-Aˈa ˈwälaɲɔɔ, ɔ ˈnɛɛ ɔ -ziɲɩ ˈwʋ. Ɔ -waɲɩ zaa, ɔ ˈzʋnɩɲɩ ˈyli. -A ˈkä -aɲɩ -su a za ɔ -nɩɲɩɛ ˈwälaa. (Jérémie 10:23) Sɛɛ ˈyu ˈtikëyi yɩbhäˈɛ nɩɩ ɔ -lowluwaa nɩ -soo, -sɩbhä -a yɩbhää nɩɩ Lagɔ nɩ -suɲɩ. (Isaïe 48:17, 18) Biblë ˈa ˈpäpägböö -yɩ -suɲɩɛ, Lagɔ mɔɔ ɲɩaɲɩɛ.​—-A zɛlɩ 2 Timotee 3:16 ˈmö.

Zoova ˈa -lɔɔ -ɲɛ ˈɔ ˈpäpägböö ˈsɔ, mii ˈcɩaɲɩɛ sɛɛ -a ˈkää mäˈä ˈpɩwʋ ˈtɩɩ -bhölɩnɩ, ˈn ˈsaa -a ˈkää nʋ, -a ˈkä bhäla -lii -yɩ ˈnaa ˈkää ˈyli bhɩɛ ghlɩ. Lagɔ mɔɔ ˈwälaɲɩɛ zaa, mɔɔ kää ɔ -kaɲɩ -lɔɔ ˈɲɛ. -A kä -a ˈkä ˈsaa ɔ -nʋɲɩɛ ˈwlu yɩbhlɩnɩ.​—-A zɛlɩ Psaume 19:7, 11 -ɲɛ ˈKlʋkälɩwɛlɩɩ 4:11 ˈsɔ ˈmö.

Biblë ˈa päpägböö dɛsɛkäwɛlɩɛ, gbëaa yɩ glɩnɩɛ. ˈPɩwʋ a -lii, bhlʋbhlʋ yɩ kää -lɔɔ. (Deutéronome 22:8) -A kä -a ˈkä dlɩ ˈpä, -a ˈkä ˈpäpägböö ˈmö ˈnʋ, nzɩ a ˈkɩ ˈwʋ ˈlibhï a ˈkä -aɲɩ gbʋ -gömö -sɛ. (Proverbes 2:10-12) A yɩɛ, Biblë lɛ nɩɩ, Lagɔ mɔɔ ɲɩaɲɩɛ -bhölɩbhölɛ. -A -kä wɛlɩkïbhë ˈla dlɩ zɛmö ˈzʋ, a -yiɲɩ -su -mä libho ˈmö, -mä ˈligbë ˈmö, -mä lɛgä ˈmö. Yɩ kä ˈŋlɩ ˈn -a ˈzʋnɩɛ -aˈa -lii ˈwuë ˈyli, -a tɩa gbʋ ghlɩ a za.​—-A zɛlɩ Tietiewaa 17:28 ˈmö

Zezwii lɛ nɩɩ, ˈpäpägböö ˈwuë a glaˈmö, ˈsɔ mii kää teɲii dɛsɛ. Tɛkäkïbhëa ma-a sʋlʋnɩɲɩɛ -yɩɲɩ za nɩkpa -bhölɩɛ. Ɛˈɛ -bhö ɲɩasɛ, maa wa ˈkä Lagɔ yɩbhlɩnɩ, wa ˈkɔ -wa, ˈn wa ˈkä sasɛ ˈɔ libhoo nʋ a za-a. Wɛlɩkïbhë ˈla, ˈmö -a pää dlɩ ˈwʋ, ˈsaa -a -kä nʋä yi -kë. (Proverbes 3:6) Nɩkpa -wa zʋä kïbhë ˈla dlɩ  zɛmö, mʋa zʋä Lagɔ a bhɛya, wa yi ˈkwädlɩnɩ -bhölɩ, ˈn wa yi -tiamö a -jɔlʋ ghlɩ.​—-A zɛlɩ Matie 22:36-38 ˈmö.

ˈSɔnakïbhëa yi ˈŋlɩ -kä -a -ɲɛ -aa ˈbhɩa ˈsɔ yi ˈtɩɩ glɩ. (1 Kɔlɛɛtɩ 13:4-7) -A -kä kïbhë ˈla -gänɩ, sɛɛ Lagɔ -suä nɩkpa ˈwuë, -a yuë -sɩbhä -sumö.​—-A zɛlɩ Matie 7:12 -ɲɛ Matie 22:39, 40 ˈsɔ ˈmö.

Biblë ˈa ˈpäpägböö mii ˈcɩaa ˈligbë ˈmö a -nʋa nɩɩ, wa nɩ tɩ ˈylimö -dlinɩ, maa wa nɩ -wawanɩ. (Kɔlɔɔsɩ 3:12-14) Lagɔwɛlɩɩ ˈcʋa ˈgämö ˈkïbhë -mämaa -aɲɩ za -lizokuu ˈnaa ˈkʋää ghlɩ. Ɛˈɛ -bhö ɲɩasɛ, maa ˈŋlɔ -ɲɛ ɲɩbhɛlʋ ˈsɔ -kä kwäkwänɩ, wa kä wa ˈkä ˈkwädlɩnɩ yɔwʋ glɩglɩnɩ.​—-A zɛlɩ Genèse 2:24 ˈmö.

-A -kä Biblë ˈa wɛlɩɩ -gänɩ, yɩ -yiɲɩ kwänɩ -a yi -lii ˈwuë ˈmözlɔnɩsɛ nʋ, -aˈa dila zɛmö yi -pälɛpälɛ -wʋ. A yɩɛ, libhonʋwaa -wa -gänɩɛ Biblë ˈa gböö, -waaa -bi -kä, ˈn wa nʋä sasɛ libhoo, ˈmö ˈbhidɩbawa yɩbhää. (Proverbes 10:4, 26; Ebleewaa 13:18) Lagɔwɛlɩɩ mii ˈcɩaɲɩˈɛɛ nɩɩ, -a -kä lile -kä, -a -kä ˈwuali -kä, yɩ nɩ -zunɩɲɩ kɛ ˈn sɛɛ -a -wʋä Lagɔ a ˈyila ˈklʋ nɩ kä -aa dɔˈwʋ dɛsɛ yɩ ˈkä wlʋnɔ ˈwʋ zi.​—-A zɛlɩ Matie 6:24, 25, 33 -ɲɛ 1 Timotee 6:8-10 ˈsɔ ˈmö.

-A -kä Biblë ˈa ˈpäpägböö -gänɩ, -a yi ˈmö nɛnɩ ˈyize. (Proverbes 14:30; 22:24, 25) A yɩɛ, -a -kä Lagɔ ˈa -lɔɔ -wʋ -zʋɲɩɛ ˈdɩ ˈmö nɩɩ, -a nɩ tɩ nʋnɩmäwa glɩnɩ ˈklʋpkamö zʋʋ, gwi -yɩ lɩbhää nɩkpa ˈn wa ˈkuä -ɲɛ asida ˈsɔ ˈnaa -kaɲɩ ghlɩ. (Proverbes 23:20) Zoova ˈnɩɛ nɩɩ, -a nɩ tɩ nʋ ˈnɩmä, maa ɔ lɛ naa, -a -kʋʋ ˈnɩmä, -a nɩ tɩ -lɛ ˈwʋ ˈmɩɛ. (Psaume 104:15; 1 Kɔlɛɛtɩ 6:10) Lagɔ ˈa ˈpäpägböö ˈcɩaɲɩ -li a -lii. Ɛˈɛ -bhö ɲɩasɛ, maa -aˈa nʋnʋlii -ɲɛ -aˈa dlɩpäsaa ˈsɔ, ˈmö yɩ zlɔmanɩɛ ˈmö. (Psaume 119:97-100) -Tiamö a Klɩtɩɛwaa ˈkä Lagɔ ˈa ŋlɩɩ ˈghlimanɩ nza wa zʋä ˈɔ -lɔɔ ˈklʋkpamö. Maa ɛˈɛ -bhö wa ˈkä -li a -lii ghlɩ a ˈyize a za.​—-A zɛlɩ Matie 5:14-16 ˈmö.