ˈPänɩɛ -ka wɛlɩ ˈlɛ dlɩ kɛ: -Lɛ a ˈcwɩ ˈsɔ dɛˈɛ ˈn Ivɛtɩ -ɲɛ Zaah ˈsɔ -bhlinɩɛ ˈwʋ. Maa Ivɛtɩ a dɔˈwʋ ɛ ˈkä -bhɩɛ nɩɩ, ɔ -yi a-a Zaah -lɛ yɛ ˈmö gwälɛ. Zila ˈwuë ˈmo, wa ˈcɛlɩcɛlɩnɩ ˈwʋ -mä -ŋöŋöyukwli ˈmö, wa -kä wäzɩwäzɩnɩ, wa sɛ ˈgïle a -bɛ, ˈn wa -kä bhïla dɔˈwʋ -wʋ, sɛ -mɔˈla nʋä ɔ ˈkä gbää, mɔˈla -yii ˈkɩ. Maa -sɩkaa a dɔˈwʋ, Zaah yɩbhä nɩɩ, wa nɩ -bhɛ käbölii.

ˈCwɩ ˈsɔ -kpɔ -yɩ ˈplɩɛ dɛˈɛ ˈmö, Ivɛtɩ -ɲɛ Zaah ˈsɔ, wa -kä nɛmö dɔˈwʋ -wʋ, sɛ wa -käkänɩɛ ˈn zila -mimii ˈmö, wa ˈɲɛɲɛnɩɛ nuë ˈwʋ. Ivɛtɩ ˈnɩɛ ˈyɩbhä nɩɩ, yɩ nɩ ghlɛ ˈyuku. Maa ɔˈɔ yɛ ˈyɩbhä nɩɩ ɔ -ɲɛ Zaah ˈsɔ ˈkä ˈylimö ˈbhööbhönɩ. Ɛˈɛ -bhö ɲɩasɛ, maa Zaah a dɔˈwʋ, ˈŋlɔ a -mɔ nɛnɩɛ ˈylimö, -ɔ -wʋä ɔ dɛ ˈmö ɔ glɩnɩɛ. ˈN ɔ -ɲɛ Zaah ˈsɔ, ˈyɩbhäyɩbhänɩ wa ˈyɩbhäyɩbhänɩɛ...’

-N -kä ˈkɔdɔ glɩnɩ ˈn -n -kä bhɛnɩ -n ˈkä bheyi -kä ˈn -nmö -käa Ivɛtɩ a ˈbhle ˈmö -wʋ, sɛ -n ˈkäa ɔ zʋ ˈnɩ?

-N -kä -mä su -vʋkwaa a ˈwlu ˈbhöö ˈn -n -kä ˈmö -buluu -naɲɩ -n ˈkää -lizoku ˈwlu nʋ. Saa -bhlʋ -kpɔ ˈla, -sɩbhä -n -kä -lɔ -wʋ nʋä: “Ŋlʋwi oo, ɲɩbhɛlʋwi oo, a nɩ -sɩɩ kɛˈmö,” -gömö panɩ, -naɲɩ -n ˈkää -lizoku ˈwʋ -lɛnɩ.—1 Tesaloniikö 4:3.

-Ɔ -kä wɛlɩ ˈlɛ ˈklʋkpamö -sɛ, ˈsaa ˈkɔ bhä ghlɩ ˈnɩ? Biblë lɛ nɩɩ: “-Ɔ -kä ɔɲɩ ŋlʋsɛtɛlɩtɛlɛ ˈmö fɩ pälanɩɩ, ˈɔ kpökpaa aˈbhë ˈmö ɔ yɛɛ daˈa ˈwʋ ˈlibhï ˈn ɔ yiɛ ɔɲɩ fɩ päla.” (1 Kɔlɛɛtɩ 6:18) Sɛ yɩ -lɛ ɔ gbëawɛlɩ ˈnɩ?

 Wa ˈkää -lii ˈmö viɛ, wa ˈyɩ ˈylɩmö nɩɩ, -dɩgbö a -bɛ, -wa -ɲɛ nɩkpɛ -ɔ ˈnɩɛ wa -lɛglɩɲɔ glɩnɩ pöä sɛ, -lii -yɩ -wʋä dɛˈɛ ˈyuku mii ˈkʋa ghlɩ.

• DLƖYLIYILE. -Dɩgbö a -bɛ -wa bhlinɩɛ -pa -ɔɔzʋkälii a nʋnwɛ mö, ligba wa ligbaa.

• Ɔ ˈNƆ A DLƖ ˈWƲ -KÄ. -Wa -kä -ɔɔzʋkälii nʋ ˈwë ˈn bhʋlʋbhlʋ wa nʋä, ‘käbönɩkpɛ -mɔ ɔ -ɲɛ pö bhä yɛ sɛ ˈnɩ?’

• SƐƐ WA -TƆNƖ A-A -LII -SƖBHÄ YƖˈƖƐ -WƲ. ˈLɩlɩlɩ a dɔˈwʋ ŋlʋyuë a -bɛ, nɩkpɛ -ɔ ˈkʋa ˈwʋ -kʋ ˈmö wa yɩbhää. Maa -ɔ tɛlɩɛ sɛ ɔ -ɲʋa ˈkä sɛpö wa ˈnɔɔ -wa. Ɲɩbhɛlɩyuë a -bɛ lɛ nɩɩ, ŋlʋyu a -mɔ ɔ -ɲɛ yɛɛ sɛpöö, ɔ ˈnɔ a-a bhäla -wa.

• Yɩ ˈwuë a ˈwlusɛnɩda: A nɩ -bhlɛ kwäkwänɩ ˈn a -kä -lɛ -wʋ, aɲɩ a yɛɛ daˈa ɲima ˈwë ˈlɩlɩlɩ. (Ghlɔɔmö 1:24) -Naˈa kpökpa teɲii a kää dɛsɛ zaa, -nn-ä -kä -n ˈka ˈfʋ -mumuë yowʋ ˈɲɛ!

ˈDɩmözʋwɛlɩ -yɩ nʋä, “Ŋlʋwi oo, ɲɩbhɛlʋwi oo, a nɩ -sɩɩ kɛˈmö,” tula nɩɩ -n bhɛnɩ ˈn ˈki ˈklʋkpamö zʋ. (1 Tesaloniikö 4:3) Maa -n -kä zɩla ghlɩ mö, -n -käˈɛ ˈŋlɔ kwää, -lɩbhä a dɔˈwʋ a bhɛnɩ a ˈkä -lɛ -wʋ. Yɩ yi ˈŋlɩ -kä -n ˈnaa ˈkä ligba -mumuë a saa, -waa -bhlɛ kwäkwänɩ ˈn wa nʋä -ɔɔzʋkälii.—Proverbes 7:22, 23; 1 Kɔlɛɛtɩ 7:⁠3.

• Nɩkpɛ a -mɔ -wamöä -tiamö -yimö ɔ -mä ˈsunɩ nzɩ -n ˈkä -lii a -mi ˈnɩɛ -na -li a -lii ˈmö -kä nʋ -a?

• Nɩkpɛ a -mɔ ˈzʋnɩmöä -tiamö ˈyli, ɔ -yimö ɔ -mä ˈsunɩ -n ˈkä -lizoku nʋ nzɩ -n -ɲɛ Lagɔ ˈkä ɲimonɩ -a?—Ebleewaa 13:4.