ˈCƖƐCƖƐKÏBHË 2
-Mɔ -lɛ ɔ Lagɔ ˈnɩ?
1. ˈSaa kä ɔ ˈŋlɩ ˈn -a kä ɔ -a ˈkä Lagɔ bʋbɔ ˈnɩ?
-Tiamö a Lagɔ, mɔɔ ˈwälaa -lii ˈwuë. Ɔˈɔɔ tɛɛnɩdɛ -kä ˈn ɔ ˈnaa ˈkä ˈbhlenɩdɛ ghlɩ. (Psaume 90:2) ˈMö Biblë ˈmö a ˈtɩtɩ a -tɩtɩɩ ˈbhöönɩɛ ˈmö. (1 Timotee 1:11) Lagɔ mɔɔ ˈwälaɲɩɛ zaa, ɔ ˈyize ˈmö -a kää -a ˈkä bʋbɔ.—-A zɛlɩ ˈKlʋkälɩwɛlɩɩ 4:11 ˈmö.
2. Sɛɛ Lagɔ -wʋ ɔ ˈnɩ?
ˈWugɔmʋʋ Lagɔ glɩnɩɛ zaa, nɩkpɛ ˈnɔɔ -bhlɛ tɛkäsɛ ˈylɩmö. ˈWʋgɔmʋ ˈnɩɛ nɩkpɛ a sɛ -wʋ, wʋ ˈghïlinɔɔ zi teɲii -abhʋa -wʋä mäˈä dʋdʋ ˈwʋ a -nʋʋ ˈwʋ. (Zaah 1:18; 4:24) -Sɩbhä yɩ -wʋä ˈmö, maa -a bhɛnɩ -a ˈkä Lagɔ ˈa -wʋwʋsaa ˈylɩmö -mä ˈɔ -bhɛbhɛlii ˈmö. A yɩɛ, swibhï a ˈki a -bɛ -ɲɛ fɩfɩɩ ˈsɔ, mii tula ˈɔ -wawʋʋ -ɲɛ ˈɔ ˈnɛɛnɔɔ ˈsɔ. Dʋdʋkpäta -ɲɛ zlɩ ˈsɔ a ˈghïlinɔɔ mii sʋlʋnɩɲɩɛ ˈɔ ˈmötɛɛnɔɔ.—-A zɛlɩ Ghlɔɔmö 1:20 ˈmö.
-A -kä Biblë ˈmö zɛlɩ, Lagɔ ˈa -wʋwʋsaa a dɔˈwʋ, -a yi -lii a -bɛ ˈcɩɛ. A yɩɛ, mɛɛ ˈcɩaɲɩɛ ˈsaa Lagɔ yɩbhää -ɲɛ ˈsaa ɔˈɔɔ ˈyɩbhä ˈsɔ, sɛ ɔ -susunɩɛ nɩkpa ˈmö, ˈn sɛ ɔ zʋä mäˈä ˈpɩwʋ a -lii a kii ˈwuë ˈmö.—-A zɛlɩ Psaume 103:7-10 ˈmö.
3. Lagɔ kä ɔ ˈŋlɩ -a?
Zezwii lɛ nɩɩ: “-Aa dɩba Lagɔ -ɔ -wʋ -mä ghäyɩ ˈwʋ, nɩkpa ˈwuë nɩ ˈghlimanɩ -na ˈŋlɩ.” (Matie 6:9) Lagɔ kä bhɩzɩŋlɩ a -bɛ, maa ˈɔ -tiamö a ŋlɩɩ -bhli -bhlʋ -kpöö. Ŋlɩ ˈla kä gbɩ ˈwuë ˈmö ˈŋlɩdɩsɛ. ˈBhɛtɩgbʋ ˈmö, ˈmö wa laa Zoova—-A zɛlɩ Psaume 83:18 ˈmö.
-Mä Biblïa a -bɛ ˈmö, ŋlɩ ˈla ˈmö wa zigbanɩɛ bhɩzɩŋlɩ -Alowli -ɲɛ Lagɔ ˈsɔ ˈmö. Maa wa ˈcɛlɩɛ Biblë cuu, Zoova ŋlɩɩ mii -wʋ a-a -mä ˈwʋ a 7.000 a sɛ la. Dɛɛ Zezwii ˈcɩa nɩkpa lagɔwɛlɩɩ, ɔ sʋlʋnuë Lagɔ ˈa -tiamö a ŋlɩɩ.—-A zɛlɩ Zaah 17:26 ˈmö.
A nɩ ylɛ video Lagɔ kä ɔ ˈŋlɩ -a?
4. Zoova ˈzʋnɩɲɩ ɔ ˈyli -a?
Sɛɛ dɩba -waa ˈɔ yuëa -sɩbhä Lagɔ -waɲɩɛ, nza ɔ nʋä -lii -yɩ kää ˈkwädlɩ -aa -li a -lii ˈmö.
ˈKlɩyɩyɛ -ɛ -zuä mäˈä ˈpɩwʋ a za, -a yi ɔ nɩɩ, Lagɔ -nɩɲɩɛ ˈyli ˈzʋnɩ -a? Nɩkpaa -mumuë a dɔˈwʋ, Lagɔ mɔɔ ˈyɩaɲɩɛ ˈklɩ ɔ -kaɲɩ -mä ˈpä a za, maa -a -yi sɛ nɩɩ widɩɛ.—-A zɛlɩ Zaakö 1:13 ˈmö.
Lagɔ ˈwälaɲɩɛ, ɔ -nɩɲɩɛ ˈwlumö -sunɩ, maa -lɛ ɔ -zʋɲɩɛ. Mɩɛ nɩɩ, ˈsaa -a yɩbhää -a ˈkä nʋʋ, ˈmö -a nʋä. Lagɔ ˈa libhoo a dɔˈwʋ, ɔ -nɩɲɩɛ -glasɛ -su. Yɩ nɛnɩɲɩ ɔ dlɩ yɔwʋ -a? (Josué 24:15) Nɩkpa a -bɛ nʋ -mumuë -lizoku ˈwlu, nza ˈklɩyɩyɛ -zuä. Saˈa a -lizokuu, dlɩ yɔwʋ yɩ -ɲuä Zoova.-A zɛlɩ Genèse 6:5, 6 ˈmö.
Zoova, Lagɔ a -mɔɔ ˈzʋnɩɲɩɛ ˈyli ˈmö ɔ glɩnɩɛ. Ɔ yɩbhä nɩɩ, -a nɩ -wʋ ˈmäna ˈmö. Ɔ yiaˈa -pa ˈklɩyɩyɛ -ɲɛ -wa kää ˈŋlɩ ˈn ɛ -bhölɩɛ ˈsɔ ˈyli bhɩa. Lagɔ -yi ˈsaa kää ˈŋlɩ ˈn ɔ ˈtatinɩɛ -bhlɛ -lizokuu ˈyi ˈn yɩ ghlɩɲɩɛ. ˈCɩɛcɩɛkïbhë 8 ˈmö, -mä -a ˈkɩɛ yɩbhlɩnɩ. -A zɛlɩ 2 Piɛlɩ 2:9 -ɲɛ 2 Piɛlɩ 3:7, 13 ˈmö.
5. Sɛɛ -a ˈkä ɔ Lagɔ yɔwʋ ˈdionɩ ˈnɩ?
Zoova yɩbhä nɩɩ, -a nɩ ghlɛnɩ bhibhebhibhiuu ˈmö -a ˈkɔ yɔwʋ ˈdionɩ. Ɔ -waɲɩ bhʋlʋbhlʋ. (Psaumes 65:2; 145:18) Ɔ yɩbhä ɔ ˈkä -aˈa ˈɲiɲloli a gbʋ ˈyi ˈtatinɩ. -A -kä zlɩ -mɛmɛɛ ˈmö ˈɲiɲloli nʋʋ, sɛ -a ˈtɛmanɩɛ ˈyli yɔwʋ -a ˈkɔa dlɩ yɔwʋ nɛnɩ a za, ɔ yɩbhlɩni. ˈƝiɲlolinʋwa -a glɩnɩɛ, maa -a bhɛnɩ -a ˈkä Lagɔ yɔwʋ ˈdionɩ.—-A zɛlɩ Psaume 103:12-14 -ɲɛ Zaakö 4:8 ˈsɔ ˈmö.
Zoova mɔɔ ˈwälaɲɩɛ zaa, ɔ ˈyize mö -a kää -a ˈkä teɲii -wa. (Maakö 12:30) -A -kä Lagɔ yɩbhlɩnɩ ˈn -a -kä ˈɔ ˈsaa ɔ yɩbhää nʋʋ, -lɛ a dɔˈwʋ -a yo yɔwʋ ˈdionɩ teɲii.—-A zɛlɩ 1 Timotee 2:4 -ɲɛ 1 Zaah 5:3 ˈsɔ ˈmö.
