ˈPänɩɛ -ka wɛlɩ ˈlɛ dlɩ kɛ: Zoofle kä ˈylʋbö 17. ˈYlɩ -bhlʋ ˈmö, ˈdimasɩ a ˈylɩ ta a sabʋsɛ, ɔ nʋä ˈɔ libhï ˈwuë ˈwë, ɔ yɩbhä ɔ ˈkäa ˈtikïyie ˈwʋ ɔɲɩ yɔlʋ ˈylimö -sɛ. Zaa, ɔ yiɛ ˈɔ -klikpëa -a nɛnɔɔ teɲii dlɩ yɔwʋ ˈmö sɛ glɩ, ɔ yiɛ tleviziɔ ˈyi -dɩ.

Ɔ -duä ˈyi cuu, ɔ dɩba yiɛ yi, ɔ ˈwuë ˈklɛ.

ˈN -nmö -käa Zoofle a ˈbhle ˈmö -wʋ sɛ -n ˈkäa ɔ -na a ˈzʋ, wɛlɩ ˈla tɩa ˈmö ˈtɛmanɩ?

-N -ɲɛ -na -lowluwa ˈkä bhïla, sɛɛ tobi a -suswee -wʋä, -sɩbhä ma-a. -N -kä ˈyio bhli dɔˈwʋ, -n -kä ˈylɩmö nɩɩ, wa ˈkʋ gbaa, -n bhɛnɩ -n ˈkä käböbɛyɩ ˈwʋ ˈtʋä mö.

 ˈWƲPÄLƖWƐLƖ:

Sɛˈɛ ŋlʋyu -bhlʋ wa laa Leya nʋä: “N -ɲɛ na dɩba ˈkä ˈdɩ -sɛ a dɔˈwʋ, ˈmö yɩ ˈtɛɛ teɲii. Zlɩ -mɛmɛɛ ˈmö, n -ɲɔ -kä ˈdɩ -sɛ dɔˈwʋ -wʋ, ˈtikïyie ˈwʋ cuu ˈn ɔ nʋä, ‘-na -kɔfanɩɛ maa -amö -n -ɲɛ bhïla ɔ -a?’”

-A BHƐNƖ -A ˈKÄ ˈDƖMÖZƲWƐLƖ A ˈKI TA LEYA ˈƝƐ.

1. Ɔ nɩ ˈkpanɩ ɔ dɩba ˈwʋ.

   Leya ˈkpa ˈmö, nʋ nɩɩ: “Yɩɛ, -nˈn-ä ɔ sɛ -yi nɩɩ, ˈsaa n bhïla dɛˈɛ dlɩsɛ yɩ -kaa! -Pʋnɩyɩ ˈyukwli ˈnaa!”

2. Ɔ nɩ ˈnigba ɔ -ɲɛ ɔ dɩba ˈsɔ a ˈdɩsɛsʋ.

   Wɛlɩ Leya gbä a-a ɔ ˈkä ɔ dɩba ˈɲɛ, ɔ ˈtɔɲɩa ˈɲɛ.

3. Ɔ nɩ -kʋnɩ ˈtɛɲɩ a -tɛɲɩ, nzɩ ɔ ˈkäa bhäla ˈɔ wɛlɩ ɔ dɩba ˈɲɛ.

   Leya -ɲɛ ɔ dɩba ˈsɔ, wa nɩ glɩ sɛ wa ˈkä bhïla. Ɔ -käˈɛ -wa, ɔ nɩ ˈzʋ ɔ wɛlɩɩ ˈbɔgʋ ˈmö ɔ ˈkɔɲɩ yowʋ ˈɲɛ.

ˈDɩmözʋwɛlɩ a -mii -n ˈkä ɔ nɩɩ, Leya nɩ -gänɩ ˈnɩ?

YƖƐ: Leya a dɩba ˈnɔɔ sasɛ ˈyukwli -pʋnɩ aˈbhë, ɔˈɔɔ sɛɛ Leya yɛ ˈklɛ ˈpä -yi. Zaa, ɔ -kä ˈdɩmözʋwɛlɩ a TƐKÄNƖƖ -gänɩ, ˈsaa kää ˈŋlɩ ˈn ɔ kpaa ˈmö, ɔ dɩba ˈnaa ˈkɩ ˈmö ˈnʋ. Mii ˈnaa ˈkä ˈŋlɩ -kä ɔ ˈkɔ ˈyukwli -pʋnɩ. ˈN ɔ -käˈɛ -sɩbhä zʋʋ, ˈklʋkpamö ɔ kɔɔ daˈa -sɛ. (Ɛfɛɛzɩ 6:2) -Tiamö a dɔˈwʋ, kïbhëa ˈla ˈnɩɛ nɛnɩ ˈlɩlɩlɩ.

Ɔ ˈkä ˈdɩmözʋwɛlɩ a ˈSƆNƖƖ -gänɩ a dɔˈwʋ, yɩˈɩɛ ˈmö ˈtɛɛ, maa -ɔɔˈnɛɛnɩliɛ. -Yɩ kä ɔ ˈŋlɩ ˈnɩ? Ɛˈɛ -bhö ɲɩasɛ, maa Leya -kä wɛlɩ yɔwʋ -kä, ɔ -kä yɩ ˈkä ˈwlu gïganɔ nʋʋ, ɔ kä ɔ ˈkɩ ɔ dɩba ˈɲɛ, -lɛ a dɔˈwʋ ɔ -yi ˈsaa ˈplɩ ˈwʋ za, ɔ bhɛnɩ ɔ ˈkɔ kwänɩ. Maa ɔ ˈnɔ ˈdɩ ˈɲɛ, ɔ dɩba ˈnaa ˈkɔ kwänɩ.

ˈDɩmözʋwɛlɩ a TANƖƖ a dɔˈwʋ, Leya ˈnɩɛ ɔ dɩba ˈa ˈzʋzʋsaa ˈyi ˈtatinɩ nzɩ ɔ ˈkä nɩɩ ɔ ˈnaa ɲɔ ˈɔ ˈmlɩ a wɛlɩ. Maa ˈyli yɔwʋ ɔ ˈtɛmanɩɛ ˈn ɔ yoɲɩɛ käbözlɩ ˈmö ˈɲɛ. Leya -käˈɛ ɔ dɩba ˈbɔgʋ ˈwʋ ˈcɛlɩ, ɔ dlɩ yi -pɛpɛ köbhä.

ˈBɔgʋ ˈla, muu ˈkɔɔ kwänɩ, nzɩ ˈɔ ˈmlɩ a wɛlɩ ˈwuë ɔ ˈkɩ sasɛ ɔ dɩba dlɩ -gömö -sɛsɛnɩ. Ɔ dɩba -kʋʋ ˈmö zɛlɩ, ɔ yi ˈsaa Leya yɩbhää ˈmö ˈnʋ ˈn ɔ yiɛ sɛ yɩbhlɩnɩ nɩɩ, ɔ kä -tiasɛ wɛlɩ yɔwʋ. Zaa, ˈdɩmözʋwɛlɩ a tanɩɩ mii nɛnɩɛ, mii kää Leya -ɲɛ ɔ dɩba ˈsɔ a -li a -lii ˈmö. Wa ˈsɔ -kpɔ wa -kä sɛ glɩ, ˈn wa -kä bhïla, ɔ -kɔˈɛ ˈbɔgʋ ˈwʋ ˈcɛlɩɩ, sɛ Biblë nʋä nɩɩ: “Sɛ -a ˈkää ˈzʋ -a ˈkä -wanɩ, -a ˈkä swɩ ɲɛmʋ ˈmö ˈpäpänɩ, nzɩɩ -a ˈkä ˈgämö ˈyukusɛ möö, a-a nɩ tɛlɩ -sɩbhä sɛ,” ˈmö wa -gänɩɛ daˈa. —Ghlɔɔmö 14:19.

ˈDɩmözʋwɛlɩ a -mii -n ˈkä ɔ Leya ˈɲɛ yɛ ˈnɩ?

ˈDɩmözʋwɛlɩɩ a -mi –n pä bhä dlɩ ˈwʋ ˈnɩ? ˈN ˈpä ˈsaa yɩ ˈkää ˈylɩ ˈwälanɩ dlɩ ˈwʋ.

Tɩ dlʋ nɩɩ, -naˈa wɛlɩ -n -sɛnɩɛ ˈmö ˈn sɛɛ -na -lowluwa ˈnwiɛ wabhlɩ ˈmö, bhɛnɩ yɩ ˈnaa ˈkä zlɩ -mɛmɛɛ ˈmö ˈwlʋnɩ.

ˈWƲPÄLƖWƐLƖ:

-Na lowluwa -kamö nimï yɩbhä nɩɩ ˈsaa lɩbhamö ɔ ˈn dlɩ zɛmö -nɩmö ɔ zɩˈɛ nɛnɩ ˈnɩ? -N yi nɩɩ: “Ɛˈɛ -bhö -lu.”

Maa, sɛˈɛ wa ˈnwiɛ wabhlɩ: “N ˈnaɲɩɛ dlɩ ˈtɛɛnɩ zaa, nˈn-ä bhɛnɩ n ˈkaɲɩ ˈna ˈmlɩ a wɛlɩ ˈɲɛ. Na ˈbhɩa ˈmö n ˈkɩɛ ˈɲɛ.”

-N kä -kamä wɛlɩ ˈkädɩ yɔwʋ ˈn -na -lowluwa yɩbhä wa -kamö kwänɩ. Maa -n -kä nɩɩ: “Dlɩ nɩ teaɲɩ libho. Naˈbhë n -yi sɛ n ˈkä zʋ.”

• Sɛɛ -na -lowluwa ˈnwi ɔ -kamä wabhlɩ ˈmö ˈnɩ?

• Sɛ -n ˈkä ɔ -na -lowluwa ˈtɩɩ plʋnɩ ˈnɩ?