ˈCƖƐCƖƐKÏBHÏ 8
Zoziasɩ kä a-a bhɛya a -nʋa a -nʋa
-Li a -lii a nʋnwɛ ˈtɛɛnɩ mö bhä kɛˈmö -a?— Nɩpka a -bɛ ˈpä mö -sɩbhä dlɩ. Bible lɛ nɩɩ, ɲɩbhɛlʋyu -bhlʋ wa laa Zoziasɩ, -li a -lii a nʋnwɛ ˈtɛɛnɔ teɲii ˈkɛˈmo. Maa ɔ kä a-a bhɛya a -bhɛya zaa, mʋa kwänɔɔ. -A nɩ ˈcɩɛ ˈsaa Zoziasɩ -ɲɛ ˈɔ bhɛya ˈsɔ nʋä.
Zoziasɩ ˈa dɩba a ˈŋlɩ a-a Amɔɔ, zwidaa a ˈkämanɩɲɔ. -Lizoku ɔ nʋ a-a teɲii ˈn ɔ bʋbɔ a-a ˈfʋ a lagwɩ. Zoziasɩ ˈa dɩba ˈkuä, mɔɔ zʋä Zwidaa a ˈkämanɩɲɔ. Maa lɛ a ˈtɛɲɩ ˈla ˈmö, ɔ kä a-a ˈylʋbö -gbʋäta a ˈyize! -Na dɔˈwʋ ˈɔ dɩba a sa -sɩbhä ɔ nʋ a-a bhä -lizoku -a?— Nˈnn ɔˈɔ -sɩbhä ˈzʋ.
Zefania ˈzʋ a-a nɩkpa ˈdɩ ˈmö nɩɩ wa nɩ tɩ ˈfʋ a -lagwɩɩ bʋbɔɔ
Ɔ glɩnɩ a-a -bhlɛ ˈyu ˈtikëyi, Zoziasɩ yɩbhä a-a ɔ ˈkä Zoova ˈklʋkpamö ˈzʋ. -Sɩbhä a za, -wa -waa Zoova a ˈyize mʋa zʋä ˈɔ bhɛya.ˈN wa kwänɔ a-a ɔ nʋä -li a -lii. -Muë -lɛ bhä Zoziasɩ ˈa bhɛya ˈnɩ?
Wa glaˈmö a -nɔɔ -bhlʋ a ˈŋlɩɛ zefanɩa. Zefanɩa, lagɔnɩkpɛ Lagɔ bhïlanɩ a-a ˈmö, ˈmö ɔ glɩnɩ a-a. Ɔ yi a-a Zwidaa a nɩkpa ˈdɩ ˈɲɛ nɩɩ, ˈn wa ˈnɩ ˈwa ˈfʋ a lagwɩ a bʋbɔbʋbʋ kɛˈmö -sɛ, -lizoku kʋä ghlɩ. Zoziasɩ yi a-a Zefanɩa ˈyukwli -pʋnɩ ˈn ɔ yiɛ Zoova bʋbɔ.
Zoziasɩ ˈa bheyi -mɔmɔ a ˈŋlɩɛ zelemii. ˈBhïlii wa ˈbhïlie ˈn wa yiɛ ˈgämö ˈghlimanɩ. Wa ˈsɔ -kpɔ teɲii wa -wawanɩ a-a zaa, Zoziasɩ ˈkuä, ˈn Zelemii yɔɔ lʋ yɔwʋ ˈpä. Zelemii -ɲɛ Zosiasɩ ˈsɔ kwänɩkwänɩ wa kwäkwänɩ a-a ˈn wa yi a-a -li a -lii -ɲɛ ˈsaa nɛnɩɛ Zoova dlɩ yɔwʋ ˈsɔ nʋ.
Zoziasɩ -ɲɛ Zelemii ˈsɔ kwänɩkwänɩ wa kwänɩkwänɩɛ ˈn wa yiɛ -li a -lii nʋ
ˈSaa Zoziasɩ ˈa nʋnʋlii ˈcɩamö ɔ ˈnɩ?— Ɔ glɩnɩ a-a -bhlɛ ˈyu ˈtikëyi, Zoziasɩ yɩbhä a-a ɔ ˈkä -li a -lii nʋ. Ɔ -yi a-a sɛ nɩɩ, nɩkpa -wa -waa Zoova a glaˈmö, -mä ɔ kää ɔ ˈkä ˈɔ bhɛya -sɛ. Nɩkpa -wa -waa Zoova, -wa -kamöä kwänɩ -n ˈkä -li a -lii nʋ, nɩ glɩnɩ -na bhɛya!
