖɛ ɖòɛ̀ kpɔ̃-kà ɓè jè hwìɖìi poìn kóɖó-kóɖó kɛ́?

¹¹ Ɔ jù ké m̀ ɖà Baɓo hwìè-da-zàìn-wùɖù ɓè ɓá nì gbɔ-po-ɖɛ̀ɔ̀ dyíɛɛ jè múin ɖe ní, m̀ kɔ̃̀ m̀ ké ɔ kpɔ̃-kà ɓè jè hwìɖìi poìn kóɖó-kóɖó. (Zà Fèɖópĩ̀ɔ̀ 1:​9, 10 wuɖuún; dyé cɛ̃́ɛ́-ɖɛ̀ ɓáà “ɖɛ séín múin-wɔ̃́-wɔ̃́” dyíɛ.) Ðɛ-múin-wɔ̃́-wɔ̃́ muɛ nyuùn ɓɛ́ m̀ ké ɖɛ ɓɛ́ìn ɖɛɔ̀ kpɔ̃-kà ɖò-ɖò mú sɔ̀ìn nyɛɛ dyé. Ɔ ɓɛ́ìn xwa fɛ̃́ɛ̀n tiɔ̀ ɖíɛ́ ɓè ɓaɖa ɓɛ́ m̀ ké ɖɛ gbɔ po. Kɛɛ, gbɔ-po-ɖɛ̀ séínɔ̀ se ná xwa fɛ̃́ìn. Ðɛ-múin-wɔ̃́-wɔ̃́ mu m̀ gbo kpáùn, ɓɛ́ m̀ ké ɖɛ nɔ̀mɔ̀ dyíin ɓè gbɔ po kɛbì wa mɛ nì sìà-sìà kɛ.

12-13. Xwɛ̀ ɖɛ-múin-wɔ̃́-wɔ̃́ ɓɛ́ìn m̀ gbo kpáa ɓɛ́ m̀ ké ɖɛ nɔ̀mɔ̀ dyíin gbɔ po ɓá kũ̀à m̀ ké nyuɛɛ jè dyíɛ́?

¹² Nàìn ɖɛ nìà kɛ hwìɖìi. M̀ nì kũ̀à dyi mɔ́uń ɓɛ́ m̀ ké nì xwéɖé-dùɔ̀ gbo gmɔ̀. Kũ̀à sɔ̃́ nì ɓó. M̀ gmɔìn ɖɛ séín múin, ké m̀ dè kà kũ̀à ɓèɔ̀ nyu nìɛ̀ kɛ kè kà wa nyu wa naɓaà kɛɛ dyéɖé gbo. Ké ɖeɛɛ, m̀ dè ti jĩ̀-kà ɔ mu dyí ɖúún ɓɛ́ m̀ ké kũ̀à ɓèɔ̀ gbo muɛɛ kè ɖɛ tɔ̀ɔ̀ ɓè dyéɖé gbo. Kũ̀à sɔ̃́ ɓèɔ̀ nɔ̀mɔ̀ dyíin ɔ dyi Baɓo hwìè-da-zàìn-wùɖù ɓè jè gbo dyi ní. Kũ̀à ɓèɔ̀ dyúáɖò ɓɛ́ìn dyɛ̀ m̀ hwìɖìi nɔ̀mɔ̀ɔ̀, sepoɛɖe m̀ ɖɛ̀ɓɛ̀ kà kũ̀àɔ̀ nyu nìɛ̀ kɛɛ mú, mɔɔ ɔ ɓéɖé wíɖí pàɖà jè. Kɛɛ, ɖɛ tɔ̀ɔ̀ ɓè nì ɓó ɖe, ɓɛ́ m̀ kɔ̃̀ m̀ ké jè hwìɖìi poìn hwɛ̀ m̀ ké ɖɛ gbɔ poɛ.

¹³ Ɔ hwɔìn-kà, kũ̀à ɓèɔ̀ ti kè nì dyí-poìn-kpòòɔ̀ dyí-poìn-tì mu dyí ɓɛɖɛìnǹ? Kũ̀à ɓèɔ̀  mu ti m̀ kɔ̃̀ m̀ ké ɓéɖé ɓɛ́ m̀ ké nì xwéɖé-dùɔ̀ gbo hwèɖè, kè ɓɛ́ m̀ ké wa gbo kpá ɖé zùùn wɛ̃ɛ kɔ̃ cɛ̃ìnǹ? Ðɛ ɓèa dyi-diè-diè mu m̀ gbo kpáùn, ɓɛ́ m̀ ké “ɖɛ mɔ̀ ɖɛ nɔ̀mɔ̀ dyíin”—mɔ̀à nì ɓiè-ɓièɔ̀ kè ɖɛ nì xwéɖé-dùɔ̀ mɔ́ kɛɛ—ɖé kɔ̃̀ɔ̀-ɖɛ̀ ɓè kɔ̃in po. Nìí, m̀ ɓɛ́ìn ɖɛ ɓɛ́ Jɛhova mu mana kɔ̃ poùn wɛ̃ɛ gbɔ poɛ.

14. Xwɛ̀ ɖɛ-múin-wɔ̃́-wɔ̃́ kè ɖɛ̀ɓɛ̀ìn-ɖɛ̀ɓɛ̀ìn mu à gbo kpáùn, ɓɛ́ à ké se dyí-gbò-ɖɛ̀ ɖò nyɔ tɔ̀ɔ̀ ɓè hwìi po kɛ́?

¹⁴ Ðɛ-múin-wɔ̃́-wɔ̃́ nyuɛ ɓɛ́ à ké kà à gbɔ-po-ɖɛ̀ nyu nyɔ tɔ̀ɔ̀ ɓè dyí ɓáa kɛɛ jè hwìɖìi poìn ɓɛ́ à ké se “dyí-gbò-ɖɛ̀ nyɔ tɔ̀ɔ̀ ɓè hwìi po.” (Fèɖ. 1:10 nwt) Ðɛ nìà kɛ kpa ɖɛ ɔ jù ké à dyi ɖɛ ɓè ɓá à mìɔùn jè dyíɛ, ɔ hwɔìn-kà ɖɔún-po-kà kè bɛ̃̀ìn-kà jè gbɔ poɛń nììn. À ɓɛ́ìn ɖɔún-po-kà mɔɔ bɛ̃̀ìn-kà jɛ́ɛ́ ɖò mú ɖɛ̀ɓɛ̀ɛ̀. Kɛɛ, ɔ jù ké nyɔ tɔ̀ɔ̀ ɓè nì ɖé dyí-poìn-kpòòɔ̀ múɛ mɔɔ ɖé píé kɛɛ se nì bɛ̃̀ìn-kàɔ̀ múàùn dyi kpáìn ní ɖé? Ðɛ-múin-wɔ̃́-wɔ̃́ mu à gbo kpáùn, ɓɛ́ à ké kà nyɔ tɔ̀ɔ̀ ɓè hwòɖò nyu nìɛ̀ kɛɛ kpéín dyé.  Ðɛ̀ɓɛ̀ìn-ɖɛ̀ɓɛ̀ìn muɛ nyuùn ɓɛ́ à ké à “mùe ɖò” nɔ̀mɔ̀ dyíin dyi mɔ́, kè ɓɛ́ à ké à mìɔùn ɓíɖíi dyà. (1 Kɔ̀. 10:​23, 24, 32; 1 Tím. 2:​9, 10) Nìí, à mu ɖɛ ɓɛ́ ɔ tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn kè kpéín-dyé-dyé ɓó nyɔ tɔ̀ɔ̀ ɓè bììɛɛ gbɔ poùn.

15. Ðɛ́ mɔ̀ ɖɛ-dyí-sɔ́-sɔ́ ɓɛ́ ɔ kɔ̃̀ ɔ ké nì hwɛ̀ m̀ ké gbɔ-po-ɖɛ̀ kpa ɖɛ ɖò nyu kɛ́?

¹⁵ Ɔ jù ké m̀ dyi ɖɛ kpa ɖɛ ɖò gbɔ poɛń nììn, poìn ɖɛ ɔ mu dyí ɖúùn ɓɛ́ m̀ ké gbɔ-po-ɖɛ̀ɔ̀ nyuɛɛ jè hwìɖìi. Jizɛ ɖá à mɛ “po wíɖí jĩ̀ kà” mɔɔ ɖɛ ɔ mu dyí ɖúùn wɛ̃ɛ jè hwìɖìi. (Ðúù 14:28) Ɔ jèɛɛ, poìn ti kè wíɖí ɔ kè kpé jĩ̀ kà m̀ mu ɖé poùn ɓɛ́ nì gbɔ-po-ɖɛ̀ɔ̀ ké mú wóɖóɛɛ jè hwìɖìi. Ðé ɖɛ ɖíɛ́ ɓè múɛɛ, m̀ ɓɛ́ìn nì xwéɖé-dùɔ̀ gbo cɛ̃ɛ ɓɛ́ ɓè ké ɖɛ nyɔ ɖò-ɖò kɔ̃̀ ɔ ké nyu ɓɛ́ gbɔ-po-ɖɛ̀ɔ̀ ké mú wóɖóɛɛ jè dyí sɔ́. Ðɛ́ kɔ̃̀ jè ɖɛ-dyí-sɔ́-sɔ́ nì kà kɛɛ kpaà ɖɛ kɛ́? Ɔ ɓɛ́ìn tɛ̀mɛ̀ìn kà nì gbɔ-po-ɖɛ̀ɔ̀ mɔ́ dyí-zàìn-zàìn mɔɔ ɖɛ kà kò ɖò gbɔ-po-po mu dyíin nɔ̀mɔ̀ùn wɛ̃. Ké m̀ dyi nì xwéɖé-dùɔ̀ dyi diè, ké m̀ dyi wa fɔ̀nɔ̀-hwòɖò ɓèɔ̀ ɖùù gbo tò ní, nìí, wa hwòɖò mu wɔ̃́ùn, ɓɛ́ wa ké m̀ sɔ̃ xwíɖíi dè, ɓɛ́ gbɔ-po-ɖɛ̀ɔ̀ ké mú wóɖó.—Nɔ́ɔ́ 15:22.

PO ÐƐ MU MÚ WÓÐÓÙN WƐ̃Ɛ GBƆ

16. Ðɛ́ mɔ̀ nyuu-ɖɛ̀ ɓè ɓɛ́ wa mu m̀ gbo kpáùn ɓɛ́ m̀ ké ɖɛ mu mú wóɖóùn wɛ̃ɛ gbɔ po kɛ́? (Dyé gbɔ̀ɖɔ̀ɔ̀ nìà kɛ ɖekè, “ Kà M̀ Ké Ðɛ Nɔ̀mɔ̀ Dyíin Ɓè Gbɔ Poɛ.”)

¹⁶ Ɔ jù ké m̀ ɖà nyuu-ɖɛ̀ ɓè wa cɛ̃à jè nɔ cɛ̃́ɛ́-ɖɛ̀ nìà kɛ múɛɛ nyu ní, nìí, m̀ ɖà ti dyé ɓɛ́ m̀ ké ɖɛ nɔ̀mɔ̀ dyíin gbɔ po. M̀ ɖà ɖɛ séín múin wɔ̃́, ké m̀ ɖà hwìè-da-zàìn-wùdù ɓè ɓɛ́ wa mu m̀ gbo kpáùn ɓɛ́ m̀ ké ɖɛ dè Jɛhova hwìdìiɛ gbɔ poɛɛ múin gmɔìn. Nìí, m̀ ɓɛ́ìná Jɛhova ɓaà ɓɛ́ nì gbɔ-po-ɖɛ̀ɔ̀ ké mú wóɖó.

17. Ðɛ́ jɛ́ɛ́ muɛ nyuùn ɓɛ́ m̀ ké ɖɛ nɔ̀mɔ̀ dyíin ɓè gbɔ po kɛ́?

¹⁷ Kɛbì m̀ mɛ ɖà ma ɖɛ nɔ̀mɔ̀ dyíin pàɖà ɓè gbɔ po kĩ́ín nyɛɛ, ɔ mɛ nì m̀ hwìɖìi kà ɖɛ jɛ́ɛ́ ɓɛ́ ɔ muɛ nyuùn ɓɛ́ m̀ ké ɖɛ nɔ̀mɔ̀ dyíin ɓè gbɔ poɛɛ se ɓɛ́ m̀ ké m̀ mìɔùn nììn ɖɛ-múin-wɔ̃́-wɔ̃́ mú tèɛ, kɛɛ ɔ mɔ̀ ɓɛ́ m̀ ké fɔ̀nɔ̀-hwòɖò sɔ̀àìn ɖé Jɛhova gboɛɛ hwòɖò kɔ̃ dè. Ɔ ɖòùn mɔ̀ nyɔ ɓɛ́ìn m̀ jàà ɖɛ-dyí-dyuò-dyuò, kè ɖɛ-múin-wɔ̃́-wɔ̃́—ɓɛ́ wa mɔ̀à hwòɖò-fɔ̀nɔ̀-fɔ̀nɔ̀ hìɖì-kpà kɛɛ nyíɛ. (Nɔ́ɔ́ 2:​1-5) Jɛhova ɓɛ́ìn m̀ gbo kpáa, ɓɛ́ m̀ ké ɖɛ dè ɔ hwìɖìiɛɛ gbɔ po.—Wɛ́ɖɛ́ 23:​2, 3.