ˈCƖƐCƖƐKÏBHË 03
˗N bhɛnɩ ɔ ˗n ˈkä Biblë dlɩ ˈwʋ ˗kä ˗a?
Biblë bhïla ˗lii a ˗bɛ ˗yɩ ˈkää zɩkö ˈyli ˈwlʋnɩ a wɛlɩɩ, ˈn ɛ käˈɛ ˈdɩmözʋwɛlɩɩ a ˗bɛ ˈmö. ˗N yɩbhä ˗kamä ˗n ˈkä ˈsaa ɛ ˈcɩaa yɩbhlɩnɩ, ˗maa ˗n ˈnɛɛnɩˈɛ ˗kamä ˗naɲɩ ˈwʋ. Sɛˈɛ a ˈbɔgʋʋ wa ˈcɛlɩ a˗a bhlagɔgɔˈmö, wʋ ˈmö a wɛlɩɩ ˗ɲɛ wʋ ˈmö a ˈdɩmözʋwɛlɩɩ ˈsɔ, ˗n bhɛnɩ ɔ ˗n ˈkɩ dlɩ ˈwʋ ˗kä ˗a? ˗Li a ˗lii ˗a ˈkää zɩˈɛ ghlɩ ˈn ˗a ˈkäˈɛ zɩkö ghlɩ, ˗yiɲɩ wɛlɩɩ Biblë bhïla, ˗n bhɛnɩ ɔ ˗n ˈkɩ ˗tiamö dlɩ ˈwʋ ˗kä ˗a? ˗Sɩbhä nɩkpa a miniɲwi ˈyɩbhämöä waɲɩ nimï. ˗A paamö swɩ ɲɛmʋ ˈmö, ˗n ˈkä ˗naɲɩgäsɛ Biblë ˈmö vɩɛ.
1. Wɛlɩɩ ˗yɩ ˗wʋä ˗mä Biblë ˈmö kä ɔ ˗tiamö gbëaa ˈmö ˗a?
Biblë tula nɩɩ, “ɛ ˈmö a wɛlɩ yɩ kä ˗tiamö gbëaa ˈmö.” (Ecclésiaste 12:10) Nɩkpaa ˗wa ˗bhölɩ a˗a ˗tiamö, wa ˗gömö a wɛlɩ ˗yɩ ˈplɩ a˗a ˗tiamö ˈwʋ, ˈmö Biblë sɛsɛnɩɛ ˈmö. (Zɛlɩ Lwiikö 1:3; 3:1, 2 ˈmö.) Wɛlɩɩ Biblë ˗sɛsɛnɩɛ ˈmö, ˈtɛɲɩ ˗mɛ ˈmö yɩ ˈplɩɛ ˈwʋ, nɩkpaa ˗waɲɩ wɛlɩ ɛ bhïlaa, dɛɛ yɩ ˈplɩnɩɛ ˈwʋ ˈn ˈsaa ˈplɩɛ ˈwʋ a dɔˈwʋ, ˈnɛɛnɩwaa ˗wa ˗sɛsɛnɩɛ bhlaˈmö a ˗lii ˈmö, wa tulanɩ nɩɩ gbëaa yɩ kää ˈmö.
2. ˗Yɩ kä ɔ ˈŋlɩ ˈn ˗a ˈkä ɔ gbä nɩɩ Biblë kä zɩˈɛ dɛsɛ ˈyize ˈnɩ?
Dɛ ˗mämaa a dɔˈwʋ, Biblë ˈmaa ˈkä ˗lii ˗mimii a wɛlɩɩ bhïla ˈwë ˈn nɩkpaa yɩbhlɩniɛ bhäla. A yɩɛ ˗ka, Biblë bhïla sɩasɩ a wɛlɩɩ. ˈN ˈtɛɲɩ ˗ɛɲɩ ˈmö wa ˈcɛlɩɛ wɛlɩ ˈla ˗mä Biblë ˈmö, nɩkpa a ˗bɛ ˈni a˗a dlɩ ˈwʋ ˗kä. Maa ˈn sɩasɩ yiɛ bhäla tula nɩɩ, ˈsaa Biblë ˗sɛnɩɛ daˈa ˈmö, gbëaa yɩ glɩnɩɛ. Wa bhɛnɩ “wa ˈkɩ dlɩ ˈwʋ ˗kä zɩˈɛ ˈn ˈkwädlɩkwädlɩnɩ.”—Psaume 111:8.
3. Zɩkö a wɛlɩɩ Biblë ˗sɛnɩɛ ˈmö, ˗yɩ kä ɔ ˈŋlɩ ˈn ˗a ˈkɩ ɔ dlɩ ˈwʋ ˗kä ˈnɩ?
Biblë ˈmö a wɛlɩɩ Lagɔ bhïlanɩ a˗a ˈɔ nɩkpaa ˈmö, yɩ bhïla a “ˈsaa ˈkää zɩkö ˈyli ˈwlʋnɩ a wɛlɩɩ.” (Isaïe 46:10) Biblë bhïla a˗a ˗lii a ˗bɛ a wɛlɩɩ, ˈn sɛ ɛ bhïliɛ ˈtɩɩ, ˗sɩbhä yɩ ˈwlʋnɩɛ bhäla ˈyli. Pɩwʋ ˈlɛ ˗a ˗bhölɩnɩɛ dɛˈɛ ˈmö, sɛɛ wʋ ˈkäa ˈmö ˗wʋwʋnɩɩ, Biblë yɛ a˗a ˗pa yɩ wɛlɩɩ bhïla. ˗Mä ˈcɩɛcɩɛkïbhë ˈlɛ ˈmö, wɛlɩɩ Lagɔ bhïlanɩ a˗a ˈɔ nɩkpaa ˈmö, ˗yɩ ˗wʋä ˗mä Biblë ˈmö, ˗a yi yɩ glaˈmö a ˗nɩ yɔwʋ yɩlɩ. Sɛɛ wɛlɩ ˈla ˈwlʋnɩɛ ˈyli ˈtɩɩ, ˗sɩbhä ŋli a yɩaa!
ˈCƖƐ ˗LII ˗MIMII
Sɛɛ sɩasɩ a wɛlɩɩ ˗ɲɛ Biblë ˈmö a ˗nɩ ˈsɔ mönɩɛ yɔwʋ, yɩlii yɔwʋ, ˈn Biblë ˈmö a wɛlɩɩ Lagɔ bhïlanɩɛ ˈɔ nɩkpaa ˈmö ˗yɩ yɩaa ŋli, yɩlɩˈɛ yɩ glaˈmö a ˗nɩ yɔwʋ.
4. Sɛɛ sɩasɩ ˗ɲɛ Biblë ˈsɔ mönɩɛ yɔwʋ
Bhlaˈmö, nɩkpa a ˗bɛ pä a˗a dlɩ nɩɩ, dʋdʋkpäta ˗lu ˈklʋ a glɩ a˗a. ˈZʋ ˗lɛ VIDEO.
A yɩɛ sɛɛ Zɔɔbö a ˈbɔgʋʋ gbä a˗a ˗lɛ a ˈylʋbö a 3.500 zɩˈɛ dɛˈɛ. Zɛlɩ Job 26:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
Sɛɛ Biblë gbää nɩɩ, dʋdʋkpäta ˈnɩɛ “˗lu ˈwʋ ˗glɛ,” ˗yɩ kä ɔ ˈŋlɩ ˈn yɩ sɛ ɔ zuzu ˗gömö ˈnɩ?
Sɛɛ ˗lii ˈplɩplɩnɩɛ ˈmö ˈn ˈɲizakwë lɩbhää, nɩkpaa kɩ a˗a ˈmö ˈnʋ ˗lɛ a ˈylʋbö a 200 a ˈyize zɩˈɛ dɛˈɛ. Maa yɩɛ ˗ka sɛɛ Biblë gbä a˗a ˗lɛ a ˈylʋbö a 3.500 zɩˈɛ dɛˈɛ. Zɛlɩ Job 36:27, 28 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Sɛɛ ˗lii ˈplɩplɩnɩɛ ˈmö ˈn ˈɲizakwë lɩbhää, sɛɛ Biblë ˗sɛsɛniɛ ˈmö, sɛɛ ˗n pä ɔ yɩ dɔˈwʋ dlɩ ˈnɩ?
-
Biblë a gbɛlɩ ˈlɛ ˗n zɛlɩɛ ˈmö, yɩ yi ɔ gbä ˗n ˈkä teɲii Biblë dlɩ ˈtɛɛnɩ ˗a?
5. Biblë bhïla a˗a ˗lii ˗yɩ kää dɛsɛ, ˗yɩ ˈkää ˈyli ˈwlʋnɩ a wɛlɩɩ
Zɛlɩ Isaïe 44:27–45:2 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
ˈYlʋbö a 200 tʋʋ ˗mä Babilɔɔnɩ a ˗glɔ ˈkä ˈyli bhɩɛ, ˈn Biblë yiɛ wʋ wɛlɩɩ ˈmö ˗sɛnɩ, sɛ ɛ gbä ɔ ˈnɩ?
ˈSaa ˈplɩɛ bhäla ˈwʋ, yɩ tula nɩɩ, Pɛɛsɩ a ˈbhlɩlowli Silwisɩ, ɔ ˗ɲɛ ˈɔ ˈslʋjaa ˈsɔ, mʋa bhɩa Babilɔɔnɩ a ˗glɔ ˈyli, 539 Z.ˈN.G. b Ɲuu ˗wʋ ˗binɩ a˗a ˗glɔ, dɛ ˗mämaa wa ˈbhluä ˈn wʋ yiɛ ˗mä mönɩ. ˗Glɔ a ˗gbïli ˗kälɩ a˗a ˈn wa yiɛ ˗mä plɛ, wa plɛɛ ˗mä ˈwë, waˈaa gwɩ ˈn wa yiɛ ˗glɔ ˈwʋ ˈlibhï. Zɩˈɛ ˈylʋbö a 2.500 ˈplɩɛ ˈwë, Babilɔɔnɩ a ˗glɛgba a ˈyize ma˗a tʋä ˗lɛ. Sɛɛ Biblë gbä a˗a ˗pa ˈwʋ, ˈyi ˈylɩmö.
Zɛlɩ Isaïe 13:19, 20 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
ˈSaa ˈplɩɛ ˈwʋ, sɛ yɩ tula ɔ nɩɩ, wɛlɩɩ wa bhïla a˗a Babilɔɔnɩ a dɛ, yɩ ˈwlʋnɩ ˗tiamö ˈyli ˈnɩ?
Babilɔɔnɩ a ˗glɛgba ˗aˈa ˈtɛɲɩ ˈlɛ ˈmö, ˗mä Yilakö
6. Biblë bhïla a˗a wɛlɩɩ ˗yɩ ˗wʋä zɩˈɛ ˈyli ˈwlʋnɩ dɔˈwʋ
ˈTɛɲɩ ˗a ˗bhölɩnɩɛ dɛˈɛ ˈmö, ˈmö Biblë laa ‘ˈPɩwʋ a ˈylibhɩɛtɛɲɩ’. (2 Timotee 3:1) ˗Lɛ a ˈtɛɲɩ ˈla a dɔˈwʋ, yɩɛ sɛɛ Biblë gbä a˗a.
Zɛlɩ Matie 24:6, 7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
Sɛɛ Biblë gbä ɔ ˈpɩwʋ a ˈylibhɩɛtɛɲɩ a dɔˈwʋ ˈnɩ?
Zɛlɩ 2 Timotee 3:1-5 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
ˈPɩwʋ a ˈylibhɩɛtɛɲɩ ˈmö, sɛɛ nɩkpa a nʋnʋliii ˈkää ˗wʋʋ, sɛɛ Biblë gbä ɔ yɩ dɔˈwʋ ˈnɩ?
-
Nʋnʋli ˈla, yɩ glaˈmö a ˗nɩ ˗mi ˗n yɩ ɔ zɩˈɛ ˈylɩmö ˈnɩ?
NƖKPA ˗MUMUË LƐ NƖƖ: “Biblë wälɛwälɛdɩ ˗ɲɛ ˗dodonini ˈsɔ a ˈbɔgʋä.”
-
˗Lu ˗mu kä ɔ ˈŋlɩ ˈn ˗n kä ɔ ˗naa Biblë dlɩ ˈwʋ ˈnɩ?
DƐSƐKÄKÏBHÏ
Bhlaˈmö a ˗lii wa vɩɛ ˈmö mi, sɩasɩ a wɛlɩɩ mi, ˈn wɛlɩɩ Lagɔ bhïlanɩ a˗a ˈɔ nɩkpaa ˈmö mi, yɩ ˈwuë yɩ tula nɩɩ, ˗a bhɛnɩ ˗a ˈkä Biblë dlɩ ˈwʋ ˗kä..
ˈWʋligbanɩkïbhï
-
Biblë ˈmö a wɛlɩɩ kä ɔ ˗tiamö gbää ˈmö ˗a?
-
Kii ˗mi ˈmö Biblë ˗ɲɛ sɩasɩ ˈsɔ mönɩ ɔ yɔwʋ ˈnɩ?
-
Biblë bhïla ɔ ˈsaa ˈkää zɩkö ˈwʋ ˈplɩ a wɛlɩɩ ˗a? ˗Yɩ kä ɔ ˈŋlɩ ˈnɩ?
YƖLII YƆWƲ
Sɩasɩ a wɛlɩ tula ɔ nɩɩ, Biblë yio ɛ kää ˈmö ˗a?
« La science est˗elle d’accord avec la Bible ? » (Ɛtɛnɛtɩ ˈklʋ a ˈcɩɛcɩɛkïbhë)
ˈSaa tula ɔ nɩɩ, “ˈpɩwʋ a ˈylibhɩɛtɛɲɩ mö”˗a ˗wʋä dɛˈɛ ˈmö ˈnɩ?
« 6 prophéties qui se réalisent sous vos yeux » (La Tour de Garde, 1er mai 2011)
Wɛlɩɩ Lagɔ bhïlanɩ a˗a ˈɔ nɩkpaa ˈmö Glɛköwaa ˈa ˈkämanɔɔ a dɛ, sɛ yɩ ˈwlʋnɩɛ ˈyli, ˈyɩ ˗sɩbhä ˈylɩmö.
“Wɛlɩɩ Lagɔ bhïlanɩ a˗a nɩkpa ˈmö ˗yɩ pää swɩ ɲɛmʋ ˈmö” (5:22)
Wɛlɩɩ Lagɔ bhïlanɩ a˗a ˈɔ nɩkpaa ˈmö, sɛ yɩ zigbanɩɛ nɩkpɛ ˗bhlʋ a zɩkpa ˈmö, ˈyɩ ˗sɩbhä ˈylɩmö.
« Pour moi, Dieu n’existait pas » (La Tour de Garde no 5 2017)
