Lagɔgligbï ˈwuë kä nɩkpa -wa yɩbhää wa ˈkä -tiasɛ Lagɔ bʋbɔ ˈmö. Lagɔ yiluë ˈwʋ, ɔ ˈzʋnuë ˈyli, mii -lɛ ˈtɩtɩ a -tɩtɩɩ. Maa zɩˈɛ, lagɔgligbï a ˈŋlɩ ˈmö, nɩkpa nʋ ˈɲiɲloli a -bɛ. (2 Kɔlɛɛtɩ 4:3, 4; 11:13-15) -Gwlɩ ˈwuë -gömö a ˈtɩtɩ, mii nʋä nɩɩ lagɔgligbï a -bɛ lɩbhä ˈku, wa ˈkä ˈsaa wa yɩbhää -mä politikö ˈmö klɩpaa ghlɩ a za. Wa pä dlɩ nɩɩ, ˈwa ŋëyii mɛɛ kää dɛsɛ mɛɛ zie -mumuë a -nɛ ˈwʋ, zaa -blipäsɛ wa lɩbhʋää, wa ˈkʋä ˈyli bhɩa. Wa gwɩ tʋ, ˈn wa nʋä ˈyuë tikïyia ylʋ, ɛ -käˈɛ -glasɛ oo, wa ɲʋä ˈkä sɛpö a za. ˈWa nʋnʋlii, ˈnɩɛ -wa kää -tiamö Lagɔ dlɩ ˈwʋ ˈmäna ˈwʋ -bhö!​—-A zɛlɩ Matie 24:3-5, 11, 12 ˈmö.

-Tiamö a lagɔgligbëa ˈghlimanɩ Lagɔ a ˈŋlɩ, maa ˈfʋ a lagɔgligbëa ˈmö a -nʋa, ˈwa nʋnʋlii dlɩ yɔwʋ yɩ -ɲoo. ˈSaa wa ˈcɩaa Lagɔ -ɲɛ -wa yɛɛ ˈku ˈwë ˈsɔ a dɛ, ˈnɩɛˈɛ -mä Biblë ˈmö -wʋ. Maa Zoova yɩbhä nɩɩ, nɩkpa nɩ yɩbhlɩnɩ sɛ ɔ -wʋä ˈtɩɩ.​—-A zɛlɩ Ézéchiel 18:4 -ɲɛ 1 Timotee 2:3-5 ˈsɔ ˈmö.

Lagɔgligbï -yɩ gbää nɩɩ Lagɔ yɩ -gänɩɩ, maa -yɩ -waa Sataa ˈa pɩwʋʋ ˈnɩɛ bhɛnɩ yɩ ˈkä Lagɔ ylʋ nʋ. (Zaakö 4:4) Lagɔ ˈa wɛlɩɩ ˈmö a dɔˈwʋ, ˈfʋ a lagɔgligbï mii -lɛ “-Glɔ ˈkɔdʋʋ Babilɔɔnɩ”. Nowee a ˈtɛɲɩ ˈmö, Ɲizakwë ˈkädaa lɩbhää ˈwë, -glɔɔ -wʋɲɩ ˈmö ˈfʋ a lagɔgligbëa tɛɛnɩɛ, wʋ ŋlɩɛ Babilɔɔnɩ. Lagɔ yiaˈa -pa lagɔgligbï -yɩ dulaa nɩkpa, ˈn -yɩ zuëë ˈzwɩ ˈyli bhɩa.​—-A zɛlɩ ˈKlʋkälɩwɛlɩɩ 17:1, 2, 5, 16, 17 -ɲɛ ˈKlʋkälɩwɛlɩɩ 18:8 ˈsɔ ˈmö.

ˈTɩtɩ a -tɩtɩɩ -mimii -wʋ -lɛ. Nɩkpa -wa yɩbhää wa ˈkä -tiamö Zoova yɩbhlɩnɩ, -wa -wʋä -mä bhlɩɩ ˈwuë -gömö a ˈfʋ a lagɔgligbï ˈmö, ɔ ˈnʋaa ˈwʋ dlʋ. Wɛlɩɩ ɔ ˈcɩaa nɩkpa -yɩ glɩnɩɛ gbëaa, mii -wamanuëë.​—-A zɛlɩ Michée 4:2, 5 ˈmö.

Nɩkpaa -wa -waa ˈsaa nɛnɩɛ -ɲɛ ˈsaa glɩnɩɛ -tiamö a -lii ˈsɔ, Zoova ˈzʋnuë ˈyli. Ɔ lɛ nɩɩ, wa nɩ ˈwlʋ -mä ˈfʋ a lagɔgligbï ˈmö. Nɩkpaa -wa -waa Lagɔ, nɛmönɩ ˈɔ wɛlɩɩ ˈmö, wa ˈkɔa dlɩ yɔwʋ nɛnɩ.​—-A zɛlɩ ˈKlʋkälɩwɛlɩɩ 18:4 ˈmö.

Zezwii ˈa tietiewaa a ˈtɛɲɩ ˈmö, nɩkpa -wa yɩbhää wa ˈkä -tiamö Lagɔ yɩbhlɩnɩ, wa ˈnʋä ˈtɩtɩ a -tɩtɩɩ, ˈmänasɛ wa ŋluɛ ˈwʋ. Zoova mɔɔ ˈcʋaa sɛɛ wa ˈkäaˈaa -sɩkaa ˈwa zɩkpaa ˈmö -susunɩ, mii zʋaa ˈmäna dlɩ zɛmö. Wa -yi -yɩ kä ˈŋlɩ ˈn wa -wʋä mäˈä dʋdʋ ˈwʋ, wa -yi ˈsaa wa kää dlɩ ˈwʋ. -A kä -a ˈkä wa gbapöö -gänɩ. Ɛˈɛ -bhö ɲɩasɛ, maa wa ˈnʋä ˈtɩtɩ a -tɩtɩɩ, Zoova mɔɔ käaˈaa -mä ˈwa zɩkpaa ˈmö dɛsɛ.​—-A zɛlɩ 1 Tesaloniikö 1:8, 9 -ɲɛ 1 Tesaloniikö 2:13 ˈsɔ ˈmö.

-Mä ˈɔ -tiamö a bʋbɔwaa a jijoˈwʋ, nɩkpaa -wa ˈwlʋä -mä ˈfʋ a lagɔgligbï ˈmö, ˈmö Zoova ŋluä ˈwʋ. -N -kä Zoova ˈa ˈwäzɩwɛlɩɩ ˈwʋ ŋlu, -n yi ɔ ˈtua ˈzʋ, -n yi ɔ -tiamö a bʋbɔwaa, -wa -kamöä -wa a bheyi ˈzʋ, -n yiˈɛ ˈkwädlɩnɩ -bhölɩ.​—-A zɛlɩ Maakö 10:29, 30 -ɲɛ 2 Kɔlɛɛtɩ 6:17, 18 ˈsɔ ˈmö.

Zoova yiaˈa -pa ˈfʋ a lagɔgligbï -zijle tunɩ. Wɛlɩ ˈla, ˈtɩtɩ a -tɩtɩɛ. Mii ˈkää bhlɩɩ ˈwuë -gömö a nɩkpa yɔlɔylʋ ˈmö -sɛ. ˈFʋ a lagɔgligbï ˈnaa ˈkäaˈaa nɩkpa ylʋ nʋ, yɩ ˈnaa ˈkʋaˈaa ˈylimö -sɛnɩ. -Lɛ a ˈtɛɲɩ ˈla ˈmö a nɩkpaa yi ˈwʋ -wʋnɩ, Lagɔ ˈa Bʋbɔbʋbʋ ˈmö a dɔˈwʋ.​—-A zɛlɩ ˈKlʋkälɩwɛlɩɩ 18:20, 21 -ɲɛ ˈKlʋkälɩwɛlɩɩ 21:3, 4 ˈsɔ ˈmö.