ˈCƖƐCƖƐKÏBHË 34

Sɛɛ ˗a ˈkä ɔ tula nɩɩ ˗a ˗wa Zoova ˈnɩ?

ˈZƲ -LƐ

Sɛɛ ˗n ˈmaa ˈkäa Biblë a ˈcɩɛcɩʋ tɛɛ, Lagɔ a ˗wawʋ ˗kamö ɔ teɲii dlɩ zɛmö zumanɩ ˗a? Sɛɛ ˗n ˈkää ˈzʋ nzɩ ˗n ˗ɲɔɔ ˈsɔ a bheyi ˈkä teɲii ˈmö ˈtumanɩ, ˗n yɩbhä ɔ ˗n ˈkɩ nʋ ˈyize ˗a? Tɩ dlʋ nɩɩ Zoova a ˗wawʋ ˗n kää teɲii dlɩ zɛmö, sɛ wʋ zumanɩɛ ˈyize, ɔ ˗kɩɩ ˈylɩmö, ɔ ˗yimöˈɛ ɔbhlɩ teɲii ˗waa, ˈn ɔ ˗yimö ˈyli ˈzʋnɩ. Zaa, sɛɛ ˗n ˈkɔ ɔ ˈylimö tulanɩ nɩɩ ˗n ˗wɔɔ ˈnɩ?

1. Sɛɛ ˗a bhɛnɩ ɔ ˗a ˈkä Zoova ˈylimö tulanɩ nɩɩ ˗a ˗wɔɔ ˈnɩ?

˗A ˗kä Zoova ˈa wɛlɩɩ ˈklʋkpamö zʋ, ˈylimö ˗a tulanɔɔ nɩɩ ˗a ˗wɔɔ. (Zɛlɩ 1 Zaa 5:3 ˈmö.) Ɔˈɔɔ nɩkpɛ ˈwlumö köbhänɩ ɔ ˈkɔ ˈklʋkpamö ˈzʋ. Ɔ yɩbhä nɩɩ ˗aɲɩgäsɛ, ˗a nɩ ˗sɛ ˗lɛ bhʋlʋbhlʋ ˈsaa ˗a yɩbhää. ˗Yɩ kä ɔ ˈŋlɩ ˈnɩ? ˗Yɩ kää ˈŋlɩ mɩɛ nɩɩ Zoova yɩbhä ˗a nɩ ‘˗sɛ ˗lɛ ɔ ˈklʋkpamözʋzwɛ ˗aˈa dila ˈwuë ˈmö.’ (Ghlɔɔmö a ˗nʋa 6:17) Mii sɛɛ zɛmö nɩɩ, Zoova yɩbhä ˗a nɩ ˈzo ˈklʋkpamö, sɛɛ ˗a kä ɔ ˗wawʋ dlɩ zɛmö a za, ˗maa ɛ nɩ tɩ ˈwlumököbhänɩsɛ glɩnɩ. ˈBɔgʋ ˈlɛ a ˈpɩɔ 3 ˗ɲɛ ˈpɩɔ 4 ˈsɔ, yɩ ˗yiɲɩ kwänɩ ˗a ˈkä ˈsaa Zoova ˗waa nʋ ˈn ˗a ˈkä ˈsaa ɔˈɔɔ ˗waa gwë ˈdionɩ.

2. ˗Yɩ kä ɔ ˈŋlɩ ˗a ˈkä Zoova ˗aˈa ˗wawʋ ˈylimö tulanɩ bhɛnɩ ɔ yɩ ˈkä ˈmö ˈtɛɛ ˈnɩ?

“˗Ɔ nʋä ˈsaa nɛnɩɛ Lagɔ yɔwʋ, ˗lizoku ˗yɩ ghïloo, yɩˈɩɛ muënɩ.” (Psaume 34:19) ˗Aˈa ˈɲiɲlolii a ˗gwälɩnɩɛ ˈmö yɔlɔaɲɩɛ, moni a gbʋ ˈtɛɛ ˈmö, wa nʋɲɩ ˗ɔɔˈmözlɔnɩlii ˈwlu, ˈn ˗lii ˗mimii ˈtɛɛnɩɲɩˈɛ kɛˈmö. ˗Sɩbhä a ˗li ˈla ˈwuë a za, ˗a ˈkä ˈsaa Zoova yɩbhää nʋ ˈtɛɛ teɲii ˈmö. Maa ˗a ˗kä ˈyli yɔwʋ ˈtɛmanɩ ˈn ˗a ˗kä Zoova ˈa wɛlɩɩ ˈklʋkpamö ˈzʋ, ˈylimö ˗a tulanɔɔ nɩɩ ɔ ˗wawʋ ˗a kää dlɩ zɛmö, wʋ ˗zu teɲii wʋ ˈkä ˗lii ˈwuë ˈwʋ zi. ˈN ˗a tulaˈɛ nɩɩ ˗a yɩbhä ˗a ˈkɔ ˈkwädlɩ ˗gänɩ ˈyize. ˗A ˗kä ˗sɩbhä ˈzʋ, Zoova ˗yiɲɩˈɛ ɔbhlɩ ˈkwädlɩ ˗waa. ˈN ɔ ˈnaa ˗kaɲɩ ˗zɩ ˈwʋ ylɛ.—Zɛlɩ Psaume 4:3 ˈmö.

ˈCƖƐ ˗LII ˗MIMII

˗Yɩ kää ˈŋlɩ Zoova a ˈklʋkpamözʋzwɛ kää dɛsɛ ˈn ˈsaa ˗kaɲɩɛ kwänɩ ˗a ˈkɔ ˗gänɩ ˈyize, ˗a nɩ ˈyi ˈylɩmö.

3. Nɩkpa ˈwuë ˈmö Sataa ˈsunɩɛ gbʋ

˗Mä Biblë ˈmö, Zɔɔbö a ˈbɔgʋʋ ɲɩaɲɩ ˈdɩ nɩɩ Sataa ˈsunɩ a˗a Zɔɔbö gbʋ. ˗Maa Zɔɔbö a ˈyize ˈmö ɔ ˈnɩɛ gbʋ ˈsunɩ, nɩkpa ˈwuë ˗wa yɩbhää wa ˈkä Zoova bʋbɔɔ, ˈmö ɔ ˈsunɩmöˈɛ gbʋ. Zɛlɩ Job 1:1, 6–2:10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

Sataa a dɔˈwʋ, ˗yɩ kä ɔ ˈŋlɩ ˈn Zɔɔbö zʋ ɔ Zoova ˈklʋkpamö ˈnɩ?—Yɩlɩ ˗mä Job 1:9-11 ˈmö.
˗Abhʋa nɩkpa ˈwuë, sɛɛ Sataa ˈsunɩɲɩ ɔ gbʋ ˈnɩ? —Yɩlɩ ˗mä Job 2:4 ˈmö.

Zɛlɩ Job 27:5b ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

Sɛɛ Zɔɔbö tula ɔ nɩɩ ɔ ˗wa ˗tiamö Zoova ˈnɩ?

Sɛɛ Zɔɔbö ˈnɩɛ Zoova ˈbɩwʋ ˈbhöö ˈlɩlɩlɩ, mii tulaa nɩɩ ɔ ˗wa ˗tiamö Zoova.

˗A ˗kä ˈkwädlɩ Zoova ˗gänɩ, ˗a tula nɩɩ ˗a ˗wɔɔ.

4. ˈZʋ Zoova ˈmäna dlɩ zɛmö

Zɛlɩ Proverbes 27:11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

˗A ˗kä ˈnɛɛnɩlii nʋ ˈn ˗a ˗kä Zoova ˈklʋkpamo ˈzʋʋ, ˈsaa yɩ nɔ bhä ˈwlu ˈnɩ? ˗Yɩ kä ɔ ˈŋlɩ ˈnɩ?

5. ˗N bhɛnɩ ˗n ˈkä ˈkwädlɩ Zoova ˗gänɩ

Zoova a ˗wawʋ muu ˈsunɩɲɩɛ ˗mä ˈn ˗a ɲɛɛ ˈɔ wɛlɩɩ nɩkpa. Sɛɛ ˗a yɩbhää ˗a ˈkɔ ˈkwädlɩ ˗gänɩ a za, sɛ yɩ yi ˈmö ˗wʋ ˗kë, ˗a yɩbhä ˗a ˈkä ˈkwädlɩ ˈɔ libhoo nʋ ˈyize. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.

VIDEO: Wa ˗yimö ˗gblɩ aˈbhë ˗kë, gwɩ ˗naˈa dlɩˈwʋkänɔɔ ˈwʋ (5:09)

ˈTɛɲɩ ˗mɛmɛɛ ˈmö, ˗n ˈkä Zoova ˈa wɛlɩɩ nɩkpa ˈɲɛ ˈtɛɛnɩmö ɔ kɛˈmö ˗a?
˗Mä video ˈlɛ ˈmö, ˈsaa kwänɩ ɔ Glayɩsɔnɩ ˈn ɔ yi bhä ˈɔ ŋanɔɔ ˈwlu ˈplɩ ˈnɩ?

ˈSaa Zoova ˗waa, ˗a ˗kii ˗waa ˈn ˈsaa ˈnɔɔ dlɩ yɔwʋ nɛnɩ, yɩ ˗nɩɲɩˈɛ ˗abhlɩ dlɩ yɔwʋ nɛnɩmö, ˗a ˈkɔ ˈkwädlɩ ˗gänɩ a dɔˈwʋ, yɩ ˈnaa ˗kaɲɩ kɛˈmö ˈtɛɛnɩ. Zɛlɩ Psaume 97:10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

ˈSaa ˗n ˈcɩɛ a dɔˈwʋ, ˈsaa Zoova ˗wa ɔ ˈnɩ? ˈN ˈsaa ˈnɔ bhä dlɩ yɔwʋ nɛnɩ ˈnɩ?
Sɛɛ ˗a ˈkä ɔ ˈsaa nɛnɩɛ ˗wa ˈnɩ? ˈN ˈsaa ˈnɩɛ nɛnɩɩ, sɛɛ ˗a ˈkɩ ɔ gwë ˈdionɩ ˈnɩ?

6. Zoova a ˈklʋkpamözʋzwɛ ka ˗aa ˗li a ˗lii ˈmö

Zoova a ˈklʋkpamözʋzwɛ nɛnɩ ɛ nɛnɩɛ ˈkwädlɩ. Zɛlɩ Isaïe 48:17, 18 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

˗N kɩ ɔ dlɩ ˈwʋ nɩɩ Zoova ˗yi ˈkwädlɩ ˈsaa nɛnɩɛ ˗aa dɔˈwʋ ˗a? ˗Yɩ kä ɔ ˈŋlɩ ˈnɩ?
˗N tɛɛ Biblë a ˈcɩɛcɩʋ ˈn ˗n yɩbhlɩnɩɛ sɛ nɩɩ Zoova mɔɔ ˗lɛ ˗tiamö a Lagɔ, ˗li a ˗lii a ˗mi yɩ nʋmö ɔ ˈwlu ˈnɩ?

NƖKPA ˗MUMUË LƐ NƖƖ: “ˈNa nʋnʋlii ˈwuë ˈnɩɛ Lagɔ a ˈyila ˈklʋ dɛsɛ ˗kä.”