ˈCƖƐCƖƐKÏBHÏ 3
Ghlaabö ˈtɛɛnɩ a-a Zoova dlɩ
Ɛ ˈkä bhie nɩɩ, -mä Zelikoo a -glɔ ˈmö -a glɩ. -Glɔ ˈla -mä ˈwʋ -wʋä Kanaa-bhölɩɩ ˈmö. -Mä ˈa nɩkpa ˈnɩɛ Zoova dlɩ ˈwʋ kä. ˈŊlɔ -bhlʋ wa ˈlaa Ghlaabö, -mä glɔ ˈla ˈmö -mä -ɔ -wʋ a-a.
Ghlaabö a ˈyuë dɔˈwʋ, ɔ ˈnʋ a-a ninii -yɩ nʋä nɩɩ, Moyizɩ dlinɩ a-a gïɲɛzlɛ ˈmö ˈn ɔ yiɛ Yizlaɛlɩ a -nʋa -mä Ezipötɩ ˈwlʋa. Ɔ ˈnʋˈɛ -gämö sɛɛ Zoova kwänʋä a-a ˈn wa yiɛ ˈwa -gblɩwa ˈwlu ˈplɩ. -Sɩkaa a dɔˈwʋ, ˈsaa ɔ ˈnʋä mɩɛ nɩɩ, Yizlaɛlɩ a -nʋa yɛ Zelikoo ˈgble ˈmö pälɩ!
Zoova ˈmö Ghlaabö ˈtɛɛnɩ a-a dlɩ nza ɔ zizaa Yizlaɛlɩ a -nʋa
ˈYlɩ -bhlʋ a -kidosɛ, ˈn Yizlaɛlɩ ˈa nɩkpa ˈsɔ yiɛ -mä Zelikoo-bhölɩɩ ˈmö mö, wa ˈkä -glɔ ˈa -lii -yɩ zizaa, ˈcɩɛ. -Mä Ghlaabö ˈa ˈligbë ˈmö -mä wa möä. Wa ghlɛ -mä, Ghlaabö, päla ɔ pölʋää. Sabʋsɛ ˈn Zelikoo ˈa ˈkämanɩɲɔ yiɛ sɛ yɩbhlɩnɩ nɩɩ, nɩkpa ˈsɔ yɛ a-a -mä Ghlaabö a mää yi wa ˈkä -glɔ a -lii -yɩ zizaa ˈcɩɛ. Zaa ˈkämanɩɲɔ yiɛ -mä Ghlaabö a mää nɩkpa tiee, wa ˈkʋä kie mö. Ghlaabö ˈlibhïä nɩkpa ˈwʋ, -mä ˈɔ -budu a ghäyɩ ˈwʋ -mä ɔ zizʋä ˈn ɔ yiɛ nɩkpa ˈkämanɩɲɔ tie ˈdɩ ˈɲɛ, ɔ -lɛ nɩɩ: ‘Nɩkpa yi a-a mäˈä, maa wa yɛ a-a -pa mö. A -kʋä -sɩkaa ˈbɩwʋ mö, a yuë -gömö ghlɩ!’ -N -yi ɔ ˈsaa ˈkä ˈŋlɩ ˈn Ghlaabö yi nɩkpa ˈlaa ˈzizaa -a?— Ɛˈɛ -bhö ɲɩasɛ, maa Zoova ˈmö ɔ kää dlɩ ˈwʋ, ˈn ɔ -yiˈɛ sɛ nɩɩ, Zoova yi Kanaa-bhölɩɩ Yizlaɛlɩ a -nʋa ˈɲɛ.
Yizlaɛlɩ a -nʋa ˈkää möä yi, Ghlaabö ˈmö wa ˈɲɛɛ ˈdɩ nɩɩ, ɔ -ɲɛ ˈɔ ˈligbë ˈmö a -nʋa ˈsɔ yi ˈpʋpʋɛ ghlɩ, Zelikoo a -nʋa -kä ˈyli bhɩɛ. -N -yi ɔ ˈsaa wa gbä ɔ nɩ nʋ -a?— Wa lɛ naa: ‘ˈlikpëa zɛla nɩ, gäla -lɛ -naˈa finɛtlɩ ˈyli. -N -kä -sɩbhä zʋä, nɩkpa ˈwuë -wa -wʋä -mä -naˈa -budu ˈmö yi ˈpʋpʋɛ ghlɩ. Sɛɛ nɩkpa nʋä Ghlaabö nɩ ˈzʋ, -sɩbhä ɔ zʋä ˈtɩɩ. -Miˈla plɩɛ ˈwë, -n -yi ɔ ˈsaa ˈwlʋnɩ ˈyli -a?—
Zoova yiɛ Ghlaabö -ɲɛ ˈɔ ˈligbë ˈmö a -nʋa ˈsɔ puë
ˈYlɩya plɩɛ ˈwë, Yizlaɛlɩ a -nʋa, wa -wʋ vlɩɩ ˈn wa binɩɛ -glɔ ˈwʋ. Sɛ zɩla zɩɛ, -sɩbhä wa binɩɛ ˈwʋ -bhlʋ -glɔ ˈwʋ ˈkëë ˈn ˈylɩ gbʋplʋ yiɛ ˈplɩ. Maa ˈylɩ ngbiˈsɔ nɛɛ ˈmö, wa binɩ -glɔ ˈwʋ ngbiˈsɔ ˈwʋ. ˈN wa ˈwuë wa yiɛ teɲii ˈmö kpa. ˈN Zoova yiɛ -glɔɔ a ˈkpakwëa sɛ bhlɩ. Maa -budu -wʋɲɩ finɛtlɩ ˈyli ˈlikpëa zɛla -glɛɛ a ˈyize mʋ ˈnɩɛ -bhli. -N ylɩ ɔ -budu ˈlaa -lɛ foto ˈklʋ ˈwʋ -a?— Ghlaabö -ɲɛ ˈɔ ˈligbë ˈmö a -nʋa ˈsɔ mʋa ˈpʋä.
ˈSaa -n ˈcɩɛ ɔ Ghlaabö a dɛ ˈnɩ?— Zoova ˈa zɩzɛlii ɔ -bhɛ a za, Ghlaabö kɔ a-a dlɩ ˈwʋ. -Naˈbhë -n -wʋ -li a -lii a -bɛ Zoova a dɛ ˈcɩɛ dɔˈwʋ. -N kä ɔ Zoova dlɩ ˈwʋ Ghlaabö a sɛ -a?— -A -yi sɛ nɩɩ, -n kɔ dlɩ ˈwʋ.