ˈCƖƐCƖƐKÏBHË 54
Libhoo “sasɛlibhonʋɲɔ ˗ɔ ˈnɛɛ” nʋä
Zezwii mɔɔ glɩnɩɛ Klɩtɩɛzɩkpa a ˈwukpëlea. (Ɛfɛɛzɩ a ˗nʋa 5:23) Zɩˈɛ, Zezwii ˗wʋ ˗mä zlɩ ˈmö ˈn ɔ ghlɛnɩɛ “sasɛlibhonʋɲɔ ˗ɔ ˈnɛɛ” ˈmö ˈn ɔ ˗gänɩɛ ɔ ˗nʋa ˈyuku, ˗wa ˗wʋä mäˈä dʋdʋ ˈwʋ. (Zɛlɩ Matie 24:45 ˈmö.) Zezwii aˈbhë mɔɔ ˈzʋä ˗lɛ sasɛlibhonʋɲɔ. Zaa, sasɛlibhonʋɲɔ ˈla mɔɔ kää ɔ ˗kaɲɩ ˈyuku ˗gänɩ, ɔ ˈkä ˈsaa ˗a ˈkää nʋ ˗lɛ ˗sɛ. ˗Maa, ɔ käˈɛ ɔbhlɩ ɔ ˈkä Zezwii ˈa wɛlɩɩ ˈklʋkpamö ˈzʋ, ɔ ˈkä Zezwii a ˗nʋa ˈyli ˈzʋnɩ. ˗Mɔ ˗lɛ ɔ sasɛlibhonʋɲɔ ˈla ˈnɩ? ˈN sɛ ɔ ˈzʋnɩɲɩ ɔ ˈyli ˈnɩ?
1. ˗Mɔ ˗lɛ ɔ “sasɛlibhonʋɲɔ ˗ɔ ˈnɛɛ” ˈnɩ?
ˈLɩlɩlɩ a dɔˈwʋ, Zoova, nɩkpɛ ɔ ghlɛnɩɛ ˈkwädlɩ ˈmö nzɩ ɔ ˈkä ɔ ˗nʋa ˈyuku ˗gänɩ, ˈn ɔ ghlɛnɩˈɛ nɩkpa a ˗zɩkpa ˈtikëyi ˈmö. (Malachie 2:7; Ebleewaa 1:1) Zezwii ˈkuä ˈwë, ˈɔ tietiewaa ˗ɲɛ Zeluzalɛɛmö a ˈyukugänɩwaa ˈsɔ, mʋa ˗gänɩɛ ˗lii ˈyuku. (Nʋnʋlii 15:2) Sɛ ˗bhlʋ ˗kpɔ ˈla, ˗sɩbhä ˈyukugänɩwa a ˗zɩkpa ˈtikëyi, wa laa ˗Muë ˗gänɩɛ ˗aˈa ˈwlugïganɩzɩkpaa ˈyukuu, lia zɩˈɛ Zoova ˈa Bhlɩnɩwaa ˈwugɔmʋsɛ. ˈN wa ˗gänɩˈɛ lagɔwɛlɩbialibhoo ˈyuku. ˗Zɩkpa ˈla ma˗a ˗lɛ “sasɛlibhonʋɲɔ ˗ɔ ˈnɛɛ [Zezwii] tɩɛ ˗lɛ.” (Matie 24:45a) ˗Muë ˗gänɩɛ ˗aˈa ˈwlugïganɩzɩkpaa ˈyukuu, Klɩtɩɛwa a ˗muë sa˗a ˗lɛ ˈmö wa glɩnɩɛ. Wa ˗kä zɩla ˈku ˈwë, ˗mä zlɩ ˈmö ˗mä wa ˈkää mö, ˗mä Zezwii yɔwʋ.
2. ˈWugɔmʋsɛ a lile a ˗ma sasɛlibhonʋɲɔ ɲɩaɲɩ ɔ ˈnɩ?
Zezwii lɛ nɩɩ sasɛlibhonʋɲɔ ˈla, ‘lilitɛɲɩ ˗kä ghlɛɛ, mɔ kää ɔ ˈkä ɔ ˈbhɩa lagɔgänɩwaa lilea dilanɩ wa ˈkä li.’ (Matie 24:45b) ˈLɩlɩlɩ a dɔˈwʋ, lilea ˗a liɛ ma˗a ɲɩaɲɩɛ ˈmötɛɛnɔ, ma˗a kää ˈŋlɩ ˈn ˗a nɛnɩɛ ˈmö. Sɛ ˗bhlʋ ˗kpɔ ˈla, ˗sɩbhä ˈdɩmözʋwɛlɩɩ ˗yɩ ˈbhöönɩɛ ˗mä Lagɔ ˈa wɛlɩɩ ˈmö ɲɩaɲɩɛ ˈmötɛɛnɔ, ˈn ˗a ˗gänɩɛ ˈkwädlɩ Zoova ˈn ˗a nʋä sasɛ Zezwii ˈa libhoo ɔ ɲɩaɲɩɛ. (1 Timotee 4:6) Lagɔzɩkpa ˈmö a ˈwluyɩbhäyɩbhɩɩ, ˈwluyɩbhäyɩbhɩ ˈkädɩɩ, lagɔbɔgwɩɩ ˈn videwi, ˈmö wa ghlɛnɩɛ ˈmö ˈn wa ɲɩaɲɩɛ ˈwugɔmʋsɛ a lilea. Yɩ kwänɩɲɩ ˈn ˗a ˗yiɛ ˈsaa Lagɔ yɩbhää ˗a nɩ nʋ. Yɩ käˈɛ ˈŋlɩ ˈn ˗a ˗ɲɛ Zoova ˈsɔ a bheyi ˈtumanɩɛ teɲii ˈmö.
ˈCƖƐ ˗LII ˗MIMII
˗Yɩ kää ˈŋlɩ ˈn “sasɛlibhonʋɲɔ ˗ɔ ˈnɛɛ” kää dɛsɛɛ, ˈyi ˈylɩmö.
˗Muë ˗gänɩɛ ˗aˈa ˈwlugïganɩzɩkpaa ˈyukuu, wa liaɲɩ ˈwugɔmʋsɛ, wa ɲɩaɲɩ ˈdɩmözʋwɛlɩ, ˈn wa kwänɩ Zoova a Bhlɩnɩwaa ˈwuë.
3. Zoova a ˗nʋa kä wa ˈkä ˈwlu ˗gïganɩ
˗Muë ˗gänɩɛ ˗aˈa ˈwlugïganɩzɩkpaa ˈyukuu, Zezwii mɔɔ ˗gänuë ˈyuku ˈn wa gïganɩɛ Zoova ˈa Bhlɩnɩwaaa a libhoo ˈwlu. Sɛ ˗bhlʋ ˗kpɔ ˈla, ˗sɩbhä Zezwii ˗gänɩ a˗a tɛkäklɩtɩɛwaa a libhoo ˈyuku. ˈZʋ ˗lɛ VIDEO.
Zɛlɩ 1 Kolɛɛtɩ a ˗nʋa 14:33, 40 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
Sɛɛ Biblë a gbɛlɩ ˈlɛ tula ɔ nɩɩ, Zoova yɩbhä ɔ ˗nʋa nɩ ˗gïganɩ ’wlu ˈnɩ?
4. Sasɛlibhonʋɲɔ mɔɔ ˗gänɩɛ ˗aˈa lagɔwɛlɩbialibhoo ˈyuku
Lagɔwɛlɩbialibhoo kä a˗a teɲii dɛsɛ tɛkäklɩtɩɛwaa a dɛ. Zɛlɩ Nʋnʋlii 8:14, 25 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
˗Mä tɛkäklɩtɩɛwaa a glaˈmö, ˗ɔ ˗gänɩ a˗a bhä lagɔwɛlɩbialibhoo ˈyuku ˈnɩ?
-
ˈDɩmözʋwɛlɩɩ ˗yɩ ˈbhöönɩɛ Zezwii ˈa tietiewaa ˗muëˈla ˈmöö, sɛɛ Piɛlɩ ˗ɲɛ Zaa ˈsɔ ˈlibhi ɔ ˈwʋ ˈnɩ?
˗Muë ˗gänɩɛ ˗aˈa ˈwlugïganɩzɩkpaa ˈyuku mʋa gïganɩɛ lagɔwɛlɩbialibhoo ˈwlu. Wa ˈyila ˈklʋ a dɔˈwʋ, libho a ˗mu kää teɲii dɛsɛ, ˗wʋ zie ˈwʋ, ˈmö wʋ glɩnɩɛ. ˈZʋ ˗lɛ VIDEO.
Maakö 13:10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Zezwii tula nɩɩ, lagɔwɛlɩbialibhoo dɛsɛ wʋ kää teɲii. Zɛlɩ-
˗Yɩ kä ɔ ˈŋlɩ ˈn lagɔwɛlɩbialibhoo kä ɔ teɲii dɛsɛ ˗Muë ˗gänɩɛ ˗aˈa ˈwlugïganɩzɩkpaa ˈyuku a dɔˈwʋ ˈnɩ?
-
Lagɔwɛlɩbialibhoo ˗a nʋä ˗mä bhlɩɩ ˈwuë ˗gömö, ˗yɩ kä ɔ ˈŋlɩ ˈn sasɛlibhonʋɲɔ ˗ɔ ˈnɛɛ kä ɔ ɔ ˈkʋ ˈyuku ˗gänɩ ˈnɩ?
5. Sasɛlibhonʋɲɔ mɔɔ slʋnɩɲɩɛ sɛɛ ˗a ˈkää ˈzʋ
˗Muë ˗gänɩɛ ˗aˈa ˈwlugïganɩzɩkpaa ˈyukuu, mʋa ɲɛɛ bhlɩɩ ˈwuë ˗gömö a Klɩtɩɛwaa ˈdɩmözʋwɛlɩɩ wa ˈkää ˗gänɩ. Sɛ wa zʋ ɔ ˈnɩ? Tɛkäklɩtɩɛwaa a ˈtɛɲɩ ˈmö, ˗muë ˗gänɩɛ lagɔwɛlɩbialibhoo ˈyuku a sɛ wa zʋä, ˈyi ˈylɩmö. Zɛlɩ Nʋnʋlii 15:1, 2 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Wɛlɩ a ˗mi yi ɔ tɛkäklɩtɩɛwaa ˗mumuë jijoˈwʋ ˈnɩ?
-
Pɔɔlʋ ˗ɲɛ Banabasɩ ˈsɔ ˈn Klɩtɩɛwaa ˗mumuë, ˗muë wa ghlɩ ɔ ˗mä nzɩ wa ˈkä wa jijoˈwʋ a wɛlɩɩ ˈwlu gïganɩ ˈnɩ?
Zɛlɩ Nʋnʋlii 15:12-18, 23-29 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
˗Muë ˗gänɩ a˗a tɛkäklɩtɩɛwaa ˈyukuu, wa ˗kä wɛlɩ ˈmö ˗sɛnɩɛ yii, sɛ wa zʋ ɔ ˈn wa ghlɩ ɔ ˈdɩmözʋwɛlɩ ˗yɩ ˈbhöönɩɛ Lagɔ ˈmö ˈnɩ? —Yɩlɩ ˗mä gbɛlɩ 12, 15 ˈn 28 ˈmö.
Zɛlɩ Nʋnʋlii 15:30, 31 ˈn 16:4, 5 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
˗Muë ˗gänɩ a˗a tɛkäklɩtɩɛwaa ˈyukuu, ˈdɩmözʋwɛlɩɩ wa ˈɲɛ a˗a ˈwa ˈtɛɲɩ ˈmö a Klɩtɩɛwaa, sɛ wa ˈlibhi ɔ ˈnɩ?
-
ˈWa ˈklʋkpamözʋzwɛ a za, sɛɛ Zoova ˈpʋa ɔ ˈɲu ˈnɩ?
Zɛlɩ 2 Timotee 3:16 ˈn Zaakö 1:5 ˈmö, ˈn a nɩ yɩlɩ nimïyɩ bhäkïbhë ˈlɛ yɔwʋ:
-
˗Muë ˗gänɩɛ zɩˈɛ ˗aˈa ˈwlugïganɩzɩkpaa ˈyukuu, wa ˗kä ˗lu nʋä yii, dɛ wa sɛ ɔ ˈdɩmözʋwɛlɩɩ ˈnɩ?
NƖKPA ˗MUMUË LƐ NƖƖ: “˗Muë ˗gänɩɛ ˗aˈa ˈwlugïganɩzɩkpaa ˈyukuu, ˗n ˗kʋa ˈyukwli ˗pʋnɩɩ, sɛɛ ˗n ˈkäˈɛ nɩkpa ˗mumuë ˗gänɩ ˗sɩbhä yɩ ˗wʋä.”
-
˗Muë ˗gänɩɛ ˗aˈa ˈwlugïganɩzɩkpaa ˈyukuu, ˈsaa tula ɔ nɩɩ Zezwii mɔɔ ˗gänuë ˈyuku ˈnɩ?
DƐSƐKÄKÏBHÏ
˗Muë ˗gänɩɛ ˗aˈa ˈwlugïganɩzɩkpaa ˈyukuu, mʋa glɩnɩɛ “sasɛlibhonʋɲɔ ˗ɔ ˈnɛɛ” Zezwii ˗sɛ ˗lɛ. Sasɛlibhonʋɲɔ ˈla ˗ɔ ˈnɛɛ, mɔɔ ˗gänɩɛ bhlɩɩ ˈwuë ˗gömö a Klɩtɩɛwaa ˈyuku, ˈn ɔ ɲʋa ˈwugɔmʋsɛ a lile.
ˈWʋligbanɩkïbhï
-
˗Ɔ ˗sɛ ɔ ˗lɛ “sasɛlibhonʋɲɔ ˗ɔ ˈnɛɛ” ˈnɩ?
-
˗Muë ˗gänɩɛ ˗aˈa ˈwlugïganɩzɩkpaa ˈyukuu, sɛ wa ˈzʋnɩɲɩ ɔ ˈyli ˈnɩ?
-
˗N kɩ ɔ dlɩ ˈwʋ nɩɩ, ˗Muë ˗gänɩɛ ˗aˈa ˈwlugïganɩzɩkpaa ˈyukuu, mʋa glɩnɩɛ “sasɛlibhonʋɲɔ ˗ɔ ˈnɛɛ”?
YILII YƆWƲ
˗Muë ˗gänɩɛ ˗aˈa ˈwlugïganɩzɩkpaa ˈyukuu, sɛ wa ˗gïganɩɛ ˈwlu ˈn wa nʋä ˈwa libhoo, ˈyi ˈylɩmö.
« Qu’est˗ce que le Collège central des Témoins de Jéhovah? » (Ɛtɛnɛtɩ ˈklʋ a ˈcɩɛcɩɛkïbhë)
˗Muë ˗gänɩɛ ˗aˈa ˈwlugïganɩzɩkpaa ˈyuku kɩ dlɩ ˈwʋ nɩɩ, ˈwugɔmʋsɛ a lilea wa ɲɩaɲɩɛ, lile a ˗ma nɛnɩɛ, nɩkpɛ ˈkää dlɩ ˈwʋ ˗kä ˈmö a glɩnɩɛ.
Libhoo Zezwii ˈɲɛɛ ˗Muë ˗gänɩɛ ˗aˈa ˈwlugïganɩzɩkpaa ˈyukuu, sɛ wa libhu ɔ ˈwʋ ˈnɩ?
Lagɔzɩkpa ˈmö a ˈwluyɩbhäyɩbhɩɩ ˈn ˈwluyɩbhäyɩbhɩ ˈkädɩɩ, sɛ yɩ tula ɔ nɩɩ, ˗Muë ˗gänɩɛ ˗aˈa ˈwlugïganɩzɩkpaa ˈyukuu, Zoova mɔɔ ˗gänuë ˈyuku ˈnɩ?