Lagɔ yɩbhä nɩɩ, -gwlɩ ˈwuë -gömö a nɩkpa nɩ ghlɛnɩ bhibhebhibhiu ˈmö wa ˈkɔ yɔwʋ ˈdionɩ. (Psaume 65:2) Maa ɔˈɔɔ bhibhebhibhiu ˈwuë ˈyukwli -pʋnɩ. A yɩɛ, nɩkpɛ -ɔ ziaa ɔ ˈlɛŋlɛ ˈzwɩ ˈa bhibhebhibhiu, ɔ ˈnʋä ˈyukwli -pʋnɩ. (1 Piɛlɩ 3:7) Dɛɛ Yizlaɛlɩ a -nʋa nʋä -lizoku a ˈyize, Lagɔ ˈnɩɛ ˈwa bhibhebhibhiu ˈyukwli -pʋnɩ. Yɩ -wʋ -sɩbhä maa, Lagɔ yi -wa nʋä ˈɲiɲloli ˈkädɩ ˈa bhibhebhibhiu ˈyukwli -pʋnɩ, wa -kɩɩ kɛˈmö -sɛ. -Tiamö a dɔˈwʋ, bhibhebhibhiu -jɔlʋä.​—-A zɛlɩ Isaïe 1:15 -ɲɛ Isaïe 55:7 ˈsɔ ˈmö.

A nɩ ylɛ video Bhibhebhibhiu a ki ˈwuë ˈmö Lagɔ -pʋnɩ ɔ ˈyuklwi -a?

-A -kä bhibhee, bʋbɔ -a bʋbɔɔ zaa, Zoova -ɔ ˈwälaɲɩɛ, ɔ ˈyize ˈmö -a kää -a ˈkä bhibhe. (Matie 4:10; 6:9) ˈƝiɲloli ˈmö -a -gwälɩnɩɛ zaa, -a kä -a ˈkä Zezwii a ˈŋlɩ ˈmö bhibhenɩ, mɔɔ ˈkuä -aˈa ˈɲiɲloli a za. (Zaah 14:6) Zoova ˈnɩɛ ˈyɩbhä -a ˈkä bhibhebhibhiu dlɩ zɛmö ˈcɩɛnɩ, ɔˈɔɔ ˈyɛ ˈyɩbhä nɩɩ, -a -kä bhibhe dɔˈwʋ -wʋ, -a ˈkä bhibhebhibhiu wa ˈcɛlɩɛ ˈmö zɛlɩ. Ɔ yɩbhä -a nɩ ˈɲɔ -aˈa dlɩ zɛmö a wɛlɩɩ.​—-A zɛlɩ Matie 6:7 -ɲɛ Filiipö 4:6, 7 ˈsɔ ˈmö.

-Aˈa ˈWälaɲɔɔ -pʋnɩ -aˈa dlɩ zɛmö a bhibhebhibhiu ˈyukwli. (1 Samuel 1:12, 13) Ɔ yɩbhä nɩɩ, -a nɩ bhibhe ˈkwädlɩ, ˈzɔkpɔsɛ, -kidosɛ, -a -kä lie yi, ˈn -a -kä ˈklɩ ˈyɩ dɔˈwʋ -wʋ.​—-A zɛlɩ Psaume 55:22 -ɲɛ Matie 15:36 ˈsɔ ˈmö.

-A ˈkä Lagɔ yɔwʋ ˈdionɩ, ˈmö yɩ ˈtɛɛ. Ɛˈɛ -bhö ɲɩasɛ, maa nɩkpa -waaa Lagɔ dlɩ ˈtɛɛnɩ a jijoˈwʋ -a -wʋä. Lagɔ ˈa wɛlɩɩ -yɩ nʋä nɩɩ, ɔ yi mäˈä dʋdʋ ˈwʋ ˈtɩɩglɩglɛ -lɛmö, wa gbʋ ˈniɛ ˈmö -wʋ. (2 Timotee 3:1, 4; 2 Piɛlɩ 3:3, 13) Zaa, -a -ɲɛ -aa lagɔdaayuë ˈsɔ, -a kä -a ˈkä ˈwlu ˈyɩbhä, -a ˈkä swɩ ɲɛmʋ ˈmö ˈpäpänɩ.​—-A zɛlɩ Ebleewaa 10:24, 25 ˈmö.

 -A -ɲɛ nɩkpaa -wa -waa Lagɔ ˈsɔ -kä ˈwʋ -bhlinɩ, yɩ -yiɲɩ kwänɩ -a yi Lagɔ yɔwʋ ˈdionɩ. Zoova ˈa Bhlɩnɩwaa -kä ˈwlu ˈyɩbhää, swɩ wa ˈpäpänɩɛ ɲɛmʋ ˈmö, Lagɔ a dlɩtɛɛnɩtɛnɛ a dɔˈwʋ.​—-A zɛlɩ Ghlɔɔmö 1:11, 12 ˈmö.

-A -kä ˈsaa -a ˈcɩɛɛ -mä lagɔwɛlɩɩ ˈmö dlɩ kɛ ˈpänɩɩ, -a yi Lagɔ yɔwʋ ˈdionɩ. ˈƆ nʋnʋlii, ˈɔ ˈdɩmözʋwɛlɩɩ -ɲɛ ˈɔ ˈsaa ɔ gbää ɔ ˈkä nʋ ˈsɔ, ˈsaa yɩ ˈcɩaɲɩɛ, -a nɩ ˈpɩ dlɩ ˈwʋ. -A -kä Lagɔ bhibhe, ˈn -a -kä ˈɔ -bhɛbhɛlii dlɩ kɛ ˈpänɩ, -a yo bhälɩ ˈɔ ˈnɛɛnɔɔ -ɲɛ ˈɔ -wawʋʋ ˈsɔ a za.​—-A zɛlɩ Josué 1:8 -ɲɛ Psaume 1:1-3 ˈsɔ ˈmö.

-A -kä -a ˈkä Lagɔ yɔwʋ ˈdionɩ, -a kä -a ˈkɔ dlɩ ˈtɛɛnɩ. Maa dlɩtɛɛnɩtɛnɛ sɛɛ ɲɛpɛɲɛpɛlu liɛ, -sɩbhä ɛ -wʋä. -A kä -a ˈkä ˈkwädlɩnɩ -aˈa dlɩtɛɛnɩtɛnɛ lia. Miɛ nɩɩ, ˈsaa kää ˈŋlɩ ˈn -a ˈtɛɛnɩɛ Lagɔ dlɩ, -a kä -a ˈkɩ dlɩ kɛ ˈpänɩ.​—-A zɛlɩ Matie 4:4 -ɲɛ Ebleewaa 11:1, 6 ˈsɔ ˈmö.

Nɩkpa -wa -wɔɔ, ˈmö Zoova ˈzʋnɩɛ ˈyli. Ɔ yʋa ˈwʋ gwɩ nzɩ -lu aˈbhë tɩa ˈwa dlɩtɛɛnɩtɛnɛ -ɲɛ ˈwa ˈkwädlɩnɩ a -bhölɩbhölɛ ˈsɔ ɲima. (Psaume 91:1, 2, 7-10) -Lii -yɩ -kaɲɩɛ gu ˈlɩbhä, ˈn -yɩɩɛ -aa -jɔlʋ ˈmö -kä, ɔ zʋɲɩ ˈdɩ ˈmö nɩɩ, -a nɩ tɩ nʋ. Zoova mɔɔ ˈcɩaɲɩɛ sɛɛ -a ˈkää -aˈa zɩkpaa ˈmö -susunɩ -a ˈkä -jɔlʋ ghlɩ.​—-A zɛlɩ Psaume 73:27, 28 -ɲɛ Zaakö 4:4, 8 ˈsɔ ˈmö.