Dlɩsɛkädaayuëɲɩ:

Lagɔ ˗ɲɛ nɩkpa ˈsɔ a ˗wawʋ ˗a kää dlɩ zɛmö, mii ˈsunɩɲɩɛ ˗mä ˈn ‘˗a ghlɩɛ ˗mä nɩkpa a kii ˈwuë, a˗a ˈcʋä Lagɔ ˈa wɛlɩɩ, a˗a kwänuëë, wa ˈkä badizee nzɩ wa ˈkä Zezwii a ˗nʋa ˈzʋ.’ (Mat. 28:​19, 20; Mk. 12:​28-31) ˗Tiamö a ˗wawʋ, ˈmötɛɛnɔɔ wʋ kää. ˗A ˗kä ˗sɩbhä a ˗wawʋ tulaa, ‘nɩkpa ˈwuë Lagɔ ˗sɛ a˗a ˗lɛ ˈcɩ wa ˈkä ˈɔ ˈpɩwʋlelea ˈwʋ ˈbhle ghlɩɩ,’ ˗a yi wa dila cɛ zɩ.—Nʋnʋlii 13:48.

Bhlaˈmö a dɔˈwʋ, ˗a ˗kä lagɔwɛlɩɩ bia möä yii, sɛɛ ˗a ˈkää nɩkpa lagɔwɛlɩɩ ˈɲɛ a ˈyize cuu, mö ˗a ˈcɩɛ ˈn ˗a zwiɛ ˈwlumö. ˗Maa ˗sɩkaa a dɔˈwʋ, sɛ ˗a ˈkää ˈnɛgösɛ bhïla ˗a ˗ɲʋa ˈsɔ ˗kä ˈdɩsɛsʋ tɛɛ, ˗sɩbhä ˗a kä ˗a ˈkä ˈzʋ. ˗Lii ˗yiɲɩ gbʋ plɛnʋa, ˗a yɩbhä ˗a ˈkʋa yɩ wɛlɩɩ ˈɲɛ, nzɩ ˗a ˈkʋa ˈylimö tulanɩ nɩɩ ˗a kä wa ˗wawʋ dlɩ zɛmö. Mii sɛɛ zɛmö nɩɩ, ˗a kä ˗a ˈkʋa ˈmö ˈnʋ, ˗lii ˗yiɲɩ gbʋ plɛnʋa, ˗a nɩ köbhɩɩ sasɛ ˈyli ˗a nɩ ˈpäni sasɛ dlɩ cɛ. Sɛɛ blosu ˈlɛ ˗kaɲɩ ɔ kwänɩ ˗a ˈkä ˗sɩbhä ˈzʋ ˈnɩ?

Blosu ˈlɛ kä ˈcɩɛcɩɛkïbhï 12 ˈmö. ˗Mä ˈcɩɛcɩɛkïbhï ˈla ˈmö, ˗wʋwʋsaa a kii ˗yɩ ˗kaɲɩɛ kwänɩ nzɩ ˗a ˈkä ˗wawʋ tula, ˈn ˗a ˈkä nɩkpa kwänɩ wa ˈkä Zezwii a ˗nʋa ˈzʋʋ, mii ˗wʋä ˗mä. ˗Wʋwʋsaa a kii Zezwii ˗ɲɛ tɛkäklɩtɩɛwaa ˈsɔ tula ˗mä lagɔwɛlɩbiabiu ˈmö, ˈmö ˈcɩɛcɩɛkïbhï ˗glɛ ˈwʋ. ˗A ˗kä nɩkpa lagɔwɛlɩɩ ˈɲɛɛ yi a sɛ ˗a ˈkää gbä a ˈyize mö ˗a kä ˗a ˈkä ˈwlumö ˈzʋ. ˗Maa, sɛɛ ˗a ˈkʋa ˈylimö tulanɩ nɩɩ ˗a kä wa ˗wawʋ dlɩ zɛmöö, mö ˗a tɛlɩɛ sɛ. ˗Wʋwʋsaa a kii ˈwuë kä abhlɩ bhʋlʋbhlʋ dɛsɛ, ˗maa ˗a ˗ɲɛ nɩkpɛ ˗kä ˈdɩsɛsʋ tɛɛ yii, ˗a ˗kɔɔ ˈylɩmöä mö, ˈn ˗a ˗kä nɩkpɛ Biblë ˈcɩa dɔˈwʋ ˗wʋ, ˗wʋwʋsaa a kii ˗yɩ kää teɲii dɛsɛ, ˗a ˈkää tulaa, mö ˗a ˈkää yɔwʋ yɩlɩ.

˗Wʋwʋsaa a kii ˗yɩɲɩ wɛlɩɩ ˈbɔgʋ ˈlɛ ˈmö a ˈcɩɛcɩɛkïbhï bhïla bhʋlʋbhlʋ, a ˗kä ˈa ˈpɩɔ ˈyli a ˗nʋa lagɔwɛlɩɩ ˈɲɛɛ yi a sɛ a ˈkiɛ tula, a nɩ ˈpäni dlɩ cɛ. ˈTɛmanɩ ˈyli yɔwʋ, Zoova ˗ɲɛ nɩkpa ˈsɔ a ˗wawʋ ˗kamö teɲii dlɩ zɛmö zumanɩ. ˗Sɩbhä a ˗wawʋ nɛnɩ wʋ ˈkä kii ˈwuë ˗a ghlɛnɩɛ ˈmö wʋ zi. Wʋ yeaɲɩ kwänɩ, a ˈkäˈɛ abhlɩ nɩkpa kwänɩ nzɩ wa ˈkä Zezwii a ˗nʋa ˈzʋ.

˗A ˗ɲɛ abhʋa ˈsɔ a sɛɛ ˗a nʋnɩɛ libho ˈgämö, yɩ ˗bhöɲɩ teɲii ˈmäna ˈwʋ. (Soph. 3:9) Sɛ a kwänɩɛ ˗wawʋ ˈmö nɩkpa ˈyize nzɩ wa ˈka Zezwii a ˗nʋa ˈzʋ a za, Zoova nɩ ˈpaɲɩ teɲii ˈɲu!