ˈCƖƐCƖƐKÏBHÏ 02
Biblë ɲɩaɲɩ dlɩtɛɛnɩdɛ
˗Lii a ˗bɛ mii ˈyɩaa mäˈä ˈpɩwʋ ˈwʋ a nɩkpaa ˈklɩ. Yɩ za, wa ˗kɔnɩ, wa ˗wʋ dlɩpänɔ ˗ɲɛ dlɩyliyile ˈsɔ ˈmö. ˗Sɩbhä a ˗lii ˗kamö ɔ tɛkäsɛ ghlɩ ˗a? ˈLɩbhägu a za, ɛ ˗käˈɛ ˗na dlɩsɛkänɩkpɛ a ˈkwie a za, ˗n ˗wʋ ˗kamä yɔlɔylʋ ˈmö. Zaa ˗n yɩbhä ˗kamä ˗naɲɩ nimï nɩɩ, ‘Zɩkpaa yi ɔ nɛnɩmanɩ ˗a?’ Nimïyɩbhäkïbhë nɩ a dɔˈwʋ, Biblë ˈtɛmanɩɲɩ dlɩ ˈwʋ.
1. Dlɩtɛɛnɩdɛ a ˗ma Biblë ɲɩaɲɩ ɔ ˈnɩ?
Sɛɛ pɩwʋ ˈlɛ yiee yɔlɔylʋ ˈwʋ, yɩ ˈyize a wɛlɩ ˈmö Biblë ˈnɩɛ ˈmö ˗sɛnɩ. Maa ɛ ɲɩaɲɩ ˈtɩtɩ a ˗tɩtɩɩ ˗yɩ nʋä nɩɩ, mäˈä ˈpɩwʋ a yɔlɔylʋ a kii ˈwuë yiaˈa ˗pa ˈyli bhɩɛ. ˈSaa Biblë gbää ˗yɩ ˈkä zɩkö ˈyli ˈwlʋnɩ a za, “˗n yi ˗li a ˗lii ghlɩ ˈn ˗n yi dlɩtɛɛnɩdɛ ˗kä.” (Zɛlɩ Jérémie 29:11, 12 ˈmö.) ˗Li ˈla ˗yɩ ˈkää zɩkö ˈyli ˈwlʋnɩɩ, yɩ kä ˈŋlɩ ˈn ˗a bhɛnɩɛ ˗a ˈkä zɩˈɛ ˈmlɩ ˈkunɩ ˗a ˗kä ˈklɩyɩyɛ ˈmö ˗wʋ, ˗a ˈkä ˗li a ˗lii dlɩ ˈwʋ ˈpä, ˈn ˗a ˈkäˈɛ zɩkö ˈkwädlɩkwädlɩnɩ ˈmäna ˈmö ˗bhölɩnɩ.
2. Sɛɛ zɩkpaa ˈkä ɔ zɩkö ˗wʋ ˈnɩ?
Biblë lɛ nɩɩ, zɩkö “Ɔ yi ˈwa mɩɔɔ ˈwuë sɩɔ. ˈKwie ˈnaa ˈkä ˗mä ˗wʋ zaa, ˈlɩgbʋ ˈnaa ˈkä ˗mä ˗wʋ, dlɩyliyile ˈnaa ˈkä ˗mä ˗wʋ, -gbapögbapɛ ˈnaa ˈkä ˗mä ˗wʋ.” (Zɛlɩ ’Ylimötulanɩlii 21:4 ˈmö.) Pʋa, ˗ɔɔˈmözlɔnɩlii, ˈlɩbhägu ˗ɲɛ ˈkwië ˈsɔ a sɛ a ˈklɩyɩyɛ a kii, ˗yɩ kää ˈŋlɩ ˈn nɩkpaa pää dlɩ nɩɩ, waˈaa dlɩtɛɛnɩdɛ ˗kä, yɩ ˈnaa ˈkäaˈaa zɩkö ˗bhölɩ. Biblë lɛ nɩɩ, ˗a yi ˗mä ˈbhlɩ a ˗bhlɩɩ ˈmö ˗bhölɩnɩ ˈkwädlɩkwädlɩnɩ, mäˈä dʋdʋ ˈwʋ.
3. Sɛɛ Biblë gbää, sɛɛ ˗a ˈkɩ ɔ dlɩ ˈwʋ ˗kä ˈnɩ?
Nɩkpa a ˗bɛ yɩbhä nɩɩ, ˗li a ˗lii nɩ ˈwlʋnɩ ˈyli. Maa wa ˈnɩɛ dlɩ ˈwʋ ˗kä nɩɩ, yɩ yi ˈyli ˈwlʋnɩ. Biblë ˈmö a wɛlɩ yɩbhlɩ, nɩkpɛ bhɛnɩ ɔ ˈkɩ dlɩ ˈwʋ ˗kä. ˗A ˗kä ‘zila ˈwuë ˈmö Lagɔ ˈa wɛlɩɩ a ˈbɔgʋʋ ˈmö zɛlɩɩ,’ ˗a yi dlɩ ˈwʋ ˗kä nɩɩ, yɩ yi ˗tiamö ˈyli ˈwlʋnɩ. (Nʋnʋlii 17:11) ˗N ˗kä Lagɔ ˈa wɛlɩɩ ˈcɩɛ, ˗n ˗kɩɩ dlɩ ˈwʋ ˗kää yii, ˗n ˈniˈɛ dlɩ ˈwʋ ˗kää yii, ˗naˈbhë ˗nmö ˈkɩɛ ˗lɛ ˗sɛ.
ˈCƖƐ ˗LII ˗MIMII
˗Lii Biblë gbää ˗yɩ ˈkä zɩkö ˈyli ˈwlʋnɩɩ, yɩlɩ yɩ glaˈmö a ˗nɩ yɔwʋ. Dlɩtɛɛnɩdɛ Biblë ɲɩaɲɩɛ, sɛ ɛ kwänɩɛ zɩˈɛ nɩkpaa, ˈyi ˈylɩmö.
4. Biblë lɛ nɩɩ zɩkö, ˗a yi ˈkwädlɩkwädlɩnɩ -bhölɩ, ˈn ˈklɩyɩyɛ ˈnaa ˈkä ˗bhölɩ
˗Lii Biblë gbää ˗yɩ ˈkä zɩkö ˈyli ˈwlʋnɩɩ, yɩ glaˈmö a ˗nɩ ˗yɩ ˗gää dɛˈɛ ˈyuku, ˈyiɛ ˗ka ˈylɩmö. ˗Mä yɩ glaˈmö, ˗mi ˗n yɩbhä ɔ ˗naa ˗n ˈkä tɛɛ ˈylɩmö ˈnɩ? ˗Yɩ kä ɔ ˈŋlɩ ˈnɩ?
Biblë a gbɛlɩɩ ˗yɩ ˗gää dɛˈɛ ˈyuku zeli ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Biblë a gbɛlɩ ˈlɛ bhɛnɩ ɔ yɩ ˗kamö dlɩtɛɛnɩdɛ ˈɲɛ ˗a? Yɩ bhɛnɩ ɔ yɩ ˈkä ˗naˈa ˈligbë ˈmö a ˗nʋa ˗ɲɛ ˗na bhɛya ˈsɔ dlɩtɛɛnɩdɛ ˈɲɛ ˗a?
ˈPää ˗ka dlɩ, ˗n ˗wʋ ˗mä ˈbhlɩ a ˗bhlɩɩ ˈmö:
˗YƖ ˈNAA ˈKÄÄ ˗BHÖLƖ: |
˗YƖ ˈKÄÄ ˗BHÖLƖ: |
---|---|
|
|
|
|
|
|
|
|
|
|
5. Biblë ˈmö a wɛlɩɩ bhɛnɩ yɩ ˗kaɲɩ dlɩtɛɛnɩdɛ ˈɲɛ
˗Lizokuu ˗yɩ plɩɛ mäˈä dʋdʋ ˈwʋ ˈwʋ, -mumuë -kii ˈylɩmö, swɩɩ ˈkunʋa yɔwʋ, yɩ plʋaˈɛ ˈklɛ ˈmö. ˗Mumuë ˈtɛmanɩˈɛ teɲii ˈyli yɔwʋ ˗lii ˈkä nɛnɩmanɩ a za. Sɛɛ Biblë gbää nɩɩ ˗lii yi nɛnɩmanɩ a sɛ yɩ ˈtɛmanɩɛ ˗mumuë dlɩ ˈwʋ, ˈyi ˈylɩmö. ˈZʋ lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
-
˗Mä video ˈlɛ ˈmö, ˗ɔɔˈmözlɔnɩlii a ˗mi ɲima ɔ Ghlafika dlɩ zɛmö ˈnɩ?
-
˗Ɔɔˈmözlɔnɩli ˈla ˈnɩɛ ˗bhlɛ bhɩɛ abhlɩ, maa sɛɛ Biblë kwänɔ bhä ˈnɩ?
ˈSaa Biblë gbää ˗yɩ ˈkä zɩkö ˈyli ˈwlʋnɩɩ, ˗a ˗kii dlɩ ˈwʋ ˗kä, swɩ ˈnaa ˗kaɲɩ yɔwʋ ˈkunɩ, ˈn ˗a yi aˈbhë ˈklɩyɩyɛ ˈmö ˗wʋ ˗kë, ˈmäna ˗yiɲɩ dlɩ zɛmö ˗wʋ. Zɛlɩ Proverbes 17:22 ˈn Ghlɔɔmö a -nʋa 12:12 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Zɩkö a wɛlɩɩ Biblë ˗sɛnɩɛ ˈmö ˗a ˗kɩɩ dlɩ ˈwʋ ˗kä, ˗na dɔˈwʋ yɩ bhɛnɩ ɔ yɩ ˈkä ˈŋlɩ ˗kä ˗aˈa zɩkpaa ˈkä zɩˈɛ nɛnɩmanɩ ˗a? ˗Yɩ kä ɔ ˈŋlɩ ˈnɩ?
NƖKPA ˗MUMUË LƐ NƖƖ: “˗Li a ˗lii ˗yɩɲɩ wɛlɩɩ Biblë bhïlaa, yɩˈɩɛ bhɛnɩ yɩ ˈkä ˈyli ˈwlʋnɩ.”
-
˗Na dɔˈwʋ, ˗yɩ kä ɔ ˈŋlɩ ˈn ˗n kä ɔ ˗n ˈkä wɛlɩ ˈlɛ ˈmö vɩɛ ˈnɩ?
DƐSƐKÄKÏBHÏ
˗Li a ˗lii ˗yɩ ˈkää zɩkö ˈyli ˈwlʋnɩɩ, yɩ wɛlɩɩ ˗wʋ ˗mä Biblë ˈmö. Wɛlɩ ˈla kä ˈŋlɩ ˈn ˗a kää dlɩtɛɛnɩdɛ, ˈn ˗aˈa zɩkpaa ˗bhöä zɩˈɛ ˈmäna ˈwʋ.
ˈWʋligbanɩkïbhï
-
ˈSaa Lagɔ gbää ɔ ˈkä zɩkö nʋʋ, ˗yɩ kä ɔ ˈŋlɩ ˈn nɩkpaa kä ɔ wa ˈkɩ ˗yi ˈnɩ?
-
Sɛɛ Biblë gbä ɔ zɩkö a dɔˈwʋ ˈnɩ?
-
˗N ˗kä dlɩtɛɛnɩdɛ ˗kä, sɛ yɩ ˗kamö ɔ kwänɩ ˈnɩ?
YILII YƆWƲ
Sɛɛ dlɩtɛɛnɩdɛ bhɛnɩ ɛ ˗kamö kwänɩ ˗n ˗kä ˈki ˈmö ˗wʋʋ, ˈyɩ ˗sɩbhä ˈylɩmö.
« L’espoir : où le trouver ? » (Réveillez˗vous !, 22 avril 2004)
˗Muë ˈlɩbhägu a ˗mu ˈnɩ bhɩɛ ˗wʋä yɔlɔa dɔˈwʋ, sɛɛ ˈwa dlɩtɛɛnɩdɛ bhɛnɩɛ ɛ ˈkʋa kwänɩ, ˈyɩ ˗sɩbhä ˈylɩmö.
« Vivre avec une maladie chronique : la Bible est-elle utile ? » (Ɛtɛnɛtɩ ˈklʋ a ˈcɩɛcɩɛkïbhë)
˗N ˗kä video ˈlɛ ylɛ dɔˈwʋ ˗wʋʋ, ˈpä dlɩ nɩɩ ˗n ˗ɲɛ ˗naˈa ˈligbë ˈmö a ˗nʋa ˈsɔ, a ˗wʋ ˗mä ˈbhlɩ a ˗bhlɩɩ ˈmö.
Dlɩtɛɛnɩdɛ Biblë ɲɩaɲɩɛ, nɩkpɛ ˗bhlʋ ˈnʋä a wɛlɩɩ a sɛ yɩ zigbanɩɛ ˈɔ zɩkpaa ˈmö, ˈyɩ ˗sɩbhä ˈylɩmö.
« Je ne pense plus devoir changer le monde » (La Tour de Garde, 1er juillet 2013)