NIMÏYƖBHÄKÏBHË 1
-Mɔ n glɩnɩ ɔ ˈnɩ?
ˈSAA -N ˈKÄ Ɔ NƲ ˈNƖ?
ˈPänɩɛ -ka wɛlɩ ˈlɛ dlɩ kɛ: Kalɛnɩ -wʋ ˈfɛtɩ -bhlʋ ˈwʋ, ɔˈɔ -bhlɛ -mä minitie kʋgbä aˈbhë -sɛ cuu, ɔ yiɛ -mä ɔ nimï bhïlawɛlɩ ˈnʋ.
“ˈSaa -n nʋ ɔ dɛˈɛ ˈnɩ?”
Ɔ lɛ zʋ a sɛˈɛ cuu, ɔ bheyi Zesika mɔɔ, ɔ -su nʋkpälɩ ˈsɔ käˈmö, yɩ -kälɩ ˈklʋ. Ɔ -wʋ ˈkpla -bhlʋ Kalɛnɩ ˈɲɛ dɔˈwʋ n ɔ yiɛ nɩɩ: “-N ˈkä ɔ nɩɩ ˈyu n glɩnɩɛ zaa -n ˈnaa nɩmä -a?”
Kalɛnɩ yɩbhä ɔ ˈkä nimï -sɛ, maa Zesika ɔ bheyiä. Kalɛnɩ ˈnɩɛ yɩbhä nɩɩ, Zesika nɩ ɲɩɛnɔ. ˈN Zesika glɩnɩˈɛ ŋlʋyu a -mɔ möä ˈŋlɩ. ˈN ɔ -kä nʋ nɩmä dɔˈwʋ -wʋ, ɛˈɛ -bhö -kamä -lizoku. ‘N ˈkä ˈtikïyie ˈwʋ ŋli ˈyɩ cuu a za-a,’ saˈa Kalɛnɩ ˈpää dlɩ. ‘Gëji nˈn-ä nɩmä dɔˈwʋ -wʋ.’
ˈN -nmö -käa Kalɛnɩ a ˈbhle ˈmö -wʋ, sɛ -n ˈkäa ɔ zʋ ˈnɩ?
ˈPÄÄ -KA ˈTIKÏYIE ˈWƲ DLƖ!
-Sɩbhä a -lii -kamö ghlɩɩ, -n -kä -n ˈkä -lii ˈnɛɛnɩsɛ nʋʋ, -n kä -n ˈkä -mɔ -n glɩnɩɛ -tiamö -yi. Mii sɛɛ zɛmö nɩɩ, -mä -naˈa dlɩ zɛmö a dɔˈwʋ, -n -yi mɔ -n glɩnɩ ˈn ˈsaa -n kää dlɩ ˈwʋ. ˈN -n -kä -miˈla -yi, -mä -naˈa zɩkpaa ˈmö, -n yi -naɲɩ -su sɛ -yi. Maa, -n ˈnaa ˈkä -mumuë ˈyi ˈtatinɩ wa -kamö -mä ˈsunɩ -n ˈkä ˈsaa wa yɩbhää nʋ.—1 Kɔlɛɛtɩ 9:26, 27.
Sɛ -n ˈkä ɔ -lɛ a ˈmötɛɛnɔ ˈla ghlɩ ˈnɩ? ˈLɩlɩlɩ a dɔˈwʋ, nimïyɩbhäkïbhï -mʋäna -kpɔ ˈlɛ a zɛmösɛna -yimö kwänɩ.
1 ˈSAA N ˈTƐƐNƖ Ɔ ˈMÖ ˈNƖ?
-N -kä ˈsaa -n ˈtɛɛnɩɛ ˈmö -yi ˈn -naˈa dlɩpäsaa -kä nɛnɩ, -naˈbhë -n yi -naɲɩ dlɩ ˈtɛɛnɩ.
BIBLË ˈMÖ A ˈWƲPÄLƖWƐLƖƖ: Zezwii ˈa tietieɲɔɔ Pɔɔlʋ ˈcɛlɩɛ miɛ dɛˈɛ: “-Tiamö abhlɩ, nˈn-ä -kamä bhïlasɛyiɲɔ ˈkɔdɔ glɩnɩ, maa Lagɔ ˈa wɛlɩɩ ˈmö a dɔˈwʋ, n -kä bhïlaa, n -yi ˈsaa n bhïla. (2 Kɔlɛɛtɩ 11:6) Lagɔ ˈa wɛlɩɩ ɔ -yiɛ teɲii, mii kwänɔ a-a ˈn wa ˈkɔɔ -mä ˈsunɩ ɔ ˈkä -lizoku nʋʋ, ˈn ɔ sɛɛ nimï ˈyize. ˈWa wɛlɩzoku wa bhïlanɔ a-a ˈnɔɔ swɩ yɔwʋ kuanɩ.—2 Kɔlɛɛtɩ 10:10; 11:5.
VƖƐ -NAƝƖ ˈMÖ: ˈSaa -n -yiɛ teɲii nʋ sɛ ɛ -käˈɛ -naˈa slɛlɛ -n kää, ˈcɛli dɛˈɛ zɛmö.
Sɛ -n -wʋä, bhïla -ka yɩ wɛlɩ. (-N ˈzʋnɩ ɔ -lii ˈyli -a? -N nɛnɩ ɔ dlɩ zɛmö -a? Wa -yimö ɔ dlɩ ˈtɛɛnɩ -a? -N tʋ ɔ nimï -a?)
2 ˈSAA NˈN BHÄ ˈMÖ ˈTƐƐNƖ ˈNƖ?
Sɛɛ ˈgogo -wʋä a dɔˈwʋ, lɛyaa -yɩ kää ˈŋlɩ ˈn wʋ -glɛglɛnɩɛ, yɩ ˈnɩ ˈtɛɛ, do wʋ ˈkää do. Sa -bhlʋ -kpɔ ˈla, ˈsaa -nˈn-ä ˈmö ˈtɛɛnɩ, -kamö -gömö ˈkämanɩ, nɩkpɛzokwë -n ˈkää zʋ.
BIBLË ˈMÖ A ˈWƲPÄLƖWƐLƖƖ: Pɔɔlʋ -yi a-a sɛ nɩɩ, ɔˈɔ a -lii -mimii ˈmö ˈtɛɛnɩ. ˈSaa ɔ ˈcɛlɩɛ miɛ dɛˈɛ: “ˈLɩlɩlɩ a dɔˈwʋ, -mä -aa dila zɛmö, Lagɔ ˈa gböö nɛnɩɲɩ dlɩ yɔwʋ, maa -a -kä -aɲɩ ˈwʋ yɩlɩɩ, -a yi sɛ nɩɩ, käböluu -känɩɲɩɛ ˈwlumö, mö -a zʋa ˈklʋkpamö. Lagɔ ˈa gböö -yɩ nɛnɩɲɩɛ dlɩ yɔwʋʋ, ˈmö wʋ -ɲɛɛ gwɩɛ tʋ.”—Ghlɔɔmö 7:22, 23.
VƖƐ -NAƝƖ ˈMÖ: ˈSaa -n ˈnɩ bhä ˈmö ˈtɛɛnɩ -wʋɲɩ dɔˈwʋ -n ˈkä ɔ -naɲɩ ˈwʋ ˈnɛnɩ ˈnɩ?
3 ˈSAA N YƖBHÄ Ɔ N ˈKÄ NƲ ˈNƖ?
-N -kä tobi ˈmö gbälɛ, -n yi ɔ tobisuɲɔ ˈdɩ ˈɲɛ nɩɩ ɔ nɩ bibinɩ ˈwʋ -këë, ɛ ˈmö a sazɩ ˈkä -mä bhɩɛ -a? -Ɔɔˈnɛɛnɩliɛ. ˈN ˈfʋ -n ˈkää moni a -bɛ plɩ!
ˈSaa yɩ ˈcɩaɲɩ ɔ ˈnɩ? -N ˈkää nʋ, -n -kʋʋ -yii, -mä -naˈa zɩkpaa ˈmö, -n ˈnaa ˈkä ˈfʋ ˈwʋ bibinɩ. Dɛɛ -n ˈkää mö, ˈn sɛ -n ˈkää ˈzʋ -n ˈkä -mä ghlɛɛ, -n -yii.
BIBLË ˈMÖ A ˈWƲPÄLƖWƐLƖƖ: Pɔɔlʋ nʋ a-a nɩɩ: “Mää ˈna dlɩ göä ˈyii, -mä n mönɩɛ cuu, maa nˈn lɛ nimï.” (1 Kɔlɛɛtɩ 9:26) Ɔˈɔ mäˈä ˈpɩwʋ a -lii ˈyi ˈtatiɲi yɩ ˈkɔ ˈwlumö -känɩ, maa ˈyli yɔwʋ ɔ ˈtɛmanɩɛ ˈn ˈsaa ɔ gbäˈɛ ɔ ˈkä nʋ, ˈn ɔ nuä.—Filiipö 3:12-14.
VƖƐ -NAƝƖ ˈMÖ: ˈYlʋba -a ˈkää yi ˈmö, -lii a ˈki ta -n yɩbhää -n ˈkä nʋʋ, ˈcelii.
4 ˈSAA N -YI Ɔ SƐ NƖƖ N BHƐNƖ N ˈKÄ NƲ ˈNƖ?
-N -kä -mɔ -n glɩnɩɛ ˈn ˈsaa -n kää dlɩ ˈwʋ -yi, sɛ su -ɲɔnʋnɩɛ glu ˈn ˈvuu ˈkɔdʋ aˈbhë -kä yi -kë ˈn wʋ ˈnɩ bhliˈɛ, -sɩbhä -n ˈkää -wʋ.
-N ˈkää nʋʋ, -naɲɩgäsɛ -n ˈni dlɩ ˈwʋ -kä, -n ˈnaa ˈkɩ nʋ. Nɩmɛ wa laa ˈglimɛ a saa, -sɩbhä -n ˈkää ˈmö zigbonɩ, -n ˈkä -na ˈbhɩa a sa zʋ a za. Mii tula nɩɩ -n yɛ mɔɔ -n glɩnɩɛ -tiamö ˈwʋ dlʋ.
Maa, ˈsaa -n ˈkää nʋ, -naˈbhë -n -kɩɩ dlɩ -wʋ -kä nɩɩ -n yi nʋ, ˈsaa -mumuë yi nʋ aˈbhë -kë, yɩ ˈnaa ˈkä ˈŋlɩ -kä n ˈkä -mɔ -n glɩnɩɛ ˈwʋ dlʋ.
BIBLË ˈMÖ A ˈWƲPÄLƖWƐLƖƖ: Daniɛlɩ, nɩkpɛ Lagɔ bhïlanɩ a-a ˈmö, ɔ -lɛ a-a -bhlɛ ɲɛgbayu, maa “ɔ lɛ nɩɩ ɔ yi ˈkwädlɩ” Lagɔ ˈa gböö ˈklʋkpamö zʋ ˈn wa ˈkɔɔ ɔ -lowluwa aˈbhë yɔwʋ -sɛ -kë. (Daniel 1:8) Daniɛlɩ, sɛ ɔ gbä a-a -sɩbhä ɔ zʋä. -Mä ˈɔ zɩkpaa ˈmö -lii ɔ nʋ a-a nɩɩ, ɔ yi nʋ, ˈmö ɔ nʋä ˈkwädlɩ.
VƖƐ -NAƝƖ ˈMÖ: ˈSaa -n -yi ɔ sɛ nɩɩ -n bhɛnɩ -n ˈkä nʋ ˈnɩ? -N kä ɔ Lagɔ dlɩ ˈwʋ -a? ˈN -n -kɔɔ dlɩ wʋ -kä, ˈsaa kä ɔ ˈŋlɩ ˈnɩ? -Yɩ kä ɔ ˈŋlɩ ˈn -n kɩ ɔ -na a dlɩ ˈwʋ nɩɩ ɔ -bhölɩ?
-kä mii, -yɩ kä ɔ ˈŋlɩ ˈnɩ?
Yɩɛ, -paplʋ -kä yɛɛ, -fʋfʋ -kä yi cuu, ˈbulo wʋ ˈbuloo. Maa su a -mu -ɲɔnʋnɩɛ glu, ˈvuu ˈkɔdʋ -kä yi aˈbhë -kë wʋˈʋ bhli. Yɩ ˈsɔ -kpɔ a dɔˈwʋ, ˈsaa -n -ɲɛ ˈkä ɔ ˈwlʋnɩ ˈnɩ? ˈN -n -kä nɩɩ -n ˈkä su ˈla a saa -wʋʋ, ˈtɛmanɩ ˈyli yɔwʋ -n ˈkä mɔ -n glɩnɩɛ -tiamö -yi. Mii -kamöä kwänɩ -n ˈkä ˈkibhëa -a nʋä, -mɔ n glɩnɩ ɔ ˈnɩ? a zɛmösɛna ghlɩ.
