1, 2. -Mɔ bhɛnɩ bhä ɔ -kaɲɩ zɩˈɛ ˈwʋ -kʋ ˈnɩ?

ˈPÄÄ -ka dlɩ, ˈylɩ -bhlʋ ˈmö, -n -wʋ -kamä ˈyio bhli dɔˈwʋ, -n -lɛ zʋ a sɛɛ cuu, zli yɛ ylumanɩ tititi, ˈɲizakwë ˈkäda -lɛ a ˈkä lɩbhä, a -su -podie, -gbägbadɛ gba. -N -wʋ ˈpulo dɔˈwʋ -n ˈkä ˈbhle sɛ tɛlɩ, -n ˈkä -lɛ plɛ. ˈN -n -kä -jɔlʋsɛ ˈbhle a bhle ghlɩɩ, dɛɛ ˈɲu ˈnɩ lɩbhänɩɛ, ˈmäna mää -kamöä ˈlɩbhä abhlɩ!

² Ki ˈla -bhlʋ -kpɔ ˈmö -a -wʋä zɩˈɛ ˈmö. Mäˈä ˈpɩwʋ a -lii ˈwuë ˈmö yɩ ˈtɛmanɩɛ ˈyize. -N yɩbhä -kamä -naɲɩ nimï nɩɩ, ‘-Mɔ -kaa bhä ˈwʋ -kʋ ˈnɩ?’ Lagɔ ˈa ˈŋlɩghlimanɩlwɩɩ a ˈbɔgʋʋ a ˈcɛlɩcɛlɩɲɔ -bhlʋ -lɛ nɩɩ: “N yɩbhä n ˈkä Zoova ˈdɩ ˈɲɛ nɩɩ: ‘Ɔ -lɛ Lagɔ a -mɔ n ˈkää ˈmö -gunɩ, -ɔ -kaa ˈmötɛɛnɔɔ ˈɲɛ. ˈNa Lagɔ n kää n ˈkä dlɩ ˈtɛɛnɩ.’” (Psaume 91:2) -Tiamö a dɔˈwʋ, Zoova bhɛnɩ ɔ -kaɲɩ ˈklɩyɩyɛ a ki ˈwuë ˈmö -sɛ, ˈn ɔ -yiɲɩˈɛ -zɩkö zɩkpa a -na a -na ˈɲɛ.

3. Sɛɛ -a ˈkä bhä Zoova ˈmö -gunɩ ˈnɩ?

³ Sɛɛ Zoova -kaɲɩ bhä ˈwʋ -kʋ ˈnɩ? Yɔlɔylʋ a -muu -a -kä ˈmö -wʋ -kë, ɔ -yiɲɩ kwänɩ, -a yu ˈmö ˈwlʋ. Ɔ ˈtɛɛ ˈmö ɔ ˈkä nɩkpa ˈwuë -wa yɩbhää wa -kaɲɩ -lizoku ˈwlu nʋ ˈwʋ zi. Maa, -lizoku -kaɲɩ zɩˈɛ ghlɩɩ, -a kɩ dlɩ ˈwʋ nɩɩ ɔ yi zɩkö sɛ -sɛ. Sɛˈɛ Biblë paaɲɩɛ swɩ ɲɛmʋ ˈmö nɩɩ: “Lagɔ ˈa -wawʋ, a nɩ tu -gömö panɩ.” (Zwiidɩ 21) Zaa, -a kä -a -ɲɛ Zoova ˈsɔ ˈkä ˈwʋ -wʋnɩ, -lɛ a dɔˈwʋ -a -kä ˈklɩyɩyɛ ˈmö -wʋʋ, ɔ -yiɲɩ ˈwʋ yi. Maa, sɛ -a -ɲɛ Zoova ˈsɔ ˈkä bhä ˈwʋ -wʋnɩ ˈnɩ?

4, 5. Sɛɛ Zoova tulanɩɲɩ bhä ˈɔ -wawʋʋ ˈylimö ˈnɩ?

⁴ -A kä -a -ɲɛ Zoova ˈsɔ ˈkä ˈwʋ -wʋnɩ nɩɩ,  -a kä -a ˈkɩ dlɩ ˈwʋ -kä nɩɩ ɔ -waɲɩ teɲii. -A nɩ ˈpänɩɛ -ka -li a -lii ˈwuë ɔ nʋɲɩɛ ˈwlu dlɩ kɛ. Ɔ ɲɩaɲɩ dʋdʋkpäta a -ma nɛnɩɛ ˈylimö ˈn ɔ yea glʋglʋlii -ɲɛ nɩma a ki ˈwuë ˈsɔ ˈwʋ yie. Ɔ ɲɩaɲɩˈɛ lili a ki ˈwuë ˈn nɩmänɩmäɲu -wʋ -wʋä ˈwlɩlɩ. Biblë a za, -a -yiˈɛ ˈɔ ŋlɩɩ -ɲɛ ˈɔ -wʋwʋsaa a ˈki -yɩɩɛ -sɩbhä a sɛ -wʋ. -Lu a -mu kää dɛsɛ ɔ nʋä -aa za miɛ nɩɩ, ɔ yowli Zezwii Klii -ɔ -glɔɔ teɲii dlɩ ˈwʋ, ˈmö ɔ tiee mäˈä dʋdʋ ˈwʋ nzɩ ɔ ˈkä -aa ˈwuë a ˈwlumö ˈku. (Zaah 3:16) Sɛɛ ɔ kuä -aa ˈwlumö a za, mii ˈkää ˈŋlɩ -kä nzɩ -a ˈkä zɩkö -li a -lii ghlɩ.

⁵ Zoova ˈa ˈKämanɔɔ -wʋ -wʋä -mä zlɩ ˈmö -wʋɲɩ ˈKämanɩɲɔɔ Zezwii glɩnɩɛ, muu ˈkää ˈpɩwʋ a yɔlɔylʋ ˈwuë ˈyli bhɩa. ˈKämanɔɔ ˈla, dʋdʋkpäta ˈwuë ˈmö wʋ ˈkää ˈbhlɩ a bhlɩ ˈwʋ zʋa. -Wa ˈkaa ˈwʋ glɩ yi ˈkwädlɩkwädlɩnɩ ˈtɩɩglɩnɔɔ -ɲɛ ˈmäna ˈsɔ ˈmö -bhölɩnɩ. (Psaume 37:29) Sɛ Zoova tulanɩɲɩˈɛ ˈɔ -wawʋʋ ˈylimö miɛ nɩɩ, ɔ sʋlʋnɩɲɩ sɛ -a ˈkää zɩˈɛ sasɛ -bhölɩ. Ɔ yɩbhäˈɛ nɩɩ -a nɩ bhibheoo ˈyize ˈn ɔ -pʋnɩɲɩ ˈyukwli. ˈLɩlɩlɩ a dɔˈwʋ, Zoova -waɲɩ -tiamö.

6. Sɛɛ -n ˈkä bhä Zoova ˈylimö tulanɩ nɩɩ -n -wamɔ ˈnɩ?

⁶ Sɛɛ -n ˈkä ɔ Zoova ˈylimö tulanɩ nɩɩ -n -wamɔ ˈnɩ? Bhälɔɔ ˈkwädlɩ nzɩ -n ˈkä tula nɩɩ -li a -lii ɔ nʋmöä ˈwluu, -n yɩbhlɩni. Maa zɩˈɛ a nɩkpa a -bɛ ˈnɩ yɩbhlɩnii. Dɛɛ Zezwii -wʋ a-a -bhlɛ mäˈä dʋdʋ ˈwʋʋ, yɩ ˈplɩ a-a -sɩbhä ˈwʋ la. ˈYlɩ -bhlʋ ˈmö, ɔ yɛmanɩ zlalɩbhäwa kʋgbä, maa -bhlʋ a ˈyize mɔɔ sɩbhää ˈwlu ˈn yoo bhälɩɛ mö. (Lwiikö 17:12-17) -A yɩbhä -a ˈkä nɩkpɛ ˈla -ɔ bhälɩɛ Zezwii ˈsaa ɔ nɔɔ ˈwlu a za a sa ˈzʋ. Zaa, -a nɩ bhälɩ ˈkwädlɩ Zoova ˈyize.

7. Sɛɛ -a kä bhä -a ˈkä Zoova -wa ˈnɩ?

⁷ -A kä -a ˈkä Zoova ˈylimö tulanɩ nɩɩ -a -wɔɔ. Sɛˈɛ Zezwii  ˈɲɛ a-a ˈɔ ˈwʋ-bhlinɩwaa ˈdɩ nɩɩ, wa kä wa ˈkä Zoova -wa, wa ˈkɔ ˈwa dila ˈwuë yowʋ ˈɲɛ, ˈwa dlɩpäsaa ˈwuë ˈmö ˈn -mä ˈwa nʋnʋlii ˈwuë ˈmö. (Zɛlɩ Matie 22:37 ˈmö.) Sɛɛ yɩ sɛ ɔ zɛmö ˈnɩ?

8, 9. Sɛɛ -a ˈkä ɔ Zoova ˈylimö tulanɩ nɩɩ -a -wɔɔ ˈnɩ?

⁸ -A yi ɔ dlɩzɛmöfoosɛ nɩɩ, -a -wa Zoova -a? Nˈnn. ˈN -a -kä nɩɩ Zoova ˈmö -a -wa -aˈa dila ˈwuë ˈmö, -aˈa dlɩpäsaa ˈwuë ˈmö ˈn -mä -aˈa nʋnʋlii ˈmö nʋʋ, yɩ kä yɩ ˈkä -mä -aˈa -bhölɩbhölɩsaa ˈmö ˈyli ˈwlunɩ. (Matie 7:16-20) Sɛˈɛ Biblë gbää nɩɩ, ˈn -a -kä Lagɔ ˈmö -a -wa nʋʋ, -a yi ˈɔ gböö ˈklʋkpamö zʋ. Yɩ -yiɲɩ bhä kɛˈmö ˈtɛɛnɩ -a? Nˈnn. Ɛˈɛ -bhö ɲɩasɛ, maa -a -kä Zoova -waa, “-ɔ wɛlɩɩ a ˈklʋkpamözʋzwɛ, -aa dɔˈwʋ ɛˈɛɛ teɲii ˈmö ˈtɛɛ.”—Zɛlɩ 1 Zaah 5:3 ˈmö.

⁹ -A -kä Zoova ˈa gböö ˈklʋkpamö ˈzʋʋ, ˈmäna -ɲɛ ˈtɩɩglɩnɔɔ ˈsɔ ˈmö -a ˈkää -bhölɩnɩ. (Isaïe 48:17, 18) Maa ˈsaa -kaɲɩ ɔ kwänɩ nzɩ -a -ɲɛ Zoova ˈsɔ ˈkä ˈwʋ -wʋnɩ ˈnɩ?

10. ˈSaa kä ɔ ˈŋlɩ ˈn -n kä ɔ -n ˈkä Zoova ˈa wɛlɩɩ ˈcɩɛ ˈyize ˈnɩ?

¹⁰ Sɛɛ -n ˈzʋ bhä ˈn -n yi ɔ Zoova a bheyi zʋ ˈnɩ? -Mä -naˈa Biblë a ˈcɩɛcɩʋ ˈmö, -mä -n ˈcɩɛɛ -mɔ Zoova glɩnɩɛ -tiamö. Mii kää ˈŋlɩ ˈn ɔ -wawʋ -yimöä dlɩ zɛmö plɛ ˈn a yiˈɛ bhɛya zʋ. -N -ɲɔɔ ˈsɔ a bheyi ˈla, sɛ wa ganɩˈɛ -kosu ˈn wa ˈsunuˈɛ -mä, -sɩbhä ɛ -ɲɛ ˈwlʋnɩɛ. Sɛ wa -käˈɛ -kosu ganɩ ˈn wa zʋnʋˈɛ ˈyli wʋ tɩa ŋïmo a za, -sɩbhä -n kää -n ˈkä Zoova ˈa wɛlɩɩ ˈcɩɛ ˈyize, -lɛ a dɔˈwʋ, -n -ɲɔɔ ˈsɔ a bheyi yi ˈyukusɛ mö ˈyize.—Proverbes 2:1-5.

11. ˈSaa -n cɩɛɛ -mä Biblë ˈmö, sɛɛ yɩ -kamö ɔ libho ˈwlu nʋ ˈnɩ?

¹¹ Sɛɛ -n cɩɛɛ Biblë ˈyize, -n yi -lii a -bɛ ˈmö ˈnʋ -yɩ ˈkää -naˈa dlɩ kɛ zɩ. -Lii -yɩ ˈkäa zɩkö ˈyli ˈwlʋnɩ a dɔˈwʋ, Zezwii -sɛsɛnɩɛ ˈɔ ˈwʋ-bhlinɩwaa dlɩ -gömö, yɩɛ sɛ yɩ zɩ a-a ˈsɔ ˈa dila kɛ. Sɛˈɛ wa nʋ a-a nɩɩ: “-Aaa, sɛˈɛ yɩ -wʋä ˈmö zaa, nza ɔ -wʋɲɩ a-a -mä ˈyio ˈwʋ Lagɔ ˈa ˈbɔgʋʋ ˈmö a wɛlɩɩ dlɩ  -gömö -sɛsɛnɩ dɔˈwʋʋ, ˈn yɩ dɩɩɲɩ a-a dila ˈmlɩ.”—Lwiikö 24:32.

12, 13. (a) ˈSaa bhɛnɩ bhä wʋ ˈkä Lagɔ ˈa -wawʋ -a kää dlɩ zɛmö ghlɩ ˈnɩ? (b) Sɛ -a ˈkä ɔ ˈzʋ nzɩ Zoova a -wawʋ -kaɲɩ ˈkwädlɩ dlɩ zɛmö -wʋ ˈnɩ?

¹² Zezwii a ˈwʋ-bhlinɩwaa ˈnʋä lagɔwɛlɩɩ, sɛ yɩ zɩɛ ˈwa dila kɛ, -n ˈkää Biblë a ˈcɩɛcɩʋ tɛɛ, -sɩbhä yɩ zɩɛ -kamä -naˈa dlɩ kɛ ˈn yɩ -yimöä ˈmäna ˈmö päla. Mii kwänɩmö a-a ˈn -n yiɛ Zoova yɩbhlɩnɩ ˈn -n -wɔ a -sɩkaa. Zaa tɩ ˈwʋ ŋlu -wawʋ ˈla -kamö dlɩ zɛmö bhɩɛ.—Matie 24:12.

¹³ ˈN -n -kä Zoova a bheyi ˈzʋʋ, ˈtɛmanɩ teɲii ˈyli yɔwʋ nzɩ -n -ɲɔɔ ˈkä -wanɩ ˈyize. Ɔ -ɲɛ Zezwii ˈsɔ a wɛlɩɩ, -n kä -n ˈkɩ ˈcɩɛ ˈyize, -n ˈkɩ dlɩ kɛ ˈpänɩ. ˈN sɛ -n kɩɛ -mä -naˈa zɩkpaa ˈmö -gänɩ, -n ˈkä -sɩbhä sɛ tɛlɩ. (Zaah 17:3) -N -kä Biblë ˈmö zɛlɩ dɔˈwʋ -wʋ, -n -käˈɛ Biblë ˈcɩɛ dɔˈwʋ -wʋ, ˈyɩbhänɩ -naɲɩ kïbhï lɛ ˈwʋ: ‘N -wʋä dɛˈɛ ˈcɩɛ dɔˈwʋ, ˈsaa yɩ ˈcɩa bhä Lagɔ Zoova a dɛ ˈnɩ? ˈSaa kä ɔ ˈŋlɩ ˈn n kä ɔ n  ˈkɔ -wa ˈna dlɩ -ɲɛ ˈna dlɩpäsaa ˈwuë ˈsɔ ˈmö ˈnɩ?’—1 Timotee 4:15.

14. Sɛɛ bhibhebhibhiuu -kaɲɩ ɔ kwänɩ nzɩ Zoova ˈa -wawʋ -käɲɩ dlɩ zɛmö zumanɩ ˈnɩ?

¹⁴ ˈN -n -kä bheyi a -bheyi -kä, -n -ɲɔ ˈsɔ ˈdɩ a sɛɛ ˈkwädlɩ ˈn ˈa bheyi a -wʋä ˈmö ˈtumanɩɛ ˈmö. -Sɩbhä -a -kä Zoova bhibhe ˈyize, ˈn ɔ -wawʋ -kaɲɩɛ teɲii dlɩ zɛmö zumanɩ. (Zɛlɩ 1 Tesaloniikö 5:17 ˈmö.) Bhibhebhibhiuu, -lɛ -lu a -muu ˈnɩɛ -sɩbhä a sɛ -wʋ. -Aˈa dɩba -ɔ -wʋä -mä ghäyɩ ˈwʋ ˈa ˈɲɛɲɛluä. Zaa, -a kä -a ˈkɔ ˈkwädlɩ bhibhe ˈyize, -aˈa dila ˈwuë ˈmö. (Psaume 62:8) -A -kä bhibhee yii, sɛ -a ˈkää gbää, -aa -kä -a ˈkɩ dlɩ zɛmö ˈcɩɛnɩ ˈwë -a ˈkäa bhäla bhibhe. Maa sɛ -a ˈkää gbää, yɩ nɩ ˈbhöönɩ -tiamö -mä -aˈa dlɩ zɛmö. -A -kä Biblë ˈcɩɛ ˈyizee, ˈn -a ˈkɔɔ -aˈa dlɩ zɛmö a ˈsaa -wʋä -mä ˈɲɛɛ, sɛɛ -a -waa Zoova -sɩbhä yi ˈmö ˈtumanɩ.

15, 16. Sɛɛ -n yɩlɩ ɔ lagɔwɛlɩɩ bia libho ˈwʋ ˈnɩ?

¹⁵ -A -kä -a -ɲɛ Zoova ˈsɔ ˈkä ˈkwädlɩ ˈwʋ -wʋnɩ nʋʋ, sɛ -a kɔɔ dlɩ ˈwʋ a wɛlɩɩ, -a kä -a ˈkɩ -mumuë ˈɲɛ. -A ˈkä Zoova ˈa wɛlɩɩ -mumuë ˈɲɛ, yɩ -lɛ -jɔlʋ ˈkɔdʋ. (Lwiikö 1:74) Libho a -mu Zezwii ˈɲɛɛ -tiamö a Klɩtɩɛwaa ˈwuë, ˈmö wʋ glɩnɩɛ. Zaa, bhʋlʋbhlʋ -a kä -a ˈkä Lagɔ ˈa ˈKämanɔɔ a ˈtɩtɩ a -tɩtɩɩ bia. -N biamö bhä ˈtɩtɩ ˈla -a?—Matie 24:14; 28:19, 20.

¹⁶ Zezwii ˈa tietieɲɔɔ Pɔɔlʋ a ˈyila ˈklʋ a dɔˈwʋ, lagɔwɛlɩɩ biabiʋ kä a-a teɲii dɛsɛ. ˈMö ɔ la a-a “dɛsɛkäli.” (2 Kɔlɛɛtɩ 4:7) -N ˈkä nɩkpa -mumuë Zoova ˈa wɛlɩɩ ˈɲɛ ˈn ˈsaa ɔ ˈkää zɩkö nʋ a -nɩɩ, libho a -mu kää teɲii dɛsɛ -n bhɛnɩɛ -n ˈkä nʋ ˈmö wʋ glɩnɩɛ. Bʋbɔbʋbʋ a ke -mämaa. -Lɛ Zoova a ˈyila ˈklʋ a dɔˈwʋ dɛsɛ yɩ kää. (Ebleewaa 6:10) -N yi lagɔwɛlɩɩ biabiʋ -li a -lii ˈmö ghlɩnɩ ˈn yɩ yiˈɛ -muë -pʋnɩmöä ˈyukwli -li a -lii ˈwlu nʋmö. Ɛˈɛ -bhö ɲɩasɛ, maa yɩ yi ˈŋlɩ -kä -a yi Lagɔ yɔwʋ ˈdionɩ ˈn -a yi -mä ˈɔ ˈpɩwʋlelea ˈwʋ  ˈbhle ghlɩ. (Zɛlɩ 1 Kɔlɛɛtɩ 15:58 ˈmö.) -Sɩbhä a libho -mumuu -wʋ nʋä nɩkpa -li a -lii ˈwlu -bhölɩ bhä -a?

17. -Yɩ kä ɔ ˈŋlɩ ˈn -a kä ɔ -a ˈkä ˈwʋ -päpanɩsɛ lagɔwɛlɩɩ bia ˈnɩ?

¹⁷ Lagɔwɛlɩɩ bia libho, libho a -mu -a ˈkää ˈwʋ -päpanɩsɛ nʋ ˈmö wʋ glɩnɩɛ. Zaa “Lagɔ ˈa wɛlɩɩ,” “ˈsɛ yɩ ˈnɩ ˈmö -wʋ oo, sɛ yɩ -kä ˈmö wʋ oo” a nɩ bii ˈyize. (2 Timotee 4:2) Nɩkpa ˈwuë kä wa ˈkä Lagɔ ˈa ˈKämanɔɔ a wɛlɩɩ ˈnʋ. Biblë lɛ nɩɩ: “Zoova ˈa -zijle ˈkäda a zlɩ yɛ ghlɛ ˈwë!” Ɛˈɛaˈ a ˈyuku -wʋ!” ˈPɩwʋ a ˈyli bhɩɛ -zlɩ a ˈtɛɲɩ “yɛ ˈdio ˈwë!” (Sophonie 1:14; Habacuc 2:3) Zoova yi a -pa Sataa ˈa ˈpɩwʋzokwëa nɩ ˈyli bhɩa. Dɛɛ -lɛ a zlɩ ˈla ˈnɩɛ -bhlɛ ghlɛ, -a kä -a ˈkä nɩkpa ˈwuë Zoova ˈa wɛlɩɩ ˈɲɛ nzɩ wa ˈkɔˈɛ wabhlɩ bʋbɔmö.

18. -Yɩ kä ɔ ˈŋlɩ ˈn -a -ɲɛ -tiamö a Klɩtɩɛwa -mumuë ˈsɔ ˈkä ɔ Zoova ˈgämö bʋbɔnɩ ˈnɩ?

¹⁸ Zoova yɩbhä nɩɩ, -a -ɲɛ -tiamö a Klɩtɩɛwaa -mumuë ˈsɔ nɩ bʋbɔnɔɔ ˈgämö. Biblë lɛ nɩɩ: “A-a nɩ ˈzʋzʋnɩ ˈdɩ ˈmö, -a ˈkä ˈkwädlɩ -wawanɩ ˈyize, -li a -li a nʋnʋdɔˈwʋ, -a ˈkä ˈyli yɔwʋ ˈtɛɛ. -A -kä ˈkwädlɩ Lagɔ ˈa wɛlɩɩ a za ˈwlu ˈyɩbhä a nɩkpa -waa yimöaˈa, a-a nɩ tɩ wa saa ˈzʋ, maa -a ˈwuë a-a nɩ ˈyɩbhä ˈkwädlɩ ˈwlu -a ˈkä Lagɔ ˈa wɛlɩɩ a dɔˈwʋ swɩ ɲɛmʋ ˈmö ˈpäpänɩ ˈyize.” (Ebleewaa 10:24, 25) -A kä -a ˈkä ˈyli yɔwʋ ˈtɛmanɩ nzɩ -a ˈkä ˈwluyɩbhäyɩbhɩɩ ˈwuë ˈwʋ mö ˈyize. -Mä ˈwluyɩbhäyɩbhɩ ˈwʋ, -mä -a ˈpäpänɩɛ swɩ ɲɛmʋ ˈmö ˈn -a ˈtumanɩɛ -aˈa Lagɔ a dlɩtɛɛnɩtɛnɛ ˈmö.

19. ˈSaa -kaɲɩ ɔ kwänɩ nzɩ -a ˈkä -aˈa lagɔdaayuë -wa ˈnɩ?

¹⁹ -N -kä ˈwluyɩbhäyɩbhɩ ˈwʋ ˈmämö, -n yi -mä bhɛya a -bhɛya ghlɩ, -wa -kamöä kwänɩ nzɩ -n ˈkä Zoova bʋbɔ ˈyize. -N yi -mä ɲɩbhɛlɩdaayuë -ɲɛ ŋlʋdaayuë ˈsɔ ˈylɩmö -wa ˈbhöönɩɛ -gwlɩ ˈwuë -gömö, -wa ˈtɛmanɩɛ -naˈa sa ˈyli yɔwʋ ˈn wa bʋbɔɔ Zoova. Maa, -aa ˈwuë ˈɲiɲloli ˈmö a -gwälɩnɩɛ zaa, zlɩ -mɛmɛɛ ˈmö, wa -yimö -lizoku ˈwlu nʋ. Wa -kamö -lizoku ˈwlu nʋʋ, ˈtatinɩ yɩ gbʋ ˈyi. (Zɛlɩ Kɔlɔɔsɩ  3:13 ˈmö.) -Aa lagɔdaayuë ˈa nʋnʋlii -yɩ gää kɛ ˈmö -a -kä ˈyli köbhaa, yɩ -yiɲɩ ˈkwädlɩ Zoova yɔwʋ ˈdianɩ.

20, 21. ˈSaa wa la bhä “-tiamö a -bhölɩbhölɛ” ˈnɩ?

²⁰ Zoova yɩbhä nɩɩ, ɔ bhɛya ˈwuë nɩ ghlɩ -tiamö a -bhölɩbhölɛ. Biblë lɛ nɩɩ, -aˈa zɩkö a zɩkpa -a ˈkää ˈmö -bhölɩnɩ -ɲɛ zɩˈɛ a -naa ˈsɔ ˈnaa ˈkä ˈwlʋnɩ ˈlɩlɩlɩ.

²¹ Zɩkö a zɩkpa a dɔˈwʋ, ˈylʋbö a 70 ˈn 80 a ˈyize ˈmö -a ˈnaa ˈkäa mäˈä dʋdʋ ˈwʋ -sɛ, maa -a yi ˈkwädlɩkwädlɩnɩ -bhölɩ. -Mä Lagɔ ˈa “ˈpɩwʋlelea ˈwʋ,” -a yi ˈmäna ˈmö -wʋ, -a yi ˈmö nɛnɩ, ˈn -a yi ˈtɩɩglɩnɔɔ ˈmö -bhölɩnɩ. Mö Biblë laa “-tiamö a -bhölɩbhölɛ.” Zoova lɛ nɩɩ, ɔ -yiɲɩ -tiamö a -bhölɩbhölɛ ˈla ˈɲɛ, maa -a kä -a ˈkä ‘sasɛ ˈyli yɔwʋ ˈtɛmanɩ’ nzɩ -a ˈkɛ ghlɩ.—1 Timotee 6:12, 19.

22. (a) Sɛ -a ˈkä ɔ ‘sasɛ ˈyli yɔwʋ ˈtɛmanɩ’ -tiamö a -bhölɩbhölɛ a dɔˈwʋ ˈnɩ? (b) -Yɩ kä ɔ ˈŋlɩ ˈn zɩkpa -a ˈnaa ˈkää ˈyli bhɩɛ glɩnɩ bhä -lu a -mu -aa bhɛnɩ -a ˈkä -aɲɩgäsɛ ghlɩ ˈnɩ?

²² Sɛ -a ˈkä ɔ ‘sasɛ ˈyli yɔwʋ ˈtɛmanɩ’ -tiamö a -bhölɩbhölɛ a dɔˈwʋ ˈnɩ? -A kä -a ˈkä ‘-li a -li nʋ.’ (1 Timotee 6:18) Mii sɛɛ zɛmö nɩɩ, ˈsaa -a ˈcɩɛɛ -mä Biblë ˈmö, -a kä -a ˈkɩ -gänɩ. -Aa bhɛnɩ -a ˈkä -tiamö a -bhölɩbhölɛ ˈla ghlɩ -aɲɩgäsɛ ˈa ˈmötɛɛnɔɔ ˈmö. Maa ˈfʋ a ˈɲɛɲɛlu Zoova ˈɲɛɛ ˈɔ bʋbɔbʋbɔwaa -wa ˈtɛɛnɔɔ dlɩ, -wʋ tulanɩɛ ˈɔ “-wawʋ ˈkɔdʋʋ” nɩkpabhë ˈylimö, ˈmö wʋ glɩnɩɛ. (Ghlɔɔmö 5:15) -Aa dɩba -ɔ -wʋä -mä ghäyɩ ˈwʋ, ˈɲɛɲɛlu ˈla ɔ yɩbhä ɔ ˈkʋ ˈɔ bʋbɔbʋbɔwaa ˈwuë ˈɲɛ.

23. ˈSaa kä ɔ ˈŋlɩ ˈn -a kä ɔ -a ˈkä zɩˈɛ ˈsaa nɛnɩɛ Lagɔ dlɩ yɔwʋ nʋ ˈnɩ?

²³ ˈYɩbhä -naɲɩ nimï nɩɩ, ‘Sɛɛ Lagɔ yɩbhää wa nɩ bʋbɔɔ, -sɩbhä n bʋbɔ bhä -a?’ ˈN -n -kä sɛ yɩbhlɩmanɩ nɩɩ, -n kä -n ˈkä -naˈa dlɩpäsaa ˈmö zigbanɩ, tɩ bʋanɩ maa ˈzʋ -sɩbhä cuu. -A -kä Zoova dlɩ ˈtɛɛnɩ ˈn -a -kä ˈyli yɔwʋ ˈtɛmanɩ ˈn -a -kɔɔ ˈklʋkpamö ˈzʋʋ, ɔ -yiɲɩ ˈwʋ yi. Sataa ˈa ˈpɩwʋzokwëa ˈlɛ ˈmö, Lagɔ a bʋbɔbʋbɔwaa -kä yɔlɔylʋ  ˈmö -wʋ, Zoova yʋa ˈwʋ yi. ˈBhlɩ a -bhlɩɩ Zoova gbää ɔ -kaɲɩ ˈɲɛɛ, ɔ -yiɲɛ -tiamö ˈɲɛ ˈn -a yi ˈkwädlɩkwädlɩnɩ -mä -bhölɩnɩ. -N -kä ˈsaa nɛnɩɛ Lagɔ dlɩ yɔwʋ nʋʋ, -n yi -tiamö a -bhölɩbhölɛ ghlɩ!