-N ˈkä ˈkwädlɩnɩ -na -lowluwaa ˈklʋkpamö ˈzʋ a dɔˈwʋ, yɩ ˈtɛɛnɩmö bhä kɛˈmo -a?— Zlɩ -mɛmɛɛ ˈmö, ˈmö yɩ ˈtɛɛ. -N -yi bhä -sɛ nɩɩ, Zezwii zʋ a-a Zoova -ɲɛ ˈɔ -lowluwaa ˈsɔ ˈklʋkpamö -a?— ˈN yɩ -kamö kɛˈmö ˈtɛɛnɩ -kë, ˈɔ nʋnʋlii -yimö kwänɩ -n ˈkä -na -lowluwaa ˈklʋkpamö ˈzʋ. A nɩ ˈcɩɛ Zezwii a dɛ.

Dɛɛ Zezwii ˈnɩ a-a -bhlɛ mäˈä dʋdʋ ˈwʋ yii, -mä zlɩ ˈmö -mä ˈɔ dɩba Zoova yɔwʋ, -mä ɔ glɩ a-a. Zezwii kä a-a mäˈä dʋdʋˈwʋ -lowluwaa. Wa ŋlɩɛ Zɩzɛɛfö -ɲɛ Malii ˈsɔ. -N -yi bhä sɛ yɩ ˈplɩplɩnɩ ˈmö ˈn wa yi bhä ˈɔ -lowluwaa zʋ -a?—

Zoova ˈa zɩzɛ ɔ ˈpä a-a mɛ kää ˈŋlɩ ˈn Zezwii yi a-a -mä Malii a mlɩ -jɩbhɛnɩ, sɛ ˈyuë -jɩbhɛnɩɛ -mä ˈwa -dawa ˈa mlɩ. ˈCwɩ ngbï-mʋana ˈplɩɛ ˈwë, ˈn Zezwii yi a-a mäˈä dʋdʋ ˈwʋ gwëlionɩ. Yɩɛ sɛˈɛ Malii -ɲɛ Zɩzɛɛfö ˈsɔ zʋ a-a Zezwii ˈa -lowluwaa mäˈä dʋdʋ ˈwʋ.

Zezwii kä a-a ˈylʋbö kʋgbä ˈsɔ, ˈn ɔ yiɛ -lu -bhlʋ -bhɛ -wʋ tulanɩ a-a nɩkpa ˈylimö nɩɩ, ɔ -wa ˈɔ dɩba Zoova. Zezwii -ɲɛ ˈɔ -lowluwaa ˈsɔ mö a-a -mä Zeluzalɛɛmö, wa ˈkä paakö a fɛtɩ -sɛ ˈn yɩ yiɛ -sɩbhä ˈwʋ plɩ. Wa -wʋ a-a ˈwlu -sɩbhä dɔˈwʋ, -mä yio ˈwʋ, waˈaa Zezwii de -yi. -N -yi ɔ dɛ ɔ -wʋnɩ a-a ˈla -a?—

Zɩzɛɛfö -ɲɛ Malii ˈsɔ yi a-a yɛ ˈmö tɩtanɩsɛ -mä Zeluzalɛɛmö ˈwlu sɩbhää, ˈn wa tɛlɩ a-a Zezwii saa ˈwuë sɛ. Waˈaa Zezwii ghlɩ dɔˈwʋ -wʋ zaa dlɩ klʋä ˈyli. Wa tɛlɩnɔ a-a ˈylɩ ta ˈmö -sɛ ˈn wa yɔ a-a bhäla -mä Zeluzalɛɛmö a lagɔbudu ˈkɔdʋ ˈmö ghlɩnɩ! -N -yi bhä ˈsaa kää ˈŋlɩ ˈn Zezwii -wʋ a-a -mä lagɔbudu ˈkɔdʋ ˈmö -a?— Ɛˈɛ -bhö ɲɩasɛ, maa -mä lagɔbudu ˈkɔdʋ ˈla ˈmö, ɔ bhɛnɩ a-a ɔ ˈkä ˈɔ dɩba a -gömö a wɛlɩ ˈcɩɛ. Ɔ -wa a-a Zoova ˈn ɔ yɩbhä a-a ɔ ˈkɔ dlɩ yɔwʋ nɛnɩ. Zezwii zʋ a-a ˈkɔdɔ aˈbhë -këë, ɔ zʋ a-a ˈkwädlɩ ˈɔ dɩba ˈklʋkpamö. Yɩ yɔ a-a kɛˈmö ˈtɛɛnɩ -kë, ɔ -kä a-a yɩ za ˈklɩ yɩɛ yi aˈbhë -kë, Zezwii kä a-a ˈkwädlɩ ˈklʋkpa. Zezwii zʋmö a-a bhä Malii -ɲɛ Zɩzɛɛfö ˈsɔ ˈklʋkpamö -a?— Nn, -sɩbhä Biblë gbää.

ˈSaa -n ˈcɩɛ bhä Zezwii a dɛ ˈnɩ?— Yɩ -kamö kɛˈmö ˈtɛɛnɩ aˈbhë -kë, -n kä -n ˈkä -na -lowluwaa ˈklʋkpamö ˈzʋ. -N yi bhä -sɩbhä ˈzʋ -a?—