˗A ˈwuë, ˗aˈa ˈmöpälasaa ˈnɩɛ ˈwlʋnɩ. ˗A ˗kä Biblë ’mö a ˈpäpägböö ˗gänɩ, ˈmöpälasaa ˗a nɛnɩɲɩɛ dlɩ yɔwʋ ˈn ˗a nɛnɩˈɛ Zoova dlɩ yɔwʋ, mö ˗a ˈkää ˗lɛ ˗sɛ. ˗A nɩ yɩlɩ yɩ glaˈmö a ˈpäpägböö ˗mimii yɔwʋ.

1. ˗A ˗kä ˗aˈa ˈmöpälabanɩ ˗lɛ ˗sɛ yii, Biblë a ˈpäpägböö ˗mi ˗kaɲɩ ɔ kwänɩ ˈnɩ?

˗Aˈa ˈmöpälabanɩ, ‘yɩ nɩ tɩ nɩkpa ˈklʋ ˈmö ˈkpëakpëanɩ, yɩ nɩ tɩ zʋ ˈwʋ ˗bhö, ˗a nɩ tɩ bɔlɔbɔlɔlii a kii ˈwuë ˗ɲɛ ˈpɛlʋtɛɛloku ˈsɔ sɛ tɛlɩ.’ ˈN yɩ nɩ tula nɩɩ, ‘Lagɔ mö ˗a ˗glɛ ˈwʋ.’ (1 Timotee 2:9, 10) ˗A nɩ yɩlɩɛ ˗ka ˈpäpägböö ˗mʋäna ˗kpɔ ˈlɛ yɔwʋ: (1) ˗Aˈa ˈmöpälasaa ‘nɩ tɩ nɩkpa ˈklʋ ˈmö ˈkpëakpëanɩ.’ ˗Mä ˈwluyɩbhäyɩbhɩ ˈwʋ, ˈsaa ˗a köbha ˈyli miɛ nɩɩ, Zoova a ˗nʋa ˈnɩɛ ˈmöpälasaa ˈwʋ ˗gbɔ. ˗Maa, ˗aˈa ˈmöpälabanɩɩ ˗ɲɛ ˗aˈa ɲukwëa a ˈwlugïganɩsaa ˈsɔ, yɩ tula nɩɩ ˗a kä ˗aˈa Lagɔ ˗a bʋbɔɔ a ˈklʋkpa. (2) ˗Aˈa ˈmöpälasaa ‘nɩ tɩ zʋ ˈwʋ ˗bhö.’ Mii sɛɛ zɛmö nɩɩ, sɛɛ ˗a päla ˈmö nɩ tɩ nɩkpa ˗mä ˈsunɩ nzɩ wa ˈkä ˗ɔɔzʋkälii ˈwʋ dlɩ ˈpä. Yɩ nɩ tɩˈɛ ˈŋlɩ ˗kä ˗a ˈkä ˗aɲɩ ˈyila ˈwʋ ˗lɛnɩ. (3) ‘˗A nɩ tɩ bɔlɔbɔlɔlii a kii ˈwuë ˗ɲɛ ˈpɛlʋtɛɛloku ˈsɔ sɛ tɛlɩ. ’ Mii sɛɛ zɛmö nɩɩ, mäˈä ˈpɩwʋ a ˈmöpälalii ˗yɩ wlʋä ˈlili ˈwʋ, yɩ ˗ɲɛ ˗lii ˗mimii ˈsɔ, ˗a nɩ ti ˈbɩwʋ guënɩ. (4) ˗Aˈa ˈmöpälasaa nɩ tula nɩɩ, ‘Lagɔ mö ˗a ˗glɛ ˈwʋ,’ miɛ nɩɩ ˗tiamö a Lagɔ mö ˗a bʋbɔ.—1 Kolɛɛtɩ a ˗nʋa 10:31.

2. ˈSaa ˗aˈa ˈmöpälasaa ˈkä ɔ ˗aa lagɔdaayuë ˈwlu nʋ ˈnɩ?

˗A bhɛnɩ ˗a ˈkä ˈsaa ˗a yɩbhää ˈmö päla abhlɩ. ˗Maa ˗a ˗kä ˈmö pälaa, ˈsaa yɩ ˈkää ˗aa lagɔdaayuë ˈwlu nʋʋ, mö ˗a nɩ ˈpä ˈwʋ dlɩ. ˗A nɩ ˈtɛmanɩ ˈyli yɔwʋ, ˈsaa kää ‘˗aˈbhɩa a ˗li a ˗li ˈmö, ˈsaa ˗bhuëë ˈmäna ˈwʋ, ˗a ˈkɩ sɛ tɛlɩ, wa ˈkä ˈyli yɔwʋ ˈtɛmanɩ ˗mä ˈwa dlɩˈwʋkänɔɔ ˈmö.’ —Zɛlɩ Ghlɔɔmö a ˗nʋa 15:1, 2 ˈmö.

3. Sɛɛ ˗aˈa ˈmöpälasaa ˈkä ɔ nɩkpa ˗tiamö a bʋbɔbʋbʋ ˈwʋ jlinɩ ˈnɩ?

˗Lii ˈwuë ˈmö a dɔˈwʋ, ˗a päla abhlɩ sasɛ ˈmö. ˗Maa ˗a ˗kä lagɔzɩkpa ˈmö a ˈwluyɩbhäyɩbhɩ ˈwʋ mö, ˈn ˗a ˗käˈɛ ˗mä lagɔwɛlɩbiabɛyɩ mö, ˗lɛ aˈbhë ˗a köbha teɲii ˗aˈa ˈmöpälasaa ˈyli. ˗Mä ˗aˈa lagɔwɛlɩbialibhoo ˈmö, ˗aa ˈyɩbhä nɩɩ, nɩkpa ˈkä ˗aˈa ˈmöpälasaa a ˈyize yɛlɛ, nzɩ wa ˈkä lagɔwɛlɩɩ ˗a ɲʋa yɔlʋ ˈwʋ plɛnɩ. ˗Maa ˗a yɩbhä nɩɩ ˗aˈa ˈmöpälasaa nɩ gbä, nzɩ ‘˗aa puëɲɔ Lagɔ ˈa wɛlɩɩ ˗a ˗gänɩɛ ˈkäa ˈklʋkpamö ˗kä.’—Tiitɩ 2:10.

 ˈCƖƐ ˗LII ˗MIMII

4. ˗Aˈa ˈmöpälasaa nɩ tula nɩɩ ˗a kä Zoova a ˈklʋkpa

ˈLɩlɩlɩ a dɔˈwʋ, ˈsaa ˈsunɩɲɩ ɔ ˗mä ˈn ˗a köbha ɔ sasɛ ˗aˈa ˈmöpälasaa ˈyli ˈnɩ? Zɛlɩ Psaume 47:2 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• Sɛɛ ˗aˈa ˈmöpälasaa tula ɔ nɩɩ Zoova a ˗nʋa ˗a glɩnɩɛ ˈnɩ?

• ˗N pä ɔ dlɩ nɩɩ, ˗a ˗kä ˈwluyɩbhäyɩbhɩ ˈwʋ möä yii, ˗a ˗kä lagɔwɛlɩɩ bia möä yii, ˗aˈa ˈmöpälasaa kä ɔ dɛsɛ ˗a? ˗Yɩ kä ɔ ˈŋlɩ ˈnɩ?

 5. ˈMöpälasaa ˈn ˈmöpälabanɩ a dɔˈwʋ, sɛɛ ˗a ˈkää ˈsaa nɛnɩɛ ˗lɛ ˗sɛ

ˈZʋ ˗lɛ VIDEO.

˗Aˈa ˗banɩ yi ˈpɛlʋ ˈtɛɛ oo, yɩ ˈnɩ ˈpɛlʋ ˈtɛɛ aˈbhë ˗kë, yɩ nɩ ˗wʋ ˈwlɩlɩ, ˈn yɩ nɩ kä ˈklʋkpamö, ˗aˈa lagɔwɛlɩbialibhoo ˗a nʋä a za. Zɛlɩ 1 Kolɛɛtɩ a ˗nʋa 10:24 ˈn 1 Timotee 2:9, 10 ˈmö. ˈN ˗yɩ kää ˈŋlɩ ˗aa ˗kä ˗a ˈkä ˗banɩ a kii ˗mimii ˈmö pälaa, a nɩ ˈyi ˈylɩmö...

• ˗Banɩ a ˗mi nɩkpɛ ˗kä ˈmö ˗su ˈn wa yɩlɩɛ ˈɔ kpökpaa ˈwuë ˈwʋ.

• ˗Banɩɩ ˗yɩ mɛɛ teɲii kpökpaa, ˈn ˗yɩ bhɛnɩˈɛ yɩ ˈkä nɩkpɛ ˗mä ˈsunɩ, nzɩ ɔ ˈkä ˗ɔɔzʋkäli ˈwʋ dlɩ ˈpä.

ˈLɩlɩlɩ a dɔˈwʋ, Moyizɩ ˈa gböö ˈmö Klɩtɩɛwaa ˈnɩaˈa ˗gänɩ abhlɩ, ˗maa yɩ bhɛnɩ yɩ ˈkʋa kwänɩ wa ˈkä Zoova ˈa dlɩpäsaa yɩbhlɩnɩ. Zɛlɩ Deutéronome 22:5 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗Yɩ kä ɔ ˈŋlɩ ˈn ɲɩbhɛlʋ ˈnɩ ɔ ˗kä ɔ ˈkä ˈŋlɔ a sɛ ˈmö päla, ˈn ˈŋlɔ ˈnɩ ɔ ˗kä ɔ ˈkä ɲɩbhɛlʋ a sɛ päla ˈnɩ?

Zɛlɩ 1 Kolɛɛtɩ a ˗nʋa 10:32, 33 ˈn 1 Zaa 2:15, 16 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˈSaa ˗aˈa ˈmöpälasaa ˈkää ˗aˈa dɛglɩwaa ˗ɲɛ ˗aˈa lagɔzɩkpaa ˈmö a ˗nʋa ˈsɔ ˈwlu nʋʋ, ˗yɩ kä ɔ ˈŋlɩ ˈn ˗a kä ɔ ˗a ˈkɩ dlɩ kɛ ˈpänɩ ˈnɩ?

• Dɛɛ ˗n ˗bhölɩnɩɛ a ˗nʋaa, sɛ wa päla ɔ ˈmö ˈnɩ?

• ˗Na dɔˈwʋ, ˗sɩbhä a ˈmöpälasa ˈla nɛnɩ ɔ Klɩtɩɛwaa a dɔˈwʋ ˗a? ˗Yɩ kä ɔ ˈŋlɩ ˈnɩ?

 DƐSƐKÄKÏBHÏ

˗Aˈa ˈmöpälasaa ˗kä nɛnɩɩ, yɩ tula nɩɩ ˗a kä Zoova ˗ɲɛ ˗mumuë ˈsɔ a ˈklʋkpa.

ˈWʋligbanɩkïbhï

• ˗Yɩ kä ɔ ˈŋlɩ ˈn ˗aˈa ˈmöpälasaa kä ɔ dɛsɛ Zoova a ˈyila ˈklʋ ˈnɩ?

• ˗Aˈa ˈmöpälasaa a dɔˈwʋ, ˈpäpägböö a ˗mi ˗kaɲɩ ɔ kwänɩ ˗a ˈkä ˈsaa nɛnɩɛ ˗lɛ ˗sɛ ˈnɩ?

• ˗Aˈa ˈmöpälasaa a zaa, sɛɛ ˗mumuë ˈkä ɔ dlɩ ˈpä ˗tiamö a bʋbɔbʋbʋ a dɔˈwʋ ˈnɩ?