ˈCƖƐCƖƐKÏBHÏ 2
Ghlebekaa yɩbhä a-a ɔ ˈkä Zoova ˈmäna dlɩ zɛmö zʋ
ˈŊlɔ a -mɔɔ -waa Zoova ˈmö Ghlebekaa glɩnɩ a-a. Ɔ ˈluwli a ŋlɩ a-a Yizaakö. Ɔ -wamöˈɛ ɔbhlɩ Zoova la. Sɛɛ Yizaakö -ɲɛ Ghlebekaa ˈsɔ yɩbhlɩnɩ yɩbhlɩnɩ ɔ ˈnɩ? Sɛɛ ɔ tulanɩɔ ˈylimö nɩɩ, ɔ yɩbhä a-a ɔ ˈkä Zoova ˈmäna dlɩ zɛmö zʋ ˈnɩ? A-a nɩ yɩbhlɩnɩ sasɛ Ghlebekaa.
Ablaamö -ɲɛ Salaa ˈsɔ mʋa -lɛ Yizaakö a -lowluwaa. Wa ˈwuë, -mä Kanaa-bhölɩɩ ˈmö -mä wa glɩ a-a. Kanaa-bhölɩɩ ˈmö ˈa nɩkpa ˈnɩ bʋbɔ a-a Zoova. Maa Ablaamö yɩbhä a-a nɩɩ, ˈɔ yuu nɩ kwä ˈŋlɔ a -mɔɔ bʋbɔɔ Zoova. Nza ɔ ˈtie ˈɔ libhonʋɲɔ -bhlʋ Eliezɛɛ ɔ ˈkä Yizaakö a ˈŋlɔ sɛtɛlɩɛ ˈmö -mä Kalaa -mä Ablaamö ˈa -kosu yɔwʋ a -nʋa glɩ a-a.
Teɲii Ghlebekaa nʋ a-a libho ɔ ˈkäa -sʋkwia ˈɲu ˈɲɛ a za
Eliezɛɛ -ɲɛ Ablaamö ˈa libhonʋwaa -mumuë ˈsɔ wa yi a-a mö. ˈYuku ˈyuku wa mö a-a la. Wa -su a-a ˈwa -sʋkwie kʋgbä -gömö, lile -ɲɛ ˈɲɛɲɛlii ˈsɔ. Sɛɛ Eliezɛɛ ˈkäa ɔ Yizaakö ˈa ŋlɔ ghlɩ ˈnɩ? Wa ghlɛɛ -mä kalaa, ˈɲibhë -bhlʋ yɔwʋ -lɛ wa ˈnɩgböä. Ɛˈɛ -bhö ɲɩasɛ, maa Eliezɛɛ -yi a-a sɛ nɩɩ, -glɔ ˈla ˈmö a nɩkpa yi a-a -pa ˈɲibhë ˈwʋ yi. Eliezɛɛ bhibhee Zoova, ɔ lɛ naa, n -kä ˈŋlɔ ˈɲu ˈyɩbhänɩ, ˈn ɔ -ka ˈmu ˈɲɛɛ, ˈn ɔ -käˈɛ na -sʋkwia ˈɲu ˈɲɛmöä, -lɛ a dɔˈwʋ, n yi sɛ yɩbhlɩmanɩ nɩɩ, ˈŋlɔ ˈla ˈmö -n -sɛ -lɛ.’
ˈN ˈdumöwʋyu Ghlebekaa yiɛ ˈɲibhë ˈwʋ yi. Biblë lɛ nɩɩ, ˈylimö ɔ nɛnɩ a-a teɲii. Eliezɛɛ yoo a-a nɩmänɩmä ɲu ˈyɩbhänɩ. Ɔ
lɛ naa: ‘Yɩˈɛ ˈmö ˈtɛɛ, n -yimö ˈɲu ˈɲɛɛ, n yiˈɛ -naˈa -sʋkwia ˈɲu ˈɲɛmö. Yɩɛ -ka. -Sʋkwia ˈɲu tʋ ˈlɩbhää, ˈmö Ghlebekaa ˈkää ˈɲu ˈɲɛ zaa ɔ ˈtʋtʋnɩ -bɛ ˈwʋ -mä ˈɲibhë yɔwʋ ˈmö. -N ylɩ ɔ -lɛ foto ˈklʋ libhoo ˈkɔdʋ Ghlebekaa -wʋä nʋ dɔˈwʋ -a?— Sɛɛ Zoova ŋluä ˈɔ bhibhebhibhiuu ˈwʋ a za, Eliezɛɛ ŋli kɔ mla.Eliezɛɛ ˈɲɛ a-a Ghlebekaa ylimönɛnɩlii a -bɛ. Ghlebekaa päla a-a Eliezɛɛ -ɲɛ ˈɔ bhɛya ˈsɔ -mä ˈɔ -lowluwaa a ˈligbë ˈmö. Ghlebekaa ˈkä Yizaakö kwä -bhö a-a ˈɔ -lowluwaa ˈmäna ˈwʋ.
Ghlebekaa -ɲɛ Eliezɛɛ ˈsɔ yiɛ mö ˈn ɔ yiɛ Yizakö kwä
Na dɔˈwʋ, Ghlebekaa yɩbhä a-a bhä ɔ ˈkä Yizaakö kwä -a?— Ghlebekaa -yi a-a sɛ nɩɩ, Zoova mɔ tie Eliezɛɛ. Zaa Ghlebekaa ˈa -lowluwaa ˈyɩbhɔɔ nimï ɔ -kä a-a yɩbhä ɔ ˈkä -mä kanaa-bhölɩɩ ˈmö mö ɔ ˈkä Yizaakö kwä, ɔ lɛ naa: ‘Nn n yi mö.’ Ɔ ŋluä ˈwʋ cuu ˈn ɔ -ɲɛ Eliezɛɛ ˈsɔ yiɛ mö. Wa ghlɛɛ -mä Kanaa, ɔ yiɛ Yizaakö kwä.
ˈSaa Zoova yɩbhä a-a ˈmö Ghlebekaa nʋ a-a zaa, Zoova yoo a-a ˈɲu ˈpä. Bhäla, -mä Ghlebekaa ˈa ŋëyii ˈmö -mä Zezwii ˈbhöönɩɛ. Ghlebekaa a sa, -n -kä Zoova ˈmäna dlɩ zɛmö ˈzʋ, ɔ -yimö ˈɲu ˈpä mö.