ˈCƖƐCƖƐKÏBHË 09

Ghlɛnɩ bhibhebhibhiu ˈmö ˗n ˈkä Lagɔ yɔwʋ ˈdionɩ

ˈZƲ -LƐ

˗N yɛ ɔ tɛkäsɛ dlɩ ˈpä nɩɩ, nɩkpɛ bhɛnɩ ɔ ˗kamö ˗lii ˗mimii sʋlʋnɩ ˗a? ˗N yɩbhä ɔ ˗n ˈkä kïbhï ˗n ˈyɩbhänɩɛ ˗naɲɩ ˈwʋ a zɛmösɛna yɩbhlɩnɩ ˗a? ˗N yɩbhä ɔ wa nɩ paamö swɩ ɲɛmʋ ˈmö ˗a? ˗N yɩbhä ɔ ˗n ˗ɲɛ Zoova ˈkä ˈwʋ ˗wʋnɩ ˗a? ˗Li ˈla ˈwuë a dɔˈwʋ bhibhebhibhiu bhɛnɩ wʋ ˗kamö kwänɩ. Maa, sɛɛ ˗a kä ɔ ˗a ˈkä Lagɔ bhibhe ˈnɩ? Lagɔ ˗pʋnɩ ɔ bhibhebhibhiu a kii ˈwuë ˈyukwli ˗a? Sɛɛ ˗n ˈkä ɔ ˈzʋ Lagɔ ˈkä ˗naˈa bhibhebhibhiu ˈyukwli ˗pʋnɩ ˈnɩ? Mö ˗a ˈkää ˈylɩmö.

1. ˗Mɔ ˗a kä ɔ ˗a ˈkä bhibhe ˈnɩ? ˈN ˗lii ˗miɲɩ za ˗a bhɛnɩ ɔ ˗a ˈkä bhibhe ˈnɩ?

Zezwii ˈcɩaɲɩ nɩɩ, ˗aa dɩba ˗ɔ ˗wʋä ˗mä ghäyɩ ˈwʋ, ɔ ˈyize mö ˗a kää ˗a ˈkä bhibhe. Zezwii aˈbhë Zoova ˈmö ɔ bhibhe a˗a. Ɔ lɛ nɩɩ, “A ˗kä Lagɔ bhibhee, a nɩ nʋ nɩɩ: ‘˗Aa dɩba Lagɔ ˗ɔ ˗wʋ ˗mä ghäyɩ ˈwʋ, [...]’” (Matie 6:9) ˗A ˗kä Zoova bhibhee, yɩ kä ˈŋlɩ ˈn ˗a ˗ɲɔ ˈsɔ, a˗a ˗wʋnɩɛ ˈwʋ teɲii.

ˈLɩlɩlɩ a dɔˈwʋ, ˗a bhɛnɩ ˗a ˈkɔ ˗lii ˈwuë a za bhibhe. ˗Maa, ɔ ˈkä ˗aˈa bhibhebhibhiu ˈwʋ ŋlu a dɔˈwʋ, ˈsaa ˗a ˈyɩbhänɔɔ nɩ glɩnɩ ˗lu a ˗mu nɛnɔɔ dlɩ yɔwʋ. “˗A ˗kɔɔ bhibhee, ˈsaa ˗a ˗kɔɔ ˈyɩbhänɩ ˗kë, ˈn ˗lu ˈla ˗kɔɔ dlɩ yɔwʋ nɛnɩɩ, ˗a ˗yi sɛɛ nɩɩ, ɔ ˗pʋnɩɲɩ ˈyukwli.” (1 Zaa 5:14) ˗Lii ˗yɩɲɩ dɔˈwʋ ˗a bhɛnɩɛ ˗a ˈkä Lagɔ bhibhee, Zezwii sʋlʋnɩɲɩ yɩ glaˈmö a ˗nɩ. (Zɛlɩ Matie 6:9-13 ˈmö.) ˗Lii ˗yiɲɩ gbʋ plɛnɩɲɩɛ, ˗a bhɛnɩ ˗a ˈkä yɩ za Lagɔ bhibhe, ˗a nɩ bhälɔˈɛ ˈgämö ˗li a ˗lii ˈwuë ɔ nʋʋɲɩɛ ˈwlu a za. ˈN ˗a bhɛnɩˈɛ ˗a ˈkɔ ˗mumuë a za bhibhemö nzɩ ɔ ˈkʋa kwänɩ.

2. Sɛɛ ˗a kä ɔ Lagɔ bhibhe ˈnɩ?

Biblë paaɲɩ swɩ ɲɛmʋ ˈmö nɩɩ, “˗aa dlɩ zɛmö a wɛlɩɩ ˈwuë ˗a nɩ ˈɲɩ Lagɔ.” (Psaume 62:8) Zaa, ˗a ˗kä Lagɔ bhibhee, wɛlɩɩ ˗a bhïlaa, yɩ nɩ glɩnɩ wɛlɩɩ a ˗mi ˈbhöönɩɛ ˗tiamö ˗mä ˗aˈa dilaa zɛmö. ˗A ˗kä bhibhe dɔˈwʋ ˗wʋʋ, ˗a bhɛnɩ ˗a ˈkä wɛlɩɩ ghäyɩ ˈpä, ˗a bhɛnɩ ˗a ˈkä dlɩ zɛmö bhibhenɩ. ˗A bhɛnɩ ˗a ˈkä ghäyɩ ˈnɩgbönɩ, ˗a bhɛnɩ ˗a ˈkä ˗kokomïladigbï glu ˈpä, ˗a bhɛnɩˈɛ ˗a ˈkä sɛ glɩ. ˗Maa, ˗sɩbhä nɩ tula nɩɩ ˗a kä Zoova a ˈklʋkpa. Dɛɛ ˗a yi ˗wʋ aˈbhë ˗kë, ˗a bhɛnɩ ˗a ˈkä ˈtɛɲɩ ˈwuë ˈmö bhibhe.

3. Sɛɛ Lagɔ ŋlu ɔ ˗aˈa bhibhebhibhiuu ˈwʋ ˈnɩ?

Zoova ghlɛnɩ ˈki a ˗bɛ ˈmö ˈn ɔ ŋluä ˗aˈa bhibhebhibhiuu ˈwʋ. Ɔ ɲɩaɲɩ ˈɔ wɛlɩɩ ˗yɩ ˗lɛ Biblë mɛ. ˗Mä Biblë ˈmö, kïbhï ˗a ˈyɩbhänɩɛ ˗aɲɩ ˈwʋ a zɛmösɛna ˗wʋ ˗mä. Lagɔ ˈa wɛlɩɩ a ˈmözɛlɩzɛlɛ, “nɩkpɛ a ˗mɔ ˈnɩɛ ˈnɛɛnɔ ˗kä, yɩ ɲɔ ˈnɛɛnɔ.” (Psaume 19:7; zɛlɩ Zaakö 1:5 ˈmö.) ˗Lu ˗kaɲɩ kɛˈmö ˈtɛɛnɩ, ɔ yi gbä ˗aˈa dlɩɩ zɛmö yɩ ˗pälɛpälɛ ˗wʋ ˈyize. ˗Lu a gbʋ ˗kaɲɩ plɛnɩ, ɔ bhɛnɩ ɔ ˈkä ˈɔ bʋbɔbʋbɔwaa ˗mumuë ˈmö ghlɛnɩ nzɩ wa ˗kaɲɩ kwänɩ.

ˈCƖƐ ˗LII ˗MIMII

Sɛɛ Lagɔ yɩbhää ˗a nɩ bhibheo, ˈn sɛɛ ˗a ˈkää bhibhebhibhiuu ˗li a ˗lii ˈmö ghlɩnɩ, ˗a nɩ ˈyi ˈylɩmö.

4. Sɛɛ Lagɔ yɩbhää ˗a nɩ bhibheo

˗Lii a ˗mi ˈkä ɔ ˈŋlɩ ˗kä Lagɔ ˈkä ˗aˈa bhibhebhibhiuu ˈyukwli ˗pʋnɩ ˈnɩ? ˈZʋ ˗lɛ VIDEO.

VIDEO: Bhibhebhibhiu a ki ˈwuë ˈmö Lagɔ ˗pʋnɩ ɔ ˈyukwli ˗a?: ˈPɩɔ (2:42)

Zoova yɩbhä nɩɩ ˗a nɩ bhibheo. Zɛlɩ Psaume 65:2 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

˗N pä ɔ dlɩ nɩɩ, “˗ɔ ˗pʋnɩɛ bhibhebhibhiu ˈyukwli,” ɔ yɩbhä bhä nɩɩ ˗n nɩ bhibheo ˗a? ˗Yɩ kä ɔ ˈŋlɩ ˈnɩ?

˗A ˗kä nɩɩ Lagɔ ˈkä ˗aˈa bhibhebhibhiuu ˈyukwli ˗pʋnɩɩ, ˗a nɩ ˈtɛmanɩ ˈyli yɔwʋ ˗a ˈkä ˈɔ ˈpäpägböö ˗gänɩ. Zɛlɩ Michée 3:4 ˈn 1 Piɛlɩ 3:12 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

Sɛɛ ˗a ˈkä ɔ ˈzʋ nzɩ ˗a ˈkɩ dlɩ ˈwʋ ˗kä nɩɩ, Zoova ˗pʋnɩ ˗aˈa bhibhebhibhiuu ˈyukwli ˈnɩ?

˗Zɩkpö ˈsɔ ˗kä tʋ gwɩ dɔˈwʋ ˗wʋ, yɩ bhɛnɩ yɩ ˈkä bhʋlʋbhlʋ bhibhe nzɩ yɩ ˈkä ˈwlu ˈplɩ. Lagɔ yi ɔ ˗zɩkpö ˈla ˈsɔ ˗kpɔ a bhibhebhibhiu ˈyukwli ˗pʋnɩ ˗a?

5. ˗Aˈa bhibhewɛlɩɩ, yɩ nɩ ˈbhöönɩ ˗tiasɛ ˗mä dlɩ zɛmö

Nɩkpa ˗mumuë, wa ˗kä bhibhee yi, ˈsaa wa ˈkää ˈkwädlɩ ˈŋlɩ ˗dɩ ˈmö wa ˈcʋä. Maa ˗sɩbhä Lagɔ yɩbhä ɔ ˗a nɩ bhibheo ˗a? Zɛlɩ Matie 6:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

Sɛɛ ˗n ˈkä ɔ bhibhe ˗n tɩa “ˈkwädlɩ ˗lii ˗bhlʋ ˗kpɔ ˈŋlɩ ˗dɩ” ˈyize ˈnɩ?

Zila ˈwuë ˈmö, ˈsaa Zoova nʋä ˗na za, ˈpänɩ yɩ glaˈmö a ˗nʋ ˗bhlʋ dlɩ kɛ, ˗nzɩ ˗n ˈkɔ wʋ za bhälɩ. Sɛɛ zila zɩɛ ˈyize, ˗n ˗kä ˗lu ˗bhlʋ a za bhibhe, ˗n yi ˈylɩmö nɩɩ ˈdimasɩ ˗bhlʋ ˈmö, ˗n yɛ ˗lii ngbiˈsɔ a za bhibhe.ˈN ˗n ˈnaa ˈkäaˈa ˗lii ˗bhlʋ ˗kpɔ ˈŋlɩ ˗dɩ.

Dɩba a ˗mɔ ˗gää kɛ, ɔ yɩbhänɩɩ ˈɔ yuu nɩ ˈɲɔ ˈɔ dlɩɩ zɛmö a wɛlɩɩ. Sɛɛ ˗bhlʋ ˗kpɔ ˈla ˗sɩbhä Zoova yɩbhää nɩɩ, ˗a nɩ ˈɲɔ ˗aˈa dilaa zɛmö a wɛlɩɩ ˈwuë.

6. Bhibhebhibhiu glɩnɩ dɛsɛkälu a ˗mu Zoova ɲɩaɲɩɛ

˗Lu ˗kaɲɩ kɛˈmö ˈtɛɛnɩ, sɛɛ bhibhebhibhiu bhɛnɩ bhä wʋ ˗kaɲɩ ˈmötɛɛnɔ ˈɲɛ ˈnɩ? ˈZʋ ˗lɛ VIDEO.

VIDEO: Bhibhebhibhiu a za ˗a plɩ ˈsaa ˈtɛɛnɩɲɩɛ kɛˈmö ˈwlu (1:32)

Biblë ɲɩaɲɩ ˈdɩ nɩɩ, bhibhebhibhiu bhɛnɩ wʋ ˗kaɲɩ kwänɩ ˗aa dila zɛmö ˈkä ˗pälɛpälɛ ˗wʋ. Zɛlɩ Filiipö a ˗nʋa 4:6, 7 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

Bhibhebhibhiu ˈnɩɛ bhɛnɩ wʋ ˈkä ˈŋlɩ ˗kä nzɩ ˗a ˈkä kii ˈwuë ˗a ˗wʋä ˈmö ˈwlu ˈplɩ abhlɩ. Maa sɛɛ wʋ bhɛnɩ ɔ wʋ ˗kaɲɩ kwänɩ ˈnɩ?
˗Lii ˗miɲɩ za ˗n yɩbhä ɔ ˗n ˈkä Lagɔ bhibhe ˈnɩ?

˗N ˗yi a˗a bhä sɛ ˗a?

Tɛɛnɩ bhlagɔgɔˈmö ˗këë zɩˈɛ, ˗a ˗kä bhibhebhibhiuu zɛmö bhɩɛ yi, ˈn ˗a nʋä “Amɛɛ!”—1 Chroniques 16:36.

7. ˈLibhï ˈkwädlɩ ˈtɛɲɩ ˈwʋ ˗n ˈkä Lagɔ bhibhe

ˈTɛɲɩ ˗mɛmɛɛ ˈmö, ˗aˈa libhoo ˗kaɲɩ teɲii ˈwlu ˈmänanɩ, yɩ gbä ˈn ˗a dlʋä bhibhebhibhiu ˈwʋ. Zezwii a dɔˈwʋ, sɛɛ bhibhebhibhiu kä ɔ teɲii dɛsɛ ˈnɩ? Zɛlɩ Matie 14:23 ˈn Maakö 1:35 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

Sɛɛ Zezwii zʋ a˗a bhä ˈn ɔ ghlɩ a˗a bhä ˈtɛɲɩ, ˈn ɔ bhibhe a˗a ɔ ˈnɩ?
ˈTɛɲɩ ˗mɛ ˈmö ˗n bhɛnɩ ɔ ˗n ˈkä bhibhe ˈnɩ?

NƖKPA ˗MUMUË LƐ NƖƖ: “Nɩkpɛ ˈnɩ ˗pʋnɩ bhibhebhibhiuu ˈyukwli zaa, ˈtɛɲɩ a ˈlɩbhälɩbhʋä”

Sɛ ˗n yili ɔ ˗naa ˈwʋ ˈnɩ?

DƐSƐKÄKÏBHÏ

Bhibhebhibhiuu kä ˈŋlɩ ˈn ˗a ˈdionɩɛ Zoova yɔwʋ, ˈn ˗aˈa dilaa zɛmö ˗wʋä ˗pälɛpälɛ, ˈn ˗a ghlɩɛ ˈmötɛɛnɔ ˗a ˈkä ˈsaa ɔ yɩbhää nʋ, ˗a ˈkɔa dlɩ yɔwʋ nɛnɩ.