Lagɔzuzuku ˈwuë Lagɔ ˈwäla a-a, nɛnɩ yɩ nɛnɩ a-a. ˈN yɩ glaˈmö a -na -bhlʋ yɩɛ ˈmlɩɲumanɩ. Zuzukuzoku a ˈkifii Sataa mɔɔ. Sataa yɩbhä a-a nɩɩ, mäˈä dʋdʋ ˈwʋ a nɩkpa ˈwuë nɩ ˈbhöö Zoova nimï nzɩ wa ˈkɔ bʋbɔ. Sɛ yɩ ˈplɩɛ ˈwʋ, -sɩbhä ma-a dɛˈɛ:

-Mä Edɛɛnɩ a ˈlagblɛɛ ˈmö, tlʋ tlʋ swii -yɩɲɩ bhïï nɛnɩɛ ŋli a -bɛ -wʋ a-a -mä. Zoova yiɛ Adaa -ɲɛ ˈɔ ˈlɛŋlɛ Ɛɛvö ˈsɔ ˈdɩ ˈɲɛ nɩɩ, wa bhɛnɩ wa ˈkä swii -miˈla ˈwuë a bhï li, maa -mä ˈlagblɛɛ ˈla ˈmö a su -bhlʋ a ˈbhï, wa nɩ tii li. ˈN wa ˈkii lii, ˈku wa ˈkää ˈku klɩpaa.—Genèse 2:9, 16, 17.

ˈYlɩ -bhlʋ ˈmö, Ɛɛvö -wʋ a-a -lɛ ɔ ˈyize, ˈn tɩmɛ -ɲɔ yiɛ bhïla. ˈLɩlɩlɩ a dɔˈwʋ, tɩmɛ mɛɛ ˈnɩ a-a bhïla ˈla. Zuzukuzoku a ˈkifii Sataa mɔɔ ghlɛnɩɛ tɩmɛ ˈmö ˈn ɔ -ɲɔ yiɛ bhïla. Sɛˈɛ Sataa ˈɲɛ a-a Ɛɛvö ˈdɩ nɩɩ, subhëa wa gbä a-a ɔ tɩ li, ɔ -kaa li, sɛɛ Lagɔ ˈnɛɛ -sɩbhä ɔ ˈkää ˈnɛɛmanɩ. Ɔ yoˈɛ ˈdɩ ˈɲɛ ˈnɩɩ, ɔ ˈnaa ˈkä ˈku. -A -yi sɛ nɩɩ, yiodɩɛ. Maa Ɛɛvö, Sataa ˈmö ɔ -pʋnɩɛ ˈyukwli ˈn ɔ yiɛ subhëa li. Ɔ liɛ ˈn ɔ yiɛ Adaa ˈɲɛmö ˈn ɔ yɛˈa ɔbhlɩ limö.—Genèse 3:1-6.

Gbëawɛlɩɩ ˈlɛ mii sʋlʋnɩɲɩɛ nɩɩ, Sataa Lagɔ a ˈylimökänɩɲɔɔ ˈn ɔ -lɛˈɛ yioɲɔ. Sɛˈɛ ɔ ˈɲɛ a-a Ɛɛvö ˈdɩ nɩɩ, ɔ -kä Zoova ˈklʋkpamö -sɛɛ, ɔ ˈnaa ˈkä ˈku. Maa yio a-a la. Ɛɛvö -ɲɛ Adaa ˈsɔ ˈku wa ˈkuä. Sataa ɔbhlɩ ɔˈɔ ˈku, maa ˈɔ ˈɲiɲlolii a za, ɔ yi zɩla -sɩbhä ˈkumö. Ɔ -bhölɩ -bhlɛ zɩˈɛ, ˈn ɔ dula nɩkpa ˈyize. Ɔ glɩnɩ -bhlɛ yioɲɔ ˈyize ˈn ɔ ˈsunɩɛ ˈkwädlɩ -mä nɩkpa wa ˈkä Lagɔ ˈklʋkpamö -sɛ.—Zaah 8:44.

ˈTɛɲɩ ˈplɩɛ ˈn lagɔzuzuku -mimii yiɛ ˈmlɩɲumanɩ. Lagɔzuzukuu ˈla ˈyɩɛ ylɩmö nɩɩ, mäˈä dʋdʋ ˈwʋ a ŋwlɩ ˈylimö wa nɛnɩ a-a, wa sɛtɛlɩtʋ yuë dlɩ zɛmö plɛ. -Sɩbhä a za, yɩ yiɛ mäˈä dʋdʋ ˈwʋ yi, yɩ yiɛ nɩkpɛkpökpa ˈwʋ ˈlibhï ˈn yɩ yiɛ ˈŋwlɩ kwä. Sɛɛ Zoova ˈnɩ a-a yɩbhää -sɩbhä yɩ zʋä daˈa.—Genèse 6:1, 2; Zwiidɩ 6.

ˈWa zʋzʋsaa nʋ a-a nɩkpabhë -lizoku a -bɛ ˈwlu. Lagɔzuzukuu ˈla a ŋwlɩɩ yiɛ ˈyuë gwälɩ, maa yuëa ˈla -wʋ a-a ˈwa sɛ. ˈWʋ wa ˈbhʋɔ a-a teɲii, wa ˈmötɛɛnɔɔ ˈnɩ a-a -sɩbhä a sɛ -wʋ ˈn wa kä a-a ˈkpʋkpʋ. -Lizoku a nʋnwɛ yiɛ dʋdʋkpäta ˈwuë ˈwʋ mlɩmanɩ. Nza Zoova gbää nɩɩ, ˈɲizakwë ˈkäda ɔ ˈkää lɩbhaa nzɩ ɔ ˈkä nɩkpazoku ˈla ˈwuë ˈyli bhɩa. Nowee -ɲɛ ˈɔ ˈligbë ˈmö a -nʋa ˈsɔ, wa ˈyize mʋa ˈpʋ a-a.—Genèse 6:4, 11; 7:23.

Lagɔzuzuku -yɩ ɲumanɩ a-a ˈmlɩ, yɩˈɩɛ yɩbhlɩ ˈku maa -mä zlɩ ˈmö -mä yɩ sɩbhää ˈwlu. Yɩ ghlɛɛ -mä, Lagɔ yiɛ yɩ -lizoku yɩ nʋ a-a a ˈpɛna ˈɲɛ. Mɩɛ nɩɩ: yɩ ˈnaa ˈkäa -mä lagɔzuzuku -miˈla -yɩɩɛ yɩbhlɩ Lagɔ ˈklʋkpamö -sɛ a -zɩkpa ˈmö plɛ. Zoova ˈni a-a ˈtɛɲɩ ˈɲɛ nzɩ yɩ ˈkä nɩkpɛkpökpa ˈwʋ ˈlibhï. Lagɔ ˈa -zijle ˈkäda a zlɩ, klɩpaa yɩ yi ˈku.—2 Piɛlɩ 2:4; Zwiidɩ 6.

ˈYlʋba wa laa 1914 ˈmö, tʋ yiɛ -mä zlɩ ˈmö bhli. ˈKlʋkälɩwɛlɩɩ a ˈbɔgʋʋ sʋlʋnɩɲɩ sɛɛ yɩ ˈplɩɛ ˈwʋ: “-Miˈla ˈplɩɛ ˈwë cuu, -mä zlɩ ˈmö ˈn tʋ yiɛ -mä bhli. Lagɔzuzuku a ˈkifii Misɛɛlɩ [Zezwii Klii -ɔ ˈwlʋä glu], ɔ -ɲɛ ˈɔ zuzukuu [-yɩ nɛnɩɛ] ˈsɔ, mʋa kwää tɩmɛ ˈla [Sataa] tʋ. Ɛ -ɲɛ ˈɛ zuzukuzokuu ˈsɔ, ˈn yɩ -ɲɛ Misɛɛlɩwa yiɛ gwɩ. Maa wa gwɩɛ, Misɛɛlɩwa mʋa ˈplɩɛ tɩmɛɛ -ɲɛ ˈɛ zuzukuu ˈsɔ ˈwlu. ˈN wa yiɛ ˈdɩ ˈɲɛ nɩɩ, yɩ ˈbhle ˈnɩaˈa -mä zlɩ ˈmö -wʋ. Tɩmɛ ˈkädɛ ˈla ˈn wa yee ˈwʋ ˈlibhï, ˈn wa yee -mä zlɩ ˈmö -sɛ, ˈn wa yee mäˈä dʋdʋ ˈwʋ sɛ bhlɩ. Tɩmɛɛ -ɛ nʋ a-a tɛkänɩkpaa ylʋ ˈn wa yi a-a ˈɲiɲlolii nʋʋ, zuzukuzoku a ˈkifii Sataa -ɔ ɲimaa -gwlɩɩ ˈwlumöö, mɔɔ. Ɔ -ɲɛ ˈɔ zuzukuzokuu ˈwuë ˈsɔ, ˈmö wa bhlɩɛ mäˈä dʋdʋ ˈwʋ sɛ.”

ˈSaa ˈwlʋnɩ ɔ ˈyli ˈnɩ? Mɩɛ dɛˈɛ: “-Sɩbhä a za, zlɩ ˈmö a -nʋäɲɩ, a ˈwuë a nɩ nʋ ˈmäna.” Sataa -ɲɛ ˈɔ zuzukuzokuu ˈsɔ ˈnɩa -mä zlɩ ˈmö -wʋ zaa, lagɔzuzukuu -yɩ nɛnɩɛ, yɩ ˈwuë ˈmäna. Mäˈä dʋdʋ ˈwʋ a -nʋa ˈna? Biblë lɛ naa: “Maa abhʋa abhlɩ dʋdʋkpäta ˈwʋ a -nʋa, a -nɩɩ ˈmö yɩ ˈtɛɛ. Ɛˈɛ -bhö ɲɩasɛ, maa zuzukuzoku a ˈkifii Sataa, -mä a jijoˈwʋ -mä wa ˈpɔɔ, -mä ɔ -wʋaˈaa. Ɔ -yi sɛ nɩɩ, ˈtɛɲɩ -ɛ tʋʋa -mä Lagɔ ˈkɔ ˈyli bhɩaa, ɛˈɛaˈa -zu zaa, ɔ ˈwuë ˈklɛ, ˈn ɔ ˈkää ˈɔ libho nʋ.”—ˈKlʋkälɩwɛlɩɩ 12:7-9, 12.

Nn, Sataa -ɲɛ ˈɔ ˈmlɩɲuzuzuku ˈsɔ mii dulaa nɩkpa ˈwuë, yɩ -bhɛ ˈn -lizoku ghïluë. ˈMlɩɲuzuzuku ˈla ˈmö wa laa zuzukuzokuu. Lagɔ a -gblɩwa yɩ glɩnɩɛ. Yɩ ˈwuë ˈmlɩ yɩ ɲuä.