Sataa -ɲɛ ˈɔ zuzukuzoku ˈsɔ dula -bhlɛ nɩkpa ˈyize, maa -lɛ a ˈtɛɲɩ ˈnaa ˈkäa ˈmö gwälɛ. Zoova ki a-a -pa -mä zlɩ ˈmö kpëti ˈwë. (ˈKlʋkälɩwɛlɩɩ 12:9) Lagɔ yia -pa Sataa -ɲɛ ˈɔ zuzukuzoku ˈsɔ yɩ ˈpɛna ˈɲɛ. Zezwii a tietieɲɔ Zaah, Lagɔ -dɔɔ ˈyila, sɛ -lii ˈkää ˈmö ˈplɩplɩnɩ ɔ ˈyɩɛ ˈylɩmö, sɛ ɔ -sɩɩɛ -sɩbhä ma-a dɛˈɛ: “-Miˈla ˈplɩɛ ˈwëë, ˈn n yiˈɛɛ lagɔzuzukwë -mämaa -bhlʋ ˈylɩmö, a ˈbhöönɩ -mä ghäyɩ ˈwʋ. -Mä glu a ˈbhʋkwa ˈkädaa zuzukuzokuu glɩɛ ˈmöö, a -su a -gbëlea a laklɩ käˈmö, a -su ˈgogo ˈkɔdʋ. ˈN a yiɛ yi. A yiɛ, -gbägbamlɛ a sɛ a tɩmɛ ˈkädɛɛ, zuzukuzoku a ˈkifii Sataa -ɔ nʋ a-a tɛkänɩkpaa ylʋʋ, ˈn a yoo ˈwʋ gbulo, ˈn a yoo gogoo gwanɩ a ˈkɔ -jie ˈmö ˈpä, ɔ ˈkä -mä -wʋ -këë ˈylʋbö a milɩ -bhlʋ ˈkä ˈplɩ. -Mä ˈbhʋkwea ˈkäda ˈla ˈmö -mä a ˈpɔɔ -jie ˈmö, ˈn a yiɛ -lɛ -gba klɩklɩ. -Mä ɔ ˈkää -wʋ -këë ˈylʋbö a milɩ -bhlʋ ˈkä ˈplɩ. -Lɛ a ˈtɛɲɩ ˈla ˈmö, ɔ ˈnaa ˈkäaˈa nɩkpɛ a ˈwlumöɲimatɛɲɩ ghlɩ ˈlɩlɩlɩ. ˈYlʋbö ˈla -kä ˈplɩ ˈwëë, ˈn wa ˈkɔɔ -jie ˈmö -sɛ, ɔ ˈkä ˈylɩya ˈmö ˈɔ libho nʋnɩ.” (ˈKlʋkälɩwɛlɩɩ 20:1-3) -Miˈla -kä ˈplɩ ˈwë, ˈn wa ˈkäa bhäla Sataa -ɲɛ ˈɔ zuzukuzoku ˈsɔ ˈyli bhɩa ˈlɩlɩlɩ.—ˈKlʋkälɩwɛlɩɩ 20:10.

Nɩkpa -wa nʋä -lizoku, wa yiˈɛ wabhlɩ ˈyli bhɩɛmö ˈlɩlɩlɩ.—Psaume 37:9, 10; Lwiikö 13:5.

Sataa -ɲɛ ˈɔ zuzukuzoku ˈsɔ -kä ˈyli bhɩɛ ˈwë, Zoova yi ˈbhlɩbhëa ˈwuë -li a -lii a -bɛ ˈwlu nʋ. A yi ligba nɩɩ, nɩkpɛ -kä ˈku, ɔˈɔ a bhɛnɩ ɔ ˈkä -lu nʋ, sɛ ɔ ylɛɛ ˈlɩlɩlɩ. Zezwii, ˈkwie ˈmö ɔ kwänɩɛ yɛla a ŋämöŋämɛ yɔwʋ. Ŋämöŋämɛ a -mɛ ˈnɩɛ yɛla a ghlɛghlʋ ˈmö -kä mɛɛ. (Zaah 11:11-14) ˈFʋ ɔˈɔ -sɩbhä gbä. Maa ɔ -yi a-a sɛ nɩɩ, nɩkpa ˈwuë -wa yɛɛ ˈku ˈwë yi gɔlɔɔ, wa yi ˈwʋ ˈsɔ -bhölɩnɩ. Ɔ -lɛ nɩɩ: “ˈTɛɲɩ -bhlʋ yi ghlɛ. Ɛ -kä ghlɛɛ, ˈkuduwaa ˈwuë [...] yi glu ˈwlʋ.”—Kwänɩ Zaah 5:28, 29; -ɲɛ Tietiewaa 24:15 ˈsɔ yɔwʋ.

Mäˈä dʋdʋ ˈwʋ, wa yʋa glu -sɛ. -A ˈnaa ˈkäa ˈlɩgbʋtɩtɩɩ ˈnʋ, nɩkpa -wa ˈkuä ˈn wa yiɛ glʋ ˈwlʋ a ˈtɩtɩ a -tɩtɩɩ a ˈyize -a ˈkäa ˈnʋ. -Aa -lowluwaa -wa -kaaɲɩɛ teɲii dlɩ -sɛ -wa ˈkuä -kä -mä lesikpï ˈmö ˈwlʋ, -a yʋa ˈyio ˈwʋ mö, -a yʋa dlɩ gbönɩ. ˈMäna a ˈyize!