ˈCƖƐCƖƐKÏBHË 6
-Wa yɛɛ ˈku ˈwë yi ɔ glu ˈwlʋ -a?
1. ˈSaa -lɛ ɔ ˈtɩtɩ a -tɩtɩɩ -wa yɛɛ ˈku ˈwë a dɔˈwʋ ˈnɩ?
Ɔ bheyi Lazaa yɛ a-a ˈku ˈylɩ -mʋäna yɛ ˈplɩ ˈwë, ˈn Zezwii yiɛ -mä Zeluzalɛɛmö a yɔwʋ Betani ghlɛ. Ɔ -ɲɛ Lazaa a -dayuë ˈsɔ Maatɩ ˈn Malii, wa yiɛ -mä lesikpëa yɔwʋ mö. ˈN nɩkpa yiɛ -mä ˈwʋ yie. A yɩɛ, ˈmäna ˈkäda -a ˈlɩbhää Maatɩ -ɲɛ Malii ˈsɔ, Zezwii -sɛɛ ˈwa -dayu Lazaa glu.—-A zɛlɩ Zaah 11:21-24, 38-44 ˈmö.
Maatɩɩ -yi a-a ɔbhlɩ sɛ nɩɩ, -wa yɛɛ ˈku ˈwë yi glu ˈwlʋ. Ɔ -yi a-a sɛ nɩɩ, Zoova yi -wa yɛɛ ˈku ˈwë glu -sɛ, wa ˈkä ˈwʋ ˈsɔ mäˈä dʋdʋ ˈwʋ -bhölɩnɩ.—-A zɛlɩ Job 14:14, 15 ˈmö.
2. -Wa yɛɛ ˈku ˈwë, sɛɛ wa -wʋwʋnɩ ɔ ˈmö ˈnɩ?
Lagɔ ˈɲɛ a-a Adaa ˈdɩ: “Dʋdʋ ˈmö -n ˈbhöönɩɛ zaa, -mä dʋdʋ ˈmö -mä -n ˈkää ˈwlu sɩbhä.”—GENÈSE 3:19.
Dʋdʋ wa ˈlibhïä ˈwʋ ˈn wa yiɛ nɩkpɛ -bhɛ. (Genèse 2:7; 3:19) Nɩkpɛ ˈnɩɛ zuzukwë -kä. Nɩkpa -wa kää kpökpa, ˈmö -a glɩnɩɛ zaa, -a -kä ˈkuu, ˈyli -a bhɩɛ ˈlɩlɩlɩ. -A -kä ˈku, -aa ˈcla ˈku a ˈkumöä, zaa -aaa bhɛnɩ -a ˈkä dlɩ ˈpä. -Wa yɛɛ ˈku ˈwë ˈnɩ a -lu a sɛ -yi. Nza Lazaa ˈnɩɛ ˈkwie a -gömö a wɛlɩɩ ˈmö -sɛnɩ.—-A zɛlɩ Psaume 146:4 -ɲɛ Ecclésiaste 9:5, 6, 10 ˈsɔ ˈmö.
-Wa yɛɛ ˈku ˈwë, Lagɔ ˈpʋa ɔ -kosu ˈkɔdʋ ˈmö, wa ˈkä -mä ˈzwɩ zinɩ -a? Biblë lɛ nɩɩ, -wa yɛɛ ˈku ˈwë ˈnɩ a -lu a sɛ -yi ˈlɩlɩlɩ. Zaa -wa nʋä nɩɩ, Lagɔ sianɩ -lizokunʋwaa -mä -kosu ˈkɔdʋ ˈmo, yio wa kää. Lagɔ ˈa ŋlɩɩ ˈmö wa ɲimaa. Ɔ ˈkä nɩkpa -mä -kosu ˈmö sianɩ a wɛlɩɩ, Lagɔ aˈbhë, dlɩ yɔwʋ yɩ -ɲoo.—-A zɛlɩ Jérémie 7:31 ˈmö.
A nɩ ylɛ video Nɩkpɛ -kä ˈku ˈwë, ɔ -bhölɩnɩ ɔ käbödɛ -a?
3. -Wa yɛɛ ˈku ˈwë bhɛnɩ ɔ wa -ɲɛ -abhʋa ˈkä bhïla -a?
-Wa yɛɛ ˈku ˈwë ˈnɩɛ bhɛnɩ wa ˈkä bhïla, waˈaa -ŋö. (Psaume 115:17) Maa ˈmlɩɲuzuzukuu -mimii, -ɲɛ nɩkpa ˈsɔ bhïla, yɩ nʋä nɩɩ -wa yɛɛ ˈku ˈwë muëë. (2 Piɛlɩ 2:4) Zoova lɛ nɩɩ, -a nɩ tɩ sɛ tɛlɩ -a -ɲɛ -wa yɛɛ ˈku ˈwë ˈsɔ ˈkä bhïla.—-A zɛlɩ Deutéronome 18:10, 11 ˈmö.
4. -Mɔ Lagɔ ˈkä ɔ glu -sɛ ˈnɩ?
Nɩkpa a miniɲwɩ -wa yɛɛ ˈku ˈwë yi glu ˈwlʋ, wa ˈkä mäˈä dʋdʋ ˈwʋ -bhölɩnɩ. -Mumuë aˈbhë -waaa Lagɔ yɩbhlɩnɩ ˈn wa yiɛ -lizoku nʋʋ, yiˈɛ glu ˈwlʋmö.—-A zɛlɩ Lwiikö 23:43 -ɲɛ Tietiewaa 24:15 ˈsɔ ˈmö.
Nɩkpa -wa ˈkää glu ˈwlʋ yi lagɔwɛlɩɩ ˈcɩɛ, ˈn wa yi Zezwii ˈklʋkpamö ˈzʋ. Mii tula nɩɩ, wa kɔ dlɩ ˈwʋ. (ˈKlʋkälɩwɛlɩɩ 20:11-13) Wa glaˈmö a -nʋa -wa ˈkää -li a -lii nʋʋ, yi ˈkwädlɩnɩ mäˈä dʋdʋ ˈwʋ -bhölɩnɩ.—-A zɛlɩ Zaah 5:28, 29 ˈmö.
5. -Lii a -mii nɩkpa a glusɛsʋ ˈcɩaɲɩ ɔ Lagɔ a dɛ ˈnɩ?
Lagɔ, ɔ Yowli ɔ tiee, -ɔ ˈkuä -aa ˈɲiɲloli a ˈwlumö, ɔ bɔɔmö a za, nɩkpa yi glu ˈwlʋ. Zaa nɩkpa a glusɛsʋ tula nɩɩ, Zoova -waɲɩ ˈn ɔ ˈpä -aa ŋäzɩdlɩ. -Wa yɛɛ ˈku ˈwë -kä glu ˈwlu, -mɔ aˈbhë -n yɩbhä ɔ -na a -n ˈkä ˈylimö ˈnɩ?—-A zɛlɩ Zaah 3:16 -ɲɛ Ghlɔɔmö 6:23 ˈsɔ ˈmö.
