Zoova -ɔ glɩnɩɛ Lagɔ -ɔ -wʋä ˈmäna ˈmö, -ɔ yɩbhää nɩɩ, ˈligbï nɩ -wʋ ˈmäna ˈmö, ˈmö ˈtɩtɩ a -tɩtɩɩ -bhöönɩɛ ˈmö. (1 Timotee 1:11) Mɔɔ nʋä nɩɩ, ˈŋlɔ -ɲɛ ɲɩbhɛlʋ ˈsɔ nɩ kwäkwänɩ. ˈŊlɔ -ɲɛ ɲɩbhɛlʋ ˈsɔ -kä -mä ˈbhlɩlowluwa a ˈyila ˈklʋ kwäkwänɩ, wa yi -jɔlʋ ghlɩ. Ɛˈɛ -bhö ɲɩasɛ, maa -lɛ a dɔˈwʋ ˈwa yuëa yi ˈtɩɩglɩglɛ ˈmö ˈghlimanɩ. ˈŊlɔ -ɲɛ ɲɩbhɛlʋ ˈsɔ ˈkä kwäkwänɩ a dɔˈwʋ, Klɩtɩɛwaa kä wa ˈkä dɛɛ wa glɩɛ a -lɔɔ -gänɩ, wa ˈkä waɲɩ ˈbɔgʋ ˈmö ˈzʋ.​—-A zɛlɩ Lwiikö 2:1, 4, 5 ˈmö.

ˈŊlɔ -ɲɛ ɲɩbhɛlʋ ˈsɔ -kä kwäkwänɩ, sɛɛ Lagɔ yɩli ɔ ˈwʋ ˈnɩ? ˈN ˈŋlɔ -ɲɛ ɲɩbhɛlʋ ˈsɔ -kä kwäkwänɩ ˈwë, ɔˈɔɔ tɛkäsɛ aˈbhë yɩbhä wa nɩ -sɛnɩ ˈylimö. Zoova yɩbhä nɩɩ, ˈŋlɔ nɩ tɩ ɲɩbhɛlɩ sɛ tɛlɩ, ˈluwli nɩ tɩ ˈŋwlɩ sɛ tɛlɩ. (Ebleewaa 13:4) Wa -kä ˈylimö -sɛnɩ, -ɲɛnɩ ˈwʋ yɩ -bhoo teɲii. (Malaki 2:16) Maa, ŋlɔɔ -kä ɲɩbhɛlɩ sɛ tɛlɩ ˈn ˈluwlii mɔɔ -käˈɛ käböŋlɔ sɛ tɛlɩ, Klɩtɩɛwaa bhɛnɩ wa ˈkä ˈylimö -sɛnɩ. Lagɔ a ˈyila ˈklʋ a dɔˈwʋ, ɛˈɛ -bhö ˈɲiɲloli, zaa ˈluwlii bhɛnɩ ɔ ˈkä ŋlɔ -mɔmɔɔ kwä, ŋlɔ bhɛnɩˈɛ ɔ ˈkä ghlɩ -mɛmɛɛ mö.​—-A zɛlɩ Matie 19:3-6, 9 ˈmö.

Zoova -bhɛɛ ˈŋlɔ -ɲɛ ˈluwli ˈsɔ, wa ˈkä kwänɩkwänɩ a za-a. (Genèse 2:18) Ɲɩbhɛlʋ mɔɔ glɩnɩɛ ˈɔ ˈligbëa a ˈwukpëlea zaa, mɔɔ ˈkʋaa lile, ˈmöpälabanɩ, -ɲɛ gʋʋdɛ ˈsɔ ˈɲɛ. Mɔɔ ˈkʋaˈɛɛ Lagɔwɛlɩɩ ˈcɩa. Ɔ kä ɔ ˈkä ɔ ˈlɛŋlɛ -wa, ɔ ˈkä ɔɲɩ ˈmö dɔlʋ ɔ za. ˈLuwluwa -ɲɛ ˈŋwlɩ ˈsɔ kä wa ˈkä -wawanɩ, wa ˈkä ˈklʋkpamö ˈzʋzʋnɩ. ˈƝiɲloli ˈmö wa -gwälɩnɩɛ zaa, ˈluwluwa -ɲɛ wa ˈlɛŋlɛwa ˈsɔ, wɛlɩ -kʋa jijoˈwʋ yi, wa nɩ ˈtatinii ˈyi. Mii glɩnɩɛ ˈligbëa a -jɔlʋ a tɛɛnɩdɛ.​—-A zɛlɩ Ɛfɛɛzɩ 4:31, 32 ˈn Ɛfɛɛzɩ 5:22-25, 33 -ɲɛ 1 Piɛlɩ 3:7 ˈsɔ ˈmö.

ˈŊlɔ -ɲɛ ˈluwli ˈsɔ -kä ˈzwɩ zi dɔˈwʋ -wʋ, wa kä wa ˈkä waɲɩ -wanɩwanɩsɛ -su. (1 Kɔlɛɛtɩ  13:4, 5) Lagɔ ˈa wɛlɩɩ ˈnɩɛ nɩɩ, ˈŋlɔ -ɲɛ ˈluwli ˈsɔ -kä ˈzwɩ zi dɔˈwʋ -wʋ, wa nɩ -sɛnɩ ˈylimö nʋ.​—-A zɛlɩ Maakö 10:9 ˈmö.

Lagɔ yɩbhä nɩɩ, a nɩ -wʋ ˈmäna ˈmö. Ɔ zʋaɲɩ ˈdɩ a dɩ ˈmö, -yɩ ˈkaɲɩɛ kwänɩ a ˈkä ˈa zɩkpaa sasɛ -su. Ɔ yɩbhä nɩɩ, a nɩ ˈnɛmanɩ a -lowluwa a saa, ˈn a nɩ ˈcɩɛ ˈsaa wa -yiɛ. (Kɔlɔɔsɩ 3:20) Zoova yɩbhäˈɛ nɩɩ, a nɩ nʋ Lagɔ -ɔ ˈwälaɲɩɛ -ɲɛ ɔ yowli ˈsɔ ˈa libhoo, -lɛ a dɔˈwʋ a yi ˈmäna ˈmö -wʋ.​—-A zɛlɩ Ecclésiaste 11:9-12:1 -ɲɛ Matie 19:13-15 ˈn Matie 21:15, 16 ˈsɔ ˈmö.

A kä a ˈkä teɲii libho nʋ, a ˈkä ˈa yuëa lile, gʋʋdɛ, -ɲɛ ˈmöpälabanɩ ˈsɔ ˈɲɛ. (1 Timotee 5:8) Maa ˈa yuëa ˈkä ˈmäna ˈmö -wʋ a dɔˈwʋ, a kä a ˈkʋa ˈcɩa, nzɩ wa ˈkä Lagɔ -wa, ˈn wa ˈkäˈɛ ˈɔ wɛlɩɩ yɩbhlɩnɩ. (Ɛfɛɛzɩ 6:4) ˈA sɛɛ a -waa Lagɔ yi ˈa yuëa a dila kɛ zɩ. ˈA ˈcɩacɩʋ -kä Biblë ˈmö ˈbhöönɩ, wʋ bhɛnɩ wʋ ˈkä ˈa yuëa ˈmö zlɔmanɩ.​—-A zɛlɩ Deutéronome 6:4-7 -ɲɛ Proverbes 22:6 ˈsɔ ˈmö.

A nɩ ˈpä ˈa yuëa swɩ ɲɛmʋ ˈmö. Wa -kä -li a -lii nʋʋ, a nɩ bhäluë. A käˈɛ a ˈkuë ˈmö zlɔmanɩ, a ˈkuë ˈsɛlɩ wa -kä -lizoku nʋ. A -kuë saˈa -su, wa ˈnaa ˈkä ˈɲiɲloli nʋ zaa, wa yi -jɔlʋ ghlɩ. (Proverbes 22:15) Maa a nɩ tuë -zɩ ˈklɛsɛ ˈn -glasɛ ˈmö zlɔmanɩ.​—-A zɛlɩ Kɔlɔɔsɩ 3:21 ˈmö.

Zoova ˈa ˈBhlɩnɩwaa ˈcɛlɩ ˈbɔgwɩɩ a -bɛ -yɩ ˈkää yuëa -ɲɛ wa -lowluwa ˈsɔ kwänɩ. Biblë ˈmö ˈa wɛlɩɩ mii cɛlɩɛ -mä ˈbɔgwɩ ˈla ˈmö.​—-A zɛlɩ Psaume 19:7, 11 ˈmö.