ˈCƖƐCƖƐKÏBHË 25
ˈSaa Lagɔ yɩbhä ɔ ˗aa dɔˈwʋ ˈnɩ?
Biblë lɛ nɩɩ nɩkpɛ a ‘zɩkpa ˈnɩɛ ˈmö ˈbhʋɔ ˈn yɔlɔylʋ a ˈyize a yie ˈwʋ.’ (Job 14:1) Saˈa ˗sɩbhä Lagɔ yɩbhä ɔ ˗aˈa zɩkpaa nɩ ˗wʋ ˗a? ˈSaa ɔ yɩbhä ɔ ˗aa dɔˈwʋ ˈnɩ? ˈSaa ɔ yɩbhää yi ɔ ˈyli ˈwlʋnɩ ˗a? Kïbhï ˈlɛ a dɔˈwʋ sɛɛ Biblë ˈtɛmanɩɲɩɛ dlɩ ˈwʋ, mö ˗a ˈkää ˈylɩmö.
1. Sɛɛ Zoova yɩbhä ɔ ˗aˈa zɩkpaa nɩ ˗wʋ ˈnɩ?
Zoova yɩbhä nɩɩ ˗aˈa zɩkpaa nɩ nɛnɩ teɲii. Dɛɛ ɔ ˈwälaa tɛkänɩkpa Adaa ˗ɲɛ Ɛɛvö ˈsɔ, ˈlagblɛ ˗bhlʋ wa laa Edɛɛnɩ a ˈlagblɛɛ ˈmö, ˗mä ɔ zuëë. ˈLagblɛ ˈla ˈylimö ˗ɛ nɛnɩ a˗a teɲii. ˈN “Lagɔ yuëë ˈɲu ˈpä, ɔ lɛ nɩɩ: ‘A nɩ gwälɩgwälɩnɩ, a ˈkä zumanɩ, a ˈkä dʋdʋkpäta ˈwuë ˈwʋ yie, a ˈka ˗gömö ˈkämanɩ.’” (Genèse 1:28) Zoova yɩbhä a˗a wa nɩ gwälɩ ˈyuë, wa nɩ ˈzʋa dʋdʋkpäta ˈbhlɩ a ˗bhlɩɩ ˈwʋ, ˈn wa nɩ ˈzʋnɩ nɩmä ˈyli. Zoova yɩbhä a˗a nɩɩ, nɩkpa ˈwuë nɩ nɛnɩ ˈmö ˈtɩɩ, ˈn wa nɩ ˗bhölɩ ˈkwädlɩkwädlɩnɩ.
Sɛɛ Zoova yɩbhä a˗a ˗lii nɩ ˗wʋ, yɩˈɩɛ zɩˈɛ ˗sɩbhä ˗wʋ. a Maa ˈsaa ɔ yɩbhä a˗a ˈnɩɛ ˗bhlɛ ˈmö zigbonɩ. (Isaïe 46:10, 11) Zoova yɩbhä nɩɩ nɩkpaa ˗wa zoo ˈklʋkpamö nɩ ˗bhölɩnɩ ˈkwädlɩkwädlɩnɩ ˈtɩɩglɩnɔ ˈmö.—Zɛlɩ ’Ylimötulanɩlii 21:3, 4 ˈmö.
2. Sɛɛ ˗a ˈkä ɔ ˈzʋ ˗aˈa zɩkpaa ˈkä zɩˈɛ ˈmäna ˈwʋ ˗bhö ˈnɩ?
Sɛɛ Zoova ˈwälaɲɩɛ a za, ˗a yɩbhä nɩɩ “mɔɔ nɩ ˗suɲɩ” ˗mä ˗aˈa zɩkpaa ˈmö. Nza ˗a ˈkɔ yɩbhlɩnɩ ˈn ˗a ˈkɔ bʋbɔ a ˈtʋ ˗wʋɲɩɛ dlɩ zɛmö. (Zɛlɩ Matie 5:3-6 ˈmö) Ɔ yɩbhä nɩɩ ˗a nɩ ˈzʋ ɔ bhɛya, “˗a nɩ ˗gänɩ ˈɔ ˈyioo, ˗a nɩ ˗wɔɔ” ˈn ˗a nɩ nʋ ˈɔ libhoo “˗aˈa dlɩɩ ˈwuë ˈmö.” (Deutéronome 10:12; Psaume 25:14) ˗A ˗kä ˗sɩbhä ˈzʋ, ˗a yi yɔlɔylʋ ˈmö ˗wʋ ˗kë, ˈmäna ˗yiɲɩ dlɩ zɛmö ˗wʋ ˈyize. Zaa, ˗a ˗kä Zoova bʋbɔɔ, yɩ yi ˈŋlɩ ˗kä, ˗aˈa zɩkpaa yi ˈmäna ˈwʋ ˗bhö. Ɛˈɛ ˗bhö ɲɩasɛ, maa sɛ ɔ yɩbhää ˗sɩbhä ˗a zʋä ˈklʋkpamö.
ˈCƖƐ ˗LII ˗MIMII
Sɛɛ Zoova ˈwälaa dʋdʋkpäta ˗wawʋ ˈmö ˗aa za, ˈn ˈsaa ˈɔ wɛlɩɩ ˈcɩaɲɩɛ ˈsaa ɔ yɩbhää ˗aa dɔˈwʋ, ˈyi ˈylɩmö.
3. Zoova yɩbhä nɩɩ ˗aˈa zɩkpaa nɩ ˗bhö ˈmäna ˈwʋ
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
-
˗Yɩ kä ɔ ˈŋlɩ ˈn Lagɔ yi ɔ dʋdʋkpäta ˗a nɛnɩɛ sɛˈɛ ˈylimö ˈwäla ˈnɩ?
Zɛlɩ Ecclésiaste 3:11 ˈmö, ˈn ˗a nɩ yɩlɩ nimïyɩbhäkïbhë ˈlɛ yɔwʋ:
-
ˈSaa wɛlɩ ˈlɛ ˈcɩamö ɔ Zoova a dɛ ˈnɩ?
4. ˈSaa Zoova yɩbhä a˗a ɔ ˈkä nʋ ˈnɩɛ ˈmö zigbonɩ
Zɛlɩ Psaume 37:11, 29 ˈn Isaïe 55:11 ˈmö, ˈn ˗a nɩ yɩlɩ nimïyɩbhäkïbhë ˈlɛ yɔwʋ:
-
Sɛɛ ˗a ˗yi ɔ sɛ nɩɩ ˈsaa Zoova yɩbhä a˗a ɔ ˈkä nʋ ˈnɩɛ ˈmö zigbonɩ ˈnɩ?
Wa ˈnɩ sasɛ ˗budu ˈyli ˈzʋnɩ ˈn wʋ ˗kä ɲimoo, wa bhɛnɩ wa ˈkʋ ˈwlu gïganɩ. Sɛɛ ˗bhlʋ ˗kpɔ ˈla, ˗sɩbhä Lagɔ ˈkää dʋdʋkpäta nɩkpaa ˈnɩɛ ˈyli ˈzʋnɩ ˈwlu gïganɩ nzɩ ɔ ˈka nɩkpa ˗wa kää ɔ ˗wawʋ dlɩ zɛmö ˈɲɛ.
5. Zoova a bʋbɔbʋbʋ kä ˈŋlɩ ˈn ˗aˈa zɩkpaa ˗bhöä ˈmäna ˈwʋ
Sɛɛ Lagɔ yɩbhää ˗aˈa zɩkpaa nɩ ˗wʋʋ, ˗a ˗kii ˗yii, yɩ bhɛnɩ yɩ ˗kaɲɩ ˈmäna dlɩ zɛmö ˈzʋ. ˈZʋ ˗lɛ VIDEO, ˈn ˗a nɩ yɩlɩ nimïyɩbhäkïbhë ˈlɛ yɔwʋ.
-
Sɛɛ Lagɔ yɩbhä a˗a ˗aˈa zɩkpa nɩ ˗wʋ, Telimii yɩbhlɩniɛ, sɛ yɩ kwänɔɔ bhä ˈnɩ?
Zɛlɩ Ecclésiaste 12:13 ˈmö, ˈn ˗a nɩ yɩlɩ nimïyɩbhäkïbhë ˈlɛ yɔwʋ:
-
˗Lii ˈwuë Zoova nʋä ˗aa za, sɛɛ ˗a ˈkä ɔ tula nɩɩ ˗a yɩbhlɩni ˈnɩ?
˗MƆMƆƆ ˗KAMÖ NIMÏ ˈYƖBHÄ NƖƖ: “˗Yɩ kä ɔ ˈŋlɩ ˈn ˗a ˗bhölɩ ɔ ˈnɩ?”
-
Sɛɛ ˗n ˈkä ɔ gbä nɩ?
DƐSƐKÄKÏBHÏ
Zoova yɩbhä nɩɩ ˗a nɩ ˗bhölɩnɩ ˈkwädlɩkwädlɩnɩ mäˈä dʋdʋ ˈwʋ ˈn ˗aˈa zɩkpaa nɩ ˗wʋ ˈtɩɩ. ˗A ˗kä Zoova bʋbɔɔ ˗aˈa dlɩ ˈwuë ˈmö, yɩ kä ˈŋlɩ ˈn ˗aˈa zɩkpaa ˗bhöä ˈmäna ˈwʋ.
ˈWʋligbanɩkïbhï
-
ˈSaa Zoova yɩbhä a˗a bhä Adaa ˗ɲɛ Ɛɛvö ˈsɔ a dɔˈwʋ ˈnɩ?
-
Sɛɛ ˗a ˗yi ɔ sɛ nɩɩ ˈsaa Lagɔ yɩbhä a˗a nɩkpa a dɔˈwʋ ˈnɩɛ ˈmö zigbonɩ ˈnɩ?
-
Sɛɛ ˗n ˈkä ɔ ˈzʋ ˗naˈa zɩkpaa ˈkä ˗tiamö ˈmäna ˈwʋ ˗bhö ˈnɩ?
YILII YƆWƲ
˗Lii ˗yɩ kää ˈŋlɩ ˈn ˗a kɩɛ dlɩ ˈwʋ nɩɩ Edɛɛnɩ a ˈlagblɛɛ ˗bhölɩ a˗a ˗tiamö, ˈyi ˈylɩmö.
« Le jardin d’Éden — Un mythe ? » (La Tour de Garde, 1er janvier 2011)
˗Yɩ kä ɔ ˈŋlɩ ˈn ˗a kɩ ɔ dlɩ ˈwʋ nɩɩ dʋdʋkpäta yi ˈkwädlɩ ˗bhölɩ ˈnɩ?
« La terre sera˗t˗elle détruite? » (Ɛtɛnɛtɩ ˈklʋ a ˈcɩɛcɩɛkïbhë)
ˈSaa kää ˈŋlɩ ˈn ˗a ˗bhölɩɛ a dɔˈwʋ sɛɛ Biblë gbää, ˈyi ˈylɩmö.
« Quel est le sens de la vie ? » (Ɛtɛnɛtɩ ˈklʋ a ˈcɩɛcɩɛkïbhë)
Nɩkpɛ ˗bhlʋ ˗ɔ pä a˗a dlɩ nɩɩ ɔ kä ˗lii ˈwuë, ˈn ɔ yiɛ ˈylɩmö nɩɩ ˗lu ˗bhlʋ ˗wʋ ˗lɛ ɔˈɔɔ ˗bhlɛ ghlɩ ˗mä ˈɔ zɩkpaa ˈmö.
a ˈCɩɛcɩɛkïbhëa ˗a ˗gä ˈyuku ˈmö, ˈsaa kää ˈŋlɩ ˈn ˗lii ˈnɩɛ zɩˈɛ sɛɛ Lagɔ yɩbhä a˗a ˗wʋʋ, mö ˗a ˈkää ˈylɩmö.
