1. -A ‘-kä -aˈa dilaa Lagɔ ˈyi ˈgïa’, ˈsaa ɔ ˈkä ɔ ɔbhlɩ nʋ ˈnɩ?

ZOOVA, -wa nʋä ˈsaa ɔ yɩbhää ˈmö ɔ -waa. ˈN -n -kɔɔ bʋbɔɔ, ɔ -yimö zɩˈɛ ˈɲu ˈpä ˈn ɔ -yimöˈɛ zɩkö ˈɲu ˈpä. Biblë lɛ nɩɩ: “A nɩ ˈgïa ˈa dilaa Lagɔ ˈyi, -lɛ a dɔˈwʋ ɔ yeanyɩˈɛ ɔbhlɩ ˈyi gömö.”—Zaakö 4:8.

2. Sɛɛ -a ˈkä ɔ Lagɔ yɔwʋ ˈdionɩ ˈnɩ? Sɛ -a ˈkɔ bhä bhibhe ɔ -kaɲɩ ˈyukwli -pʋnɩ ˈnɩ?

² -A ˈkä Lagɔ -aˈa dila ˈyi ˈgïa a dɔˈwʋ, miɛ nɩɩ -a ˈkɔ yɔwʋ ˈdionɩ a dɔˈwʋ, -a kä -a ˈkä ˈɔ wɛlɩɩ ˈmö zɛlɩ ˈn sɛ yɩ gbää, -a ˈkä -sɩbhä nɛmö. Sɛɛ Zoova yɩbhää, -a -kä -sɩbhä bhibhee, ɔ -yiɲɩ ˈyukwli -pʋnɩ ˈn ˈsaa -a ˈyɩbhänɔɔ, ɔ -yiɲu ˈɲɛ. Zezwii ˈa tietieɲɔɔ Zaah ˈcɛlɩ a-a nɩɩ: “-A -kä Lagɔ bhibhee, ˈsaa -a -kɔɔ ˈyɩbhänɩ -kë, ˈn -lu ˈla -kɔɔ dlɩ yɔwʋ nɛnɩɩ, -a -yi sɛɛ nɩɩ, ɔ -pʋnɩɲɩ -tiamö ˈyukwli. Sɛ ɔ -pʋnɩɲɩɛ daˈa ˈyukwli a za, -a -yiˈɛ sɛɛ nɩɩ: ˈSaa -a ˈyɩbhänɔɔ daˈaa, ɔ ŋulu ˈwʋ ɔ -kaɲu ˈɲɛ.”—1 Zaah 5:14, 15.

3-7. Sɛ -a ˈkä ɔ ˈzʋ nzɩ -a ˈkä Lagɔ ˈa ˈnɛɛnɔ ghlɩ ˈnɩ? Sɛ wʋ -kaɲɩ ɔ kwänɩ ˈnɩ?

³ ˈLɩlɩlɩ a dɔˈwʋ, -n -kä Lagɔ yɔwʋ ˈdionɩ, ɔ -yimö ˈnɛɛnɔ ˈɲɛ, wʋ -kaɲmöä -su nzɩ -a ˈkä -lii a -bɛ ˈwlu ˈplɩ -mä -naˈa zɩkpa ˈmö. Biblë lɛ nɩɩ: “A glaˈmö a -nɔ -bhlʋ ˈnɩ ˈnɛɛnɔ -kä ɔ ˈkʋ yɩbhlɩnɩɩ, ɔ nɩ bhibhe Lagɔ, maa Lagɔ yo -lɛ a ˈnɛɛnɔ ˈla ˈɲɛ.”—Zaakö 1:5.

⁴ Sɛɛ Lagɔ ˈa ˈnɛɛnɔ bhɛnɩ ɔ wʋ -kamö kwänɩ ˈnɩ? Wʋ -yimö kwänɩ -n yi -lii -yɩ -ɲuä Lagɔ dlɩ yɔwʋ yɩbhlɩnɩ. ˈN ˈsaa kää ˈŋlɩ ˈn yɩˈɩɛ nɛnɩ, ˈn sɛ -n ˈkää ˈzʋ -n tia ˈmö bhlinɩ, -n yi -yi. ˈNɛɛnɔ ˈla muu -kamöä kwänɩ -n tia -lizoku ˈmö bhlinɩ, -yɩ yɔlɔa zɩˈɛ a nɩkpa. A yɩɛ -ka, Lagɔ ˈa gba -a nʋä nɩɩ -aa -kä -a ˈkä -aɲɩ ŋlʋsɛtɛlɩtɛlɛ ˈn ɲɩbhɛlɩsɛtɛlɩtɛlɛ ˈmö ˈfɩ pälɩnɩ, -ɔ -kaa ˈklʋkpamö ˈzʋ, ɔ ˈnaa ˈkä gu ˈlibhï, ɔ ˈnaa ˈkäˈɛ bidibidi nɩkplokwë ˈplɩ. Ɔ -ɲɛ ɔ -lɛglɩɲɔ ˈsɔ a jijoˈwʋ, -lii yi ˈtɩɩ -wʋ.

⁵ ˈSaa Lagɔ ˈa ˈnɛɛnɔɔ bhɛnɩ bhäˈɛ wʋ -kamö ˈwlu nʋ ˈnɩ? Wʋ -yimö kwänɩ -n yi -lii a -bɛ nʋ -mä -naˈa zɩkpa ˈmö. -N -kä -lu nʋä yi, ˈnɛɛnɔ ˈla muu -kämöä -su nzɩ -n ˈkä sɛ -n ˈkää ˈzʋ -yi. Ɛ -kä moni, sɛɛ -n ˈkɛɛ plɩ, -n yi -sɩbhä -yi. -Mä -naˈa zɩkpaa ˈmö, -lii -yɩ -wʋä lagɔsɛ a ˈyize ˈmö -n ˈkää sɛ tɛlɩ.

⁶ Lagɔ ˈa ˈnɛɛnɔ muu -kamöˈɛ kwänɩ -n -ɲɛ -mumuë ˈsɔ a ˈkä ˈmö -ŋöŋönɩ. -Naˈa ˈligbë ˈmö a -nʋa yi ˈmäna ˈmö -wʋ. -N -ɲɛ -mumuë ˈsɔ a yi bhɛya ˈzʋ. Wa yi -na ˈklʋkpa -kä, -waa Lagɔ -yi kökä.

⁷ ˈNɛɛnɔ ˈla yi ˈŋlɩ -kä -n ˈkä -bhölɩbhölɛ a dɛ sasɛ dlɩ ˈpä. -N -kä yɔlɔylʋ ˈmö -wʋ, ˈn swɩ -kamöˈɛ yɔwʋ ˈkunɩɩ, muu -kamöä kwänɩ -n ˈkä yɩ ˈwuë ˈwlu ˈplɩ. Sɛɛ ˈpɩwʋ nɩ ˈkää zɩkö -wʋ a wɛlɩ ˈnaa -kämö dlɩ libha. Yɩ yi ˈŋlɩ -kä -n ˈkä ˈmö nɛnɩ.—Proverbes 14:30; Isaïe 48:17.

8. ˈN -n -kä Lagɔ bʋbɔ, ˈsaa ˈnaa -kamö ɔ ŋanɔ ˈwʋ -bhö ˈnɩ?

⁸ -Tiamö a Lagɔ, ˈn -n -kɔɔ bʋbɔɔ, ŋanɔ ˈnaa -kamöa ˈlɩbhä, nɩkpa -wa ˈnɔɔ -yi -wa kää mäˈä ˈpɩwʋ a -lii a ŋanɔ dlɩ zɛmö a sa. Nɩkpa -kä ˈku ˈwë, wa -kʋa ziza ˈwë, waˈaa bhɛnɩ wa ˈkä -lu nʋ. Zaa, -n ˈnaa ˈkäa wa ŋanɔ ku ˈmö -kä. ˈN sɛɛ Lagɔ gbää nɩɩ, ɔ yi zɩkö -wa yɛɛ ˈku ˈwë glu -sɛ, sɛ -n kää wɛlɩ ˈla dlɩ ˈwʋ a za, ˈkwie ˈnaa -kamö ŋanɔ ˈwʋ -bhö.  -N -yiˈɛ sɛ nɩɩ Lagɔ ˈtɛɛ ˈmö ɔ zi -lii ˈwuë ˈwʋ zaa, -n ˈnaa ˈkäa guwa a ŋanɔ kuˈmö -kä.—Zaah 8:32.

9-11. -Mä ˈbhlɩ a -bhlɩɩ ˈmö, -muë ˈkä ɔ -mä -bhölɩnɩ ˈnɩ? -Muë ˈnaa ˈkä ɔ -mä ˈbhle ghlɩ ˈnɩ?

⁹ ˈN -n -kä Lagɔ yɔwʋ ˈdionɩ, sɛɛ ˈpɩwʋ nɩ ˈkää zɩkö -wʋ, yɩ ˈnaa -kamö ŋanɔ ˈwʋ -bhö ˈlɩlɩlɩ. Mäˈä dʋdʋ ˈwʋ a -lizoku -yɩ -bhölɩɛ zɩˈɛ, Biblë yɛ a-a -pa yɩ wɛlɩ bhïla ˈwë. Zoova lɛ nɩɩ, yɩ yi ˈylɩ -bhlʋ ˈmö ˈyli bhɩɛ. ˈƆ ˈKämanɔɔ yia -pa dʋdʋkpäta ˈbhlɩ a -bhlɩɩ ˈwʋ ˈzʋa.—Lwiikö 21:10, 11, 31; 23:43.

¹⁰ -Wa ˈdionɩɛ Zoova yɔwʋ ˈn -wa bʋbɔɔ, wa ˈyize mʋa ˈkää -mä ˈbhlɩ a -bhlɩɩ ˈmö ˈbhle ghlɩ. Biblë lɛ nɩɩ: “-Lɩbhä ˈnaa ˈkäa ˈmö gwälɛ, ˈɲiɲlolinʋɲɔ -bhlʋ aˈbhë ˈnaa ˈkäa -bholɩ. Nn, -n -kä dɛ ɔ -wʋ a-a yɩlɩɩ, ɔˈɔa -lɛ -wʋ. Maa -wa lɛmöä waɲɩ dʋdʋ ˈwʋ mʋa ˈkää dʋdʋkpäta -kälɩ ˈn wa yi -tiasɛ ˈtɩɩglɩnɔɔ ˈmö -wʋ, ˈkwädlɩkwädlɩnɩ.”—Psaume 37:10, 11.

¹¹ -Waa ˈyɩbhä wa ˈkä Lagɔ ˈa wɛlɩɩ ˈklʋkpamö ˈzʋ, ˈyli wa ˈkää bhɩɛ ˈlɩlɩlɩ. (2 Tesaloniikö 1:8, 9) Sɛ wa ˈkää ylɛ. Sɛɛ Sataa -ɲɛ ˈɔ zuzukuzokuu ˈsɔ ˈkää ˈyli bhɩɛ ˈlɩlɩlɩ, -sɩbhä wa ˈkäˈɛ wabhlɩ ˈyli bhɩɛmö. (ˈKlʋkälɩwɛlɩɩ 20:10, 14) Maa -muë cɩɛɛ Zoova ˈa wɛlɩɩ ˈn wa zʋä wɛlɩɩ ˈla ˈklʋkpamö, mʋa ˈkää ˈkwädlɩnɩ ˈmäna ˈmö -bhölɩnɩ -mä ˈbhlɩ a -bhlɩɩ ˈmö.

12. Zɩkö a zɩkpa a dɔˈwʋ, sɛɛ Biblë gbä ɔ ˈnɩ?

¹² Zoova yi zɩkö nɩkpa -wa -wɔɔ -li a -lii ˈɲɛ. -Mä ˈɔ wɛlɩɩ ˈmö, dʋdʋkpäta -kä ˈbhlɩ a -bhlɩɩ ˈzʋ a wɛlɩɩ -yɩ cɛlɩɛ -mä, ˈpänɩɛ -ka dlɩ kɛ:

• Lile yi ˈkwädlɩ -bhölɩ: “Mäˈä dʋdʋ ˈwʋ, lilea yi -bhölɩ ˈyize; -mä -gägö ˈwlu, glʋglʋlii yi nɛnɩmanɩ, lilea yi teɲii zumanɩ.”—Psaume 72:16.

• Wa yi -bïdi a -bïdi ghlɩ: “Nn, wa yi -bïdi ˈsɩbhä, ˈn wa yi ˈmö gʋʋ.”—Isaïe 65:21.

• Wa yi libho -wʋ -bhöä ˈmäna ˈwʋ ghlɩ: “Na -nʋa n -sɛɛ -lɛ, ˈwa libhoo wa ˈkää nʋʋ, wa yu -li a -lii ˈmö ghlɩnɩ. Wa ˈnaa ˈkä ˈfʋ yɔlɔ.”—Isaïe 65:22, 23.

• Guu ˈnaa ˈkäa nɩkpɛ ˈlɩbhä: “Nɩkpɛ -bhlʋ aˈbhë ˈnaa ˈkäˈaa nɩɩ: ‘Guu ˈlɩbhaa.’”—Isaïe 33:24.

• Nɩkpɛ ˈnaa ˈkäa nɩmänɛ -kä: “-Lɛ a ˈtɛɲɩ ˈla ˈmö, ˈkukwlekäwaa ˈa yila yi do, ˈyukwïlagbägbakäwa a ˈyukwïla yi do. ˈTɛɲɩ ˈla ˈmö, kpälɛkpälɛɲɔ yi ˈlwɩɩ a sɛ guëë, ˈn -ɔɔ wɛlɩ -kä, ɔ wɛlɩ yi do, ˈmäna a za ɔ yi ˈmö ˈkpa.”—Isaïe 35:5, 6.

• ˈLɩbhägu, dlɩyliyile -ɲɛ ˈkwie ˈsɔ ˈnaa ˈkäa -bhölɩ: “[Lagɔ] mɔɔ ˈkʋää ˈyli yɔwʋ sɩɔ ˈtɩɩ. -Mä -glɔ ˈla ˈmö, ˈkwie ˈnaa ˈkä -mä -wʋ zaa, ˈlɩgbʋ ˈnaa ˈkä -mä -wʋ, dlɩyliyile ˈnaa ˈkä -mä -wʋ, ˈklɩyɩyɛ a ˈke -bhlʋ aˈbhë ˈnaa ˈkä -mä -wʋ ˈlɩlɩlɩ. Ɛˈɛ -bhö ɲɩasɛ, maa mäˈä ˈpɩwʋ a -lii ˈwuë ˈyli yɩ ˈkää bhɩɛ, yɩ ˈnaa ˈkä -mä -wʋ.”—ˈKlʋkälɩwɛlɩɩ 21:4.

• Tʋ ˈnaa ˈkäa -bhölɩ: “[Lagɔ] mɔɔ ˈkää -bhɛ ˈn dʋdʋ a ˈketiëa ˈwuë ˈwʋ tʋ ˈkä bhɩɛ.—Psaume 46:9.

• ˈKwädlɩkwädlɩnɩ a -bhölɩbhölɛ: “-Wa nʋä ˈsaa nɛnɩɛ Lagɔ dlɩ yɔwʋ, mʋa ˈkää dʋdʋkpäta -kälɩ, ˈn wa yi -lɛ a ˈklʋ ˈkwädlɩnɩ -bhölɩnɩ.”—Psaume 37:29.

13. -Mɔ bhɛnɩ bhä ɔ ˈkä dʋdʋkpäta ˈbhlɩ a -bhlɩɩ wʋ ˈzʋa ˈnɩ ˈn ˈsaa kä ɔ ˈŋlɩ ˈnɩ?

¹³ Zoova kä ˈmötɛɛnɔɔ zaa, ɔ bhɛnɩ ɔ ˈkä -lii ˈla ˈwuë -bhɛ. Maa ˈpɩwʋ a nɩkpa ˈnɩɛ bhɛnɩ wa ˈkä -sɩbhä zʋ. -Lu -bhlʋ aˈbhë ˈnɩɛ bhɛnɩ wʋ ˈkɔ ˈyio ˈwʋ -sɛ. Biblë lɛ naa: “-Lu a -muu ˈkää Lagɔ kɛ ˈmö ˈtɛɛnɩɩ, wʋˈʋä -bholɩ.”—Lwiikö 1:37.

14. Lagɔ ˈa ˈpɩwʋlelea ˈwʋ a ˈyio, sɛ -n ˈkʋ ɔ bhli ˈnɩ?

¹⁴ Zoova, ˈɔ Bhlɩnɩwaa ˈmö ɔ ghlɛnɩɛ ˈmö ˈn ɔ kwänɩɛ nɩkpa ˈwuë -wa yɩbhää wa ˈkä “ˈyio -wʋä klʋ ˈghïli,” -wʋ möä -mä ɔ ˈpɩwʋlelea ˈwʋ bhli. Nɩkpa -wa ˈkää ˈyio ˈla bhli, -n yi ɔ ˈwʋ ŋulu -n ˈkʋa jijoˈwʋ plɛ -a? -N -kä -tiamö a lagɔgligbëa -gänɩɩ, Zoova -yimö ˈkwädlɩkwädlɩnɩ ˈɲu ˈpa!—Matie 7:13, 14.