Yɩlɩɛ -ka ˈyu le ce, -ɔ glɩɛ -mä foto ˈmö ˈwʋ. Ɛ ˈkä bhɩɛ ɔ ˈyize ɔ glɩɛ -lɛ ˈn ɔ ŋänɩɛ. Ɛˈɛ -bhö ɔ mi? -Sɩbha a -lii -nɩmö ɔ -bhlɛ tɛkäsɛ ghlɩ -a?— -Aa ˈwuë yɩ -kaɲɩ tɛkäsɛ ghlɩ. -Mä Biblë ˈmö, Zoova ˈa bhɛya -mumuë wa ˈyize wa glɩ a-a -lɛ ˈn ŋanɔ ˈlɩbhämuë a-a -sɩbhä. Wa glaˈmö a -nɔɔ -bhlʋ mɔ -lɛ Elii. -A nɩ ˈcɩɛ ɔ -gömö a wɛlɩɩ.

Elii -bhölɩnɩ a-a -mä yizlaɛlɩ -lɛ yɛ ˈmö gwälɛ ˈwë ˈn Zezwii yi a-a bhäla gwäluo. Yizlaɛlɩ ˈa ˈkämanɩɲɔ Aabö, ˈnɩ bʋbɔ a-a -tiamö a Lagɔ Zoova. Aabö -ɲɛ ˈɔ ˈlɛŋlɛ Zezabɛlɩ ˈsɔ, ˈfʋ a lagɔ Baalɩ ˈmö wa bʋbɔ a-a. Zaa, -mä Yizlaɛlɩ a nɩkpa -mumuë a -bɛ Baalɩ ˈmö wa bʋbɔ a-a. ˈBhlɩlɛŋlɛ Zezabɛlɩ mlɩ ɔ -ɲu a-a teɲii, ˈn ɔ yɩbhä a-a ɔ ˈkä nɩkpa ˈwuë -wa bʋbɔ a-a Zoova ˈlɩbhä, Elii kökämö. -N -yi ɔ ˈsaa Elii nʋ -a?—

Elii, futo ɔ futo! Ɔ yi a-a -mä muse ˈklʋ zizoo ˈmö -mä kpiyi ˈmö. -Na dɔˈwʋ,  ˈsaa kä bhä ˈŋlɩ ˈn ɔ yi bhä -sɩbhä ˈzʋ ˈnɩ?—Nn, ŋänɩ ɔ ŋänɩɛ a zaa. Maa Elii ˈnɩa -kä ɔ ˈkä ŋänɩ. ˈSaa kä bhä ˈŋli ˈnɩ? Ɛˈɛ -bhö ɲɩasɛ, maa ɔ yi a-a -sɛ nɩɩ, Zoova bhɛnɩ a-a ɔ ˈkɔɔ kwänɩ. Zoova yɛ a-a bhlaˈmö ˈɔ ˈmötɛɛnɔ Elii ˈylimö tulanɩ ˈwë. Zoova yɛ a-a tɛkäsɛ Elii a bhibhebhibhiuu ˈyukwli -pʋnɩ ˈwë ˈn -kosu yi a-a -mä zlɩ ˈmö ˈbhöönɩ. Zaa, Zoova bhɛnɩ ɔ ˈkɔ a-a -sɩkaa kwänɩ!

Ɔ -wʋ a-a -mä kpiyi ˈmö ˈn Zoova yɔ a-a nimï ˈyɩbhä nɩɩ: ‘ˈSaa -n nʋ bhä -mä ˈnɩ?’ ˈN Elii yɩɛ nɩɩ: ‘Na ˈyize amö bʋbɔ ˈmöä -bhlɛ. Wa lɛ wa kaa ˈlɩbhä zaa, ŋänɩ n ŋänɩɛ.’ Elii tɔnɩ a-a nɩɩ, wa yɛ a-a Zoova ˈa bʋbɔbʋbɔwaa ˈwuë ˈlɩbhä ˈwë ˈla. Maa Zoova yiɛ Elii ˈdɩ ˈɲɛ nɩɩ: ‘Nˈnn, ɛˈɛ -bhö mi. Nɩkpa -mumuë a 7.000 bʋbɔɔ -bhlɛ ˈyize. ˈTɛmanɩ ˈyli yɔwʋ. N kä libhoo a -bɛ n -kamöä ˈɲɛɛ!’ -Na dɔˈwʋ, wɛlɩɩ ˈla Elii ˈnʋä -bhɔɔ bhä ˈmäna ˈwʋ -a?—

-Lii -yɩ ghlɩɛ Elii, ˈsaa yɩ ˈcɩamö ɔ ˈnɩ?— ˈLɩlɩlɩ a dɔˈwʋ, tɩ nɩɩ -na ˈyize ˈn -n -wʋä -lɛ zaa, ŋänɩ -n ŋänɩɛ. -N kä bhɛya -wa -waa Zoova ˈn wa -wamöä. Zoova ˈtɛɛ teɲii ˈmö, ˈn ɔ bhɛnɩ ɔ -kamö ˈkwädlɩ kwänɩ! -N -kä sɛ -yi nɩɩ -nˈn-ä -tiamö a dɔˈwʋ -bhlʋ -bhli, yɩ -bhö mö ɔ ˈmäna ˈwʋ -a?—