-Aa ˈwuë, -a kä -a ˈkä -lɛ -sɛ. -A -kä ˈyɩbhää, -a yi Zoova bʋbɔ, -a -käˈɛ ˈyɩbhä Sataa -ɲɛ ˈɔ zuzkuzoku ˈsɔ ˈmö -a ˈkää bʋbɔ. -Aa bhɛnɩ -a ˈkä Zoova bʋbɔ nzɩ -a ˈkäˈɛ ˈgämö Sataa bʋbɔ. -A ˈkä Zoova bʋbɔɔ mu -lɛ ˈnɛɛnɔ a ˈyio!

ˈSaa -a ˈyɩɛ ˈylɩmö a dɔˈwʋ, zuzukuzoku ˈkä nɩkpa ˈɲiɲlolii ˈwlu nʋ ˈn yɩ ˈkʋa dula mii nɛniiɛ dlɩ yɔwʋ. Zoova ˈnɩɛ ɔbhlɩ -sɩbhä -wʋ. Sɛɛ dɩba -wa yɛ ˈɔ yuëa, -sɩbhä Zoova -waa nɩkpa ˈwuë. “-Li a -li a ˈyize mɩɩ ˈbhöönɔɔ käˈmö.” (Zaakö 1:17) Sɛ aˈbhë yɩ -kä ˈmö -wʋ -kë, -lu a -muu nɛnɩɛ, ɔ ˈnuä -zɩ nɩkpa mïna.—Ɛfɛɛzɩ 2:4-7.

Lagɔ a yowli Zezwii -wʋ a-a mäˈä dʋdʋ ˈwʋ a -lii ɔ nʋ a-a, -a nɩ ˈpäniɛ -ka dlɩ kɛ. Nɩkpa -waa wɛlɩ -kä, ɔ kä ˈŋlɩ wa yiɛ bhïla, -waa sɛ ylɩ, ɔ -dʋa ˈyila. Ɔ yɛmanɩ ˈzlalɩbhäwa, ˈn kpälɛkpälɛwa. Ɔ kpëti -mumuë zuzukuzoku -gömö ˈn ɔ yiɛ ˈlɩbhägwi a ˈki ˈwuë göpö. Ɔ yiˈɛ Lagɔ ˈa ˈmötɛɛnɔɔ ɔ ˈɲɔɔ ˈwʋ ˈlibhï ˈn ɔ yiɛ nɩkpa -wa yɛɛ ˈku ˈwë glu -sɛ.—Matie 9:32-35; 15:30, 31; Lwiikö 7:11-15.

Lagɔ -nɩɲɩɛ -zɩ yiodɩ ˈɲɛ ɔ -kaɲɩ dula a za, maa ˈɔ wɛlɩɩ ɔ sɛnɩɛ ˈmö, gbëaa a ˈyize yɩ kää ˈmö. Ɔˈɔ -zɩ nɩkpɛ dula.—Nombres 23:19.

Zaklɔdɛlɩ -kä dɛ -mämaa -wʋʋ, zɔkpoyi -kä -mä bhlinɩ, -mä ɛ mɛɛ, ɛˈɛ a bhɛnɩ ɛ ˈkä -mä ˈwlʋ ˈn ɛ -wʋ a -jie ˈmö. Sɛ -bhlʋ -kpɔ ˈla -sɩbhä nɩkpa a miniɲwɩɩ -wʋä zɩˈɛ gböö a ˈklʋkpamözʋzwɛ -ɲɛ yiodɩ ˈsɔ a -jie ˈmö. Wa kä -wa yɛɛ ˈku ˈwë a ŋanɔ kuˈmö. Wa gu zuzukuzoku. Wa gu bhätlɩnɛ, wa ŋänɩ wa tuëa gu ˈmö ˈlɩbhä a za, wa tuëa gusɛ gwa ˈn wa guˈɛ guwa. Dlɩwʋkälii -ɲɛ ˈpäpägbö ˈsɔ -yɩ ˈbhöönɩɛ zuzukuzoku a ˈkifii Sataa ˈmö, yɩ göwa wa glɩnɩɛ. Lagɔ ˈa bʋbɔbʋbɔwaa ˈnɩɛ -sɩbhä a -lii ˈla a -jie ˈmö -wʋ.

Zoova ˈtɛɛ teɲii ˈmö ɔ zi Sataa ˈwʋ. A -kä Zoova bʋbɔɔ ɔ yeaɲɩ ˈwʋ -kʋ zuzukuzoku a za. (Zaakö 4:7) Nɩkpɛ ˈnaa ˈkä guu ˈpä ɔ ˈkaɲɩ ghlɩ. A yɩɛ -ka, -mä Nizelɩa a guwa ta yɩbhä a-a wa ˈkä Zoova ˈa Bhlɩnɩɲɔ -bhlʋ gu ˈmö ˈlɩbhä ɔ ˈkä ˈku, ɔˈɔ ˈyɩbhä ɔ ˈkä -mä wa -glɔ ˈmö ˈbhöö a za. Wa yɛla -lii ˈmö, wa ˈyɩɛ ˈylɩmö nɩɩ, ˈsaa wa nʋä ˈnɩɛ ˈwʋ ˈplɩ, wa glaˈmö a -nɔɔ -bhlʋ, ŋanɔ yoo ˈlɩbhä ˈn ɔ yiɛ Zoova ˈa Bhlɩnɩɲɔɔ ˈla -mä ghlɩ, ɔ yoo ˈdɩ ˈɲɛ nɩɩ ɔ nɩ ˈpä ɔ ŋäzɩdlɩ.

ˈN zuzukuzoku kaɲɩ -gägänɩ, yɩ kaɲɩ yɔlɔa, a bhɛnɩ a ˈkä Zoova wäzɩ. A -kɔɔ wäzɩɛ yi, a nɩ -dɔɔ ˈŋlɩ, ɔ yeaɲɩ ˈwʋ -kʋ. (Proverbes 18:10) Maa a -kä nɩɩ Lagɔ ˈkaɲɩ ˈwʋ -kʋ nʋ, -lii ˈwuë -yɩ kää zuzukuzoku a ˈmötɛɛnɔɔ ˈmö -ɲɛ zuzukuzoku a bʋbɔbʋbʋ ˈsɔ, a nɩ ˈdianii aɲɩ gwë ˈlɩlɩlɩ. Bhlagɔgɔˈmö, -mä Ɛfɛɛzɩ a Lagɔ ˈa bʋbɔbʋbɔwaa, -sɩbhä wa ˈzʋ a-a. ˈWa guu a ˈbɔgwɩɩ wa ghlɛnɩ a-a ˈmö ˈn wa ˈpä a-a -damina, yɩ ˈwuë ˈwlu wa yɩbhɩɛ ˈn wa yiɛ sia. (Tietiewaa 19:19, 20) Zɩˈɛ, Lagɔ ˈa bʋbɔbʋbɔwaa, -sɩbhä wa kää wa ˈkä ˈzʋ. -Lii ˈwuë -yɩ kää zuzukuzoku a ˈmötɛɛnɔɔ ˈmö, ˈkplɔ, ˈlikpï a -suä yɩ ˈkaɲɩ “ˈwʋ -kʋ” a za, gu a -lii a bʋbɔɔ, -damina a ˈbɔgwɩɩ ˈn -lii -mimii, a nɩ -sɩɩ kɛˈmö ˈlɩlɩlɩ.

ˈN a -kä a ˈkä Lagɔ dlɩ yɔwʋ nɛnɩɩ, ˈfʋ a lagwɩ a bʋbɔbʋbʋ ˈn -lizoku a kɛˈmösɛsʋ a ˈyize ˈmö aˈa -kä a ˈkä nʋ. A nɩ -gänɩ -tiamö a bʋbɔbʋbʋ. Biblë sʋlʋnɩ sɛ a ˈkää zʋ:

Sataa -ɲɛ ˈɔ zuzukuzoku ˈsɔ kä mäˈä dʋdʋ ˈwʋ nɩkpa -wa ˈcɩa -lizoku ˈn wa nwiɛ. Maa Zoova käˈɛ ɔbhlɩ -gänɩwaa. Mʋa -lɛ Zoova ˈa Bhlɩnɩwaa muë. (Isaïe 43:10) ˈBhlɩ ˈwuë -gömö, wa bhlɩ nɩkpa a miniɲwɩɩ gbʋplʋ yɛˈmö. Wa ˈwuë ˈyli yɔwʋ wa ˈtɛmanɩɛ ˈn wa nʋä -li a -lii ˈn wa ˈcɩa nɩkpa gbëawɛlɩɩ. -Mä ˈbhlɩɩ a -bɛ -gömö, a bhɛnɩ a ˈkʋa -mä Lagɔ ˈa ˈkämanɔɔ a -bïdi ˈmö ghlɩnɩ. A -kä -mä möö, wa yeaɲɩ ˈmänasɛ päla.

ˈWa libho wa kää muä nɩɩ, wa ˈkä nɩkpa kwänɩ nzɩ wa ˈkä Lagɔ bʋbɔ. Wa -ɲɛ abhʋa yi Biblë ˈcɩɛ -mä a bɛyɩ, wa yeaɲɩ kwänɩ a yi sɛ a ˈkää sasɛ Zoova bʋbɔ yɩbhlɩnɩ. A ˈnaa ˈkä -lu ˈpɛnɩ. Zoova ˈa Bhlɩnɩwaa ˈkä nɩkpa gbëawɛlɩɩ ˈɲɛ, ˈmäna ˈwʋ yi -bhʋaa. Ɛˈɛ -bhö ɲɩasɛ, maa nɩkpa wa -waa ˈn wa -wa Lagɔ Zoova nza-a.