Siela Leɔnɩ a nɩkpɛ -bhlʋ wa laa Dauda lɛ nɩɩ: “-Mä -glɔ ˈtikëyi -bhlʋ ˈmö, -wʋ -wʋä -mä bhlɩɩ a -glɩgbë ˈwʋ -mä n ˈghlimanɩɛ.” “ˈYlɩ -bhlʋ ˈmö, dɛ n -wʋ a-a -bhlɛ ˈtikëyi ˈwʋ, ˈna -kosu yɔwʋ a -nʋa -ɲɛ -kosu -mumuu yɔwʋ a -nʋa ˈsɔ yɩɛ ˈklokwë wʋ kpɛnɩ, wa yiɛ ˈlʋ. Wa ˈkäa wɛlɩ ˈla ˈwlu -dɩ a zaa, -zliɲɔ -bhlʋ ˈmö wa wäzɩɛ. Ɔ yiɛ, pöpleyi ɔ ˈlibhïä ˈwʋ ɔ yɛɛ nɩkpɛ -bhlʋ yowʋ ˈɲɛ ˈwë, ˈn ɔ yoo lekwi ˈpɩpɛ ˈwlumö -gbli. Ɔ zoɲɩˈɛ sɛˈɛ ˈwlumö ˈwë cuu, nɩkpɛ -ɔ -wʋ a-a -mä lekwi zɛmöö, ɔ tɩtlɛnɩ, ɔ ˈwuë ˈbhubhu. Ɔ -wʋ -mä pöpleyi ˈmö yɩlɩ dɔˈwʋ, ɔ yiɛ ˈmö ˈkpa ɔ lɛ naa: ‘N yɩlɩ ɲɛkpökpa -bhlʋ ˈwʋ, ɔ -wʋ yi dɔˈwʋ! Ɔ -su -banɩɩ ˈpɩpɩ ˈmö. Ɔ ˈbhʋɔ ˈwʋ, ɔ -gɔ, ˈn ɔ -kä nɛmö dɔˈwʋ -wʋ, ˈwlu ɔ kwlinɩɛ ˈtikïyie ˈwʋ.’

“Nɩkpɛ ɔ ˈyɩɛ daˈa ˈylɩmö, na dɩba ˈkɔdɔ mɔɔ! Nɩkpɛ a -mɔ ˈwlumö ɲimoo a sɛ, ɔ yiɛ ˈmö ˈkpa, ɔ lɛ nɩɩ: ‘ˈN a ˈnɩ ˈsaa n bhïlaa dlɩ ˈwʋ -kää, aˈbhï a nɩ yi a ˈkä -mä yɩlɩ.’ Maa ŋanɔ a za, -ɔ ˈkä ɔ -mä yɩlɩ ˈnɩ? Zaa, -zliɲɔ ˈla -su a-a -mä -tɛpɛɛ ˈmö ˈɲu -wʋ kää -titii ˈmö. Ɲuu ˈla ˈmö ɔ ˈmlɩɛ nɩkpɛ ˈla ˈwʋ ˈn ɔ yiɛ vlɩɩ plɛ.

“Ɲɩkpɛ -ɔ -su a-a pöpleyi, ˈmö na ‘Dɩba ˈkɔdɔ’ ghlɛnɩɛ ˈmö n ɔ yiɛ nɩɩ, -aˈa -kosu yɔwʋ a -nʋa mʋa -kälɩɛ ˈklokwëa. Ɔ yiˈɛ na -da ˈkɔdɔ ˈdɩ ˈɲɛ nɩɩ, ɔ nɩ tɩ ŋänɩ maa ɔ bhɛnɩ ɔ ˈka glʋ. ˈN -kosu -muˈla yɔwʋ a -nʋa yiɛ ˈwʋ ŋlu. Saˈa -sɩbhä wa -dɩɛ wɛlɩɩ ˈla ˈwlu.”

 -Mä ˈbhlɩɩ a -bɛ -gömö, -sɩbhä a -lii ˈnɩɛ muënɩ. ˈN -mä -gwlɩ -mimii ˈmö, nɩkpa a miniɲwɩɩ -tɔnɩ nɩɩ, nɩkpa -kä ˈku, kudu ˈwʋ wa möä, wa ylɩɲɩ ˈwʋ, wa bhɛnɩ wa -kaɲɩ kwänɩ ˈn wa bhɛnɩˈɛ wa -kaɲɩ -lizokuu ˈwlu nʋ. -A bhɛnɩ ɔ -a ˈkä -sɩbhä a -lii dlɩ ˈwʋ -kä -a? -Wa yɛɛ ˈku ˈwë -bhölɩnɩ ɔ käbödɛ -a? Ɛ ˈnɩ -bhö -sɩbhä ma-a, -wa glɩnɩ ɔ -tiamö -wa yɛɛ ˈku ˈwë ˈa zuzuku ˈnɩ? -A ˈkä nimïyɩbhäkïbhï ˈla a zɛmösɛna -yii kä teɲii dɛsɛ, yɩ yi -aa -li a -lii ˈmö -kä.