ˈPƖƆ 5
Sɛ a -ɲɛ ˈa -kosu yɔwʋ a -nʋa ˈsɔ ˈkää ˈtɩɩglɩnɔɔ ˈmö -wʋ
“A nɩ nɛnɩ dlɩ zɛmö. A nɩ tɩ aɲɩ ˈkädɩ ˈmö ˈwʋ ˈlibhï. A nɩ yɔnɩ dlɩ ˈwʋ. A nɩ -kpaanɩ dlɩ ˈmö.”—Kɔlɔɔsɩ 3:12
ˈŊlɔ -ɲɛ ɲɩbhɛlʋ ˈsɔ -kä kwäkwänɩ, ˈligbëlele wa dɩɛ. Mɩɛ abhlɩ, a kä a ˈkä a -lowluwa -wa, a ˈkuë ˈklʋkpamö zʋ, maa -sɩkaa a dɔˈwʋ, -naˈa -lɛglɩɲɔ mɔɔ kää teɲii dɛsɛ -mä -naˈa zɩkpa ˈmö a dɔˈwʋ. ˈA -kosu yɔwʋ a -nʋa -mumuë ˈkɩ -sɩbhä ˈwʋ ŋlu a dɔˈwʋ, yɩ yʋa kɛˈmö ˈtɛɛnɩ. Sɛ a ˈtɛmanɩɛ ˈyli yɔwʋ ˈa ˈligbëa ˈkä ˈyukusɛ mö -ɲɛ ˈa -kosu yɔwʋ a -nʋa ˈsɔ a jijoˈwʋ -lii ˈkää ˈtɩɩ -wʋ a dɔˈwʋ, Biblë ˈa ˈpäpägböö yeaɲɩ kwänɩ.
1 ˈA -KOSU YƆWƲ A -NƲA, A NƖ ˈLIBHUË SASƐ ˈWƲ
SƐƐ BIBLË GBÄÄ: “-Na dɩba -ɲɛ -na -da ˈsɔ, ˈzuë ˈklʋkpamö.” (Ɛfɛɛzɩ 6:2) ˈYlʋbö -zɩmö aˈbhë a yi -kä oo, a kä a ˈkä ˈkwädlɩ a -lowluwa ˈklʋkpamö ˈzʋ. Yɩbhlɩnɩ sɛ nɩɩ, -naˈa -lɛglɩɲɔ, nɩkpa -mumuë ˈa ˈyu ɔ glɩnɩɛ zaa, ɔ kä ɔ ˈkä ɔ -lowluwa ˈyli yɔwʋ ˈzʋnɩ. “Nɩkpɛ a -mɔ Lagɔ ˈzʋä ˈɔ -wawʋ dlɩ zɛmöö, ɔ ˈbhɩa ˈnɔɔ ˈyli kälɩ.” Zaa, --naˈa -lɛglɩɲɔ -ɲɛ ˈɔ -lowluwa ˈsɔ -kä ˈwʋ -wʋnɩɩ, yɩ nɩ -tɩmö ˈklɛ ˈwʋ -bhö.—1 Kɔlɛɛtɩ 13:4; Galatii 5:26.
ˈSAA A BHƐNƖƐ A ˈKÄ NƲ:
-
“-Na -lowluwa ˈylimö wa fälanɩɩɛ ˈyize,” ɛ -käˈɛ “ˈSaa n -kä nʋ -kë, yɩˈɩɛ -na -da dlɩ yɔwʋ nɛnɩ ˈlɩlɩlɩ. Saˈa a wɛlɩzoku nɩ taɲɩ ŋli ˈwlʋ.”
-
Sɛɛ -naˈa -lɛglɩɲɔ yɩlɩɛ -lii ˈwʋ, ˈtɛmanɩ ˈyli yɔwʋ -n ˈkɩɛ -naa -sɩbhä ˈwʋ ylɩmö.
2 SƐƐ -LII KÄÄ YI ˈKÄ -WƲ ˈƝƲA -SƖBHÄ ˈDƖ
SƐƐ BIBLË GBÄÄ: “Nɩkpɛ kä ɔ ˈkä ɔ dɩba -ɲɛ ɔ -da ˈsɔ yɔwʋ ˈbhöö ɔ -ɲɛ ɔ ˈlɛŋlɛ ˈsɔ wa ˈkä ˈwa dɛ ˈplɩ wa ˈkä ˈwʋ -glɛglɛnɩ, wa ˈsɔ -kpɔ wa ˈkä nɩkpɛ -bhlʋ ˈzʋ.” (Genèse 2:24) -N -kä ˈŋlɔ kwää, -n -käˈɛ ghlɩ möö, -na -lowluwa bhɛnɩ wa ˈkä dlɩ ˈpä nɩɩ, mʋa kää -bhlɛ wa -kamö ˈyli zʋnɩ ˈyize, -sɩbhä a za, wa bhɛnɩ wa ˈkä gbä nɩɩ, wa ˈkä teɲii -naˈa ˈligbë ˈmö a -lii ˈmö plɛ, sɛɛ waˈaa -kä wa ˈkä ˈzʋ.
ˈA ˈligbë ˈmö a -lii a ˈmö plɛ dɔˈwʋ, dɛ a yɩbhä nɩɩ, a -lowluwa nɩ ˈbhlenɩ, abhʋa yɩ -wʋä käˈmö. Maa a -kʋa ˈdɩ ˈɲɛɛ yi, a nɩ ˈɲʋa dlɩzɛmönanɩsɛ ˈdɩ. A bhɛnɩ a ˈkuë gbëaa ˈdɩ ˈɲɛ maa a nɩ tuë ˈklʋkpamö -sɛ. (Proverbes 15:1) A nɩ tɩ aɲɩ ˈkädɩ ˈmö ˈwʋ ˈlibhï, a nɩ yɔnɩ dlɩ ˈwʋ, a nɩ -kpaanɩ dlɩ ˈmö. Yɩ yeaɲɩ kwänɩ a -ɲɛ a -lowluwa ˈsɔ yi ˈmäna ˈmö -wʋ ˈn “a ˈkä ˈmlɩ ˈkunɩ a -ɲʋä ˈkä ˈwʋ -wʋnɩ.” —Ɛfɛɛzɩ 4:2.
ˈSAA A BHƐNƖƐ A ˈKÄ NƲ:
-
Sɛ a -lowluwa plɛɛ -mä ˈa ˈligbë ˈmö a -lii ˈmö naɲɩ dlɩ yɔwʋ nɛnɩɩ, a nɩ -kʋnɩ ˈa ˈklɛ -kä dʋdʋ ˈwʋ yi ˈwë, a ˈkä sɛ glɩ nzɩ a ˈkɩ yɔwʋ yɩlɩ.
-
-Sɩbhä a -lii a dɔˈwʋ sɛ a ˈkää ˈmö ˈzʋzʋnɩ, a nɩ ˈnʋnʋnɩ ˈmö.
