ˈPänɩɛ -ka wɛlɩ ˈlɛ dlɩ kɛ: Zulia a -lowluwa -ɲɛ ɔ ˈbhɩa ˈsɔ -lɛ nɩɩ ɔˈɔ ˈghïli, ɔ ˈkä -bhɩɛ “-peyike.” Maa, ɔ -kä -mä ɔɲɩ pöpleyi ˈmö ˈylɩmö ˈyɩnɩɩ, ɔ dɔˈwʋ teɲii ɔ ˈghïliɛ. Ɔ nʋä: “N kä n ˈkä ˈwʋ -sɛnɩ ˈtikïyie ˈwʋ.”

ˈYlɩya nɩ ˈmö, Zulia yɩbhä ɔ ˈkä “ˈwʋ -sɛnɩ” zaa, -lii ˈwuë -yɩ ˈkɔɔ kwänɩ ˈmö ɔ yɩbhää ɔ ˈkä nʋ. Ɔˈɔ ˈkä li -këë ˈylɩya ˈkä ˈplɩ...

-N -kä Zulia a saa ˈghïlii, ˈsaa -n ˈkä ɔ nʋ ˈnɩ?

-N ˈkä -naˈa kpökpaa ˈwʋ dlɩ pä ˈnɩ -bhö -lizoku. ˈŊwlɩ -ɲɛ ɲɩbhɛlɩ -mumuë ˈsɔ -waɲɩ ˈylimönanɔ a wɛlɩ Biblë bhïlaa, wa glaˈmö a nʋa -mumuë muä dɛˈɛ: Salaa, Ghlasɛlɩ, Abigayilɩ, Zɩzɛɛfʋ ˈn Daviidɩ. Ŋlɔ wa laa Abisagö, Biblë lɛ nɩɩ, “ɔ nɛnɩ a-a ˈylimö teɲii, ɔˈɔ a-a -sɩbhä a sɛ -wʋ.”—1 Rois 1:4.

Zɩˈɛ, -dɩgbö a -bɛ a dɔˈwʋ, sɛ ˈwa kpökpaa -wʋä, dɛsɛ yɩ kää teɲii. -Sɩbhä a za, waɲɩ wa lɛnɩɛ wɛlɩ ˈkädɩ ˈwʋ. Yɩlɩɛ -ka -minɩ ˈlɛ yɔwʋ:

• Wa ˈkää -lii ˈmö vɩɛ, -mä ˈdumöwʋyuë a 100 a glaˈmö, 58 pä a-a dlɩ nɩɩ ˈghïli wa ˈghïliɛ teɲii, maa ˈlɩlɩlɩ a dɔˈwʋ, 17 a ˈyize mʋa ˈghïli a-a -tiamö.

• Wa ˈkäˈɛ -lii ˈmö vɩɛ, -mä ˈŋwlɩ a 100 a glaˈmö, 45 -waa ˈkɩ ˈghïlii, pä a-a wabhlɩ dlɩ nɩɩ teɲii wa ˈghïli a-a.

• -Dɩgbö -wa yɩbhää wa ˈkä yɔwʋ yɛɛ, wa -lɛnɩ waɲɩ gu ˈkɔdʋ -bhlʋ ˈwʋ. Nɩkpɛ ˈnɩ li, ɔ -kä ɔɲɩ ŋɔmʋ ˈlɩbhaa, -sɩbhä a gu ˈla muu lɩbhɔɔ.

 ˈN -n -kä sɛ -yi nɩɩ, -sɩbhä a gu muu -wʋmöä tɛɛ dɔˈwʋ nʋʋ, -bhɛ wa -kamö kwänɩ cuu. ˈƝɛ -na -lowluwa ˈdɩ, ɛ -käˈɛ nɩkpɛ a -mɔ ˈklʋä ˈyli yɔwʋ -n kää dlɩ ˈwʋ. Biblë lɛ nɩɩ: “-Tiamö a bheyi, ˈtɛɲɩ ˈwuë ˈmö ɔ tulanɩ ˈɔ -wawʋ ˈylimö, -na -daayu a -mɔ -wʋmö zila ˈwuë ˈmö yɔwʋ, wɛlɩzoku -yimö ghlɩ -kë, ˈmö ɔ glɩnɩɛ.”—Proverbes 17:17.

ˈLɩlɩlɩ a dɔˈwʋ, -naˈa -wʋwʋsaa bhɛnɩ a ˈkä ˈŋlɩ -kä nɩkpa -kamö -yinɩ, a yiˈɛ ˈŋlɩ -kä wa -yimö gwë ˈdionɩ. Yɩlɩɛ -ka ˈKämanɩɲɔ Daviidɩ ˈa yowli Abösalɔmö a wɛlɩɩ yɔwʋ. Biblë lɛ nɩɩ:

“Ɔ sɛ a ˈylimönanɩɲɔ ˈnɩɛ -bhölɩ, -sɩbhä a za nɩkpa ˈwuë ˈɔ ŋlɩɩ wa ˈghlimanɩ a-a. [...] Ɔ dɛ -ma ˈkää ˈylimö -ɲu aˈbhë ˈnɩɛ -bhölɩ.”—2 Samuel 14:25.

Maa, ɲɛgbayu ˈla, ɔɲɩ ɔ libhï a-a ˈkɔdɔ ˈmö ˈwʋ, -lii ˈkädɩ ɔ tɛlɩ a-a sɛ, ˈn ɔ -lɛˈɛ yioɲɔ! Zaa, Biblë ˈnɩɛ ɔ ˈdɩ a dɩ -sɛ, maa ɛ lɛ nɩɩ, nɩkpɛ a -mɔ ˈzʋnɩɛ ɔ ˈbhɩa tʋ zɛmö, -ɔɔɔ -kpöö ˈwʋ -wʋ, -ɔ -lɛ ˈkulɩbhäɲɔ, -ɔ -gblɩɛ ɔ ˈbhɩa, ˈmö ɔ glɩnɩɛ.

Nza, Biblë zʋʋɲɩɛ ˈdɩ ˈmö nɩɩ:

‘-A nɩ ˈzʋ a -sɩkaa nɩkpalili.’—Kɔlɔɔsɩ 3:10.

“Sɛ -n ˈkää -naˈa kpökpa bɔlɔ wa -kamöa ˈyila ˈwʋ kwä a za-a, -sɩbhä -n nɩ tɩ dlɩ ˈwʋ ˈpä. [...] Maa -n -kä -n ˈkä nɛnɩ nʋʋ, -naˈa dlɩɩ mö -n nɩ nɛmanɩ ˈylimö.”—1 Piɛlɩ 3:3, 4.

ˈN nɩkpɛ -kä ɔɲɩ ˈwlu gïganɩ ɔ ˈkäa ˈylimö nɛnɩ a za, ɛˈɛ -bhö -lizoku, maa -naˈa -wʋwʋsaa ma-a kää teɲii dɛsɛ. -Naˈa -wʋwʋsaa -kä kɛ -gää, wa yi ˈkwädlɩ -na ˈdɩ a dɩ -sɛ. Maa, -n ˈkä -naɲɩ ˈyli ˈzʋnɩ, -n ˈkäa teɲii ˈylimö nɛnɩ, -n ˈkä ˈmö ˈtɛɛ, yɩˈɩɛ dɛsɛ -kä ˈlɩlɩlɩ! Ŋlʋyu -bhlʋ wa laa Felisia lɛ nɩɩ: “-N -kä ˈylimö nɛnɩ, ylɛ wa yɛlamöä, maa -naˈa -wʋwʋsaa -kä nɛnɩ, -n -kä -li a -lii nʋ ˈyize, -naˈa ˈsaa -n nʋ a-a, wa yi ˈkwädlɩ ˈwʋ ligbanɩ.”

-N -kä zlɩ -mɛmɛɛ ˈmö -naɲɩ ˈwʋ yɩlɩ, yɩ ˈkuanɩmö ɔ swɩ yɔwʋ -a?

-Mumuë pä waɲɩ pikulu wa ˈkä zɛlɩ, wa ghlɩˈɛ -mä -dʋtaawa, wa ˈkʋa ghlɛ, wa ˈkäa ˈylimö nɛnɩ a za. -N yɛ ɔ tɛkäsɛ -sɩbhä a -lii a nʋnwɛ ˈwʋ dlɩ ˈpä -a?

ˈN -n -käa bhɛnɩ, sɛ -n ˈkä ɔ -na a ˈzʋ, -n ˈkäa ˈylimö nɛnɩ a za ˈnɩ? (-Sɛ -lɛ -Lii -n ˈkää nʋ.)

• ˈYILA

• MLEA

• ƝUKWËA

• KPÖKPA

• ˈYIKAKPÏKPÏ

• SƐ -NAˈA KU -WƲÄ

Nn -n -kä nʋ, tɛkädɔˈwʋ a nimïyɩbhäkïbhï ˈsɔ -kpɔ a dɔˈwʋ, nimïyɩbhäkïbhëa tana a dɔˈwʋ, -lii a ki ta, yɩ -käˈɛ -gömö -kä, ˈmö -n -kä -ziple ˈmö ˈzʋ, yɩlɩɛ -ka -minɩ ˈlɛ yɔwʋ: Sɛɛ -n yɩlɩɛ -na a daˈa käbösɛ -naɲɩ ˈwʋ, -mumuë -nɩmöä-sɩbhä ˈwʋ yɩlɩ. Zaa, -naˈa kpökpa a za dlɩ nɩ -tɩmö libho, -tɩˈɛ -lii -mimii aˈbhë nʋ.—1 Samuel 16:7.