ˈCƖƐCƖƐKÏBHË 55
Sɛɛ ˗a ˈkää lagɔzɩkpa kwänɩ
˗Mä bhlɩɩ ˈwuë ˗gömö, nɩkpa a miniɲwɩ mʋa bʋbɔɔ ˈmänasɛ Zoova, ˗mä lagɔzɩkpö a mila a ˗bɛ ˈmö. ˈDɩmözʋwɛlɩɩ wa ɲʋaa, ˈn ˈsaa wa cɩɛɛ ˗bhʋa teɲii ˈmäna ˈwʋ. Yɩ za, wa ˗bhɩɔ ˈkwädlɩ ˈmö wa ˈkä lagɔzɩkpa kwänɩ, ˈki a ˗bɛ ˈmö. Zaa, ˗sɩbhä ˗n ˈpämö ɔ dlɩ ˗naˈa lagɔzɩkpa a dɔˈwʋ ˗a?
1. Sɛɛ ˗n ˈkä ɔ ˗naˈa ˈtɛɲɩ ˗ɲɛ ˗naˈa ˈmötɛɛnɔɔ ˈsɔ ˈmö ghlɛnɩ ˗n ˈkä lagɔzɩkpa kwänɩ ˈnɩ?
˗A ˈwuë, ˗a bhɛnɩ ˗a ˈkä bhʋlʋbhlʋ lagɔzɩkpa ˈmö a ˗nʋa kwänɩ. ˗Mä ˗naˈa lagɔzɩkpa ˈmö, ˗wa yɛɛ gɔ ˗ɲɛ kpälɛkpälɛwa ˈsɔ ˗wʋ ɔ ˗mä ˗a? ˗N bhɛnɩ ɔ ˗n ˈkʋa kwänɩ wa ˈkä ˈwluyɩbhäyɩbhɩ ˈwʋ ˈmämö ˗a? ˗N bhɛnɩˈɛ ˗n ˈkʋa kii ˗mimii ˈmö kwänɩ. ˗N bhɛnɩ ˗n ˈkʋa ˈylɩmöä mö nzɩ wa ˗kamö tiee, ˗mä ˈpɛlʋ ˈklʋ, ˗n ˈkäˈɛ ˈwa ˈligbë ˈmö a libhi ˗mimii nʋ. (Zɛlɩ Zaakö 1:27 ˈmö.) ˗A bhɛnɩ ˗a ˈkä ˗mä lagɔzɩkpa ˈmö a ˗nʋa kwänɩ, ˗a ˈkä ˗mä ˗aˈa ˈKämanɔɔ a ˗budu ˈmö ˈwlɩlɩ päla, ˗a ˈkä ylɩpö ˈn ˗a ˈkä ˗mä ˈwlu gïganɩ. ˗A ˈkä ˗li ˈla ˈwuë nʋ a dɔˈwʋ, nɩkpɛ ˗nɩɲɩɛ ˈwlumö köbhänɩ. Zoova a ˗wawʋ ˈn ˗aa lagɔdaayuë a ˗wawʋ ˗a kää dlɩ zɛmö, muu ˈsunɩɲɩɛ ˗mä ˈn ‘˗a sɛɛ ˗aɲɩ dlɩ.’—Psaume 110:3.
Zoova a ˗nʋa ˗wa badizee, wa bhɛnɩˈɛ wa ˈkä lagɔzɩkpa kii ˗mimii ˈmö kwänɩ. Ɲɩbhɛlɩdaayuëa ˗wa zʋä Biblë a ˈpäpägböö ˈklʋkpamö, wa bhɛnɩ wa ˈkä ˈyukugänɩwa a ˈyliwʋwa ˈzʋ, ˈn wa ˈkäˈɛ bhäla ˈyukugänɩwa ˈzʋ. Ɲɩbhɛlɩdaayuë ˗mumuë ˗ɲɛ ŋlʋdaayuë ˗mumuë ˈsɔ, wa bhɛnɩ wa ˈkä ˈyiosɛwa ˈzʋ, nzɩ lagɔwɛlɩbialibhoo ˈkä ˈyukusɛ mö. Zoova a ˗nʋa ˗mumuë nʋmö ˗bïdisɩbhälibhoo, ˈn mää lagɔwɛlɩbiawaa ˈnɩɛ ˗zu, ˗mumuë möˈɛ ˗mä ˈn wa kwänɩɛ ˗mä a lagɔzɩkpö.
2. Sɛɛ ˗a ˈkä ɔ ˗aˈa moni ˈmö ghlɛnɩ ˗a ˈkä lagɔzɩkpa kwänɩ ˈnɩ?
˗A bhɛnɩ ˗a ˈkä ‘˗aˈa dlɩsɛkälii ˈmö ghlɛnɩ nzɩ ˗a ˈkä Zoova a ˈŋlɩ ˈghlimanɩ.’ (Proverbes 3:9) ˗A ˈkä ˗aˈa moni ˗ɲɛ ˗aˈa ˗lii ˗a kää ˈsɔ ˈmö ghlɛnɩ nzɩ ˗a ˈkä ˗aˈa lagɔzɩkpa kwänɩ ˈn ˗a ˈkäˈɛ ˈbhlɩ ˗gömö a lagɔwɛlɩbialibhoo ˈyukusɛ kwää, yɩ ˗bhöɲɩ teɲii ˈmäna ˈwʋ. (Zɛlɩ 2 Kolɛɛtɩ a ˗nʋa 9:7 ˈmö.) ˈSaa ˗a ɲɛɛ, ˈmö wa libhïˈɛ ˈwʋ ˈn wa kwänɩɛ ˗aa lagɔdaayuë ˗lizoku ghlɩɛ: Dʋdʋ a tɩtlɛnɩtɩtlɛnɛ, ˈvuu ˈkɔdʋ ˈn ˗sɩbhä a ˗lii ˗mimii. ˗Mumuë a ˗bɛ, ‘moni wa zʋä ˗lɛ sɛ’ ˈyize, wa ˈkää ˈwäla. (Zɛlɩ 1 Kolɛɛtɩ a ˗nʋa 16:2 ˈmö.) ˗A ˗kä ˈɲɛɛ yii, ˗mä Lagɔ ˈa ˈKämanɔɔ a ˗budu a ˗dɔkwɩ ˈmö, ˗a bhɛnɩ ˗a ˈkä ˗mä ˈpä, ˗a bhɛnɩˈɛ ˗a ˈkä ɛtɛnɛtɩ ˈmö ghlɛnɩ, dɛɛ wa ˈzʋä, donate.pr418.com. Zoova yɩbhä nɩɩ ˗a nɩ ghlɛnɩ ˗aˈa ˗lii a kää ˈmö nzɩ ˗a ˈkɔ ˈɲɛ, nzɩ ˗a ˈkɔ ˈylimö tulanɩ nɩɩ ˗a ˗wɔɔ.
ˈCƖƐ ˗LII ˗MIMII
ˈKi a ˗mi ˗a bhɛnɩɛ ˗a ˈkä ˈmö ghlɛnɩ nzɩ ˗a ˈkä lagɔzɩkpa kwänɩ, ˈyi ˈylɩmö.
3. ˗A nɩ ghlɛnɩ ˗aˈa ˗lii ˗a kää ˈmö
Zoova ˗ɲɛ Zezwii ˈsɔ, wa ˗waa teɲii nɩkpa ˗wa ɲɛɛ ˈmänasɛ ˈwa ˈsaa wa kää. ˈYlɩ ˗bhlʋ ˈmö, ˈpʋäkuzleŋlɔ ˗bhlʋ ˗ɔ ˈɲɛɛ Lagɔ ˈɔ ˈsaa ˈwuë ɔ kä a˗a, Zezwii köbhɔ a˗a sasɛ ˈyli. Zɛlɩ Lwiikö 21:1-4 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
˗A kä ɔ ˗a ˈkä Zoova moni a ˗bɛ ˈɲɛ nzɩ ˗a ˈkɔ dlɩ yɔwʋ nɛnɩ ˗a?
-
˗A ˗kä ˈmänasɛ ˗aˈa ˈsaa ˗a kää ˈɲɛɛ, ˈsaa yɩ nʋ ɔ Zoova ˗ɲɛ Zezwii ˈsɔ ˈwlu ˈnɩ?
ˈSaa wa nʋä moni ˗a ɲɛɛ ˈwʋ, ˗n ˗kä ˗n ˈkɩ ˈylɩmö, ˈzʋ ˗lɛ VIDEO. ˈN a nɩ yɩlɩ nimïyɩbhäkïbhë ˈlɛ yɔwʋ.
-
Moni ˗a ˈwälaa, sɛɛ ɛ kwänɩ ɔ ˗mä ˈbhlɩ ˈwuë ˗gömö a lagɔzɩkpö ˈnɩ?
4. ˗A nɩ ˗sɛ ˗aɲɩ dlɩ nzɩ ˗a ˈkä ˗mumuë kwänɩ
Bhlaˈmö a ˈtɛɲɩ ˈmö, Zoova ˈa bʋbɔbʋbɔwaa ˈkä ˈwa lagɔbïdi ˈyli ˈzʋnɩ, ˈn wa ˈkɩ ˈwlu gïganɩ a dɔˈwʋ, waˈaa moni a ˈyize ˈwäla. ˗Maa kuˈmösusɛ wa nʋ a˗a libho. Zɛlɩ 2 Chroniques 34:9-11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
Sɛɛ Yizlaɛlɩ a ˗nʋa ˈtɛmanɩ ɔ bhʋlʋbhlʋ ˈyli yɔwʋ ˈn wa yi ɔ Zoova ˈa ˗budu ˈsɩbhä ˈnɩ?
Sɛɛ Zoova ˈa Bhlɩnɩwaa ˗gänɩɛ zɩˈɛ bhlaˈmö a ˗nʋa a gbäpöö, a ˈkɩ ˈylɩmö a dɔˈwʋ, ˈzʋ ˗lɛ VIDEO. ˈN a nɩ yɩlɩ nimïyɩbhäkïbhï ˈlɛ yɔwʋ.
-
Lagɔ ˈa ˈKämanɔɔ a ˗budu ˈkä ˈkwädlɩ ˈwlɩlɩ ˗wʋ a dɔˈwʋ, ˗yɩ kä ɔ ˈŋlɩ ˈn yɩ kä ɔ teɲii dɛsɛ ˈnɩ?
-
Sɛɛ ˗n bhɛnɩ ɔ ˗n ˈkä libho ˈla nʋmö ˈnɩ?
5. Ɲɩbhɛlɩdaayuëa nɩ tɛlɩ sɛ wa ˈkä libhi ˗mimii nʋ ˗mä lagɔzɩkpa ˈmö
Biblë pä ɲɩbhɛlɩdaayuëa swɩ ɲɛmʋ ˈmö nɩɩ wa nɩ nʋ ˈsaa ˈwuë wa bhɛnɩɛ nzɩ wa ˈkä lagɔzɩkpa kwänɩ. A ˈkɩ ˈylɩmö a dɔˈwʋ, ˈzʋ ˗lɛ VIDEO. ˈN a nɩ yɩlɩ nimïyɩbhäkïbhë ˈlɛ yɔwʋ.
-
˗Mä video ˈlɛ ˈmö, sɛɛ Ghlayanɩ ˈzʋ ɔ ˈn ɔ yi ɔ teɲii lagɔzɩkpa kwänɩ ˈnɩ?
Nɩkpɛ a ˗mɔ yɩbhää ɔ ˈkä ˈyukugänɩwa a ˈyliwʋɲɔ ˈzʋ, ˈn ˗ɔ yɩbhäˈɛ ɔ ˈkä ˈyukugänɩɲɔ ˈzʋ, sɛ ɔ kää ɔ ˈkä ˗wʋʋ, Biblë ˗sɛsɛnɩ yɩ wɛlɩɩ ˈmö. Zɛlɩ 1 Timotee 3:1-13 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
-
Ɲɩbhɛlɩdaayuëa ˗wa yɩbhää wa ˈkä ˈyukugänɩwa a ˈyliwʋwa ˈzʋ, ˗wa yɩbhäˈɛ wa ˈkä ˈyukugänɩwa ˈzʋ, sɛ wa ˈkä ɔ ˗wʋ ˈnɩ?
-
Sɛɛ ˈwa ˈligbë ˈmö a ˗nʋa ˈkä ɔ ˗wʋ ˈnɩ? —Yɩlɩ ˗mä gbɛlʋ 4 ˈn 11 ˈmö.
-
Lagɔdaayuëa ˗kä ˈyli yɔwʋ ˈtɛmanɩ ˈn wa ˗kä sɛɛ gbɛlɩ ˈlɛ gbää ˗gänɩɩ, sɛ yɩ ˈkä ɔ lagɔzɩkpa a ˗li a ˗lii ˈmö ˗kä ˈnɩ?
˗MƆMƆƆ ˗KAMÖ NIMÏ ˈYƖBHÄ NƖƖ: “Dɛɛ Zoova a Bhlɩnɩwaa sɛ ɔ moni ˈn wa nʋ ɔ ˈwa lagɔlibhoo ˈnɩ?”
-
Sɛ ˗n ˈkä ɔ gbä ˈnɩ?
DƐSƐKÄKÏBHÏ
˗Aˈa ˈtɛɲɩ, ˗aˈa ˈmötɛɛnɔɔ ˈn ˗aˈa ˗lii ˗a kää, ˗a ˗kii ˈmö ghlɛnɩ ˈn ˗a ˗kä lagɔzɩkpa kwänɩɩ, yɩ ˗bhö teɲii Zoova ˈmäna ˈwʋ.
ˈWʋligbanɩkïbhï
-
Sɛɛ ˗a ˈkä ɔ ˗aˈa ˈtɛɲɩ ˗ɲɛ ˗aˈa ˈmötɛɛnɔɔ ˈsɔ ˈmö ghlɛnɩ nzɩ ˗a ˈkä lagɔzɩkpa kwänɩ ˈnɩ?
-
ˈN ˗aˈa ˗lii ˗a kää, sɛɛ ˗a bhɛnɩ ɔ ˗a ˈkɩ ˈmö ghlɛnɩ ˗a ˈkä lagɔzɩkpa kwänɩ ˈnɩ?
-
ˈSaa ˗n yɩbhä ɔ ˗naa ˗n ˈkä ˈmö ghlɛnɩ nzɩ ˗n ˈkä lagɔzɩkpa kwänɩ ˈnɩ?
YILII YƆWƲ
˗Yɩ kää ˈŋlɩ ˈn ˗sɩkaa a dɔˈwʋ, Lagɔ ˈnɩ ˈyɩbhänɩɛ ˈɔ bʋbɔbʋbɔwaa ˈwa ˗lii a kʋgbänɩɩ, ˈyi ˈylɩmö.
« La dîme: Que dit la Bible à ce sujet? » (Ɛtɛnɛtɩ ˈklʋ a ˈcɩɛcɩɛkïbhë)
Biblɩɩ tula nɩɩ ɲɛgblɩdaayuëa bhɛnɩ wa ˈka libhi a kii -mimii -nʋ -mä lagɔzɩkpaa ˈmö. -Maa ŋlʋdaayu bhɛnɩ bha ɔ ˈkɩ nʋmö -a?
« Le principe de l’autorité dans l’assemblée » (La Tour de Garde, février 2021)
Sɛɛ Zoova a ˗nʋa ˈtɛmanɩɛ ˈyli yɔwʋ ˈn wa möä wa lagɔdaayuë lagɔbɔgwɩ ˈɲɛɛ, ˈyi ˈylɩmö.
˗Mä Kɔgo a lagɔdaayuëa ˗wʋ wa lagɔdaayuë lagɔbɔgwɩ ˈɲɛɛ mö dɔˈwʋ (4:25)
Sɛɛ ˗a nʋnɩɛ ˗aˈa moni libho ˈmö, sɛ yɩ ˗ɲɛ lagɔgligbï ˗miˈla ˈsɔ ˈnɩ ɔ yɔwʋ mönɩ ˈnɩ?
« Comment les Témoins de Jéhovah financent˗ils leurs activités ? » (Ɛtɛnɛtɩ ˈklʋ a ˈcɩɛcɩɛkïbhë)
