ˈCƖƐCƖƐKÏBHË 17

Nɩkpɛ a ˗mɔ Zezwii glɩnɩ bhä ˈnɩ?

ˈZƲ -LƐ

ˈSaa Zezwii bhïla a˗a ˈn ˈsaa ɔ nʋ a˗a dɛɛ ɔ ˗wʋ a˗a mäˈä dʋdʋ ˈwʋ, ˗a ˗kii ˈmö zɛlɩ, ˈɔ ˗wʋwʋsaa a kii mö ˗a yɩbhlɩnɩɛ cuu. Yɩ kä ˈŋlɩ ˈn ˗a yɩbhää ˗a ˈkä ɔ bheyi zʋ, ˈn ˗a yɩbhäˈɛ ˗a ˈkä ɔ dɩba Zoova a bheyi ˈzʋ. ˗N ˗yi bhä ˈɔ ˗wʋwʋsaa a kii ˗mimii ˗a? ˗Mä ˗aˈa zɩkpaa ˈmö, sɛ ˗a bhɛnɩ bhä ˗a ˈkä Zezwii ˈa gbäpöö ˗gänɩ ˈnɩ?

1. Kii ˗mi ˈmö Zezwii ˈwlʋnɩ bhä ɔ dɩba sɛˈɛ ˈtɩɩ ˈnɩ?

Dɛɛ Zezwii ˗wʋ a˗a ˗mä zlɩ ˈmö, ɔ köbha a˗a ɔ dɩba ˈyli ˈylʋbö a miliyalie a ˗bɛ ˈmö. ˗Sɩbhä a za, ɔ ˈcɩɛ ˗lii a ˗bɛ. Sɛɛ ˈɔ dlɩpäsaa ˗wʋä, ˈɔ nʋnʋlii ˈn sɛɛ ˈɔ dlɩɩ ˗wʋä sɛˈɛ ˈtɩɩ, ˗sɩbhä Zezwii ˗wʋmöä. (Zɛlɩ Zaa 5:19 ˈmö.) Zezwii, ɔ dɩba ˈa ˗wʋwʋsaa a gbäpöö ˈmö ɔ ˗gänɩɛ sɛˈɛ ˈtɩɩ. Nza ɔ gbää nɩɩ: “˗Ɔ ˗kaa ˈylɩmöö, ɔ yɛ ˈgämö na dɩba Lagɔ ˈylɩmö.” (Zaa 14:9) Sɛɛ Zezwii ˗wʋwʋnɩɛ ˈmö, ˗n ˗kii ˈcɩɛ, ˗n yi sasɛ Zoova yɩbhlɩnɩ. Yɩɛ, Zezwii ˗kä nɩkpa ˗wa ˗wʋ a˗a yɔlɔylʋ ˈmö ˈylɩmö, ŋäzɩ ˈwʋ wa ˗bhɔ a˗a. Zaa, ˗a ˗käˈɛ abhlɩ yɔlɔylʋ ˈmö ˗wʋʋ, ˈsaa yɩ nʋä Zoova ˈwluu, ˈmö yɩ tulanɩɲɩɛ ˈylimö.

2. Sɛɛ Zezwii tula bhä nɩɩ ɔ ˗wa a˗a Zoova ˈnɩ?

Zezwii lɛ nɩɩ: “ˈBhlɩbhëa ˈwuë ˈkä sɛ yɩbhlɩmanɩ nɩɩ, n ˗wa na dɩba Lagɔ nza sɛ ˈɔ ɲɩaaa ˈdɩɩ, ˈn n ˈzʋä ˗sɩbhä.” (Zaa 14:31) Zezwii ˗wʋ a˗a mäˈä dʋdʋ ˈwʋ, ɔ tulanɩ a˗a nɩkpa ˈylimö sɛ ɔ ˗wa teɲii ɔ dɩba. Ɔ zo a˗a ˈkwädlɩ ˈklʋkpamö sɛ ˗lii yi ˈmö ˗wʋ aˈbhë ˗kë. Sɛ ɔ ˗waˈɛ ɔ dɩba a za, nza ɔ ɲɛ a˗a ɔ dɩba ˈa wɛlɩɩ nɩkpa ˈyize, ˈn ɔ kwänuë wa ˈkä ɔ bhɛya ˈzʋ.—Zaa 14:23.

3. Sɛɛ Zezwii tula ɔ nɩɩ ɔ ˗wa nɩkpa ˈnɩ?

Biblë lɛ nɩɩ, Zezwii ˈa “dlɩɩ ˗glɛ a˗a teɲii nɩkpaa ˈwʋ.” (Proverbes 8:31 kpʋ zɛmö a kïbhëa.) ˗Wawʋ mʋʋ ˈsunɔ a˗a ˗mä ˈn ɔ pää nɩkpa swɩ ɲɛmʋ ˈmö ˈn ɔ kwänuë, ˈn ɔˈɔɔ a˗a ˈyɩbhä wa ˈkɔ yɩ ˈylimö a ˗lu ˈɲɛ. Zɩzɛli ɔ nʋ a˗a tula abhlɩ sɛɛ ɔ ˈtɛɛ ˈmö, ˗maa ˈɔ ŋäzɩdlɩɩ ˈmö yɩ tulaa teɲii aˈbhë. (Maakö 1:40-42) Dlɩ zɛmö ɔ nɛnɩ a˗a teɲii ˗mä nɩkpa ˈwuë ˗gömö, ɔˈɔɔ a˗a nɩkpa ˈmö gbäzɩ. Nɩkpa ˗wa yɔnɩ a˗a dlɩ ˈwʋ, ˗wa ˗pʋnɔ a˗a ˈyukwli, ɔ pʋa swɩ ɲɛmʋ ˈmö ˈn ɔ ˈtɛmanuë a˗a dlɩ ˈwʋ. Sɛɛ ɔ ˗wa nɩkpa ˈwuë a za, nza ɔ ŋluä ˈwʋ ˈn ɔ yiɛ ˈklɩ ˈyɩ ˈn ɔ yiɛ wa ˈwlumö ˈku. ˗Maa ˈsaa ɔ ˈcɩa a˗a, nɩkpa ˗wa zwiɛ ˈklʋkpamö, ˈmö ɔ ˗wa a˗a teɲii aˈbhë.—Zɛlɩ Zaa 15:13, 14 ˈmö.

ˈCƖƐ ˗LII ˗MIMII

˗A nɩ yɩlɩ Zezwii ˈa ˗wʋwʋsaa a kii yɔwʋ, ˈn sɛɛ ˗a bhɛnɩɛ ˗a ˈkä ˈɔ ˗wawʋ ˗ɲɛ ˈɔ dlɩzɛmönanɔɔ ˈsɔ a gbäpöö ˗gänɩ, ˗a ˈki ˈylɩmö.

4. Zezwii ˗wa teɲii ɔ dɩba

Sɛɛ Zezwii tula nɩɩ ɔ ˗wa Lagɔ, yɩ sʋlʋnɩɲɩ sɛɛ ˗a ˈkää ˈɔ gbäpöö ˗gänɩ. Zɛlɩ Lwiikö 6:12 ˈn Zaa 15:10; 17:26 ˈmö. A ˗kä Biblë a gbɛlɩ ˈlɛ ˈmö zɛlɩ ˈwë, a nɩ yɩlɩ nimïyɩbhäkïbhë ˈlɛ yɔwʋ:

Zezwii a saa, sɛɛ ˗a bhɛnɩ ɔ ˗a ˈkä tula nɩɩ ˗a ˗wa Zoova ˈnɩ?

Zezwii ˗wa a˗a ɔ dɩba ˗ɔ ˗wʋä ˗mä zlɩ ˈmö ˈn ɔ bhibheo a˗a ˈyize

5. Nɩkpa a gbʋ plɛnɩ a˗a teɲii Zezwii

Zezwii ˈnɩɛ a˗a ɔɲɩ a ˈyize a dlɩ ˈpä. Maa sɛ ɔ ˈkää nɩkpa kwänɩ ˈmö ɔ ˈpïlanɩ a˗a ˈyuku. Ɔ yi yɔlɔ aˈbhë ˗kë, ɔ libhï ˈɔ ˈtɛɲɩ ˗ɲɛ ˈɔ ˈmötɛɛnɔɔ ˈsɔ ˈwʋ ˈn ɔ kwänʋa. Zɛlɩ Maakö 6:30-44 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

Sɛɛ Zezwii tula ɔ nɩɩ nɩkpa a gbʋ plɛnɔ ˈnɩ?—Yɩlɩ ˗mä gbɛlɩ 31, 34, 41 ˈn 42 ˈmö.
ˈSaa ˈsunɩ a˗a bhä ˗mä Zezwii ˈn ɔ kwänɩ bhä nɩkpa ˈnɩ? —Yɩlɩ ˗mä gbɛlʋ 34 ˈmö.
Sɛɛ Zoova ˗wʋä sɛˈɛ ˈtɩɩ, ˗sɩbhä Zezwii ˗wʋä. Zaa, ˈsaa yɩ ˈcɩamö bhä Zoova a dɛ ˈnɩ?
Zezwii a saa, sɛɛ ˗a bhɛnɩ bhä ˗a ˈkä tula nɩɩ, nɩkpa a gbʋ plɛnɩɲɩ ˈnɩ?

6. Zezwii dlɩ zɛmö ɔ nɛnɩɛ a˗a

Zezwii ˈnɩɛ a˗a ˗lii a ˗bɛ ˗kä, maa ɔ nɛnɩ a˗a dlɩ zɛmö. ˗Sɩbhä ɔ yɩbhää ˗a nɩ zʋmö. Zɛlɩ Nʋnʋlii 20:35 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

Sɛɛ Zezwii gbää a dɔˈwʋ, ˈsaa zʋ ɔ teɲii ˈmäna dlɩ zɛmö ˈnɩ?

ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.

VIDEO: “N ˗kä nɩkpɛ ˗lu ˈɲɛɛ, yɩ ˗yimö teɲii ˈmäna ˈwʋ ˗bhö”: ˈPɩɔ (4:00)

˗A ˈnɩ aˈbhë ˗lii a ˗bɛ ˗kä, sɛɛ ˗a bhɛnɩ bhä ˗a ˈkä ˗mumuë ˈɲɛ ˈnɩ?

˗N ˗yi a˗a bhä sɛ ˗a?

Biblë ˈcɩaɲɩ nɩɩ ˗a nɩ bhibhe Zoova, Zezwii ˈa ŋlɩɩ ˈmö. (Zɛlɩ Zaa 16:23, 24 ˈmö.) ˗A ˗kä ˗sɩbhä bhibhe, ˗a nɩ yɩbhlɩnɩ sɛ nɩɩ ˈsaa Zezwii nʋä mɩɩ kää ˈŋlɩ nza ˗a bhɛnɩɛ ˗a ˈkä zɩˈɛ Zoova a bhɛya ˈzʋ.

NƖKPA ˗MUMUË LƐ NƖƖ: “˗A yi yɔlɔylʋ ˈmö ˗wʋ aˈbhë ˗kë, Lagɔ a gbʋ ˗nɩɛ ˗mä ˗wʋ.”