ˈCƖƐCƖƐKÏBHË 11
Sɛɛ ˗n ˈkää Biblë a ˈmözɛlɩzɛlɛ ˗li a ˗lii ˈmö ghlɩnɩ
˗N yɩbhä a˗a ˗kamä ˗n ˈkä ˗lu ˈkɔdʋ nʋ. Maa ˗n ˈkʋ nʋ a dɔˈwʋ, yɩ ˈtɛɛnɩmö ˗kamä teɲii kɛˈmö. ˗Sɩbhä a ˗lii ˗kamö ɔ tɛkäsɛ ghlɩ ˗a? ˗N ˈkʋ bhɛnɩ a dɔˈwʋ, ˈmö ˗n dlinuä. Zaa, sɛɛ ˗n zʋä ˈn ˗n ˈyuää ˈmö dlinɩ, ˗n ˈkʋ bhɛnɩ a za, sɛ ˗bhlʋ ˗kpɔ ˈla ˗sɩbhä Biblë a ˈmözɛlɩzɛlɛ ˗wʋä. ˗N kä ˗n ˈkä ˗naɲɩ nimï ˈyɩbhä nɩɩ: ‘Dɛ n ˈkä ɔ tɛɛnɩ ˈnɩ?’ ˗Mä ˈcɩɛcɩɛkïbhëa ˈlɛ ˈmö, ˗lii ˗yɩ ˗kamöä kwänɩ nzɩ Biblë a ˈmözɛlɩzɛlɛ ˗ɲɛ ɛ ˈcɩɛcɩʋ ˈsɔ ˗kamö ˈmäna ˈwʋ ˗bhö, mö ˗a ˈkää ˈylɩmö.
1. ˗Yɩ kä ɔ ˈŋlɩ ˈn ˗a kä ɔ ˗a ˈkä Biblë ˈmö zɛlɩ ˈyize ˈnɩ?
Nɩkpɛ a ˗mɔ zɛlɩɛ ˈkwädlɩ Biblë ˈmö, ɛ ˗käˈɛ ˗ɔ zɛlɩɛ ˈkwädlɩ “Zoova ˈa ˗lɔ ˈmö,” ɔ yi ˈkwädlɩ ˈmäna ˈmö ˗wʋ ˈn ˈsaa ˈwuë ɔ nʋä yi nɛnɩmanɩ ˈyize. (Zɛlɩ Psaume 1:1-3 ˈmö.) ˗N ˈkä tɛɛ a dɔˈwʋ, ˈlibhï zila ˈwuë ˈmö minitie ˈwʋ, ˗n ˈkä ˈmö zɛlɩ. ˗N ˗kä ˗sɩbhä ˈzʋ ˈyize, ˗n yi Lagɔ ˈa wɛlɩɩ sasɛ yɩbhlɩnɩ ˈn Biblë a ˈmözɛlɩzɛlɛ ˗yimö teɲii ˈmäna ˈwʋ ˗bhömanɩ.
2. ˈSaa ˗kaɲɩ ɔ kwänɩ ˗a ˈkä Biblë a ˈmözɛlɩzɛlɛ ˗li a ˗lii ˈmö ghlɩnɩ ˈnɩ?
˗A ˈkä sasɛ Biblë a ˈmözɛlɩzɛlɛ ˗li a ˗lii ˈmö ghlɩnɩ a dɔˈwʋ, ˗a ˗kä ˈmö zɛlɩɩ, ˗a nɩ ˈlɩbhänɩ ˈmö ˈtikïyie ˈwʋ nzɩ ˗a ˈkä ˈsaa ˗a zɛlɩɛ ˈmö dlɩ kɛ ˈpänɩ. Zaa, ˗a ˗kä ˈmö zɛlɩɩ, ˗a kä ˗a “ˈkä ˈsaa ˗a zɛlɩɛ ˈmö dlɩ kɛ ˈpänɩ.” (Josué 1:8, kpʋ zɛmö a kïbhëa) ˗N ˗kä ˈmö zɛlɩɩ, ˈyɩbhänɩ ˗naɲɩ kïbhï ˈlɛ ˈwʋ: ‘ˈSaa n zɛlɩɛ ˈmö, ˈsaa yɩ ˈcɩa ɔ ˗aa Lagɔ Zoova a dɛ ˈnɩ? ˗Mä ˈna zɩkpaa ˈmö, sɛ n ˈki ɔ ˗gänɩ ˈnɩ? Sɛ n ˈkä ɔ Biblë a gbɛlɩ ˈlɛ ˈmö ghlɛnɩ nzɩ n ˈkä ˗mumuë kwänɩ ˈnɩ?’
3. Sɛ ˗n ˈkä ɔ ˈzʋ ˗n ˈkä ˈtɛɲɩ ghlɩ nzɩ ˗n ˈkä Biblë ˈmö zɛlɩ ˈnɩ?
˗N ˈkä ˈtɛɲɩ ghlɩ nzɩ ˗n ˈkä Biblë ˈmö zɛlɩ a dɔˈwʋ kɛˈmö yɩ ˈtɛɛnɩmö bhä ˗a? ˗Sɩbhä yɩ ˈtɛɛnɩmöˈɛ ˗aa glaˈmö a ˗nʋa ˗mumuë a ˗bɛ kɛˈmö. ˈTɛmanɩ ˈyli yɔwʋ, ‘ˈtɛɲɩɩ ˈwuë Lagɔ ɲɩamöä tɛ ˈyi ˈtatinɩ ɛ nɩ tɩ ˈfʋ ˈplɩ.’ (Ɛfɛɛzɩ a ˗nʋa 5:16) ˗N ˈkä ˗sɩbhä ˈzʋ a dɔˈwʋ, ˗sɛ ˗lɛ ˈtɛɲɩ ˗n ˈkää ˈwʋ ˈlibhï nzɩ ˗n ˈkä Biblë ˈmö zɛlɩ zila ˈwuë ˈmö. ˗Mumuë, ˈzɔkpɔ ˈpii ˈmö wa sɔɔ ˈwʋ, ˈn wa zɛlɩɛ Biblë ˈmö. ˗Mumuë wabhlɩ, wa ˗kä ˈylɩkäsɛ li dɔˈwʋ ˗wʋ ˈn wa zɛlɩɛ ˈmö. ˗Mumuëˈɛ, wa ˗kä ˗kidosɛ sɛpöä möä yi ˈn wa zɛlɩɛ ˈmö. ˗Nmö ˈnaa, ˈtɛɲɩ ˗mɛ ˈmö ˗n zɛlɩ ɔ ˈmö ˈnɩ?
ˈCƖƐ ˗LII ˗MIMII
Sɛɛ ˗n ˈkää ˈzʋ ˗naˈa Biblë a ˈmözɛlɩzɛlɛ ˈkä teɲii ˈmäna ˈwʋ ˗bhö, tɛlɩ ˗sɩbhä sɛ. Sɛɛ ˗n ˈkää ˈzʋ ˗n ˈkä Biblë a ˈcɩɛcɩʋ ˗li a ˗lii ˈmö ghlɩnɩ, ˈyɩ ˗sɩbhä ˈylɩmö.
Sɛɛ lili a kii ˗mimii bhɛnɩɛ yɩ ˗kaɲɩ dlɩ yɔwʋ nɛnɩmanɩɩ, ˗sɩbhä Biblë a ˈmözɛlɩzɛlɛ bhɛnɩˈɛ ɛ ˗kaɲɩ dlɩ yɔwʋ nɛnɩmanɩ.
4. ˈCɩɛ sɛ ˗n ˈkää ˈzʋ Biblë a ˈmözɛlɩzɛlɛ ˗kamö ˈmäna ˈwʋ ˗bhö
Nɩkpɛ ˈkä Biblë a ˈmözɛlɩzɛlɛ tɛɛ a dɔˈwʋ, yɩ bhɛnɩ ˗kamä yɩ ˈkɔ kɛ ˈmö ˈtɛɛ. ˗Maa, nɩkpɛ a ˗mɔ ˈnɩɛ ˗bhlɛ tɛkäsɛ lile a ke ˗mämaa lii, ˈn ɔ yɩbhäˈɛ ɔ ˈka lii, ˗sɩbhä Biblë a ˈmözɛlɩzɛlɛ ˗wʋä. Ɛ bhɛnɩ ɛ ˗kaɲɩ ˈmäna ˈwʋ ˗bhömanɩ. Zɛlɩ 1 Piɛlɩ 2:2 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
˗N pä ɔ dlɩ nɩɩ, ˗n ˗kä zila ˈwuë ˈmö Biblë ˈmö zɛlɩ, ɛ ˈmözɛlɩzɛlɛ ˗yimö teɲii ˈmäna ˈwʋ ˗bhömanɩ ˗a?
ˈZʋ ˗lɛ VIDEO, nzɩ sɛɛ nɩkpa ˗mumuë ˈzʋä ˈn Biblë a ˈmözɛlɩzɛlɛ yuëë dlɩ yɔwʋ nɛnɩmanɩ, ˗n ˈki ˈylɩmö. ˈN a nɩ yɩlɩ nimïyɩbhäkïbhï ˈlɛ yɔwʋ.
-
˗Mä video ˈlɛ ˈmö, ˗lii a ˗mi ˗dɩgbö ˈplɩ ɔ ˈwlu ˈnɩ?
-
ˈSaa kwänʋä bhä ˈn wa zɛlɩ ɔ ˈkwädlɩ Biblë ˈmö ˈyize ˈnɩ?
-
Sɛ wa ˈzʋ ɔ ˈn Biblë a ˈmözɛlɩzɛlɛ yuä ɔ teɲii ˈmäna ˈwʋ bhömanɩ ˈnɩ?
˗N ˈkä Biblë a ˈmözɛlɩzɛlɛ tɛɛ a ˈdɩmözʋwɛlɩɩ:
-
Biblë a ˗mɛ kää gbëaa ˈmö, wa bhɛnɩɛ wa ˈkä ˗pa ˈmö ˈnʋ, mö ˗n nɩ ˗sɛ ˗lɛ. ˗N bhɛnɩ ˗n ˈkä Biblë wa laa Traduction du monde nouveau ˗lɛ ˗sɛ, ɛ ˗kä ˗naˈa gbʋ ˈmö cɛlɩnɩ.
-
˗N ˗kä ˈmö zɛlɩɛ yii, Biblë a pɩɔ ˗wʋ ˗bhömöä ˈmäna ˈwʋ mö ˗n nɩ tɛɛnɩ ˈwʋ. Yɩlɩ dɛɛ wa ˈzʋä “Tɛɛ Biblë a ˈmözɛlɩzɛlɛ”
-
ˈSaa ˗n zɛlɩɛ ˈmö, ˗n tia ˈwʋ dlʋ a za, ˈceli. ˗Mä ˈbɔgʋ ˈlɛ ˈmö a dɛɛ wa ˈzʋä “ˈZʋ yɩbhlɩnɩdɛ dɛɛ ˗n ˈbhlenɩɛ” yɩlɩ ˗lɛ.
-
˗N bhɛnɩ ˗n ˈkä aplikasɩɔ wa laa JW Library®ˈmö ghlɛnɩ. ˗N bhɛnɩ ˗n ˈkɛ ˈmö ghlɛnɩ ˗mä ˗naˈa ˗ŋöŋöyukwli ˈmö, nzɩ ˗n ˈkä Biblë ˈmö zɛlɩ, ˗n ˈkɛ ˈyukwli ˗pʋnɩ, dɛɛ ˗n yi ˗wʋ aˈbhë ˗kë.
-
Ghlɛnɩ wa laa annexes ˈmö, ˗mä Traduction du monde nouveau ˈmö. ˈKatɩ ˗ɲɛ desɛ ˈsɔ, ˈn wa laa lexique, yɩ ˗wʋˈɛ ˗mä. Yɩ yi gbä ˗naˈa Biblë a ˈmözɛlɩzɛlɛ yi teɲii ˈmäna ˈwʋ ˗bhö.
5. ˗N ˗kä Biblë ˈcɩɛɛ yi gïganɩ ˗naɲɩ ˈwlu
Zɛlɩ Psaume 119:34 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
˗A ˗kä Biblë ˈmö zɛlɩɛ yi ˈn ˗a ˗käˈɛ Biblë ˈcɩɛɛ yii, ˗yɩ kä ɔ ˈŋlɩ ˈn ˗a kä ɔ ˗a ˈkä Lagɔ bhibhe ˈnɩ?
ˈBɔgʋ ˈlɛ a ˈcɩɛcɩɛkïbhï, sɛ ˗n ˈkɩ ɔ ˗li a ˗lii ˈmö ghlɩnɩ ˈnɩ? ˗N ˗kä ˗naɲɩ ˈwlu gïganɩ dɔˈwʋ ˗wʋ a sɛɛ ˗n bhɛnɩɛ ˗n ˈkä ˈzʋ, ˗sɩbhä ma˗a dɛˈɛ:
-
(1) Zɛmösɛkïbhï a tɛkänɩɩ, zeli ˈmö.
-
(2) Zɛlɩ Biblë a gbɛlɩɩ ˈmö, ˈn sɛɛ yɩ ˗ɲɛ zɛmösɛkïbhï ˈsɔ mönɩɛ yɔwʋ, tɛlɩ ˗sɩbhä sɛ.
-
(3) Tli nimïyɩbhäkïbhï a zɛmösɛna ˗pʋ zɛmö. A ˗kä ˈcɩɛɛ ˗yii, mii ˗kamöä kwänɩ.
˗N ˗yi a˗a bhä sɛ ˗a?
Zoova ˈa Bhlɩnɩwaa, wa ˗bhɛ Biblïa a ˗bɛ. ˗Maa ˗mɛ wa laa La Bible. Traduction du monde nouveau mɛɛ nɛnɩɲɩɛ teɲii dlɩ yɔwʋ. Ɛˈɛ ˗bhö ɲɩasɛ, ˗maa gbëaa ɛ kää ˈmö, ˈɛ ˈnuoo ˈmö ˈtɩɩ, ˈn ɛ kä Lagɔ ˈa ŋlɩɩ ˈmö.—Yɩlɩ ˗mä ɛtɛnɛtɩ ˈklʋ a ˈcɩɛcɩɛkïbhëa ˈlɛ ˈmö “Zoova ˈa Bhlɩnɩwaa ˈa Biblë ˗wʋ bhä ˈɛ dɛ ˗a?”
NƖKPA ˗MUMUË LƐ NƖƖ: “Biblë a ˈcɩɛcɩʋ ˈmö wʋ ˈtɛɛ teɲii. Nˈn˗ä ˗miˈla a ˈtɛɲɩ ˗kä.”
-
Sɛɛ ˗n yili ɔ ˗naa ˈwʋ ˈnɩ?
DƐSƐKÄKÏBHÏ
˗N ˈkä Biblë a ˈmözɛlɩzɛlɛ ˗li a ˗lii ˈmö ghlɩnɩ a dɔˈwʋ, ˗dɩ ˈtɛɲɩ ˗ɛɲɩ ˈmö ˗n ˈkää ˈmö zɛlɩ, bhibhe Lagɔ nzɩ ˗n ˈkä ˈsaa ˗n zɛlɩɛ ˈmö ˈmö ˈnʋ, ˈn gïganɩ sasɛ ˗naɲɩ ˈwlu ˈwë a ˈkä ˈcɩɛ.
ˈWʋligbanɩkïbhï
-
Sɛɛ ˗n ˈkä ɔ ˈzʋ nzɩ ˗n ˈkä ˗naˈa Biblë a ˈmözɛlɩzɛlɛ ˗li a ˗lii ˈmö ghlɩnɩ ˈnɩ?
-
ˈTɛɲɩ ˗mɛ ˈmö ˗n ˈkä ɔ Biblë ˈmö zɛlɩ ˈn ˗n ˈkɛ ˈcɩɛ ˈnɩ?
-
˗Yɩ kä ɔ ˈŋlɩ ˈn ˗n kä ɔ ˗n ˈkä ˗naɲɩ ˈwlu gïganɩ ˈwë, nzɩ a ˈkä bhäla ˈcɩɛ ˈnɩ?
YILII YƆWƲ
˗Lii ˗yɩ ˗kamöä kwänɩ ˗n ˈkä Biblë a ˈmözɛlɩzɛlɛ ˗li a ˗lii ˈmö ghlɩnɩ, ˈyi ˈylɩmö.
« Une lecture qui vous apportera beaucoup » (La Tour de Garde no 1 2017)
˗N bhɛnɩ ˗n ˈkä ˗lii a ˈki ta ˈmö ghlɛnɩ ˗n ˈkä Biblë ˈmö zɛlɩ.
Sɛɛ Bible a ˈmözɛlɩzɛlɛ ˗kamöä ˈmäna ˈwʋ bhömanɩ.
Nɩkpaa ˗wa zɛlɩɛ ˈkwädlɩ Biblë ˈmö ˈylʋbö a ˗bɛ ˈmö, wa ˗yimö ˈdɩmözʋwɛlɩɩ ˈɲɛ.
